1. ¿Kenon timomachilia ijkuak tikasikamati ika toTajtsin mitstlasojtla?

APÓSTOL Juan okijkuilo: “Dios yejua tetlajsojtlalistli” (1 Juan 4:8). Yejuin tlajtoltin techititiaj ika itech toTajtsin ualeujtika tlasojtlalistli, ijkon ken itech ualeujtika nemilistli. Jehová techtlasojtla, niman ipampa yejuin, kuajli tomachiliaj niman tiyolpakij.

2. a) Itech tlen kijtoua Mateo 22:37-40, ¿katlejua on ome tlanauatiltin tlen más ueyi kijtosnekij? b) ¿Tleka más ouijtika tikitaj tiktlakamatiskej on ika ome tlanauatijli?

² Akin tikchiuaj ken Cristo kipiya ika titetlasojtlaskej pampa ijkon yotechnauatijkej (xpoua Mateo 22:37-40). Ijkuak kuajli tikixmatij Jehová, kanaj nion xouijtika tikitaj tiktlakamatiskej on kachtopa tlanauatijli. ¿Tleka? Pampa Jehová xkeman nopopoloua niman yejua techititia ika techtlasojtla niman ika kineki techpaleuis. San ika, kanaj ouijtika tikitaj tiktlakamatiskej on ika ome tlanauatijli. ¿Tleka? Pampa tokniuan miyekpa nopopolouaj, niman kemantika uelis kichiuaskej noso kijtoskej itlaj tlen techyolkokos. Ipampa yejuin, Jehová okichiuj ika apóstol Juan niman oksekimej itekipanojkauan makijkuilokan ipan Biblia kenon noneki titetlasojtlaskej niman tleka noneki ijkon tikchiuaskej (1 Juan 3:11, 12).

3. ¿Tlenon okiteasikamachilti Juan?

³ Ipan nochi amoxtin tlen Juan okimijkuilo, yejua nochipa okiteasikamachilti ika tinochimej akin tikchiuaj ken Cristo noneki titetlasojtlaskej. Juan melak miyekpa otlajto itech tlasojtlalistli ipan iEvangelio xijkon ken on oksekimej apóstoles  akin okimijkuilojkej on okseki Evangelios. Juan kipiaya kanaj 100 xiuitl ijkuak okijkuilo iEvangelio niman on okseki yeyi iamatlajkuiloluan. Nochi tlen okijkuilo techititia ika nochipa noneki tokojtiliskej titetlasojtlaskej (1 Juan 4:10, 11). Yejua noijki ononek nokojtilis tetlasojtlas pampa yeuejkaui xijkon kichiuaya.

4. ¿Nochipa okiteititi Juan ika tetlasojtlaya? Xkijto tleka ijkon titlanankilia.

⁴ Ijkuak Juan telpochtli katka, xmás tetlasojtlaya. Sejpatipan, Jesús iuan inomachtijkauan opanokej ipan se kalpantsin tlen onkatka Samaria pampa yayaj Jerusalén. Yejuamej kinekiyaj achijtsin noseuiskej, san ika, akin ompa chanejkej xokinejkej okinseuijkej. ¿Tlenon okichiuj Juan? Yejua okijli Jesús: “¿Tikneki para ma titlanauatikan ma tlikiaui [...] para nochimej ma tlatlakan?” (Luc. 9:52-56). Niman okse tonajli, yejua okichiuj itlaj kampa ones ika xtlanemiliaya intech oksekimej apóstoles. Yejua iuan ikniuj, Santiago, okijlikej innan makitlajtlanili Jesús ika makichiua mauejueyixtokan ijkuak iuan tlayekanaskiaj ne iluikak. Ijkuak oksekimej apóstoles okimatkej yejuin, melak okualankej (Mat. 20:20, 21, 24). Maski Juan melak onopopolo, Jesús kitlasojtlaya (Juan 21:7).

5. ¿Tlenon tikitaskej ipan yejuin tlamachtijli?

⁵ Ipan yejuin tlamachtijli, titlajtoskej itech Juan niman itech tlen okijkuilo. Noijki, tikitaskej kenon uelis tikteititiskej ika tikintlasojtlaj tokniuan. Niman tikitaskej tlenon uelis kichiuaskej akin kinyekanaj inchanejkauan niman ijkon kimititiskej infamilias ika kintlasojtlaj.

6. ¿Kenon yotechititi Jehová ika techtlasojtla?

⁶ Tla yakaj yemelak tiktlasojtlaj, xsan noneki tikijliskej ika tiktlasojtlaj, noijki noneki tikititiskej. Kema, noneki tikchiuaskej tlen kuajli ipampa (uelis tikitas Santiago 2:17). Matitlanemilikan itech yejuin, Jehová techtlasojtla (1 Juan 4:19). Niman ipan Biblia techijlia kenon melak techtlasojtla (Sal. 25:10; Rom. 8:38, 39). San ika, Jehová xsan kijtoua ika techtlasojtla, yejua noijki techititia ika techtlasojtla. Juan okijkuilo: “Dios okipantlantij ken techtlajsojtla ijkuak okuajtitlan isenteKonetsin ipan tlaltikpaktli para itechkopa iKonetsin ma tikpiyakan nemilistli para nochipa” (1 Juan 4:9). Jehová okitekauili ika isenteKonetsin matlajyoui niman mamiki topampa (Juan 3:16). Kuajli tikitaj ika Jehová yemelak techtlasojtla.

7. ¿Kenon okiteititi Jesús ika techtlasojtla?

⁷ Aman matitlanemilikan itech Jesús, yejua okimijli inomachtijkauan ika kintlasojtlaya  (Juan 13:1; 15:15). San ika, Jesús xsan okimijli ika kintlasojtlaya, yejua noijki okimititi ika yemelak kintlasojtlaya. Okichiuj tlen kuajli inpampa niman noijki topampa. Okijto ika akin melauak kintlasojtla iamigos hasta kinektika mikis inpampa (Juan 15:13). ¿Kenon uelis tikteititiskej ika tiktlasojkamatij nochi tlen Jehová niman Jesús yokichiujkej topampa?

8. ¿Tlenon technauatia 1 Juan 3:18?

⁸ Ijkuak tikchiuaj tlen Jehová niman Jesús technauatiaj, tikteititiaj ika tikintlasojtlaj (Juan 14:15; 1 Juan 5:3). Niman Jesús technauatia matikintlasojtlakan oksekimej (Juan 13:34, 35). San ika, xsan noneki tikimijliskej tokniuan ika tikintlasojtlaj, noijki noneki tikimititiskej (xpoua 1 Juan 3:18). ¿Tlenon uelis tikchiuaskej inpampa tokniuan?

9. ¿Kenon okiteititi Juan ika tetlasojtlaya?

⁹ Juan ueliskia tekitis ken michajsiketl iuan itaj niman ijkon kitlanis miyek tomin. San ika, yejua yej onokojtili tenojnotsas niman kinpaleuis oksekimej makixmatikan Jehová niman Jesús. Tlen okitlapejpeni kichiuas ouijtika katka. Okitlaueltokakej niman uejka okitsakuatoj ipan itlamiyan kachtopa siglo, ijkuak yejua melak youeuentsintiaka (Hech. 3:1; 4:1-3; 5:18; Apoc. 1:9). Maski yejua tsauktoya, okiteititi ika tlanemiliaya intech oksekimej. ¿Tleka ijkon tikijtouaj? Ijkuak tsauktoya ipan isla tlen itoka Patmos, yejua okijkuilo amoxtli Apocalipsis niman okintitlanili tlanechikoltin niman ijkon makimatikan tlenon nochiuaskia ika tlayekapan (Apoc. 1:1). Sakin, kanaj ijkuak xok tsauktoya ne Patmos, okijkuilo iEvangelio kampa otlajto itech inemilis niman itenojnotsalis Jesucristo. Noijki, okimijkuilouili tokniuan yeyi amatlajkuiloltin niman ijkon kinyolchikauas. ¿Kenon uelis tikchiuaskej ijkon ken Juan?

10. ¿Kenon uelis tikteititiskej ika tikintlasojtlaj oksekimej?

¹⁰ Niman tejuamej, ¿tlenon tiktlapejpenijtokej tikchiuaskej? Akin xkitekichiuiliaj Jehová kinekij matijkuikan totiempo niman tokojtilis niman ijkon matotomintikan niman matiuejueyixtokan. San ika, ipan nochi tlaltikpaktli nemij miyekej tokniuan akin nokojtilijtokej tenojnotsaskej niman kinpaleuiskej oksekimej makixmatikan Jehová. Sekimej tokniuan hasta nochiuaj precursores.

11. ¿Kenon kiteititiaj miyekej tokniuan ika kitlasojtlaj Jehová niman oksekimej tokniuan?

¹¹ Miyekej tokniuan noneki chikauak tekitiskej niman ijkon kinmakaskej inchanejkauan tlen kinpoloua. Maski ijkon, yejuamej nokojtiliaj kipaleuiskej ikalpan toTajtsin. Sekimej ontlapaleuiyaj kampa tlaixpoliui, oksekimej ontlapaleuiyaj kampa nochijchiuaj Kaltin kampa tosentlaliaj, niman nochimej uelis kitemakaskej tomintsin niman ijkon más manotenojnotsa. Ijkuak ijkon kichiuaj, kiteititiaj ika kitlasojtlaj toTajtsin niman oksekimej. Noijki, tikimititiaj tokniuan ika tikintlasojtlaj ijkuak tiauej tlanechikoltin maski tisiaujtokej, ijkuak titlanankiliaj maski tomojtiaj niman ijkuak tokojtiliaj tikinyolchikauaskej tokniuan ipan tlanechikojli maski tejuamej noijki tikixnamiktokej tlen ouijtika (Heb. 10:24, 25). Melak tiktlasojkamatij nochi tlen kichiuaj tokniuan.

12. ¿Kenon más okiteititi Juan ika kintlasojtlaya tokniuan?

¹² Juan okimititi tokniuan ika kintlasojtlaya pampa kimijliaya tlen kuajli kichiuayaj. San ika, xsan yejon okichiuj, yejua noijki kimijliaya ika nonekiya noyektlaliskej pampa kitaya ika kichiujtoyaj tlen xkinamikiya. Ipan  iamatlajkuiloluan okimijli tokniuan ika melak yolpakiya pampa chikauak kipiayaj intlaneltokil niman pampa nokojtiliayaj kichiuaskej tlen kuajli, san ika, noijki okimijli ika nonekiya notlajpiyaskej niman ijkon maka uetsiskej ipan tlajtlakojli (1 Juan 1:8–2:1, 13, 14). Tejuamej noijki noneki tikimijliskej tokniuan nochi tlen kuajli kichiuaj. San ika, tla tikitaj ika se tokniuj yopeuj kichiua tlen xkinamiki, uelis tikijliskej tlen kipaleuis manoyektlali. Kanaj nonekis toyolchikauaskej para tikijliskej, san ika, Biblia kijtoua ika tla yakaj melauak toamigo, tikijliskej tlen xkuajli kichiujtika niman ijkon uelis noyektlalis (Prov. 27:17).

13. ¿Tlenon xnoneki tikchiuaskej?

¹³ Noijki uelis tikimititiskej tokniuan ika tikintlasojtlaj tla xtikchiuaj seki tlemach. ¿Tlenon tikijtosnekij? Ika xnoneki toyolkokoskej noso tikualaniskej ijkuak oksekimej kijtoskej tlen xmás tikasikamatiskej. Matikilnamikikan tlenon opanok ijkuak sa achijtsin poliuiya para kimiktiskej Jesús. Yejua okimijli inomachtijkauan ika tla kinekiyaj kipiyaskej se nemilistli tlen xkeman tlamis, nonekiya kikuaskej itlalnakayo niman koniskej iyesyo (Juan 6:53-57). Miyekej xokuelkakej tlen okijto Jesús niman okitlalkauijkej. San ika, akin yemelak iamigos katkaj, ken Juan, xijkon okichiujkej. Melauak, yejuamej noijki xokasikamatkej tlenon kijtosnekiya Jesús niman kanaj hasta omojkatlachixkej, san ika, xokualankej niman xokinemilijkej ika Jesús nopopolojtoya. Yejuamej itech otlaneltokakej pampa kimatstoyaj ika yejua nochipa kijtouaya tlen melauak (Juan 6:60, 66-69). Ika yejon, maka nimantsin matikualanikan noso matoyolkokokan ijkuak tokniuan kijtoskej itlaj tlen xtikasikamatiskej, yej matikinkauilikan matechasikamachiltikan tlenon kinekij kijtoskej (Prov. 18:13; Ecl. 7:9).

14. ¿Tleka xnoneki tikintlauelitaskej tokniuan?

¹⁴ Juan noijki otechijli maka matikintlauelitakan tokniuan. ¿Tleka? Pampa tla tikintlauelitaj, tikchiujtoskiaj tlen Satanás kineki (1 Juan 2:11; 3:15). Yejon tlen opeuj kichiuaj sekimej tokniuan akin onenkej ipan itlamiyan kachtopa siglo. Satanás kinekiya ika itekipanojkauan toTajtsin manotlauelitakan niman maxeliujtokan. Ijkuak Juan okintlajkuilouili tokniuan, nemiyaj sekimej tlakamej ipan tlanechikojli akin kinekiyaj kichiuaskej tlen Satanás kinekiya. Se  tlakatl akin itoka katka Diótrefes kichiujtoya maxeliui tlanechikojli (3 Juan 9, 10). Diótrefes nion achijtsin xkitlakaitaya grupo akin tlayekanaya nion tokniuan akin komintitlaniyaj makintlajpalotij tlanechikoltin. Melak noueyimatiya, hasta kinekiya kinkixtis itech tlanechikojli akin kinekiyaj kuajli kinseliskej akin yejua kintlauelitaya. Ipan yejuin tonaltin, Satanás ok kiyejyekotika kixelos tlanechikojli. Kuakon, maka keman matikintlauelitakan tokniuan, nochipa matikintlasojtlakan.

15. ¿Tlenon xnoneki kilkauaskej nochimej akin kinyekanaj inchanejkauan?

¹⁵ Tla tejuamej tikinyekanaj tochanejkauan, ¿kenon uelis tikteititiskej ika tiktlasojtlaj tofamilia? Tla tikinmakaj tlen kinpoloua (1 Tim. 5:8). San ika, xkipiya ika tikilkauaskej ika onka itlaj tlen más noneki tikchiuaskej: tikinpaleuiskej kuajli manouikakan iuan toTajtsin (Mat. 5:3, TNM). Matikitakan tlenon okichiuj Jesús. Ipan iEvangelio Juan kijtoua ika ijkuak Jesús pilkatoya ipan kojtli melaktik, yejua ok kinemilijtoya kenon kipaleuis inan, María. Maski Jesús melak tlajyouijtoya pampa pilkatoya, okijli Juan kuajli makitlajpiya María (Juan 19:26, 27). María kinpiaya oksekimej ikoneuan akin ueliskiaj kitlajpiyaskej, san ika, nesi ika nion se xinochiuaya inomachtijkauj Jesús. Kuajli tikitaj ika Jesús kinekiya manemi yakaj akin ueliskia kitlajpiyas inan niman akin ueliskia kipaleuis machikaujto itlaneltokil.

16. ¿Tleka tikijtouaj ika Juan kipiaya miyek tekitl?

¹⁶ Juan kipiaya miyek tekitl. Maka matikilkauakan ika yejua se apóstol katka, ika yejon, nonekiya chikauak tenojnotsas. Niman, kanaj yejua yononamiktijka, kuakon, nonekiskia kinmakas ichanejkauan tlen kinpolouaya niman kinpaleuis chikauak makipiyakan intlaneltokil (1 Cor. 9:5). ¿Kenon uelis kichiuaskej ijkon ken Juan nochimej akin kinyekanaj inchanejkauan?

17. ¿Tlenon melak noneki makichiuakan nochimej akin kinyekanaj inchanejkauan?

¹⁷ Akin kinyekanaj inchanejkauan noijki kipiyaj miyek tekitl. Yejuamej noneki tekitkej yeskej niman kuajli kichiuaskej intekiyo niman ijkon oksekimej kuajli tlajtoskej itech Jehová (Efes. 6:5, 6; Tito 2:9, 10). Niman kanaj nemij sekimej tokniuan tlakamej akin tlapaleuiyaj ken tlayekankej noso tlapaleuijkej.  Ipampa yejon, yejuamej noneki kinyolchikauaskej tokniuan niman chikauak tenojnotsaskej. San ika, noijki melak noneki nochipa manomachtikan Biblia iuan insiuauj niman inkoneuan. Inchanejkauan melak kitlasojkamatiskej tla yejuamej nokojtiliaj kinmakaskej tlen kinpoloua, tla kinyolchikauaj niman tla kinpaleuiyaj machikaujto intlaneltokil (Efes. 5:28, 29; 6:4).

18. ¿Tlenon kuajli kimatstoya Juan?

¹⁸ Juan uejkaujtipan onen niman miyek tlen okixnamik. Nochi tlen okixnamik ueliskia kichiuas maka ok makitekichiuili toTajtsin. San ika, yejua nochipa onokojtili kitlakamatis Jesús niman noijki on tlanauatijli kampa kijtoua ika noneki tikintlasojtlaskej tokniuan. Ika yejon, Juan kuajli kimatstoya ika Jehová niman Jesús kitlasojtlayaj niman ika kipaleuiskiaj makixiko nochi tlen kixnamikiskia (Juan 14:15-17; 15:9, 10; 1 Juan 4:16). Nion Satanás nion akin yejua kinyekana xouel okichiujkej ika Juan maka makimijli niman makimititi tokniuan ika kintlasojtlaya.

19. ¿Tlenon techijlia 1 Juan 4:7, niman tleka?

¹⁹ Ijkon ken Juan, tejuamej noijki tinemij ipan yejuin tlaltikpaktli kampa tlayekantok Satanás niman kampa onka miyek tlauejli (1 Juan 3:1, 10). Yejua kinekiskia maka ok matikintlasojtlakan tokniuan, san ika, yejuin xkeman panos. Tejuamej kuajli yotikijtokej ika nochipa tikimijliskej niman tikimititiskej tokniuan ika tikintlasojtlaj. Tla tikchiuaj ijkon ken yotikijtokej, tipakiskej ipan ikalpan Jehová niman tinemiskej ika toyojlo (xpoua 1 Juan 4:7).