1. ¿Kenon tikxelouaj tiempo niman ijkon más kuajli tikixmatiskej toTajtsin?

 TINOCHIMEJ tikuelitaj tinemiskej imiuan akin melak tikintlasojtlaj. Akin yononamiktijkej kuelitaj kixeloskej tiempo niman ijkon san sekan nemiskej. Telpokamej noijki kuelitaj kixeloskej tiempo niman ijkon nemiskej imiuan inamigos. Niman tinochimej tikuelitaj tikxeloskej tiempo niman ijkon tinemiskej imiuan tokniuan. San ika, más tikuelitaj tikxeloskej tiempo niman ijkon más kuajli tikixmatiskej toTajtsin. ¿Kenon tikchiuaj yejuin? Ijkuak tiknotsaj ika teoyotl, tikpouaj iTlajtol, titlanemiliaj itech nochi tlen kichiuas niman itech nochi tlen kuajli kichiua. ¡Melak tikpatiojkaitaj yejon tiempo tlen tikxelouaj para Jehová! (Sal. 139:17).

2. ¿Tleka kemantika xueli tikxelouaj tiempo niman ijkon tikchiuaskej teoyotl niman tikpouaskej iTlajtol toTajtsin?

² Maski tikuelitaj tiknotsaskej Jehová ika teoyotl niman tikpouaskej iTlajtol, kemantika ouijtika tikitaj tikxeloskej tiempo pampa tikpiyaj miyek tekitl. Totekiyo, tochanejkauan niman okseki tekitl tlen tikpiyaj kanaj kichiuaj matiknemilikan ika xtikpiyaj tiempo tikchiuaskej teoyotl, tomachtiskej noso titlanemiliskej.

3. ¿Itech tlenon noneki totlajpiyaskej?

 ³ Onka seki tlemach tlen uelis techkuilis totiempo. Maski kanaj tlen tikchiuaj xse tlajtlakojli, tla xtotlajpiyaj, kanaj uelis techkuilis miyek tiempo niman xok techkauilis más matiknisiuikan Jehová. Tinochimej tikuelitaj kemantika toseuiskej niman toyolpaktiskej, san ika, tla xtotlajpiyaj, uelis techkuilis miyek tiempo tlen ueliskia tikuiskej para más tikixmatiskej Jehová. Melak noneki san tiktemachiuaskej tiempo tlen ika toyolpaktiaj (Prov. 25:27; 1 Tim. 4:8).

4. ¿Tlenon tikitaskej ipan yejuin tlamachtijli?

⁴ Ipan yejuin tlamachtijli, tikitaskej tleka melak noneki matikitakan tlenon kachtopa noneki tikchiuaskej. Noijki, tikitaskej kenon uelis kuajli tiktekitiltiskej on tiempo tlen tikxelouaj para tiknotsaskej Jehová niman tomachtiskej iTlajtol. Niman tikitaskej kenon techpaleuiya ijkuak ijkon tikchiuaj.

5. ¿Kenon Efesios 5:15-17 kinpaleuis telpokamej niman ichpokamej makitlapejpenikan tlen más kuajli?

⁵ Matiktlapejpenikan tlen más kuajli. Yejuin itlaj tlen miyekej telpokamej niman ichpokamej xkimatij kenon kichiuaskej. Pampa inmaestros niman inchanejkauan akin xnomachtiaj Biblia kimijliaj manomachtikan ipan uejueyi escuelas niman makipiyakan se ueyi tekitl kampa kitlaniskej miyek tomin. Nochi yejon kanaj kinkuilis miyek tiempo. San ika, intajuan niman tokniuan kanaj kimijliaj makitekichiuilikan Jehová. ¿Tlenon kipaleuis se telpochtli akin kitlasojtla Jehová makitlapejpeni tlen más kuajli? Uelis kipouas niman tlanemilis itech tlen kijtoua Efesios 5:15-17 (xpoua). Sakin uelis notlajtoltis: “¿Tlenon kineki manikchiua Jehová? ¿Tlenon más kiyolpaktis? ¿Tlenon nechpaleuis más kuajli maniktekitilti notiempo?”. Matikilnamikikan ika “in tonaltin sanoyej xkuajkualtin” niman nochi tlen Satanás kiyekantok sa achijtsin poliui para kipopoloskej. Kuakon, más kuajli tla tiktekitiltiaj totiempo niman ijkon tikyolpaktiskej Jehová.

6. ¿Tlenon okitlapejpeni María, niman tleka melak kuajli tlen okichiuj?

⁶ Matikitakan tlenon más noneki kachtopa tikchiuaskej. Kemantika tikpiyaj ome tlemach tlen noneki tikchiuaskej, maski yejuin ome tlemach kuajli, noneki kuajli tikitaskej tlenon kachtopa tikchiuaskej. Yejon tlen opanok ijkuak Jesús okintlajpaloto María niman Marta. Pampa Marta melak kuelitaya teselis niman melak yolpakiya pampa Jesús okintlajpaloto, kinekiya kichijchiuas se tlakuajli tlen melak uelik. San ika ikniuj, María, ouajnotlali ikxitlan Jesús niman opeuj kikaki tlen kinekiya kinmachtis. Maski Marta noijki okichiuj itlaj tlen kuajli, Jesús okijto ika “María okitlapejpenij on tlen más kuajli” (Luc. 10:38-42). Kanaj sakin, María okilkauj tlen okikua, san ika, xkeman okilkauj tlen Jesús okimachti. Kuajli nesi ika María okipatiojkaitak on tiempo tlen okitekitilti para kikakis Jesús. Niman tejuamej noijki melak tikpatiojkaitaj on tiempo tlen tikxelouaj para más tiknisiuiskej Jehová. San ika ¿kenon uelis más kuajli tiktekitiltiskej yejuin tiempo?

7. ¿Tleka melak noneki matikchiuakan teoyotl, matomachtikan niman matitlanemilikan?

⁷ Matikilnamikikan ika noijki tikueyichiuaj Jehová ijkuak tikchiuaj teoyotl, tomachtiaj niman titlanemiliaj. Ijkuak tikchiuaj teoyotl,  tiknotsaj toTajtsin, akin melak techtlasojtla (Sal. 5:7). Ijkuak tomachtiaj Biblia, tikixmatij toTajtsin, akin más tlamachilise (Prov. 2:1-5). Niman, ijkuak titlanemiliaj, titlanemilijtokej itech nochi tlen Jehová kuajli kichiua niman itech nochi tlen techmakas ika tlayekapan. ¡Melak kuajli tla ijkon tiktekitiltiaj totiempo! San ika, tla miyek tekitl tikpiyaj, ¿tlenon uelis techpaleuis kuajli matijkuikan totiempo?

8. ¿Tlenon techmachtia tlen okichiuj Jesús ijkuak oyaj ipan tlaluaktli?

⁸ Matiktejtemokan kampa xtlaj techpajsolos. Matikitakan tlenon okichiuj Jesús. Yejua onen 40 tonaltin ipan tlaluaktli ijkuak kemach opeuj tenojnotsa (Luc. 4:1, 2). Ompa, ouel okichiuj teoyotl niman otlanemili itech nochi tlen iTajtsin kinekiya makichiua. Kuajli tikmatstokej ika nochi yejon okipaleui makixiko tlen sakin okixnamik. ¿Tlenon techmachtia tlen okichiuj? Tla kampa tichantij melak timiyekej, kanaj kemantika ouijtika tikitaj tiknextiskej kampa xakaj uelis techpajsolos. Tla tejua ijkon mopan nochiujtok, ¿tleka xtiauj oksekan kampa uelis san moselti timomachtis niman tikchiuas teoyotl? Yejon tlen kichiua Julie ijkuak kineki kinotsas Jehová. Yejua niman iueuentsin chantij ipan se pitentsin cuarto ne Francia, yejua ika, ouijtika kita kinextis kampa iselti nemis niman xakaj kipajsolos. Yejua kijtoua: “Mojmostla nonnejnemi ipan se parque. Ompa, ueli san noselti ninemi, nitlanemilia niman niknotsa Jehová”.

9. Maski Jesús xmás miyek tiempo kipiaya, ¿kenon okiteititi ika kinekiya kuajli nouikas iuan Jehová?

⁹ Jesús melak miyek tekitl kipiaya. Nochiuiyan kampa yaya miyekej tlaltikpakchanejkej kinekiyaj iuan nemiskej. Biblia kijtoua ika sejpatipan “nochimej on yejuan chantiyaj ipan on ueyikalpan onosentlalijkej ikiauatenko on kajli” kampa nemiya pampa kinekiyaj kitaskej. Maski yejua xmiyek tiempo kipiaya, onokojtili kuajli nouikas iuan Jehová. Yejua, uelipan oyaj kampa xakaj ueliskia kipajsolos niman ueliskia kinotsas iTajtsin (Mar. 1:32-35).

10, 11. Itech tlen kijtoua Mateo 26:40, 41, ¿tlenon okimijli Jesús inomachtijkauan ne Getsemaní, niman tlenon opanok?

¹⁰ Ijkuak Jesús itlamiskia itekiyo nikan ipan tlaltikpaktli niman ikimiktiskiaj, oyaj Getsemaní kampa xakaj ueliskia kipajsolos ijkuak kinotsaskia iTajtsin niman tlanemilis (Mat. 26:36). Ompa, okimijli itlaj inomachtijkauan.

¹¹ Matikitakan tlenon opanok. Kanaj melak itlayoua katka ijkuak oajsikej ne Getsemaní. Jesús okimijli iapóstoles ika matlachixtokan,  niman sakin okichiuato teoyotl (Mat. 26:37-39). Ijkuak ouajnokuep, okitak ika yokochkaj. Ika yejon, oksejpa okimijli: “Xtlachixtiakan niman xchiuakan oración” (xpoua Mateo 26:40, 41). Yejua kimatstoya ika melak miyek kinnajmantoya niman ika yosiaujkaj. Yejua ika, okimikneli niman okimijli ika intlalnakayo xkojtik katka. Maski ijkon, yejua oksejpa ika okpa oyaj okichiuato teoyotl niman ijkuak ouajnokuep okitak ika iapóstoles kochtoyaj niman xkichiujtoyaj teoyotl (Mat. 26:42-45).

12. ¿Tlenon uelis tikchiuaskej tla xueli tikchiuaj teoyotl pampa melak tajmantokej noso tisiaujtokej?

¹² Matikitakan kemanon uelis tikchiuaskej teoyotl. Tinochimej kemantika melak miyek tlen techajmana noso tisiaujtokej, yejua ika xtikchiuaj teoyotl. Tla ijkon topan nochiua, ¿tlenon uelis tikchiuaskej? Sekimej tokniuan kachtopa kichiuayaj teoyotl itlamiyan tonajli, san ika, okitakej ika más kinpaleuiya tla kichiuaj ijkuak ximás siauij. Oksekimej yokitakej ika más kuajli kichiuaj teoyotl ijkuak notlalijtokej noso notlakuantelketstokej. Niman, ¿tlenon uelis tikchiuaskej tla xueli tikchiuaj teoyotl pampa melak tajmantokej noso tisiaujtokej? Matikijlikan Jehová, yejua techiknelis niman techasikamatis (Sal. 139:4).

13. ¿Kenon uelis techpajsolos toteléfono noso itlaj okse ijkuak tikchiujtoskej teoyotl, tomachtijtoskej noso tinemiskej tlanechikojli?

¹³ Maka itlaj matechpajsolo ijkuak tomachtijtoskej. Tla tiknekij kuajli touikaskej iuan Jehová, xsan noneki tikchiuaskej teoyotl, noijki noneki kuajli tomachtiskej iTlajtol niman tiaskej tlanechikoltin. ¿Tlenon uelis tikchiuaskej tla tiknekij matechpaleui tlen tomachtiaj niman tlen tijkakij ipan tlanechikoltin? Matotlajtoltikan: “¿Tlenon xnechkauilia kuajli maninomachti noso kuajli manitlakakto?”. Kanaj ijkon topan nochiua ijkuak yakaj techuajnotsa, techuajtitlanilia correo noso se mensaje ipan toteléfono noso ipan itlaj okse. Aman, melak miyekej kitekitiltiaj nochi yejuin. San ika, sekimej ixtlamatkej kinemiliaj ika tla yakaj kiyejyekojtika kuajli tlanemilis niman ompa kipiya se teléfono, xuelis ijkon kichiuas. Se tlakatl akin onomachti Psicología kijtoua: “Xueli kuajli titlanemilia itech tlen tikchiujtika, pampa  tontlanemilijtika itech itlaj okse”. Tla ijkuak tikpiyaj se toueyitlanechikol techijliaj matiktemoltilikan volumen toteléfono noso itlaj okse para maka yakaj kipajsolos, ¿noijki uelis ijkon tikchiuaskej ijkuak tikchiujtoskej teoyotl, tomachtijtoskej noso tinemiskej ipan tlanechikojli?

14. Itech tlen kijtoua Filipenses 4:6, 7, ¿kenon techpaleuis Jehová kuajli matitlanemilikan?

¹⁴ Matiktlajtlanilikan Jehová matechpaleui kuajli matitlanemilikan. Tla tomachtijtokej noso tinemij ipan tlanechikojli niman peua titlanemiliaj itech itlaj okse, matiktlajtlanilikan Jehová matechpaleui. Maski kemantika tlen techajmana xtechkauilia kuajli matitlanemilikan itech tlen kichikauas totlaneltok, melak noneki matokojtilikan. Matiktlajtlanilikan Jehová matechyolseui niman matechpaleui kuajli matitlanemilikan (xpoua Filipenses 4:6, 7).

15. ¿Kenon uelis techpaleuis tla tikchiuaj teoyotl, tomachtiaj Biblia niman itech titlanemiliaj?

¹⁵ ¿Kenon uelis techpaleuis tla tikchiuaj teoyotl, tomachtiaj Biblia niman itech titlanemiliaj? Kachtopa, kuajli tiktlapejpeniskej tlen tikchiuaskej. Biblia ijkin kijtoua ipan Proverbios 13:20: “Xmouika iuan sen tlamatki niman titlamatki yes”. Pampa Jehová yejua akin más tlamachilise, ijkuak tikxelouaj tiempo para iuan touikaskej, tejuamej noijki tochiuaj tlamachilisejkej. Noijki, techpaleuiya más matikasikamatikan kenon tikyolpaktiskej niman techpaleuiya maka matikchiuakan itlaj tlen uelis kiyolkokos.

16. ¿Kenon uelis techpaleuis más kuajli matitemachtikan tla tikxelouaj tiempo para tikchiuaskej teoyotl, tomachtiskej Biblia niman itech titlanemiliskej?

¹⁶ Ika ome, más kuajli titemachtiskej. Ijkuak tejuamej tikmachtiaj se tonomachtijkauj, tiknekij tikpaleuiskej más makinisiui Jehová. Ijkuak tiknotsaj Jehová, más tiktlasojtlaj, niman yejon techpaleuiya matikititikan tonomachtijkauj kenon noijki kitlasojtlas. Yejon tlen Jesús okichiuj. Pampa ijkuak yejua kinotsaya iTajtsin kititiaya ika kitlasojtla, inomachtijkauan noijki opeuj kitlasojtlaj Jehová (Juan 17:25, 26).

17. ¿Tleka ijkuak tikchiuaj teoyotl niman tomachtiaj más chikaui totlaneltokil?

¹⁷ Ika yeyi, totlaneltokil más chikauis. San matikonnemilikan tlenon panoua ijkuak tiktlajtlaniliaj toTajtsin matechyekana, matechyolseui noso matechpaleui. Ijkuak yejua kichiua tlen tiktlajtlaniliaj, totlaneltokil más chikaui (1 Juan 5:15). Totlaneltokil noijki uelis más chikauis tla san toselti tomachtiaj Biblia. Matikilnamikikan ika Romanos 10:17 kijtoua ika “se ueli tlaneltoka ijkuak kaki on  temachtijli”. San ika, tla tiknekij machikaujto totlaneltokil, xsan noneki tomachtiskej. ¿Tlenon más noneki tikchiuaskej?

18. ¿Kenon okiteititi se salmista ika melak noneki titlanemiliskej itech tlen tomachtijtokej?

¹⁸ Noneki titlanemiliskej itech tlen tomachtijtokej. Matontlanemilikan itech akin okijkuilo Salmo 77. Yejuin salmista melak najmanaya pampa kinemiliaya ika yejua niman israelitas yokintlalkauijka Jehová. Pampa melak najmantoya, hasta xok kochiya (tlaxeloltin 2-8). ¿Tlenon okichiuj? Yejua okijto: “Melauak, nejua nochipa nikelnamikis on tlen yejua okichiu” (tlaxelojli 12). Yejua kimatstoya nochi tlen Jehová yokichiujka ipampa ikalpan. Maski ijkon, yejua notlajtoltiaya: “¿Tlen manin Dios yej yokelkau ken techmakaya ikuajlilis [noso iteiknelilis]?” (tlaxelojli 9). Akin okijkuilo yejuin salmo otlanemili itech kenon Jehová yokimiknelijka itekipanojkauan (tlaxelojli 11). Yejon okipaleui makineltoka ika Jehová xkeman kikauaskia ikalpan (tlaxelojli 15). Noijki ijkon, totlaneltokil más chikauis tla titlanemiliaj itech kenon Jehová yokipaleui ikalpan niman kenon yotechpaleui.

19. ¿Kenon más techpaleuiya ijkuak tikchiuiliaj teoyotl Jehová, tomachtiaj iTlajtol niman itech titlanemiliaj?

¹⁹ Ika naui, más tiktlasojtlaskej Jehová. Yejuin tlen más techpaleuiya. ¿Tleka? Pampa tla tiktlasojtlaj Jehová techpaleuis matiktlakamatikan, más matiktekichiuilikan niman techpaleuis matikxikokan nochi tlen ouijtika (Mat. 22:37-39; 1 Cor. 13:4, 7; 1 Juan 5:3). Tinochimej tikmatstokej ika más ueyi kijtosneki touikaskej iuan Jehová (Sal. 63:1-8).

20. ¿Tlenon yotiknemili tikchiuas para más kuajli timouikas iuan Jehová?

²⁰ Matikilnamikikan ika noijki tikueyichiuaj Jehová ijkuak tikchiuaj teoyotl, tomachtiaj niman titlanemiliaj. Ijkon ken Jesús, tla tiknekij más kuajli touikaskej iuan Jehová, matikchiuakan teoyotl niman matomachtikan kampa xakaj techpajsolos. Maka matijkauilikan itlaj matechkuili totiempo. Ijkuak tikchiujtoskej itlaj tlen ika tikchikauaj totlaneltokil, matiktlajtlanilikan Jehová matechpaleui kuajli matitlanemilikan. Tla tejuamej kuajli tiktekitiltiaj totiempo, Jehová techteochiuas niman techmakas se nemilistli tlen xkeman tlamis (Mar. 4:24).