TLAMACHTIJLI 4
¿Tleka tiauej Conmemoración?
“Xchiujtokan yejuin niman ijkon xnechilnamikikan” (LUC. 22:19, TNM).
TLAKUIKAJLI 20 Titechmaka moKonetsin
TLEN TIKITASKEJ *
1, 2. a) ¿Kemanon más tikilnamikij yakaj akin yomik? b) ¿Tlenon otlanauati Jesús?
IJKUAK miki yakaj akin tiktlasojtlaj, nochipa tikilnamikij maski melak youejkauj ika yomik. Niman más tikilnamikij ijkuak ajsi on tonajli ijkuak omik.
2 Sejse xiuitl, tejuamej niman melak miyekej tlaltikpakchanejkej akin nemij ipan nochi tlaltikpaktli, tikilnamikij yakaj akin melak tiktlasojtlaj: Jesucristo (1 Ped. 1:8). Tosentlaliaj para tikilnamikiskej kenon imikilis otechmakixti itech tlajtlakojli niman mikilistli (Mat. 20:28). Jesús kinekiya ika inomachtijkauan makilnamikikan imikilis. Ipan yeuajli achto mikiskia, yejua otlakua iuan inomachtijkauan niman okimijli: “Xchiujtokan yejuin niman ijkon xnechilnamikikan” (Luc. 22:19, TNM).
3. ¿Tlenon tikitaskej ipan yejuin tlamachtijli?
3 Melak miyekej yauej Conmemoración niman ijkon kilnamikiskej imikilis Cristo. Itech nochimej akin yauej, san achijtsitsintin akin kichiaj yaskej ne iluikak, niman más miyekej akin kichiaj nemiskej ipan yejuin tlaltikpaktli. Ipan yejuin tlamachtijli tikitaskej tleka sejse xiuitl nochimej yauej Conmemoración. Noijki, tikitaskej tleka melak techpaleuiya ijkuak tiauej. Kachtopa tikitaskej tleka tokniuan tlapejpeniltin yauej Conmemoración.
¿TLEKA TOKNIUAN TLAPEJPENILTIN YAUEJ CONMEMORACIÓN?
4. ¿Tleka tokniuan tlapejpeniltin ueli kikuaj pan niman konij vino tlen notekitiltia Conmemoración?
4 Sejse xiuitl, akin tlapejpeniltin yauej Conmemoración para kikuaskej pan niman koniskej vino tlen notekitiltia ipan yejon tonajli. ¿Tleka yejuamej ueli ijkon kichiuaj? Para tikmatiskej matikitakan tlenon okichiuj Jesús achto mikiskia. Sakin ika yokipanoltijkej Pascua, Jesús okimijli inomachtijkauan ika nonekiya kilnamikiskej yejon yeuajli ijkuak san sekan imiuan otlakua. Niman sakin okinpanoltili pan niman vino on 11 iapóstoles niman okimijli ika makikuakan on pan niman makonikan on vino. Sakin, imiuan okichiuj yejuin ome pactos: “yenkuik pacto” niman pacto itech Tekiuajyotl (Luc. 22:19, 20, 28-30). * Yejuin ome pactos okichiujkej ika yejon apóstoles niman okseki achijtsitsintin tokniuan tlapejpeniltin manochiuakan tekiuajkej niman teopixkej ne iluikak (Apoc. 5:10; 14:1). Ipan yejuin ome pactos tlen Jesús okinteneuj noijki teuan nopouaj tokniuan tlapejpeniltin akin xiyauej ne iluikak. Yejua ika, yejuamej ueli kikuaj pan niman konij on vino tlen notekitiltia ipan Conmemoración.
5. ¿Tlenon kimatij tlapejpeniltin itech tlen toTajtsin yokijto kinmakas?
5 Tokniuan tlapejpeniltin noijki yauej Conmemoración pampa ijkon ueli tlanemiliaj itech tlen kiseliskej ika tlayekapan. Jehová yokintlapejpeni para xok keman mikiskej niman nochipa chantiskej ne iluikak, tekitiskej iuan Jesucristo niman on okseki 144,000 tlapejpeniltin. Niman yejuamej noijki melak yolpakij pampa uelis nemiskej ixpan Jehová (1 Cor. 15:51-53; 1 Juan 3:2). Tokniuan tlapejpeniltin kimatstokej ika toTajtsin Jehová yokinnots para kiseliskej nochi yejuin. San ika, yejuamej san uelis yaskej iluikak tla nochipa yolmelajkanemij (2 Tim. 4:7, 8). Melak yolpakij ijkuak tlanemiliaj itech nochi tlen kiseliskej (Tito 2:13, TNM). ¿Niman tleka “oksekimej borregos” noso akin xyaskej iluikak yauej Conmemoración? (Juan 10:16). Matikitakan.
¿TLEKA “OKSEKIMEJ BORREGOS” YAUEJ CONMEMORACIÓN?
6. ¿Tleka sejse xiuitl “oksekimej borregos” yauej Conmemoración?
6 On “oksekimej borregos” yauej Conmemoración niman ijkon kitaskej kenon nopanoltia. Ipan xiuitl 1938, onoijto ika akin kichiaj nemiskej ipan yejuin tlaltikpaktli uelis yaskej Conmemoración. Ipan amatlajkuilojli La Torre del Vigía tlen okis ipan abril de 1938, onoijto ika kinamiki niman noneki ika on “oksekimej borregos” manemikan ipan yejuin tlanechikojli niman makitakan tlenon nochiua. Niman noijki okijto ika ijkuakon yejuamej noijki noneki yolpakiskej. Ijkon ken yolpakij akin yauej kampa nonamiktilo, on “oksekimej borregos” yolpakij ijkuak kitaj kenon nopanoltia Conmemoración.
7. ¿Tleka on “oksekimej borregos” sa kinektokej kikakiskej on tlamachtijli tlen nopanoltia ipan Conmemoración?
7 On “oksekimej borregos” noijki tlanemiliaj itech tlen kiseliskej ika tlayekapan. Sa kinektokej kikakiskej on tlamachtijli tlen nopanoltia ipan Conmemoración pampa ompa noijtoua tlenon kichiuaskej Cristo niman on 144,000 tlapejpeniltin ijkuak tekiuajtiskej ipan mil xiuitl. Jesucristo kinyekanas niman san sekan kichiuaskej ika yejuin tlaltikpaktli manokuepa se xochitlalpan niman kinpaleuiskej tlaltikpakchanejkej maka ok makipiyakan tlajtlakojli. Akin yauej ipan Conmemoración melak yolpakij ijkuak konnemiliaj kenon toTajtsin kichiuas tlen yokijto ipan Isaías 35:5, 6; 65:21-23 niman Apocalipsis 21:3, 4. Intlaneltokil más chikaui niman más ika inyojlo kinekij kitekichiuiliskej Jehová ijkuak konnemiliaj kenon nemiskej ipan se kualtsin tlaltikpaktli imiuan inchanejkauan akin yomijkej (Mat. 24:13; Gál. 6:9).
8. Xkijto tlenon más ika kinpaleuiya on “oksekimej borregos” ijkuak yauej Conmemoración.
8 On “oksekimej borregos” noijki yauej Conmemoración pampa kinekij kimititiskej tlapejpeniltin ika kintlasojtlaj niman kinekij kinpaleuiskej. ToTajtsin iTlajtol okijto ika tlapejpeniltin niman akin kichiaj nemiskej ipan yejuin tlaltikpaktli san sekan tekitiskiaj. Matikimitakan seki teotlajtoltin tlen techititiaj yejuin.
9. Itech tlen kijtoua Zacarías 8:23, ¿tlenon kimachiliaj “oksekimej borregos” ipampa tlapejpeniltin?
9 (Xpoua Zacarías 8:23, TNM). * Yejuin teotlajtojli kuajli kiteititia tlenon kimachiliaj on “oksekimej borregos” ipampa imikniuan tlapejpeniltin. Ijkuak ipan yejuin tlaxelojli kinteneua tlajtoltin “se judío” niman “nemouan”, tlajtotika itech tlapejpeniltin akin xiyauej ne iluikak (Rom. 2:28, 29). On “majtlaktli tlakamej itech nochi tlajtoltin tlen onka ipan países” kinneskayotia on “oksekimej borregos”. Yejuamej kuajli najsij intech tlapejpeniltin. Kijtosneki ika, ika nochi inyojlo kinpaleuiyaj niman san sekan kiueyichiuaj Jehová. Pampa on “oksekimej borregos” yauej ipan Conmemoración kimititiaj tlapejpeniltin ika san sekan imiuan nopaleuiyaj.
10. ¿Tlenon yokichiuj Jehová para manochiua tlen kijtoua Ezequiel 37:15-19, 24, 25?
10 (Xpoua Ezequiel 37:15-19, 24, 25, TNM). * Yejuin teotlajtojli yonochiuj pampa Jehová kinpaleuijtika tlapejpeniltin niman “oksekimej borregos” san sekan kuajli matekitikan. Ipan yejuin tlaxeloltin tlajtoua itech ome tlakotl. Akin kichiaj yaskej ne iluikak yeskiaj kentla on tlakotl “para Judá” (ipan yejuin tribu kintlapejpeniayaj akin tekiuajtiskiaj ipan Israel). Niman akin kichiaj nemiskej ipan tlaltikpaktli yeskiaj ken on “itlakouj Efraín”. * Jehová kinsentlaliskia yejuin ome tlakotl niman ijkon san se tlakotl nochiuaskej. Yejuin kijtosneki ika san sekan kitekichiuiliskiaj intekiuaj, Jesucristo. Sejse xiuitl, tokniuan tlapejpeniltin niman “oksekimej borregos” san sekan yauej Conmemoración pampa “san se tlapixki” kipiyaj (Juan 10:16).
11. Itech tlen kijtoua Mateo 25:31-36, 40, ¿kenon “oksekimej borregos” kinpaleuijtokej akin tlapejpeniltin?
11 (Xpoua Mateo 25:31-36, 40). “On iborreguitos” akin nikan noteneuaj kinneskayotia tlaltikpakchanejkej akin yolmelajkanemij ipan sa itlamiyan tonaltin niman kichiaj nemiskej ipan tlaltikpaktli, kijtosneki on “oksekimej borregos”. Yejuamej ika nochi inyojlo kinpaleuiyaj tlapejpeniltin para makichiuakan se ueyi tekitl: tenojnotsaj niman temachtiaj (Mat. 24:14, TNM; Mat. 28:19, 20, TNM).
12, 13. ¿Kenon más kinpaleuiyaj ikniuan Cristo on “oksekimej borregos”?
12 Sejse xiuitl, seki semanas achto nopanoltis Conmemoración on “oksekimej borregos” kiteititiaj ika kinpaleuiyaj ikniuan Cristo. ¿Kenon kinpaleuiyaj? Yejuamej nokojtiliaj nochimej kinnotsaskej para imiuan makilnamikikan imikilis Cristo (xkita recuadro “ ¿Yotiknemili tlenon tikchiuas ijkuak inopanoltis Conmemoración?”). Ipan nochi tlaltikpaktli on “oksekimej borregos” nokojtiliaj kichiuaskej nochi tlen noneki niman ijkon kipanoltiskej Conmemoración, maski ipan intlanechikol xnemij akin tlapejpeniltin. Yejuamej ika inyojlo kinpaleuiyaj ikniuan Cristo. Kimatstokej ika nochi tlen kichiuaj ipampa tlapejpeniltin, yeskia kentla kichiujtoskiaj ipampa Jesús (Mat. 25:37-40).
13 ¿Tleka tinochimej noneki tiaskej Conmemoración?
¿TLEKA TINOCHIMEJ TIAUEJ CONMEMORACIÓN?
14. ¿Kenijki yokiteititijkej Jehová niman Jesús ika melak techtlasojtlaj?
14 Pampa ijkon tiktlasojkamatij itlasojtlalis Jehová niman Jesús. Miyek ken Jehová yokiteititi ika techtlasojtla. San ika, más okiteititi ika techtlasojtla ijkuak okuajtitlan iKonetsin, akin otlajyouiko niman omikiko topampa (Juan 3:16). Jesús noijki okiteititi ika melak techtlasojtla pampa okinek kitemakas inemilis topampa (Juan 15:13). Tejuamej xkeman uelis tikintlaxtlauiliskej nochi tlen yokichiujkej topampa. San ika, kema uelis tikimititiskej ika tikintlasojkamachiliaj tla tokojtiliaj tikintlakamatiskej (Col. 3:15). Ijkuak tiauej Conmemoración, tikimititiaj Jehová niman Jesús ika tiktlasojkamatij pampa techtlasojtlaj niman tikimititiaj ika noijki tikintlasojtlaj.
15. ¿Tleka tlapejpeniltin niman “oksekimej borregos” kitlasojkamatij tlen Jesús okichiuj inpampa?
15 Pampa ijkon tikteititiaj ika tiktlasojkamatij tlen Jesús okichiuj topampa (Mat. 20:28). Akin tlapejpeniltin kitlasojkamatij tlaxtlauijli, pampa yejon kichiua ika mauelikan mauiyan iluikak. Pampa kineltokaj ika Cristo onotemakak inpampa, Jehová kimita ika yolkuajkualtin niman kintlapejpenia ken ikoneuan (Rom. 5:1; 8:15-17, 23). Niman “oksekimej borregos” noijki kitlasojkamatij tlaxtlauijli. Pampa yejuamej tlaneltokaj itech tlen Cristo okichiuj, toTajtsin kintlapopoluiya, kinkauilia makiueyichiuakan niman kinmakixtis ipan “on temojtij tlajyouilistli” (Apoc. 7:13-15). Ijkuak tlapejpeniltin niman “oksekimej borregos” yauej Conmemoración, kiteititiaj ika kitlasojkamatij tlen Jesús okichiuj inpampa.
16. ¿Tlenon más tikteititiaj ijkuak tiauej Conmemoración?
16 Pampa tiknekij tiktlakamatiskej Jesús. Maski tla tikchiaj tinemiskej nikan ipan tlaltikpaktli noso tiaskej ne iluikak, tinochimej tiknekij tiktlakamatiskej tlen Jesús otenauatij ijkuak okipeualti Conmemoración. Yejua okijto ika noneki tikilnamikiskej imikilis (1 Cor. 11:23, 24).
¿KENON TECHPALEUIYA IJKUAK TIAUEJ CONMEMORACIÓN?
17. ¿Tleka más tiknisiuiyaj Jehová ijkuak tiauej Conmemoración?
17 Techpaleuiya más matonisiuikan itech Jehová (Sant. 4:8). Ken yotikitakej, ijkuak tiauej Conmemoración techpaleuiya matitlanemilikan itech tlen Jehová yokijto techmakas niman itech kenon yotechititi ika techtlasojtla (Jer. 29:11; 1 Juan 4:8-10). Kuajli tikmatstokej ika kichiuas nochi tlen yokijto niman ika itlasojtlalis xkeman tlamis. Ijkuak titlanemiliaj itech nochi yejuin, más tiktlasojtlaj Jehová niman más tiknisiuiyaj (Rom. 8:38, 39).
18. ¿Kenon techpaleuiya ijkuak titlanemiliaj itech tlen Jesús okichiuj?
18 Techpaleuiya matikchiuakan ijkon ken Jesús (1 Ped. 2:21). Ijkuak sa achijtsin poliui para nopanoltis Conmemoración, tikpouaj ipan Biblia tlenon ipan onochiuj Jesús achto kimiktiskiaj niman sakin ika oyoliuj. Niman tlamachtijli tlen nopanoltia ipan Conmemoración techilnamiktia ika Jesús melak techtlasojtla (Efes. 5:2; 1 Juan 3:16). Ijkuak tikpouaj niman titlanemiliaj itech nochi tlen Jesús okichiuj, techpaleuiya matinemikan ijkon ken yejua nemiya (1 Juan 2:6).
19. ¿Kenon tikititiaj toTajtsin ika tiknekij nochipa tiktlasojtlaskej?
19 Techpaleuiya nochipa matiktlasojtlakan toTajtsin (Jud. 20, 21). ¿Kenon tikititiaj toTajtsin ika tiknekij nochipa tiktlasojtlaskej? Ijkuak tokojtiliaj nochipa tiktlakamatiskej, titlapaleuiskej manochipaua itoka niman tikyolpaktiskej (Prov. 27:11; Mat. 6:9; 1 Juan 5:3). Ijkuak tiauej Conmemoración, techpaleuiya para mojmostla matikijlikan Jehová: “¡Nikneki nochipa mouan ninouikas!”.
20. ¿Tleka noneki tiaskej Conmemoración?
20 Maski tla tikchiaj tiaskej ne iluikak noso tinemiskej nikan ipan tlaltikpaktli, sejse xiuitl melak noneki matiakan Conmemoración. Ipan yejon tonajli ijkuak tosentlaliaj, tikilnamikij yakaj akin melak tiktlasojtlaj: Jesucristo. Niman tlen más ueyi kijtosneki, tikilnamikij ika Jehová melak techtlasojtla pampa okuajtitlan iKonetsin para matechmakixtiki. Ipan yejuin xiuitl, Conmemoración nopanoltis ipan tonajli viernes 15 de abril de 2022, sakin ika yokalak tonaltsintli. Pampa tiktlasojtlaj Jehová niman Jesús xtiknekij topolouiliskej yejuin Conmemoración.
TLAKUIKAJLI 16 Matikueyichiuakan Jehová ipampa iKoneuj
^ Maski tla titlapejpeniltin noso tikchiaj tinemiskej nikan ipan tlaltikpaktli, nochi xiujtin tiknekij tiaskej Conmemoración. Ipan yejuin tlamachtijli tikimitaskej seki textos tlen techpaleuiyaj matikasikamatikan tleka tiauej Conmemoración niman kenon techpaleuiya ijkuak ijkon tikchiuaj.
^ Tla tikneki tikmatis más itech “yenkuik pacto” niman pacto itech Tekiuajyotl, xkita tlamachtijli “Llegarán a ser ‘un reino de sacerdotes’”, itech La Atalaya del 15 de octubre de 2014, páginas 15-17.
^ Zacarías 8:23: “Yejuin tlen kijtoua Jehová akin kinyekana akin tlaixnamikij: ‘Ipan yejon tonaltin majtlaktli tlakamej itech nochi tlajtoltin tlen onka ipan países kajsiskej, kema, kajsiskej itlaken se judío, kijtojtoskej: “Tiknekij nemouan tiaskej, pampa yotiktekakilijkej ika toTajtsin nemouan nemi”’”.
^ Ezequiel 37:15-19, 24, 25: “15 Jehová oksejpa onechnots, niman onechijli: 16 ‘Niman tejua, ikoneuj se tlaltikpakchane, xkajsi se tlakotl niman ipan xkijkuilo: “Para Judá niman israelitas akin iuan nemij”. Sakin xkajsi okse tlakotl niman ipan xkijkuilo: “Para José, itlakouj Efraín, niman para nochimej israelitas akin iuan nemij”. 17 Sakin xsentlali se iuan okse niman ijkon ipan moma nochiuaskej san se tlakotl. 18 Ijkuak mokalpan mitstlajtoltis: “¿Xtitechijlis tlenon kijtosneki nochi yejuin?”, 19 xkimijli “Yejuin tlen Ueyixtika toTeko Jehová kijtoua: ‘Nikajsis itlakouj José, tlen onka ipan ima Efraín, niman nochi tribus de Israel akin iuan nemij, niman nikinsentlalis iuan itlakouj Judá. Niman nejua nikchiuas manochiuakan san se tlakotl; san se nochiuaskej ipan noma’”’”. “24 Notekitkauj David intekiuaj yes niman nochimej yejuamej san se intlajpixkauj kipiyaskej. Noyekanaskej ika notlanauatiluan niman kuajli kintlakamatiskej. 25 Chantiskej ipan tlajli tlen onikmakak notekipanojkauj, Jacob, kampa ochantikej nemoachtotajuan. Nochipa ompa chantiskej, yejuamej niman inkoneuan niman inkoneuan inkoneuan; niman notekipanojkauj David nochipa intlayekankauj yes”.
^ Tla tikneki tikmatis tlenon más noijtoua itech on ome tlakotl tlen kinteneua Ezequiel capítulo 37, xkita libro La adoración pura de Jehová: ¡por fin restaurada!, páginas 130-135, párrafos 3-17.
