1, 2. ¿Tleka tiauej Conmemoración nochi xiujtin?

 IKIPIYA kanaj 2,000 xiuitl ika Jesús omik topampa. Ika yejon, aman tejuamej uelis nochipa tinemiskej. Sejpa, ijkuak sa achijtsin poliuiya para kajsiskej niman kimiktiskej Jesús, yejua otlakua imiuan inomachtijkauan niman okikuajkej pan niman okonikej vino. Jesús okinnauati inomachtijkauan nochipa ijkon makichiuakan niman ijkon kilnamikiskej kenon melak okintlasojtlak (1 Cor. 11:23-26).

² Akin tikchiuaj ken Cristo tikchiuaj tlen Jesús otechnauati pampa melak tiktlasojtlaj (Juan 14:15). Ijkuak itikpanoltiskej Conmemoración niman tla yotikpanoltijkej, tikteititiaj ika tikpatiojkaitaj tlen Jesús okichiuj topampa. ¿Kenon? Tikxelouaj más tiempo para tikchiuaskej teoyotl niman titlanemiliskej itech kenon melak ueyi kijtosneki imikilis Cristo. Noijki, más titenojnotsaj niman ijkon miyekej tikimijliskej touan makipanoltitij Conmemoración. Niman ijkuak ajsi tonajli ijkuak itikpanoltiskej Conmemoración, xtlaj tijkauiliaj matechtelti para matiakan.

3. ¿Tlenon tikitaskej ipan yejuin tlamachtijli?

³ Akin tiktekichiuiliaj Jehová nochipa tokojtiliaj niman ijkon uelis tikilnamikiskej imikilis Cristo. Ipan yejuin tlamachtijli tikitaskej yeyi tlemach tlen nochipa tikchiuaj: 1) tikpanoltiaj Conmemoración ijkon ken Jesús okijto, 2) nochimej tikinnotsaj para touan makipanoltikan niman 3) maski ouijtika tlen tikixnamikij, nochipa tikpanoltiaj.

4. a) ¿Tlenon techmachtiaj itech imikilis Cristo ipan Conmemoración? (Lucas 22:19, 20). b) ¿Tleka melak noneki matiktlasojkamatikan tlen ompa techmachtiaj?

⁴ Nochi xiujtin, ipan Conmemoración kipanoltiaj se tlamachtijli tlen kikixtiaj itech Biblia. Ipan yejuin tlamachtijli techijliaj tleka nonekiya yakaj mamiki topampa niman kenon imikilis se tlakatl ouel okichiuj ika toTajtsin makintlapopolui miyekej tlaltikpakchanejkej. Noijki techilnamiktiaj akinomej kikuaj pan niman konij vino, niman techijliaj tlenon kijtosneki yejuin ome tlemach (xpoua Lucas 22:19, 20). Ijkuak tijkakij yejuin tlamachtijli, titlanemiliaj itech kenon Jehová kinteochiuas akin kichiaj nemiskej ipan tlaltikpaktli (Is. 35:5, 6; 65:17, 21-23). Melak noneki matiktlasojkamatikan ika tejuamej tikmatij nochi yejuin itech imikilis Cristo. ¿Tleka? Pampa miyekej tlaltikpakchanejkej xtlaj kimatij itech yejuin niman xkimatij kenon melak patioj tlen Jesús okichiuj topampa. Noijki, yejuamej xkilnamikij imikilis Jesús ijkon ken yejua okijto matikchiuakan. ¿Tleka?

5. Sakin ika omijkej sekimej apóstoles, ¿kenon tlaltikpakchanejkej opeujkej kilnamikij imikilis Jesús?

⁵ Sakin ika sekimej apóstoles omijkej, sekimej tlakamej akin kijtouayaj ika kichiuayaj ken Cristo okalajkej ipan tlanechikojli (Mat. 13:24-27, 37-39). Pablo ijkin okijtojka itech yejuin tlakamej: “Kitemachtiskej on tlen xmelauak, para on tlaneltokakej kinuikaskej” (Hech. 20:29, 30). Yejuamej kijtouayaj ika xmelauak katka ijkuak Biblia kijtoua ika Cristo “san sejpa onotemakak ken uentli para miyekej kinkixtilis intlajtlakoluan”. Yejuamej temachtiayaj ika nonekiya miyekpa nouentlalis iyesyo niman itlalnakayo Cristo (Heb. 9:27, 28). Ipan yejuin tonaltin, miyekej tlaltikpakchanejkej akin kipiyaj kuajli inyojlo ijkin tlaneltokaj. Yejuamej chijchikueyi noso mojmostla yauej teopan niman ijkon kipanoltiskej tlen kitokayotiaj el sacrificio de la misa. b Noijki, seki religiones xmás kilnamikij imikilis Jesús, niman miyekej akin nemij ipan yejon religiones xkasikamatij tleka omikiko Jesús. Kanaj sekimej notlajtoltiaj: “¿Yemelak ika imikilis Cristo uelis kichiuas manechtlapopolui toTajtsin?”. Sekimej ijkon notlajtoltiaj pampa ipan inreligión yokinmachtijkej ika imikilis Cristo xtechpaleuiya para matechintlapopoluilikan totlajtlakoluan. ¿Tlenon yokichiujkej akin kichiuaj ken Cristo niman ijkon kinpaleuiskej tlaltikpakchanejkej makasikamatikan tleka omik Jesús, niman kenon noneki kilnamikiskej imikilis?

6. ¿Tlenon okasikamatkej ipan 1872 sekimej akin opeujkej nomachtiaj Biblia?

⁶ Kanaj ipan xiuitl 1870, Charles Russell niman oksekimej akin noijki nomachtiayaj Biblia opeujkej melak kuajli nomachtiaj iTlajtol toTajtsin. Yejuamej kinekiyaj kuajli kasikamatiskej tleka omik Jesús niman noijki kinekiyaj kimatiskej kenon noneki tikilnamikiskej imikilis. Pampa onomachtijkej Biblia, ipan 1872 okasikamatkej ika Jesús onotemakak topampa niman ijkon kinmakixtis nochimej tlaltikpakchanejkej. Niman yejuamej xokiyankej tlen youelkaj, yej kinekiyaj nochimej makimatikan. Ika yejon, okijkuilojkej tlen youelkaj ipan libros, periódicos niman revistas. Sakin, opeujkej kipanoltiaj Conmemoración sejpa ipan se xiuitl, ijkon ken akin kichiuayaj ken Cristo ipan kachtopa siglo.

7. ¿Kenon techpaleuiya tlen okasikamatkej akin opeujkej nomachtiaj Biblia?

⁷ ¿Kenon techpaleuiya tlen okasikamatkej akin opeujkej nomachtiaj Biblia? Pampa yejuamej onokojtilijkej nomachtiskej Biblia, Jehová okinteochiuj. Niman aman, tejuamej kuajli tikasikamatij tleka omik Jesús niman kenon  techpaleuis imikilis (1 Juan 2:1, 2). Noijki yotiuelkej ipan Biblia tlenon inpan panos akin kitlakamatij toTajtsin: sekimej yaskej iluikak niman xok keman mikiskej, niman oksekimej nochipa chantiskej ipan tlaltikpaktli. Noijki, tomachiliaj más nisiuj itech Jehová ijkuak tiknemiliaj kenon melak techtlasojtla niman kenon techpaleuiya toseselti tlen Jesús okichiuj topampa (1 Ped. 3:18; 1 Juan 4:9). Ika yejon, ijkon ken yeuejkaui okichiujkej tokniuan, aman tejuamej noijki tikinnotsaj oksekimej touan makilnamikikan imikilis Cristo, ijkon ken Jesús okijto matikchiuakan.

8. ¿Tlenon yokichiujkej itekipanojkauan Jehová para kinnotsaskej tlaltikpakchanejkej mauiyan Conmemoración? (Xkita tlaixkopinajli).

⁸ Ikipiya miyek xiujtin ika itekipanojkauan Jehová kinnotsaj tlaltikpakchanejkej mauiyan Conmemoración. Ipan 1881, yejuin revista okinnots tokniuan de Estados Unidos manosentlalikan ipan se kajli tlen onkatka Allegheny (Pensilvania) para kilnamikiskej imikilis Cristo. Sakin, nochi tlanechikoltin opeujkej kipanoltiaj Conmemoración. Ipan marzo de 1940, okimijlikej akin tenojnotsayaj ika ueliskiaj kinnotsaskej tlaltikpakchanejkej akin nisiuj chantiyaj niman kuelitaskiaj konpanoltiskej Conmemoración. Niman ipan 1960, Betel opeuj komintitlanilia tlanechikoltin invitaciones para Conmemoración. Desde ijkuakon, akin tiiteixpantijkauan Jehová yotikinxelojkej melak miyek invitaciones. ¿Tleka melak tokojtiliaj tikinxeloskej invitaciones niman tikimijliskej oksekimej mauiyan Conmemoración?

9, 10. ¿Akinomej tikinnotsaj mauiyan Conmemoración? (Juan 3:16)

⁹ Tejuamej tikinnotsaj tlaltikpakchanejkej mauiyan Conmemoración pampa tiknekij makimatikan  tlen Jehová niman Jesucristo okichiujkej topampa (xpoua Juan 3:16). Tiknekij ika tlen kemach ika sejpa kitaskej niman kikakiskej makinpaleui para más makixmatikan Jehová niman makitekichiuilikan. San ika, xsan tikinnotsaj akin xkeman yauej Conmemoración. ¿Akinomej noijki tikinnotsaj?

¹⁰ Noijki tikinnotsaj tokniuan akin xok touan nosentlaliaj nion xtenojnotsaj. Tikimijliaj mauiyan Conmemoración pampa tiknekij tikimilnamiktiskej ika Jehová ok kintlasojtla. Niman melak tiyolpakij ijkuak tikitaj ika sekimej kema yauej. Ijkuakon, kilnamikij kenon melak yolpakiyaj ijkuak kitekichiuiliayaj Jehová. Matikitakan tlen ipan onochiuj Mónica. c Ipan pandemia del COVID-19, oksejpa opeuj tenojnotsa. Sakin ika oyaj Conmemoración del 2021, okijto: “Yejuin Conmemoración xnikilkauas. Ikipiya 20 xiuitl ika xnitenojnotsaya nion xnikteijliaya mauiyan Conmemoración. Oninokojtili nikinnotsas oksekimej mauiyan Conmemoración pampa niknekiya nikteititis ika melak niktlasojkamati tlen Jehová niman Jesús okichiujkej nopampa” (Sal. 103:1-4). Ijkuak tikinxelouaj invitaciones, sekimej techinseliliaj niman sekimej ka. Maski ijkon, tikmatstokej ika toTajtsin kitlasojkaita pampa tokojtiliaj titenotsaskej mauiyan Conmemoración.

11. ¿Kenon Jehová yotechteochiuj pampa tokojtiliaj titenotsaskej mauiyan Conmemoración? (Ageo 2:7).

¹¹ Jehová melak yotechteochiuj pampa melak tokojtiliaj tikinnotsaskej oksekimej mauiyan Conmemoración. Ipan 2021, maski xmiyek ueliya tikchiuayaj ipampa kokolistli COVID-19, melak miyekej touan okilnamijkej imikilis Cristo. Otosentlalijkej 21,367,603 tlaltikpakchanejkej, más de okpatipan de nochimej iteixpantijkauan Jehová akin nemij ipan nochi tlaltikpaktli. Xkeman ijkon tosentlaliayaj. San ika, Jehová xsan kita kechmej yauej Conmemoración, yejua kita akinomej yauej pampa kineki kinpaleuis mamakisakan (Luc 15:7; 1 Tim. 2:3, 4). Ika yejon, Jehová techpaleuiya matikinnextikan akin kipiyaj kuajli inyojlo ijkuak titenotsaj mauiyan Conmemoración (xpoua Ageo 2:7).

12. ¿Tlenon ueliskia kichiuas maka matikpanoltikan Conmemoración? (Xkita tlaixkopinajli).

¹² Jesús okijto ika ipan itlamiyan tonaltin tikixnamikiskiaj miyek tlen ouijtika: miyekej techtlaueltokaskiaj, tochanejkauan techtlauelitaskiaj, oniaskiaj guerras, uajnesiskiaj uejueyimej kokolistin... (Mat. 10:36; Mar. 13:9; Luc. 21:10, 11). Nochi yejuin ueliskia kichiuas maka matikpanoltikan Conmemoración. ¿Tlenon yokichiujkej tokniuan para kipanoltiskej Conmemoración maski kixnamikij tlen ouijtika, niman kenon yokinpaleui Jehová?

13. ¿Kenon Jehová okiteochiuj tlen okichiuj Artiom para uelis kipanoltis Conmemoración maski tsauktoya?

¹³ Ijkuak kintsakuaj tokniuan. Tokniuan akin tsauktokej ipampa intlaneltok melak nokojtiliaj niman ijkon kilnamikiskej imikilis Cristo. Matikitakan tlen ipan onochiuj Artiom. Ijkuak inopanoltiskia Conmemoración ipan 2020, okitsajkej niman okikauatoj kampa xtlaueyi katka, niman ompa kintsakuayaj hasta makuiltin tlaltikpakchanejkej. Maski tsauktoya, ouel okinexti seki tlemach tlen kitekitiltiskia para kipanoltis Conmemoración niman okinemili kipanoltis tlamachtijli maski san yejuatsin kilnamikiskia imikilis Cristo. San ika, okitak ika ouijtika yeskia kipanoltis itlamachtil pampa akin imiuan tsauktoya melak pokiyaj niman nochi tonajli tlauijuikaltijtoyaj. ¿Tlenon okichiuj Artiom? Okintlajtolti tla ueliskia xtlauijuikaltiskiaj niman xpokiskiaj se hora. Niman okijlikej ika kema. Artiom kijtoua: “Onikimijli ika ueliskia nikintlajtlajtouilis  tleka nikilnamikiskia imikilis Cristo”. Maski okijlikej ika xkinekiyaj kimatiskej, sakin ika okitakej kenon Artiom okilnamik imikilis Cristo, okijlikej ika kinekiyaj okseki kimatiskej itech Conmemoración.

14. ¿Tlenon okichiuj ikalpan Jehová para kipanoltis Conmemoración maski onesiko kokolistli COVID-19?

¹⁴ Ueyi kokolistli COVID-19. Maski miyek tlen otikixnamijkej ipampa yejuin kokolistli niman xouel otosentlalijkej, kema ouel otikpanoltijkej Conmemoración. d Tlanechikoltin akin kipiayaj internet ouel okipanoltijkej ipan videoconferencia. San ika, melak miyekej tokniuan xkipiayaj internet. ¿Yejuamej kenon okipanoltijkej Conmemoración? Ipan seki países onopanolti tlamachtijli ipan televisión noso ipan radio. Noijki, sucursales okitakej kenon tokniuan akin melak uejka chantiyaj ueliskia kipanoltiskej Conmemoración. Ika yejon, okichiujkej grabaciones itech yejuin tlamachtijli ipantsin 500 tlajtoltin. Niman okitakej kenon tokniuan ueliskia kipiyaskej yejon grabaciones.

15. ¿Tlenon techmachtia tlen ipan opanok Sue?

¹⁵ Ijkuak inchanejkauan tokniuan kintlauelitaj.  Sekimej tokniuan melak ouijtika okitakej kipanoltiskej Conmemoración pampa inchanejkauan xkuelitaj ika nomachtiaj Biblia. Yejon tlen ipan onochiuj Sue akin kemach nomachtijtika Biblia. Ipan 2021, ijkuak san se tonajli poliuiya para nopanoltis Conmemoración, Sue okijli imaestra ika xueliskia kipanoltiskia Conmemoración pampa ichanejkauan xkuelitayaj ika yejua nomachtia Biblia. Imaestra okiamapouili Lucas 22:44. Okijli ika ijkuak tikixnamikij tlen ouijtika, noneki tikchiuaskej ken Jesús niman tikneltokaskej ika Jehová techpaleuis ijkuak tikchiuiliskej teoyotl. Uajmostla, Sue okitak kenon ueliskia kipiyas pan niman vino, niman okitak ipan jw.org video “Tikueyichiuaj toTajtsin ika kualkan ijkuak tikpanoltiaj Conmemoración”. Sakin, onokaltsak niman okikak Conmemoración ipan teléfono. Sakin okijkuilouili yejuin imaestra: “Yaloua melak otinechyolchikauj. Onikchiuj nochi tlen oniuel para uelis nikpanoltis Conmemoración niman Jehová melak onechpaleui. Melak niyolpaki niman melak nimitstlasojkamachilia”. Tla tejua noijki itlaj tikixnamiktika, ¿tiknemilia ika Jehová uelis mitspaleuis?

16. ¿Tleka uelis kuajli tikmatstoskej ika Jehová techteochiuas tla tokojtiliaj tikpanoltiskej Conmemoración? (Romanos 8:31, 32).

¹⁶ Jehová melak kipatiojkaita nochi tlen tikchiuaj para uelis tikilnamikiskej imikilis iKonetsin. Uelis kuajli tikmatstoskej ika toTajtsin techteochiuas tla tikteititiaj ika tiktlasojkamatij tlen yejua okichiuj topampa (xpoua Romanos 8:31, 32). ¡Melak tiknekij tikpanoltiskej Conmemoración yejuin xiuitl! Tiknekij más tiktekichiuiliskej Jehová achto ika nopanoltis Conmemoración niman tla yonopanolti.