1, 2. ¿Tlenon noneki tikchiuaskej tla yotoapolaktijkej, niman tleka?

 ¿KECHPA titlachipaua mochan? Kanaj ijkuak kemach ompa otimochantito, melak kuajli otitlachipauj. San ika, tla sakin xok titlachipauaskia, nochi melak tlaltexiniskia niman melak tlatsokuiliuiskia. Ika yejon, tla tikneki kuajli manesi mokal, noneki miyekpa titlachipauas.

² Ijkon ken miyekpa titlachipauaj tochan, noijki noneki miyekpa tikitaskej tla kuajli ken titlanemiliaj niman tla kuajli tlen tikchiujtokej. Ijkuak tiknekiyaj toapolaktiskej, otokojtilijkej topatlaskej niman otijkixtijkej “ipan totlalnakayo niman toalma nochi on tlen techijtlakoua” (2 Cor. 7:1). San ika, aman ika yotoapolaktijkej noneki tikchiuaskej tlen okijto apóstol Pablo: “Xkauilikan para kuajli ma kiyenkuilijtiu nemoyojlo niman nemotlamachilis” (Efes. 4:23). ¿Tleka melak noneki matikyenkuilijtiakan toyojlo niman totlamachilis? Pampa ijkon ken nimantsin nosentlalia tlajli tochan, noijki ueliskia nimantsin nosentlalis tlen xkuajli ipan toyojlo niman ipan totlamachilis. Tla xtiknekij ijkon topan mapano niman tiknekij ika Jehová makita ika tichipaujkej, noneki miyekpa tikitaskej tla kuajli ken titlanemilijtokej, tla kuajli tlen tikchiujtokej niman tla kuajli tlen tiknekij tikchiuaskej.

3. ¿Tlenon noneki tikchiuaskej tla tiknekij tikyenkuilijtiaskej totlamachilis? (Romanos 12:2).

³ ¿Tlenon noneki tikchiuaskej niman ijkon tikyenkuilijtiaskej  totlamachilis noso tikpatlatiaskej ken titlanemiliaj? (xpoua Romanos 12:2). Noneki tikitaskej tlen tikpiyaj ipan toyojlo niman ipan totlamachilis. Niman tla tikitaj ika tlen tikpiyaj xmás kuajli, noneki topatlaskej niman tiktlaliskej ipan toyojlo tlen Jehová kineki matikchiuakan. Maka matiknemilikan ika Jehová ikuajli techita san pampa kemantika titepaleuiyaj noso tikchiuaj tlen kuajli. Kuakon, noneki miyekpa toixtlaloskej niman ijkon topatlatiaskej.

4. ¿Tlenon techpaleuis maka matitlanemilikan ken akin xkitekichiuiliaj Jehová?

⁴ Ijkuak xok tikpiyaskej tlajtlakojli, nochipa tikyolpaktiskej Jehová. San ika, aman noneki tokojtiliskej tla tiknekij tikyolpaktiskej. Ipan Romanos 12:2, Pablo okijto ika tla tiknekij tikyenkuiliskej totlamachilis, noneki tikmatiskej tlenon kineki Jehová matikchiuakan. Maka san ijkon matokauakan niman maka matijkauilikan ika akin xkitekichiuiliaj Jehová matechmauakan ika tlen kinemiliaj niman tlen kichiuaj, yej matikitakan tla titlanemilijtokej ken Jehová ijkuak itlaj tiknemilijtokej tikchiuaskej noso ijkuak itlaj tiktlapejpeniaj.

5. ¿Tlenon uelis totlajtoltiskej niman ijkon tikmatiskej tla tikneltokaj ika achijtsin poliui para yejkos itonal Jehová? (Xkita tlaixkopinajli).

⁵ Se matikteneuakan itech kenon Jehová kineki matitlanemilikan. Yejua kineki matikilnamiktokan ika sa achijtsin poliui ijkuak yejkos “on tonajli ijkuak Dios kitlajtlakolmakas nochi tlaltikpaktli” (2 Ped. 3:12). Kuakon, matotlajtoltikan: “¿Tlen aman nikchiujtika kiteititia ika nikasikamati ika sa achijtsin poliui para toTajtsin tlapopolos? Ijkuak niknemilia kanon nitekitis noso tla ninomachtis universidad, ¿kachtopa nikita tla tlen niktlapejpenis xkichiuas maka sa maniktekichiuili Jehová? ¿Nikneltoka ika Jehová kintlajpiyas nochanejkauan, noso melak ninotekimiktia pampa xnikneltoka ika Jehová nechmakas tlen noneki?”. Jehová melak yolpaki ijkuak kita ika tokojtiliaj  tinemiskej ken yejua kineki (Mat. 6:25-27, 33; Filip. 4:12, 13).

6. ¿Tlenon noneki nochipa tikchiuaskej?

⁶ Noneki miyekpa tikitaskej kenon titlanemiliaj, niman tla tikitaj ika xmás kuajli ken titlanemiliaj, noneki topatlaskej. Pablo ijkin okimijli tokniuan akin chantiyaj Corinto: “Sano nemejuamej kuajli xmixtlalokan para nenkitaskej tla nenmelajkanemij ipan nemotlaneltok. ¡Xmotlatlatakan!” (2 Cor. 13:5). Para timelajkanemiskej ipan totlaneltok, xsan noneki tiaskej tlanechikoltin niman tontenojnotsaskej, noijki noneki tikitaskej kenon titlanemiliaj, tlenon tikchiuasnekij niman totlajtoltiskej tleka tikchiuaj tlen kuajli. Kuakon, tla tiknekij tikyenkuilijtiaskej totlamachilis, noneki tikpouaskej iTlajtol toTajtsin, titlanemiliskej ken toTajtsin tlanemilia niman, tla tikitaj ika itlaj xkuajli tikchiujtokej, nimantsin topatlaskej para tikyolpaktiskej Jehová (1 Cor. 2:14-16).

7. Ijkon ken kijtoua Efesios 4:31, 32, ¿tlenon okse noneki tikchiuaskej, niman tleka ouijtika tikchiuas yejon?

⁷ (Xpoua Efesios 4:31, 32). Xsan noneki tikpatlaskej ken titlanemiliaj, noijki noneki totlakentiskej ika “on yenkuik nemilistli” (Efes. 4:24). Kemantika yejuin ouijtika tikchiuas. ¿Tleka? Pampa kemantika tikchiuaj tlen xkuajli pampa titlajtlakolejkej. Kuakon, maka san matitlamatstokan, yej matokojtilikan topatlaskej. Sekimej melak tlauelejkej noso nimantsin tetlauelitaj ijkuak itlaj kinchiuiliaj, hasta Biblia kijtoua ika sekimej nimantsin kualanij (Prov. 29:22). Maski tla yotoapolaktijkej, ok nonekis tokojtilijtoskej para xtikchiuaskej tlen xkuajli. Niman yejon tlen okichiuj se tokniuj akin amantsin tikteneuaskej.

8, 9. ¿Kenon techititia tlen ipan onochiuj Stephen ika melak noneki nochipa matopatlatiakan?

⁸ Se tokniuj akin itoka Stephen kijtoua ika melak ouijtika kita xtlauele yes. Yejua kijtoua: “Maski yoninoapolaktijka, melak ononek ninokojtilis xok nitlauele yes. Sejpatsin, ijkuak nitenojnotstinemiya techajchan, onikitak ika se tlachtejketl okichtek iradio nocarro. Kuakon oninotlalojteuj pampa niknekiya nikonkuijkuilis noradio. San ika, ijkuak inikojnasiskia, yejua okitlajkal noradio niman más chikauak onotlalo. Ijkuak onikimijli tokniuan kenon oniktojtokak tlachtejketl, se tlayekanketl onechtlajtolti: ‘¿Tlenon tikchiuiliskia tlachtejketl tla tikojnasiskia?’. Ijkuak tlayekanketl ijkin onechtlajtolti, onikasikamat ika ok nonekiya ninopatlas”. b

⁹ Tlen ipan opanok Stephen techititia ika oksejpa uelis tikchiuaskej ken yeuejkaui tikchiuayaj, maski tla tiknemiliayaj ika yotopatlakaj. Tla ijkon topan panoua, maka melak matajmanakan niman maka matiknemilikan ika xtechmelaua tikueyichiuaskej Jehová. Apóstol Pablo noijki ijkon ipan onochiuj, yejua okijto: “Ijkuak nikneki nikchiuas on tlen kuajli, xniueli pampa on tlajtlakojli onkaj ipan notlalnakayo” (Rom. 7:21-23). Ken yotikijtokaj, tla xtitlachipauaj tochan uelis oksejpa tlatsokuiliuis. Noijki ijkon, pampa titlajtlakolejkej, uelis oksejpa tikchiuaskej tlen yeuejkaui tikchiuayaj. Ika yejon, noneki nochipa tokojtiliskej tikchiuaskej tlen kuajli niman tlen chipauak. ¿Tlenon techpaleuis ijkon matikchiuakan?

10. ¿Tlenon noneki tikchiuaskej niman ijkon toxijxikoskej iuan on tlen xkuajli tikchiuasnekij? (1 Juan 5:14, 15).

¹⁰ Matikijlikan Jehová kanon ouijtika tikitaj topatlaskej, niman kuajli matikmatstokan ika yejua techkakis niman techpaleuis (xpoua 1 Juan 5:14, 15). Maski Jehová xkichiuas se milagro para techpatlas niman ijkon nochipa matikchiuakan tlen kuajli, kema techpaleuis matoxijxikokan iuan on tlen xkuajli tikchiuasnekij (1 Ped. 5:10). ¿Tlenon noneki tikchiuaskej  tla yotiktlajtlanilijkej toTajtsin matechpaleui? Xsan noneki tikchiaskej matechpaleui Jehová, tejuamej noijki noneki totlajpiyaskej. Xnoneki tikchiuaskej tlen ueliskia kichiuas oksejpa matikchiuakan ken yeuejkaui tikchiuayaj. Xnoneki tikimitaskej películas, programas de televisión noso tikamapouaskej kampa noteititia ika kuajli tlen tejuamej xkuajli tikchiuaj niman tlen iuan toxijxikotokej. Niman maka san matiknemilijtokan tlen xkuajli tiknekiskiaj tikchiuaskej (Filip. 4:8; Col. 3:2).

11. ¿Tlenon uelis techpaleuis matopatlatiakan?

¹¹ Tejuamej yotikajkaujkej miyek tlen xkuajli tikchiuayaj, san ika, ok noneki topatlatiaskej. ¿Kenon uelis tikchiuaskej? Más matomachtikan itech Jehová niman itech tlen kualtsin kichiua, niman matokojtilikan matikchiuakan ken yejua (Efes. 5:1, 2). Ijkuak tikpouaskej ipan Biblia kenon Jehová otetlapopolui, matotlajtoltikan: “¿Nejua nitetlapopoluiya?”. Noso tla tikamapouaj kenon Jehová teiknelia niman kinpaleuiya akin kixnamikij tlen ouijtika, matotlajtoltikan: “¿Ninajmana inpampa tokniuan akin xmiyek tomin kipiyaj niman nikita kenon uelis nikinpaleuis?”. Nochipa matotlakentikan ika on yenkuik nemilistli niman ijkon tikyenkuiliskej totlamachilis, niman maka matosiaujkauakan.

12. ¿Kenon techititia tlen ipan onochiuj Stephen ika Biblia uelis techpaleuis matopatlakan?

¹² Stephen, akin otikteneujkej ipan párrafo 8, ika yolik onotlakenti ika on yenkuik nemilistli. Yejua kijtoua: “Desde ijkuak oninoapolakti, kemantika ouijtika nikita xnimantsin nikualanis. Ijkuak ijkon nopan panoua, oksekan niauj niman ijkon xnikueyilis tlauejli nion xniteixnamikis. Ijkuak ijkon nikchiuani, nosiuauj niman oksekimej nechijlianij ika melak kuajli pampa xnimantsin onikualan, niman hasta nejua nimojkatlachia pampa xok nikualani ijkon ken yeuejkaui nikualaniya. Xuelis nikijtos ika san nejua onikchiuj maninopatla. Biblia kipiya kojtilistli pampa ueli kinpatla tlaltikpakchanejkej”.

13. ¿Tlenon techpaleuis matiknekikan tikchiuaskej tlen kuajli? (Gálatas 5:16).

¹³ (Xpoua Gálatas 5:16). Jehová kuelita kitemakas niman techmaka iespíritu santo para techpaleuis matikchiuakan tlen kuajli. Ijkuak tomachtiaj iTlajtol toTajtsin, tijkauilijtokej espíritu santo matechpaleui. Niman Jehová noijki techmaka iespíritu santo ijkuak tiauej tlanechikoltin. Ipan tlanechikoltin tikimitaj tokniuan akin nokojtilijtokej kichiuaskej tlen kuajli ijkon ken tejuamej, niman yejon techyolchikaua (Heb. 10:24, 25; 13:7). Niman ijkuak ika nochi toyojlo tiktlajtlaniliaj Jehová matechpaleui maka matikchiuakan tlen xkuajli, yejua techmaka iespíritu santo niman ijkon matopatlakan niman maka matosiaujkauakan. Kema, yejuin xkichiuas mapopoliui tlen xkuajli tiknekij tikchiuaskej, san ika, kema techpaleuis maka matikchiuakan tlen xkuajli. Ijkon ken kijtoua Gálatas 5:16, tla tiktlakamatij on espíritu, xtikchiuaskej on tlen xkuajli kineki totlalnakayo.

14. ¿Tleka melak noneki matokojtilijtokan tiknemiliskej tlen kuajli?

¹⁴ Tla yopeuj tikchiuaj tlen techpaleuis kuajli matouikakan iuan Jehová, melak noneki nochipa ijkon matikchiujtokan niman nochipa matokojtilijtokan tiknemiliskej tlen kuajli. ¿Tleka? Pampa mojmostla onka tlen uelis tikileuiskej. Maski tla yotoapolaktijkej, kanaj uelis tikileuiskej tlen tikmatstoskej ika xkuajli. Kanaj tiknekiskej tauiltiskej para tiktlaniskej tomin, titlauaniskej noso tikitaskej pornografía (Efes. 5:3, 4). Se tokniuj telpochtli kijtoua: “Nejua melak ninokojtilia xnikinuelitas tlakamej. Niknemiliaya ika yejon san panos, san ika, xueli  kuajli nikajkaua ijkon nitlanemilis”. ¿Tlenon uelis techpaleuis tla sajnoye tikileuiyaj tikchiuaskej tlen xkuajli?

15. ¿Tleka techyolchikaua tikmatiskej ika miyekej tokniuan noxijxikouaj iuan on tlen xkuajli kileuiyaj? (Xkita tlaixkopinajli).

¹⁵ Tla tokojtilijtokej xtikchiuaskej itlaj tlen tikileuiyaj, noneki tikilnamikiskej ika xsan toselti tinemij. Biblia kijtoua: “Xmatikan ika on tlatlamach tlayouilistli niman tetlatlatalistli yejuan nenkipiyaj sano ijki ken oksekimej tlaltikpaktlakamej kipiyaj” (1 Cor. 10:13a). Se Biblia ijkin okitlajtolkuep yejuin tlaxelojli: “Tlatlatalistli tlen nemejuamej nenkipiyaj noijki kipiyaj oksekimej tlaltikpakchanejkej”. Yejuin tlajtoltin okimijlikej tokniuan akin chantiyaj Corinto. Sekimej tokniuan akin ompa chantiyaj auilnemiyaj, tlauaniyaj niman sekimej kinuelitayaj san no insiuaikniuan noso intlakaikniuan (1 Cor. 6:9-11). ¿Xmelak ika maski yejuin tokniuan yonoapolaktijkaj, ok nonekiya noxijxikoskej iuan on tlen xkuajli kileuiayaj? Kema, pampa maski nochimej tlapejpeniltin katkaj, yejuamej ok tlajtlakolejkej katkaj. Ika yejon, uelis tiknemiliskej ika kemantika ononek noxijxikoskej iuan on tlen xkuajli kinekiyaj kichiuaskej. Yejuin techyolchikaua pampa tikitaj ika tokniuan noijki onoxijxikojkej iuan on tlen xkuajli kileuiayaj niman ouelkej omelajkanenkej. Kuakon, matikchiuakan ijkon ken kijtoua 1 Pedro 5:9: “Xmelajkanemikan ipan nemotlaneltok. No ijki xmatstiakan ika nochiuiyan imanian in tlaltikpaktli on nemokniuan no ijki ken nemejuamej tlajyouiyaj”.

16. ¿Tlenon xnoneki tiknemiliskej niman tleka?

¹⁶ Maka keman matiknemilikan ika xakaj kasikamati kenon melak ouijtika tikitaj topatlaskej. Tla ijkon titlanemiliaj, ueliskia tiknemiliskej ika xok uelis titlaxikoskej niman ika xkeman uelis topatlaskej. Matikilnamikikan ika Biblia ijkin kijtoua: “Dios yolmelajki, niman mechpaleuis para on tlayouilistli niman tetlatlatalistli maka nemopan uajlas yejuan sanoyej temojtij  yejuan nemejuamej xuelis nenkixikoskej. Yej ijkuak nenkipiyaskej tlayouilistli niman tetlatlatalistli, Dios mechmakas sen ojtli kampaka uelis nenkitlalkauiskej, niman ijki uelis nenkixikoskej” (1 Cor. 10:13b). Kuakon, maski sajnoye tikileuiyaj tikchiuaskej itlaj tlen xkuajli, uelis timelajkanemiskej itech Jehová. Jehová techpaleuis niman ijkon uelis titlaxikoskej niman xtikchiuaskej tlen xkuajli tikileuiyaj.

17. Maski titlajtlakolejkej niman tikileuiyaj tlen xkuajli, ¿tlenon kema uelis tikchiuaskej?

¹⁷ Nochipa matikilnamikikan ika pampa titlajtlakolejkej, uelis techyoltilanas tlen xkuajli. Kuakon, tla kemantika tikileuiyaj tlen xkuajli, nimantsin ne ika matikmapeuakan, ijkon ken José akin okicholouili isiuauj Potifar (Gén. 39:12). Xkipiya ika tikchiuaskej tlen xkuajli tikileuiyaj.

18, 19. ¿Tlenon uelis totlajtoltiskej tla tiknekij tikyenkuilijtiaskej totlamachilis?

¹⁸ Tla tiknekij tikyenkuiliskej totlamachilis, noneki nochipa titlanemiliskej niman tikchiuaskej ijkon ken Jehová kuelita. Ika yejon, noneki miyekpa toixtlaloskej niman totlajtoltiskej: “¿Tlen nikchiua kiteititia ika nikmatstika ika iyejkotika itonal Jehová? ¿Ninokojtilijtika nochipa ninotlakentis ika on yenkuik nemilistli? ¿Ninokauilia manechyekana iespíritu Jehová niman ijkon xnikchiuas tlen xkuajli nikileuiaya?”.

¹⁹ Tla ijkin yototlajtoltijkej, kanaj tikitaskej ika seki xmás kuajli tikchiujtokej, san ika, maka san yejon matikitakan, noijki matikitakan tlen kuajli tikchiujtokej. Tla tikitaj ika itlaj nonekis tikyektlaliskej, maka melak matajmanakan. Matikilnamikikan ika maski ikuajli tiktekichiuilijtokej Jehová, ok noneki topatlatiaskej (Fili. 3:16). Tla ijkon tikchiuaj, Jehová techteochiuas pampa tokojtiliaj tikyenkuiliskej totlamachilis.