1. ¿Tleka miyekej xok tlaneltokaj itech Biblia?

 IPAN yejuin tonaltin, miyekej xok kimatij intech akinon tlaneltokaskej. Miyekej kintlakaitaj akin kipiyaj miyek tomin, políticos niman ixtlamatkej, san ika, notlajtoltiaj tla yemelak kinekij kinpaleuiskej. Noijki, sekimej xok más tlaneltokaj intech akin tlayekanaj ipan tlaneltokiltin. Akin tlayekanaj ipan tlaneltokiltin kijtouaj ika noyekanaj ika Biblia, ika yejon, xtechmojkatlachialtia ika miyekej noijki xok tlaneltokaj itech Biblia.

2. Ken kijtoua Salmo 119:160, ¿tlenon uelis kuajli tikmatstoskej?

² Akin tiktekichiuiliaj Jehová kuajli tikmatstokej ika toTajtsin nochipa kijtoua tlen melauak niman ika nochipa kineki techpaleuis (Sal. 31:5; Is. 48:17). Noijki tikmatstokej ika uelis titlaneltokaskej itech Biblia pampa iTlajtol toTajtsin “yejua tlen melauak” (xpoua Salmo 119:160). Titlanemiliaj ijkon ken se ixtlamatki itech Biblia, yejua okijkuilo: “Itech nochi tlen toTajtsin yokijto, xonka nion achijtsin tlen xmelauak nion tlen xuelis nochiuas. Ikalpan toTajtsin tlaneltoka itech tlen yejua kijtoua pampa tlaneltokaj itech inTajtsin”.

3. ¿Tlenon tikitaskej ipan yejuin tlamachtijli?

³ ¿Kenon uelis tikinpaleuiskej oksekimej noijki matlaneltokakan itech iTlajtol toTajtsin? Ipan yejuin tlamachtijli tikitaskej yeyi tlemach tlen uelis tikimijliskej: tlen kijtoua Biblia  xnopatla, iteotlajtoluan nochipa nochiuaj niman ueli kinpatla innemilis tlaltikpakchanejkej.

4. ¿Tleka sekimej kinemiliaj ika Biblia yonopatlak?

⁴ Jehová okichiuj ika 40 tlakamej makijkuilokan Biblia. San ika, ipan yejuin tonajli xok onka nion se amatl tlen yejon tlakamej okijkuilojkej. San tikinpiyaj copias tlen okinkixtilijkej copias. Ika yejon, sekimej notlajtoltiaj tla tlen kijtoua Biblia no san noijki kijtoua ken on tlajkuiloltin tlen yejon tlakamej okijkuilojkej. ¿Kenon uelis kuajli tikmatstoskej ika tlen kijtoua Biblia xnopatla?

5. ¿Kenon okinchijchiujkej copias itech Tlajkuiloltin ika Hebreo? (Xkita tlaixkopinajli tlen nesi ixpan yejuin revista).

⁵ Jehová xkinekiya mapopoliui iTlajtoltsin. Ika yejon, otlanauati makinchijchiuakan copias. Tekiuajkej ipan Israel okinnauatijkej makichijchiuakan se copia itech Tlanauatijli, niman levitas okimijlikej matemachtikan ika yejon Tlanauatijli (Deut. 17:18; 31:24-26; Neh. 8:7). Sakin, ijkuak judíos okinuikakej Babilonia, sekimej tlakamej okinchijchiujkej copias itech Tlajkuiloltin ika Hebreo (Esd. 7:6). Yejuin tlakamej melak kuajli okichiujkej intekiyo. Sakin, ijkuak kichijchiuayaj se copia, kinpoujtiayaj tlajtoltin niman hasta letras niman ijkon kitaskej tla nochi okijkuilojkej. Maski ijkon, pampa tlajtlakolejkej katkaj, kemantika itlaj kixtenkauayaj. San ika, sakin okinextijkej kampa onopopolojkej pampa okinchijchiujkej miyek copias itech yejon Tlajkuiloltin. Matikitakan kenon okinextijkej kampa onopopolojkej.

6. ¿Kenon uelis nonextis kampa onopopolojkej akin okinchijchiujkej copias itech Biblia?

⁶ Ixtlamatkej itech Biblia yokitakej ika tla kimitaj copias itech Biblia, uelis kinextiskej kampa onopopolojkej akin okimaijkuilojkej Biblia. Matitlanemilikan itech yejuin, 100 tlakamej kimijliaj itlaj makimaijkuilokan, niman se tlakatl itlaj kixtenkaua. ¿Kenon uelis kinextiskej kampa onopopolo? Tla kimitaj nochi copias tlen on tlakamej okinchijchiujkej. Noijki ijkon, tla ixtlamatkej kimitaj miyek copias tlen onka itech Biblia, uelis kitaskej tla yakaj akin okimaijkuilo onopopolo noso tla itlaj okixtenkauj.

7. ¿Kenon tikmatij ika akin okinchijchiujkej copias itech Biblia kuajli okichiujkej intekiyo?

⁷ Matikitakan itlaj tlen techititia ika akin okinchijchiujkej copias itech Biblia melak kuajli okichiujkej intekiyo. Ipan 1008 noso 1009, okimaijkuilojkej se copia itech Tlajkuiloltin ika Hebreo tlen noixmati ken Códice de Leningrado. San ika, xiuejkaui, ononextijkej miyek copias itech Biblia, niman okitakej ika yejon copias kanaj 1,000 xiuitl más youejkaujkej xijkon ken Códice de Leningrado. Yakaj ueliskia kinemilis ika pampa ipan 1,000 xiuitl onochijchiujkej melak miyek copias itech Tlajkuiloltin ika Hebreo, Códice de Leningrado xok san noijki kijtoskia ken on copias tlen más youejkaujkej. San ika, xijkon opanok. ¿Tlenon okinextijkej ixtlamatkej ijkuak okimitakej copias tlen más yeuejkayomej niman copias tlen xmás yeuejkayomej? Ika maski achijtsin onopatlak ken otlajkuilojkej, xokipatlakej tlen Biblia kijtouaya.

8. ¿Tlenon uelis tikijtoskej itech copias itech Tlajkuiloltin ika Griego niman itech okseki libros tlen melak youejkaujkej?

⁸ Akin kichiuayaj ken Cristo ipan kachtopa siglo noijki okinchijchiujkej miyek copias itech Biblia. Yejuamej okinmaijkuilojkej 27 libros itech Tlajkuiloltin ika Griego, niman yejon tlajkuilolamamej kintekitiltiayaj ipan tlanechikoltin niman ijkuak tenojnotsayaj. Se ixtlamatki okimitak seki copias tlen  okinmaijkuilojkej ipan kachtopa siglo. Seki copias tlen okimitak katkaj itech Tlajkuiloltin ika Griego niman okseki katkaj itech libros tlen san okimijkuilojkej ixtlamatkej. Yejua kijtoua ika onka más copias itech Tlajkuiloltin ika Griego niman ika más kuajli okinchijchiujkej. Libro Anatomy of the New Testament kijtoua: “Uelis kuajli tikmatstoskej ika tlen aman tikpouaj ipan Biblia [itech Tlajkuiloltin ika Griego] san noijki kijtoua ken on tlajkuilolamamej tlen yeuejkaui okimijkuilojkej tlakamej akin toTajtsin okintlapejpeni”.

9. ¿Tlenon techijlia Isaías 40:8 itech Biblia?

⁹ Ipan miyek xiujtin, miyekej tlakamej okinchijchiujkej copias itech Biblia niman ijkuak kijkuilouayaj melak kuajli kitstiayaj niman ijkon xtlaj kipatlaskej niman xnopopoloskej. Ika yejon, tlen tikpouaj niman tlen tomachtiaj ipan Biblia xnopatla. b Kema, Jehová okichiuj maka manopatla iTlajtol (xpoua Isaías 40:8). San ika, sekimej uelis kijtoskej ika maski xonopatlak tlen kijtoua Biblia, xkijtosneki tla ualeua itech toTajtsin. Matikitakan seki tlen techititia ika Biblia ualeua itech toTajtsin.

10. Xteneua se teotlajtojli tlen onochiuj niman tlen kiteititia ika melauak tlen kijtoua 2 Pedro 1:21 (xkimita tlaixkopinaltin).

¹⁰ Ipan Biblia onka miyek teotlajtoltin tlen yonochiujkej, niman seki melak youejkaujka ika yonoijkuilojkaj. Tlen yeuejkaui opanok techititia ika yejon teotlajtoltin yemelak yonochiujkej. Yejon xtechmojkatlachialtia pampa tikmatstokej ika Jehová yejua akin okimijto yejon teotlajtoltin (xpoua 2 Pedro 1:21). Matitlanemilikan itech ueyikalpan Babilonia. Kanaj ipan ika chikueyi siglo, Jehová okichiuj ika Isaías makijto ika kinotlatkitiskiaj Babilonia. Isaías hasta okijto ika akin kinotlatkitiskia itoka yeskia Ciro, niman noijki okijto kenon kinotlatkitiskia yejon ueyikalpan (Is. 44:27-45:2). Noijki okijto ika sakin kixoxotoniskiaj Babilonia niman ika xok yakaj ompa chantiskia (Is. 13:19, 20). Niman nochi  ijkon onochiuj. Maski Babilonia melak ueyixtoya, medos niman persas okinotlatkitijkej ipan xiuitl 539 ijkuak xpeuaya xiuitl 1, niman aman xok yakaj ompa chanti. (Xkita video Biblia yokijtoka tlenon ipan nochiuaskia Babilonia, ipan punto 5 tlamachtijli 3 itech amoxtli ¡Nochipa uelis tiyolpakis!).

11. ¿Kenon inochiujtika Daniel 2:41-43?

¹¹ Teotlajtoltin tlen Biblia kinteneua xsan yeuejkaui onochiujkej. Ipan yejuin tonaltin noijki tikitaj kenon nochiujtokej seki teotlajtoltin. San matontlanemilikan itech teotlajtojli tlen okijkuilo Daniel itech se ueyixtika tekiuaj: Reino Unido niman Estados Unidos (xpoua Daniel 2:41-43). Teotlajtojli kijtoua ika maski yejuin tekiuaj “chikauak yes ken hierro, no xkojtik yes kenon tlalajmojli [noso sokitl]”. Niman yejuin teotlajtojli kema ijkon nochiujtika. Yejuin ome países otetlankej ijkuak opanok ome guerras ipan nochi tlaltikpaktli, niman hasta aman kipiyaj miyek armas niman soldados. Ika yejon, nesi ika yejuamej melak chikaujtokej ijkon ken hierro. San ika, yejuin países no xkojtikej ken sokitl pampa xuelij tlayekanaj ijkon ken yejuamej kinekiskiaj. Tlaltikpakchanejkej akin chantij ipan yejon países kimixnamikij tekiuajkej pampa xkuelitaj ken tlayekanaj niman kichiuaj marchas pampa xkuelitaj tlen kichiuaj empresas. Xiuejkaui, se ixtlamatki akin kita kenon tlayekanaj países okijto: “Estados Unidos melak xeliujtika xijkon ken okseki países pampa akin ompa chantij xkuelitaj kenon tlayekana tekiuaj”. ¿Niman tlenon panoua Reino Unido? Ipan yejuin país sekimej kinekij nopaleuiskej imiuan países akin nemij ipan Unión Europea niman oksekimej xkinekij imiuan nopaleuiskej. Ken tikitaj, yejuin país melak xeliujtika ijkon ken Estados Unidos. Ika yejon, kemantika yejuin ueyixtika tekiuaj, Reino Unido niman Estados Unidos, ouijtika kita kimatis tlenon kichiuas.

12. ¿Tlenon tikmatstokej pampa tikitaj ika yonochiujkej seki teotlajtoltin?

¹² Miyek teotlajtoltin tlen onka ipan Biblia yonochiujkej, yejon techpaleuiya matikmatstokan ika tlen Jehová yokijto kema nochiuas. Tomachiliaj ijkon ken se salmista akin okijli Jehová: “Sanoyej nikneki para xnechmakixti; nochi notlamachalis yoniktlalij ipan motlajtoltsin” (Sal. 119:81). Jehová sajnoye techtlasojtla, ika yejon, ipan Biblia yejua techijlia ika tikpiyaskej “sanoyej kuajli tlamachalistli” (Jer. 29:11). Maski tlaltikpakchanejkej kinekiskej tlayektlaliskej, xueliskej. San Jehová uelis tlayektlalis pampa yejua ijkon yokijto. Kuakon más matomachtikan itech teotlajtoltin tlen uajlauej ipan Biblia, ijkon, más titlaneltokaskej itech iTlajtol toTajtsin.

13. ¿Tleka noijki uelis titlaneltokaskej itech Biblia? (Salmo 119:66, 138).

¹³ Noijki uelis titlaneltokaskej itech Biblia pampa tlen ompa kijtoua melak tepaleui (xpoua Salmo 119:66, 138). San matikonteneuakan yejuin: miyekej akin kinekiyaj nokauaskej, aman san sekan nemij niman ika inyojlo nemij pampa okichiujkej tlen Biblia kijtoua. Niman inkoneuan noijki ika inyojlo nemij pampa kintlasojtlaj niman kintlajpiyaj (Efes. 5:22-29).

14. ¿Tlenon techititia ika Biblia techpaleuiya matopatlakan?

¹⁴ Tlen kijtoua Biblia uelis kinpaleuis manopatlakan akin kichiuaj tlen melak xkuajli. Matitlajtokan itech Jack. c Yejua tsauktoya, niman kimiktiskiaj pampa okichiujka tlen melak xkuajli. Kampa tsauktoya noijki nemiyaj  sekimej akin kinmiktiskiaj ipampa tlen okichiujkaj. San ika, san Jack más kimakasiyaj pampa melak xkuajli tlen yokichiujka. Se tonajli, yejua onotlali kampa tokniuan temachtijtoyaj itech Biblia. Jack melak okuelitak kenon kualtsin tenotsayaj tokniuan ijkuak temachtijtoyaj, ika yejon, yejua noijki okinek makimachtikan. Yejua melak opeuj nopatla ijkuak kichiujtiaya tlen ueltiaya ipan Biblia. Sakin, opeuj tenojnotsa niman onoapolakti. Yejua melak kuelitaya kinnojnotsas akin imiuan tsauktoya itech iTekiuajyo toTajtsin, niman hasta okinpaleui nauimej tlakamej makixmatikan Jehová. Ijkuak ikimiktiskiaj, Jack melak yonopatlaka. Se iabogado okijto: “Ikipiya 20 xiuitl ika onikixmat Jack niman nikita ika melak yonopatlak. Tlen okimachtijkej iteixpantijkauan Jehová melak okipaleui”. Maski Jack okimiktijkej, tlen okichiuj techititia ika uelis titlaneltokaskej itech iTlajtol toTajtsin niman ika uelis techpaleuis matopatlakan (Is. 11:6-9).

15. ¿Tleka akin tiktekichiuiliaj Jehová xtiijkomej ken akin xkitekichiuiliaj? (Xkita tlaixkopinajli).

¹⁵ Akin tiktekichiuiliaj Jehová kuajli touikaj niman tiyolseujtokej pampa tikchiuaj tlen kijtoua Biblia (Juan 13:35; 1 Cor. 1:10). Miyekej nimantsin kitaj kenon tejuamej kuajli touikaj pampa ipan yejuin tonaltin xok ijkon nochiua. Miyekej xexeliujtokej ipampa política, ipampa tomin noso kinchikoitaj akin xinchanikniuan. Jean, se telpochtli akin ualeua África, nimantsin okitak ika akin nemij ipan ikalpan Jehová kuajli nouikaj. Ijkuak opeuj se guerra kampa chanti, yejua noijki oteixnamikito. San ika, sakin ocholoj ipan okse país, niman ompa okimixmat iteixpantijkauan Jehová. Jean kijtoua: “Oniuel ika akin yemelak kitekichiuiliaj toTajtsin xnokalaktiaj ipan política niman xnotlauelitaj, yej notlasojtlaj”. Noijki kijtoua: “Niknektoya niteixnamikis niman ijkon nikpaleuis nopaís, san ika, ijkuak onikixmat Jehová, oniknek yejua nikpaleuis niman niktekichiuilis”. Yejuin telpochtli melak  onopatlak. Aman yejua xok kimixnamiki tlaltikpakchanejkej akin xichanikniuan, yejua nochimej kinnojnotsa itech yolseuilistli tlen kijtoua Biblia. Kuajli tikitaj ika tlen kijtoua Biblia melak miyekej yokinpaleui. Yejon techititia ika uelis titlaneltokaskej itech iTlajtol toTajtsin.

16. ¿Tleka melak noneki más matitlaneltokakan itech iTlajtol toTajtsin?

¹⁶ Yejuin tlaltikpaktli más ijtlakaujtias, niman más ouijtika tikitaskej titlaneltokaskej itech Biblia. Kanaj tlaltikpakchanejkej techijliskej ika tlen kijtoua Biblia xmelauak niman ika Jehová xokitlali “tekitketl” yolmelauak niman tlamachilise para makiyekana ikalpan. San ika, tla tikneltokaj ika iTlajtol toTajtsin kijtoua tlen melauak, xtechkajkayauaskej. Noijki tiknektoskej nochipa tiktlakamatiskej itlanauatiluan Jehová (Sal. 119:112). Xtipinauiskej tikinnojnotsaskej oksekimej itech Biblia niman tikimijliskej makichiuakan tlen ompa uajlauj (Sal. 119:46). Noijki, titlaxikoskej “ikan miyek ijyouilistli niman pakilistli” ijkuak tikixnamikiskej tlen melak ouijtika, ken ijkuak techtlaueltokaskej (Col. 1:11; Sal. 119:143, 157).

17. ¿Tlenon techilnamiktis texto del año 2023?

¹⁷ Melak tiktlasojkamachiliaj Jehová pampa otechkauili matikixmatikan. Tlen yotiuelkej ipan iTlajtoltsin techpaleuiya matiyolseujtokan niman itech matitlaneltokakan. Noijki techititia kenon uelis kuajli tinemiskej ipan yejuin tlaltikpaktli kampa miyekej xika inyojlo nemij pampa xkimatij tlenon kichiuaskej. Biblia techijlia ika melak kualtsin tinemiskej ijkuak techyekanas iTekiuajyo toTajtsin. Texto del año 2023 techpaleuis nochipa matikneltokakan ika iTlajtoltsin toTajtsin yejua tlen melauak (Sal. 119:160).