1. ¿Kenon tiknemilia tlachia Jehová?

 ¿KEMANTIKA yotiknemilijka kenon tlachia Jehová? ¿Tlenon tiknemilia itech Jehová ijkuak tiknotsa? Maski xueli tikitaj, Biblia miyek kijtoua itech kenon yejua. Ompa kitokayotia ken akin “techtlauiluiya niman techmanauiya”. Noijki kitokayotia “tlitl yejuan ueli nochi kitlatia” (Sal. 84:11; Heb. 12:29). Ipan se tlatlachalistli, teotlajtoketl Ezequiel okijto ika Jehová petlaniya ken se tepostli, ika kampa yeuatoya katka ken on tetl zafiro niman ika onkatka se akosamalotl (Ezeq. 1:​26-28). Tla titlanemiliaj itech Jehová, kanaj techmojkatlachialtis kenon yejua, niman kanaj tiknemiliskej ika xtechnamiki tikixmatiskej.

2. ¿Tleka sekimej ouijtika kitaj nonisiuiskej itech toTajtsin?

² Kanaj xueli tikneltokaj ika Jehová techtlasojtla pampa xueli tikitaj noso pampa yotikixnamijkej miyek tlen xkuajli. Kemantika tiknemiliaj ika Jehová xtechtlasojtla pampa totajuan xotechtlasojtlakej. San ika, Jehová kasikamati kenon tomachiliaj niman kimatstika ika melak otechijtlako nochi tlen otikixnamijkej. Niman yejua kineki matikasikamatikan ika techtlasojtla, ika yejon, yokitlali ipan iTlajtol nochi tlen kualtsin kichiua.

3. ¿Tleka titlajtoskej itech Jehová niman itech itlasojtlalis?

 ³ Jehová noixmati ken “tetlajsojtlalistli” (1 Juan 4:8). Nochi tlen yejua kichiua, kichiua pampa tetlasojtla. Xakaj tetlasojtla ijkon ken Jehová pampa yejua hasta kintlasojtla akin xkitlasojtlaj (Mat. 5:​44, 45). Ipan yejuin tlamachtijli, titlajtoskej itech Jehová niman itech itlasojtlalis. Ijkuak más tikixmatstiaskej, más tiktlasojtlatiaskej.

JEHOVÁ MELAK TECHTLASOJTLA

4. ¿Kenon timomachilia ijkuak tiknemilia ika Jehová melak teiknelia? (Noijki xkita tlaixkopinajli).

⁴ “ToTEKO sanoye [ . . . ] teikneliani” (Sant. 5:11). Biblia kijtoua ika yejua ken se nantli akin melak tetlasojtla (Is. 66:​12, 13). Matontlanemilikan itech se nantli akin kitlajpiya niman kiknelia ikonetsin. Yejua kinapaloua niman kualtsin kinotsa. Ijkuak konetsintli choka noso itlaj kikokoua, yejua nimantsin konta niman kitlakaualtia. Noijki ijkon, Jehová nochipa touan nemis ijkuak tajmantoskej. Se salmista okijto: “Ijkuak sa tlajtlamach ika ninotenmatiya, tejua otinechyoltlalij, niman otinechyolpaktij” (Sal. 94:19).

5. ¿Tlenon tiknemilia ijkuak tijkaki ika Jehová nochipa mitstlasojtlas?

⁵ Jehová yolmelajki (Sal. 103:8). Yejua nochipa techtlasojtla maski topopolouaj. Israelitas miyekpa kiyolkokouayaj Jehová, san ika, ijkuak noyolkuepayaj, yejua kimititiaya ika ok kintlasojtlaya. Sejpatipan okijli ikalpan: “Sanoyej nemechpatiojkaita, nemechtlajsojkaita niman nemechtlajsojtla” (Is. 43:​4, 5). Niman Jehová xnopatla. Uelis kuajli tikmatstoskej ika tejuamej noijki ijkon techtlasojtla. Maski tla tikchiuaj se ueyi tlajtlakojli, yejua xtechkauas. Tla toyolkuepaj niman itech topaleuiyaj, yejua techtlapopoluis niman ok techtlasojtlas (Is. 55:7). Biblia kijtoua ika ijkuak Jehová techtlapopoluiya, noijki kichiua matiyolseujtokan (Hech. 3:19).

6. ¿Tlenon techmachtia Zacarías 2:8 itech Jehová?

⁶ (Xpoua Zacarías 2:​8, TNM). a Jehová techita ken ixtololojuan. Toixtololo melak maluijli niman melak tepaleuiya ipan  totlalnakayo. Ika yejon, Jehová kentla kijtoskia: “Ijkuak yakaj mexchiuilia tlen xkuajli, yeskia kentla nejua nexchiuilijtoskia”. Pampa Jehová techtlasojtla, kajmana tlen tikmachiliaj, niman kineki techtlajpiyas. Ijkuak titlajyouiyaj, yejua noijki tlajyouiya. Ika yejon, uelis tikijliskej: “Xnechejeua ken itlaj mixtlilijkayotsin [noso moixtololoj]” (Sal. 17:8).

7. ¿Tleka noneki tikneltokaskej ika Jehová kema techtlasojtla?

⁷ Jehová kineki xneltoka ika yejua mitstlasojtla. Yemelak, kanaj ipampa nochi tlen tikixnamiki, uelis tiknemilis ika yejua xmitstlasojtla. Kuakon, ¿tlenon mitspaleuis xneltoka ika yejua mitstlasojtla? Tla tikita kenon Jehová kitlasojtla Jesús, kenon kintlasojtla tlapejpeniltin niman kenon techtlasojtla tejuamej. Niman yejon tlen aman tikitaskej.

JEHOVÁ TECHITITIA IKA TECHTLASOJTLA

8. ¿Tleka Jesús kuajli kimatstoya ika iTaj melak kitlasojtlaya?

⁸ Jehová melak youejkauj iuan nemi Jesús, ika yejon, yejuamej melak notlasojtlaj. Ipan Mateo 17:​5, Jehová okijto ika melak kitlasojtla Jesús. Jehová ueliskia san kijtos ika Jesús melak kiyolpaktiaya niman ika melak kiyolpaktiskia nochi tlen sakin kichiuaskia, san ika, yejua kinekiya matikmatikan ika melak kitlasojtlaya. Ika yejon, yejua okijto: “Yejua notlajsojkaKoneu” (Efes. 1:7). Jesús miyekpa okijto ika iTaj melak kitlasojtlaya pampa yejua kuajli kimatstoya yejon (Juan 3:35; 10:17; 17:24).

9. ¿Kenon Jehová kimititia tlapejpeniltin ika melak kintlasojtla? (Romanos 5:5)

⁹ Jehová noijki kimititia tlapejpeniltin ika kintlasojtla (xpoua Romanos 5:5). Ika tlajtojli griego, yejuin tlaxelojli teasikamachiltia ika Jehová melak kintlasojtla tlapejpeniltin pampa kijtoua ika itlasojtlalis yeskia ken se atentli kampa chikauak notlalojtika atl. Niman tlapejpeniltin kuajli kimatstokej yejon (Jud. 1). Yejuamej nomachiliaj ijkon ken okijto apóstol Juan: “Xmatikan kenijki sanoyej techtlajsojtla Dios toTajtsin, hasta techtokayotiaj tiikoneuan Dios, niman melauak tiikoneuan” (1 Juan 3:1). San ika ¿Jehová san kintlasojtla tlapejpeniltin? Ka, amantsin tikitaskej kenon Jehová kimititia nochimej itekipanojkauan ika kintlasojtla.

10. ¿Kenon Jehová okiteititi ika melak mitstlasojtla?

¹⁰ Jehová otechititi ika melak techtlasojtla ijkuak okitemakak iKonetsin topampa (Juan 3:16; Rom. 5:8). Yejua okitekauili mamiki iKoneuj niman ijkon uelis techintlapopoluilis totlajtlakoluan niman uelis iuan touikaskej (1 Juan 4:10). Ijkuak más titlanemiliaj itech tlen Jehová niman Jesús okichiujkej topampa, más tikasikamatij kenon melak techtlasojtlaj (Gál. 2:20). Jehová xakaj okichiualti makitemaka tlen más patioj kipiaya, iKoneuj, san ika, okitekauili makitlajyouiltikan niman makimiktikan pampa melak techtlasojtla.

11. ¿Tlenon techmachtia Jeremías 31:3?

¹¹ Ken yotikitakej, Jehová xsan kimachilia ika techtlasojtla, yejua noijki techititia (xpoua Jeremías 31:3). Yejua otechuajuikak ipan ikalpan pampa techtlasojtla (noijki xkita Deuteronomio 7:​7, 8). Niman xakaj uelis techxelos itech itetlasojtlalis tlen techpilia (Rom. 8:​38, 39). ¿Tejua kenon timomachilia ijkuak titlanemilia itech yejuin? Ipan Salmo 23, tikitaskej ika David kimatstoya kenon Jehová kitlasojtlaya, niman yejon okipaleui matlaxiko. Noijki tikitaskej kenon techpaleuis tla xtikilkauaj kenon Jehová techtlasojtla.

 ¿KENON TIMOMACHILIA IJKUAK TIKNEMILIA KENON MELAK MITSTLASOJTLA JEHOVÁ?

12. ¿Tlenon okijto David ipan Salmo 23?

¹² (Xpoua Salmo 23:​1-6). Ipan Salmo 23, David okijto ika kineltokaya ika Jehová kitlasojtlaya niman ika kitlajpiaya. Noijki okijto ika Jehová katka ken itlajpixkauj, niman kenon kuajli iuan nouikaya. David kimatstoya ika xueliskia ipan nochiuas tlen xkuajli pampa Jehová kiyekanaya, niman yejua nochipa itech nopaleuiaya. Kimatstoya ika Jehová nochipa kitlasojtlaskia. Matikitakan tleka okijto ika tlaneltokaya itech toTajtsin.

13. ¿Tleka David kimatstoya ika Jehová kitlajpiaya?

¹³ “Xitlaj nechpoloua”. David kimatstoya ika Jehová kitlajpiaya pampa nochipa kimakaya tlen kipolouaya. Noijki kimatstoya ika kiyolpaktiaya niman ika iuan nouikaya, ika yejon, David kineltokaya ika maski san tlenon ipan panoskia, Jehová kitaskia maka itlaj makipolo. Kuajli kimatstoya ika itlasojtlalis Jehová más ueyi katka xijkon ken nochi tlen kajmanaya, niman yejon kichiuaya melak mayolpaki (Sal. 16:11).

14. ¿Kenon Jehová techititia ika techtlasojtla? Xkijto se neskayotl.

¹⁴ Jehová nochipa techtlajpiya, niman más ijkuak tikixnamikij tlen xkuajli. Matikitakan tlen ipan onochiuj Claire, b akin ikuika ipantsin 20 xiuitl ika nemi Betel. Yejua kijtoua kenon onomachili ijkuak ichanejkauan opeuj kixnamikij miyek tlen ouijtika: itaj okajsik se kokolistli ipan itsontekon, ikniuj siuatl okikixtijkej itech tlanechikojli, xok okipixkej tekitl niman banco okinkuili inkal. ¿Kenon Jehová okimititi ichanejkauan Claire  ika kintlajpixtoya? Claire kijtoua: “Jehová melak okinpaleui nochanejkauan niman nochipa okinmakak tlen kinpolouaya. Xkeman nikilkauas kenon Jehová onechititi ika melak nechtlasojtla. Ijkuak nikilnamiki kenon melak otechpaleui, nechpaleuiya manitlaxiko ijkuak itlaj nikixnamiki”.

15. ¿Tleka David oksejpa onoyolchikauj? (Noijki xkita tlaixkopinajli).

¹⁵ “Nechyolchikajtiu”. David miyek kixnamiktoya tlen kichiuaya maajmankamiki (Sal. 18:​4-6). San ika, pampa kitaya kenon Jehová melak kitlasojtlaya, okipaleui oksejpa mayolchikaui. David okimachili ika Jehová kuikaya “kampa tlaselistok ikan sakatl” niman “kampa on atl notlaloua yemanki”. Yejon okipaleui oksejpa mayolchikaui niman makitekichiuili Jehová ika nochi iyojlo (Sal. 18:​28-32).

16. ¿Tejua kenon yomitskojtili Jehová?

¹⁶ Ijkuak tikixnamikiskej tlen ouijtika, uelis ijkin tikijtoskej: “Itetlajsojtlalis toTEKO niman iteiknelilis xkaman tlamiskej” (Lam. 3:22; Col. 1:11). Matikitakan tlen ipan onochiuj Rachel. Yejua melak onoyolkoko ijkuak ipan pandemia iueuentsin okikauj niman okitlalkaui Jehová. ¿Kenon okipaleui Jehová? Yejua kijtoua: “Jehová okichiuj ika melak manechtlasojtlakan. Onechinmakak miyekej noamigos akin nouan nemiyaj. Yejuamej nechitkiliayaj tlakuajli, nechtitlaniliayaj mensajes niman nechinmijkuilouiliayaj seki tlaxeloltin itech Biblia tlen melak nechyolchikauayaj. Noijki nechixuetskiliayaj niman nechijliayaj ika Jehová nouan nemiya. Niktlasojkamachilia Jehová pampa tokniuan melak nechtlasojtlaj”.

17. ¿Tleka David ouel okijto: “Xitlaj ika ninomojtis”?

¹⁷ “Xitlaj ika ninomojtis, pampa tejua noTEKO nouan tinemi”. Miyekej kitlauelitayaj David niman kinekiyaj kimiktiskej. San ika, yejua kimatstoya ika Jehová kitlasojtlaya niman ika kitlajpiyaskia. Kimachiliaya kentla tla Jehová inakastlan nemiskia. Ika yejon, ijkin onokuikati: “Onechmanauij de nochi nonemojtil” (Sal. 34:4). Maski kemantika David melak nomojtiaya, yejua ouel otlaxiko pampa kimatstoya ika Jehová melak kitlasojtlaya.

18. ¿Kenon Jehová techititia ika techtlasojtla ijkuak tikixnamikij tlen techmojtia?

¹⁸ ¿Kenon techpaleuiya tikmatiskej ika Jehová techtlasojtla ijkuak tikixnamikij tlen techmojtia? Se precursora akin itoka Susi kijtoua kenon onomachili yejua niman iueuentsin  ijkuak inkoneuj onomikti: “Ijkuak mopan nochiuas tlen xkuajli, melak xkuajli timomachilis niman mitsmojtis oksejpa itlaj xkuajli mopan manochiua. San ika, otikitakej kenon Jehová melak techtlasojtla pampa otechtlajpix niman xotechkauj”. Rachel, akin otikteneujkej ipan párrafo 16, kijtoua: “Se yeuajli, melak ninajmantoya niman melak ninomojtitoya. Nikmachiliaya ika xok ueliskia nitlaxikos niman melak nichokatoya. Ijkuakon, oniknots toTajtsin niman nimantsin onikmachili kenon yejua onechyolseui, kentla nechnapaloskia ijkon ken se nantli kinapaloua ikonetsin. Sakin ouel onikoch. Xkeman nikilkauas kenon Jehová onechpaleui”. Se tlayekanketl, akin itoka Tasos, tsauktoya naui xiuitl pampa xokinek tlapaleuis ipan ejército, san ika, Jehová nochipa okipaleui. Yejua kijtoua: “Jehová onechmakak nochi tlen nechpolouaya niman yejon okichiuj más itech manitlaneltoka. Noijki onechmakak iespíritu niman ijkon maniyolpaki maski nitsauktoya. Yejon onechititi ika ijkuak más nitlaneltokaya itech Jehová, más nikitaya kenon yejua melak nechtlasojtlaya. Ika yejon, maski nitsauktoya, oninochiuj precursor regular”.

MATIKNISIUIKAN TOTAJTSIN AKIN MELAK TETLASOJTLA

19. a) ¿Kenon tikinchiuaskej toteoyouan tla tikmatij ika Jehová techtlasojtla? b) ¿Katlejua tlaxeloltin tlen tlajtouaj itech itlasojtlalis Jehová más ajsij ipan moyojlo? (Xkita recuadro “ Tlaxeloltin tlen techpaleuiyaj matikitakan ika Jehová melak techtlasojtla”).

¹⁹ Tlen inpan onochiuj tokniuan akin otikinteneujkej techititia ika Jehová yejua “tetlajsojtlalistli” (2 Cor. 13:11). Jehová najmana topampa. Niman kuajli tikmatstokej ika yejua techmaka “itetlajsojtlalis” (Sal. 32:10). Ijkuak tiknemiliaj kenon yejua melak techtlasojtla, más itech titlaneltokaj niman más itech tonisiuiyaj. Ika yejon, matiknotsakan niman matikijlikan ika tiknekij nochipa matechtlasojtla. Uelis tikijliskej nochi tlen techajmana, niman kuajli matikmatstokan ika yejua techasikamatis niman techpaleuis (Sal. 145:​18, 19).

20. ¿Tleka itlasojtlalis Jehová kichiua itech matonisiuikan?

²⁰ Itlasojtlalis Jehová yeskia ken se tlitl tlen techtotonia ijkuak seua, pampa kichiua kuajli matomachilikan. Itlasojtlalis Jehová sajnoye kojtik niman teiknelia. ¡Sanoyej tiyolpakij pampa Jehová melak techtlasojtla! Nochipa ijkin matikijtokan: “Niktlasojtla Jehová” (Sal. 116:1).