1, 2. ¿Tlenon ueliskia tikixnamikiskej akin tiktekichiuiliaj Jehová?

 SAN totoka uelis itlaj panos tlen kipatlas nochi tonemilis. Matitlajtokan itech sekimej tokniuan akin ijkon inpan opanok. Se tonajli se doctor okijli se tokniuj akin itoka Luis a ika kipiaya cáncer niman ika sa nemiskia seki metstin. Tokniuj Monika chikauak kitekichiuilijtoya Jehová iuan iueuentsin akin tlayekanketl katka, san ika, se tonajli yejua okimat ika iueuentsin san ichtaka kichiujtoya tlen Jehová xkuelita. Olivia, akin xinonamiktia, ononek kikauas ichan pampa uajnonisiuijtiaya se chikauak ajakakiyaujtli. Ijkuak onokuep ichan, okitak ika ikal oxoxoton. Innemilis yejuin tokniuan san totoka onopatlak. ¿Noijki ijkon mopan yonochiujka?

² Akin tiktekichiuiliaj Jehová noijki tikualoj niman tikixnamikij tlen ouijtika. Noijki techtlaueltokaj akin kitlauelitaj ikalpan toTajtsin. Yemelak, Jehová xkichiua maka matikixnamikikan tlen xkuajli, san ika, kema yokijto ika techpaleuis (Is. 41:10). Tla yejua touan nemi, uelis tiyolpakiskej, tiktlapejpeniskej tlen kuajli niman itech timelajkanemiskej maski san tlenon matikixnamikikan. Ipan yejuin tlamachtijli tikitaskej naui tlemach tlen Jehová kichiua niman ijkon techpaleuis. Noijki tikitaskej  tlenon noneki tikchiuaskej niman ijkon topaleuiskej ika tlen techmaka.

JEHOVÁ TECHTLAJPIYAS

3. ¿Tlenon ouijtika tikitaj tikchiuaskej ijkuak itlaj tikixnamikij?

³ Tla tikixnamiktokej tlen ouijtika, kanaj xueli kuajli titlanemiliaj niman xueli tiktlapejpeniaj tlen tikchiuaskej. ¿Tleka? Pampa tlen techyolkokoua niman tlen techajmana techixtlapachoua niman xok tikmatij tlenon tikchiuaskej. Ijkon onomachilijkej tokniuan siuamej akin otikinteneujkej ipan kachtopa párrafo. Tokniuj Olivia kijtoua: “Ijkuak ajakakiyaujtli okixoxoton nokal, xok nikmatiya tlenon nikchiuas”. Niman tokniuj Monika kijtoua kenon onomachili ijkuak iueuentsin okikajkayauj, yejua kijtoua: “Xniknemiliaya tla noueuentsin ijkon nexchiuiliskia, nikmachiliaya kentla tla nechyoltsopiniskiaj ika se cuchillo. Hasta xok niueliya nitekichiuaya, xkeman oniknemili tla ijkon nopan nochiuaskia”. ¿Kenon yokijto Jehová techpaleuis ijkuak tikixnamikiskej itlaj tlen tikmachiliskej ika xuelis tikxikoskej?

4. ¿Tlenon yotechijli Jehová ipan Filipenses 4:​6, 7?

⁴ Tlen kichiua Jehová. Yejua yokijto ika techmakas “yolseuilistli” (xpoua Filipenses 4:​6, 7). Pampa touikaj iuan Jehová, tikpiyaj yolseuilistli tlen kichiua kuajli matomachilikan. Yejuin “yolseuilistli más ueyi yejuan xakaj uelis kajsikamatis”. ¿Kemantika yotikmachilijka ika sakin ika otiknots toTajtsin hasta otiuajyolseuj? Yejon “yolseuilistli” tlen toTajtsin techmaka.

5. ¿Kenon yolseuilistli tlen techmaka toTajtsin kitlajpiya totlamachilis niman toyojlo?

⁵ Filipenses 4:7 noijki kijtoua ika “yolseuilistli” tlen toTajtsin techmaka “kejyeuas” toyojlo niman totlamachilis. Tlajtojli “kejyeuas” notekitiltiaya ijkuak soldados kitlajpiayaj se ueyi kalpan para maka makixnamikikan. Akin chantiyaj ipan yejon ueyi kalpan, ueliyaj kuajli kochiyaj pampa kimatstoyaj ika soldados kintlajpixtoyaj. Noijki ijkon, ijkuak “yolseuilistli” tlen toTajtsin techmaka kitlajpiya toyojlo niman totlamachilis, más kuajli tomachiliaj niman tiyolseuij (Sal. 4:8). Maski tlen tikixnamikij xnimantsin popoliui, ueli achijtsin tiuajyolseuij, ijkon ken ipan opanok Ana (1 Sam. 1:​16-18). Niman yejon techpaleuiya más kuajli matitlanemilikan niman kuajli matiktlapejpenikan tlen tikchiuaskej.

6. ¿Tlenon noneki tikchiuaskej niman ijkon matechyolseui toTajtsin? (Noijki xkita tlaixkopinajli).

⁶ Tlen noneki tikchiuaskej. Tla yakaj akin chantiya ipan ueyi kalpan kinekiya ika se soldado makipaleui, nonekiya kitlajtlanilis. Noijki ijkon, tla tiknekij matechpaleui Jehová, noneki tiktlajtlaniliskej. Matikchiuilikan  teoyotl hasta ijkuak tikmachiliskej ika Jehová yotechyolseui (Luc. 11:9; 1 Tes. 5:17). Ijkon okichiuj Luis niman isiuauj, Ana, ijkuak okimijlikej ika Luis san nemiskia seki metstin. Tokniuj Luis okijto: “Ijkuak ijkon mopan nochiujtos nion xtikmatis kenon tiktlapejpenis mamitspajtikan, san ika, teoyotl melak yotechpaleui matiyolseujtokan”. Yejuin tokniuan okijtokej ika miyekpa kitlajtlaniliayaj toTajtsin makinyolseui, makitlajpiya inyojlo niman makinmaka tlamachilistli para uelis kitlapejpeniskej tlen kuajli. Yejuamej okimachilijkej ika Jehová okinkak. Tla tejua tikixnamiktok itlaj tlen melak ouijtika, maka xkajkaua ika tiknotsa toTajtsin. Tikitas ika yejua mitsmakas yolseuilistli tlen kitlajpiyas moyojlo niman motlamachilis (Rom. 12:12).

JEHOVÁ TECHPALEUIS KUAJLI MATITLANEMILIKAN

7. ¿Kenon tomachiliaj ijkuak tikixnamikij tlen ouijtika?

⁷ Tla tikixnamiktokej tlen ouijtika, kanaj xkuajli titlanemiliaj nion xueli itlaj kuajli tikchiuaj. Kanaj tomachiliaj ken se barco tlen yopoliuj itlajkotian mar niman iakoxonajlo chikauak kimailia. Ijkon onomachili tokniuj Ana ijkuak omik iueuetsin, yejua kijtoua: “Melak ninajmanaya ipampa tlen nopan nochiujtoya, niman kemantika melak nikualaniya pampa Luis xok nouan nemiya”. Kemantika yejua san iselti nomachiliaya niman tlauelmikiya pampa xkimatiya kenon kichiuas tlen Luis kichiuaya. Yejua kimachiliaya kentla nemiskia itlajkotian mar ipan se ueyi ajakakiyaujtli. ¿Kenon techpaleuiya Jehová ijkuak xueli kuajli titlanemiliaj?

8. ¿Tlenon yotechijli Jehová ipan 1 Pedro 5:10?

⁸ Tlen kichiua Jehová. Yejua yokijto ika techmelajkapiyas (xpoua 1 Pedro 5:10). Tla se barco panoua kampa chikauak ajakakiyaujtika, uelis chikauak peuas noolinis. Miyek barcos kipiyaj innajnakastlan tlen kinpaleuiya maka melak manolinikan. Niman pampa barco xsanoyej noolinia, akin ompa yauej xnomojtiaj niman más kuajli nomachiliaj. Seki tlen kinpaleuiya barcos maka sanoyej manolinikan más kuajli tekitij tla xnoteltia barco. Noijki ijkon, tla tiknekij matechmelajkapiya Jehová ijkuak itlaj tikixnamikiskej, xnoneki toteltiskej noso xnoneki tijkajkauaskej ika tiktekichiuiliaj.

9. ¿Kenon techpaleuiya tlen ikalpan toTajtsin techmaka? (Noijki xkita tlaixkopinajli).

⁹ Tlen noneki tikchiuaskej. Ijkuak itlaj tikixnamikiskej, xnoneki tijkajkauaskej ika tikchikauaj totlaneltok. Yemelak, kanaj xok uelis tikchiuaskej tlen achto tikchiuayaj, san ika, matikilnamikikan ika Jehová techasikamati (noijki xkita Lucas 21:​1-4). Maka xkilkaua ika noneki tikxelos tiempo niman ijkon  moselti timomachtis niman titlanemilis itech nochi tlen ikalpan Jehová yotechmakak, ken tlamachtiltin niman videos tlen uelis techpaleuiskej kuajli matitlanemilikan. Tla tikneki tiknextis itlaj tlen tikneki mamitspaleui, uelis tiktekitiltis aplicación JW Library^®, Índice de las publicaciones Watch Tower niman amatlajkuilojli Tlen kinpaleuiya ika nomachtiaj iteixpantijkauan Jehová. Monika, akin yotikteneujkaj, kijtoua ika kintekitiltiaya nochi yejuin ijkuak peuaya najmanaya. Kemantika kitejtemouaya tlajtojli tlauejli, tlakajkayaualistli noso melajkayotl, niman kiamapouaya tlen kinextiaya hasta ijkuak más kuajli nomachiliaya. Monika kijtoua: “Ijkuak peuaya ninomachtiaya melak ninoyolkokojtoya. San ika, ijkuak nitlaamapouaya, nikmachiliaya ika Jehová nechasikamatiya niman ika nechyolseuijtoya. ¡Kentla nechnapaloskia!”. Jehová noijki uelis mitspaleuis xmelajkanemi niman kuajli xtlanemili hasta ijkuak mapano tlen tikixnamiktika (Sal. 119:​143, 144).

JEHOVÁ XTECHKAUAS

10. ¿Kanaj kenon uelis tomachiliskej ijkuak tikixnamikiskej tlen ouijtika?

¹⁰ Ijkuak tikixnamikij tlen ouijtika, kanaj tikmachiliaj ika xok tikojtikej niman ika xok kuajli titlanemiliaj. Kemantika uelis tomachiliskej ken yakaj akin chikauak notlalouaya, san ika, pampa onokoko, aman san yolik yauj. Kanaj xok más uelis tikchiuaskej tlen tikchiuayaj noso xok tiknekiskej tikchiuaskej tlen tikuelitayaj. Ijkon ken Elías, kanaj san tiknektoskej tikochtoskej (1 Rey. 19:​5-7). ¿Tlenon yokijto Jehová ika kichiuas topampa ijkuak ijkon tomachiliskej?

11. ¿Tlenon más kichiua Jehová niman ijkon techpaleuis? (Sal. 94:18).

¹¹ Tlen kichiua Jehová. Yejua yokijto ika techpaleuis (xpoua Salmo 94:18). Ijkuak yakaj akin notlaloua nokokoua, noneki yakaj makipaleui. Noijki ijkon, tejuamej noneki yakaj matechpaleui niman ijkon tiktekichiuiliskej Jehová. Yejua techijlia: “Nejua nemoTEKO Dios, nemechmayantiu. Nejua nemechilia: ‘Maka xmomojtikan. Nejua nemechpaleuiya’” (Is. 41:13). Ijkuak tekiuaj David okixnamik tlen ouijtika niman ijkuak itlauelikniuan kinekiyaj kimiktiskej, okitak ika Jehová iuan nemiya, yejua ika, ijkin okijli: “Tinechkitskia ikan ipoder moyekma” (Sal. 18:35). San ika ¿kenon techpaleuiya Jehová?

12. Tla melak xkuajli tomachiliaj, ¿akinomej uelis kintekitiltis Jehová niman ijkon techpaleuis?

¹² Jehová miyekpa kichiua ika oksekimej  matechpaleuikan niman ijkon techititis ika xtechkauas. Matikonteneuakan tlen ipan onochiuj David. Ijkuak yejua melak najmantoya, iamigo, Jonatán, okitato niman okiyolchikauato (1 Sam. 23:​16, 17). Niman ijkuak Elías melak xkuajli nomachiliaya, Jehová okitekitilti Eliseo niman ijkon makipaleui (1 Rey. 19:​16, 21; 2 Rey. 2:2). Ijkuak xkuajli tomachiliskej, Jehová uelis kintekitiltis tochanejkauan, toamigos noso tlayekankej para techpaleuis. Yemelak, ijkuak melak xkuajli tomachiliaj pampa itlaj tikixnamiktokej, tiknekiskiaj san toselti tinemiskej. Kuakon, ¿tlenon uelis tikchiuaskej para tokauiliskej matechpaleui Jehová?

13. ¿Tlenon noneki tikchiuaskej niman ijkon matechpaleui Jehová? (Noijki xkita tlaixkopinajli).

¹³ Tlen noneki tikchiuaskej. Maka matikintlalkauikan oksekimej. Ijkuak san toselti tinemij, san tiknemilijtokej tlen tikixnamiktokej. Niman yejon uelis kichiuas matiktlapejpenikan tlen xkuajli (Prov. 18:1). Yemelak, tinochimej kemantika tiknekij san toselti tinemiskej, más ijkuak tikixnamikij itlaj tlen melak teajman. San ika, tla nochipa toselti tinemij, tikteititijtoskiaj ika xtiknekij matechpaleui Jehová. Kuakon, maski ouijtika, noneki tokauiliskej matechpaleuikan tochanejkauan, toamigos niman tlayekankej. Matikilnamikikan ika Jehová kintekitiltijtika niman ijkon techititis ika touan nemi (Prov. 17:17; Is. 32:​1, 2).

JEHOVÁ TECHYOLSEUIS

14. ¿Tlenon uelis techmojtis?

¹⁴ Kanaj kemantika uelis melak tomojtiskej. Biblia kinteneua sekimej itekipanojkauan toTajtsin akin melak onomojtijkej pampa intlauelikniuan kintlaueltokayaj noso pampa itlaj kixnamiktoyaj (Sal. 18:4; 55:​1, 5). ¿Tejuamej tlenon tikixnamiktokej? ¿Techtlauelitaj akin imiuan tomachtiaj, akin imiuan titekitij, tochanejkauan noso gobiernos? ¿Yotechijlikej ika tikpiyaj se ueyi kokolistli tlen uelis techmiktis? Tla ijkon topan nochiujtok, kanaj tomachiliaj ken se konetl akin san iselti nemi. ¿Tlenon kichiua Jehová niman ijkon techpaleuis?

15. Ijkon ken kijtoua Salmo 94:​19, ¿tlenon yokijto Jehová kichiuas?

¹⁵ Tlen kichiua Jehová. Jehová techyolchikaua niman techyolseuiya (xpoua Salmo 94:19). Matontlanemilikan itech se ichpokatsin akin nomojtia niman xueli kochi pampa melak chikauak kiyaui niman chikauak tlakomoni. Kuakon, itaj uajlauj, kinapaloua niman  kiyolseuiya hasta ijkuak kochi. Maski ok chikauak kiyaui, yejon ichpokatsin kuajli nomachilia pampa itaj kinapalojtika. Noijki ijkon, ijkuak melak tomojtiskej, kanaj tiknekiskej matechnapalo toTajtsin akin nemi ne iluikak hasta ijkuak más kuajli tomachiliskej. ¿Tlenon noneki tikchiuaskej para matechyolseui Jehová?

16. ¿Tlenon noneki tikchiuaskej tla tiknekij ika Jehová matechyolseui? (Noijki xkita tlaixkopinajli).

¹⁶ Tlen noneki tikchiuaskej. Melak techpaleuis tla nochipa tikxelouaj tiempo niman ijkon tiknotsaskej Jehová niman tikamapouaskej iTlajtol (Sal. 77:​1, 12-14). Ijkon, ijkuak tikixnamikiskej itlaj tlen ouijtika, nimantsin tiktlajtlaniliskej matechpaleui toTajtsin akin nemi ne iluikak. Matikijlikan Jehová tlenon techajmana niman tlenon techmojtia niman matijkauilikan matechnankili niman matechyolchikaua ika iTlajtol (Sal. 119:28). Ijkuak tikixnamikiskej itlaj tlen ouijtika, tlen noijtoua ipan Biblia uelis melak techpaleuis, ken tlen kijtoua libro de Job, Salmos, Proverbios, niman tlen okijto Jesús ipan Mateo capítulo 6. Tla tejua tiknotsa Jehová niman tikamapoua iTlajtol, tikitas kenon mitsyolseuiya.

17. ¿Tlenon noneki tikmatstoskej?

¹⁷ Nochipa matikmatstokan ika maski san tlenon tikixnamikiskej, Jehová techpaleuis. Yejua xkeman san toselti techkauas (Sal. 23:4; 94:14). Matikilnamikikan ika yejua yokijto ika techtlajpiyas, techpaleuis kuajli matitlanemilikan, techyolseuis niman xkeman techkauas. Isaías okijli Jehová: “NoTEKO, tejua tikchiua para ma nemikan inyolika on yejuan xmitstlalkauiyaj, pampa yejuamej kitlaliaj inyojlo san tejua motech” (Is. 26:3). Kuakon, xtlaneltoka itech Jehová niman xkauili mamitspaleui. Tla ijkon tikchiua, uelis tikxikos maski san tlenon tikixnamikis.