1. ¿Tleka melak ueyi kijtosneki tonajli ijkuak tikilnamikij imikilis Cristo? (Lucas 22:​19, TNM; Lucas 22:20).

 AKIN tiktekichiuiliaj Jehová, tikitaj ika melak ueyi kijtosneki tonajli ijkuak tikilnamikij imikilis Cristo. San yejon tonajli otechnauati Jesús matikilnamikikan (xpoua Lucas 22:​19, TNM; a Lucas 22:20). Onka miyek tlemach tlen kichiua matiknekikan mayejko yejon tonajli. Matikitakan san seki.

2. ¿Tleka san tiknektokej tikpanoltiskej Conmemoración?

² Conmemoración techpaleuiya matitlanemilikan itech kenon melak ueyi kijtosneki tlen Jesús okichiuj topampa. Techilnamiktia seki tlemach tlen noneki tikchiuaskej niman ijkon tikteititiskej ika tiktlasojkamatij pampa Jesús onotemakak topampa (2 Cor. 5:​14, 15). Niman kichiua matinemikan imiuan tokniuan niman san sekan matoyolchikauakan (Rom. 1:12). Nochi xiujtin, miyekej akin youejkauj xok tenojnotsaj yauej ipan Conmemoración niman sekimej oksejpa kinekij nokuepaskej ipan ikalpan Jehová pampa kitaj kenon tokniuan kintlasojtlaj. Noijki, miyekej tlaltikpakchanejkej mojkatlachiaj ipampa tlen kitaj niman kikakij ipan Conmemoración niman peuaj nomachtiaj Biblia. Ipampa nochi yejuin, melak tikpatiojkaitaj Conmemoración.

3. ¿Tlenon tikitaj ijkuak nopanoltia Conmemoración? (Noijki xkita tlaixkopinajli).

³ Noijki, tiknekij mayejko Conmemoración pampa tikitaj kenon akin kitekichiuiliaj Jehová kuajli nouikaj. Ipan nochi tlaltikpaktli tosentlaliaj ijkuak ikalaktika tonaltsintli. Tinochimej tijkakij se tlamachtijli kampa kijtoua ika melak ueyi kijtosneki tlen Cristo okichiuj topampa, techpanoltiliaj pan niman vino, okpa tokuikatiaj niman nakpa tikijtouaj “amén” pampa nakpa  kichiuaj teoyotl. Ipan yejon tonajli, nochi tlanechikoltin ijkon kichiuaj. San matikonnemilikan kenon melak yolpakij Jehová niman Jesús ijkuak kitaj ika tikintlakaitaj.

4. ¿Tlenon tikitaskej ipan yejuin tlamachtijli?

⁴ Ipan yejuin tlamachtijli tiknankiliskej yejuin: ¿tlenon noneki tikchiuaskej niman ijkon tikyektlaliskej toyojlo achto yejkos Conmemoración?, ¿tlenon uelis tikchiuaskej niman ijkon oksekimej noijki makinpaleui Conmemoración? niman ¿kenon uelis tikinpaleuiskej akin youejkauj xok touan nosentlaliaj niman xok tenojnotsaj? Tlen tikitaskej techpaleuis ijkuak tikilnamikiskej imikilis Cristo.

¿TLENON NONEKI TIKCHIUASKEJ NIMAN IJKON TIKYEKTLALISKEJ TOYOJLO ACHTO YEJKOS CONMEMORACIÓN?

5. a) ¿Tleka melak noneki matitlanemilikan ipan tlaxtlauijli? (Salmo 49:​7, 8). b) Xteneua seki tlemach tlen otiuel itech video ¿Tleka omik Jesús?

⁵ Uelis tikyektlaliskej toyojlo tla titlanemiliaj itech kenon melak ueyi kijtosneki tlen Jesús okichiuj topampa. San toselti xkeman ueliskia tomakixtiskiaj itech tlajtlakojli niman mikilistli (xpoua Salmo 49:​7, 8; noijki xkita video ¿Tleka omik Jesús?). b Jehová okinek ika iKoneuj makitemaka inemilis topampa, niman melak ueyi kijtosneki tlen yejuamej okichiujkej (Rom. 6:23). Ijkuak más titlanemiliaj itech tlen Jehová niman Jesús okichiujkej topampa, más tikpatiojkaitaj tlaxtlauijli. Aman, matikitakan seki tlemach tlen Jehová niman Jesús okinejkej kichiuaskej topampa. Kachtopa tikitaskej tleka nonekiya se tlaxtlauijli.

6. ¿Tleka ononek se tlaxtlauijli?

⁶ Se tlaxtlauijli kijtosneki itlaj tlen noneki tiktlaxtlauas niman ijkon oksejpa tikpiyas tlen yotikpolojka. Kachtopa tlakatl akin toTajtsin okichijchiuj, Adán, xkipiaya tlajtlakojli. San ika, ijkuak otlajtlako, okipolo nemilistli para nochipa niman noijki okichiuj ika ikoneuan maka makipiyakan yejon tetlayokolijli. Jesús okitemakak inemilis tlen xkipiya tlajtlakojli niman ijkon oksejpa matikpiyakan tlen Adán yokipolojka. Ijkuak nemiya ipan tlaltikpaktli, Jesús “nion se tlajtlakojli xokichiu, nion okajkayau yakaj” (1 Ped. 2:22). Ijkuak Jesús omik, xkipiaya tlajtlakojli, kuakon inemilis tlen okitemakak san noijki katka ken inemilis Adán tlen xkipiaya tlajtlakojli (1 Cor. 15:45; 1 Tim. 2:6).

7. Xkijto seki tlen okixnamik Jesús.

⁷ Ijkuak Jesús nemiya ipan tlaltikpaktli, nochipa okitlakamat Jehová maski okixnamik tlen ouijtika. Ijkuak pitentsin katka, ononek kintlakamatis itajuan akin tlajtlakolejkej katkaj maski yejua xtlajtlakole katka (Luc. 2:51). Ijkuak telpochtli katka, kanaj ononek tlaxikos ijkuak oksekimej kijliayaj maka makintlakamati itajuan noso ika maka mamelajkanemi itech Jehová. Niman ijkuak iueyi katka, Jesús ononek kixikos ijkuak Satanás okitlatlatak pampa yejua xkinekiya mamelajkanemi itech Jehová (Mat. 4:​1-11). Satanás kinekiya ika Jesús matlajtlako niman ijkon maka manotemaka topampa.

8. ¿Tlenon más okixnamik Jesús?

⁸ Jesús okixiko miyek tlen xkuajli ijkuak otenojnots. Itlauelikniuan okitlaueltokakej niman okijlikej ika kimiktiskiaj (Luc. 4:​28, 29; 13:31). Ononek kixikos ken nopopolouayaj inomachtijkauan (Mar. 9:​33, 34). Ijkuak okitlajtlakolmakakej, okijlikej ika kimiktiskiaj, okitlajyouiltijkej niman okipijpinaujtikej. Sakin okipilojkej ijkon ken kinpilouayaj akin kichiuayaj tlen xkuajli (Heb. 12:​1-3). Niman ijkuak imikiskia, ononek san yejua tlaxikos pampa Jehová xok okitlajpix (Mat. 27:46). c

9. ¿Tlenon tikmachiliaj ijkuak titlanemiliaj itech tlen Jesús okichiuj topampa? (1 Pedro 1:8).

 ⁹ Kuajli nesi kenon Jesús melak ueyi otlatlaxtlauj niman ijkon techmakixtis. Ijkuak titlanemiliaj itech nochi tlen Jesús okinek kichiuas topampa, más tiktlasojtlaj (xpoua 1 Pedro 1:8).

10. ¿Tlenon ononek kixikos Jehová niman ijkon techmakixtis?

¹⁰ ¿Tlenon ononek kixikos Jehová ijkuak Jesús onotemakak ken tlaxtlauijli? Ken tikmatij, Jehová niman Jesús melak kuajli nouikaj (Prov. 8:30). Kuakon, matiknemilikan kenon onomachili Jehová ijkuak okitak tlenon kixnamiktoya Jesús ipan tlaltikpaktli. Tikmatstokej ika Jehová melak noyolkokouaya ijkuak kitaya kenon miyekej melak kitlauelitayaj niman kitlajyouiltiayaj iKoneuj.

11. ¿Tlenon techpaleuiya matikasikamatikan kenon onomachili Jehová ijkuak okimiktijkej Jesús?

¹¹ Tajtin akin yomik se inkoneuj kuajli kimatstokej ika yejon melak teyolkoko. Yemelak, tinochimej kuajli tikmatstokej ika oksejpa yoliuiskej akin yomijkej, san ika, yejon xkichiua ika maka sa matoyolkokokan ijkuak miki yakaj akin tiktlasojtlaj. Yejuin techpaleuiya matikasikamatikan kenon onomachili Jehová ipan xiuitl 33, ijkuak okitak kenon okitlajyouiltijkej niman okimiktijkej iKoneuj (Mat. 3:17). d

12. ¿Tlenon uelis tikchiuaskej achto ika nopanoltis Conmemoración?

¹² Achto ika panos Conmemoración matomachtikan itech tlen Jesús okichiuj topampa. ¿Kenon uelis tikchiuaskej yejuin? Ijkuak toselti tomachtiskej noso ijkuak tomachtiskej ken familia, xtekitilti Tlen kinpaleuiya ika nomachtiaj iteixpantijkauan Jehová noso okseki amatlajkuiloltin niman ijkon más tikmatis itech yejon. e Xkita tlen nopoua itech Biblia ijkuak noilnamiki imikilis Cristo tlen uajnestiuj ipan Nemilistli niman Tekitl ken Cristo. Tlen Tomachtiskej niman tlen Notekitiltis. Niman maka tikilkauas tikitas video tlen itoka “Tikueyichiuaj toTajtsin ika kualkan ijkuak tikpanoltiaj Conmemoración”. Tla tikyektlaliaj toyojlo ijkuak xiajsi yejon tonajli, uelis tikchiuaskej ika oksekimej noijki makinpaleui (Esd. 7:10).

¿TLENON UELIS TIKCHIUASKEJ NIMAN IJKON OKSEKIMEJ NOIJKI MAKINPALEUI CONMEMORACIÓN?

13. ¿Tlenon uelis tikchiuaskej niman ijkon oksekimej noijki makinpaleui Conmemoración?

¹³ ¿Tlenon uelis tikchiuaskej niman ijkon oksekimej noijki makinpaleui Conmemoración? Uelis tikimijliskej touan manosentlalikan. Maka san matikintemakakan invitaciones, noijki matikijkuilokan akinon tikuelitaskiaj tikimijliskej mauiyan Conmemoración. Ken  tochanejkauan, akin imiuan titekitij, akin imiuan tomachtiaj noso akin tikimixmatij. Tla xok tikinpiyaj invitaciones ika amatl, uelis tikintitlaniliskej tlen ueli noita ipan tableta noso celular. Kanaj techmojkatlachialtis ijkuak tikitaskej kechmej yaskej (Ecl. 11:6).

14. Xkijto se neskayotl itech tlenon uelis panos ijkuak tiktemakaj se invitación.

¹⁴ Maka xnemili ika se invitación xuelis kichiuas ika yakaj makineki yas Conmemoración. Se tokniuj siuatl melak omojkatlachix ijkuak iueuentsin, akin xiteixpantijkauj Jehová katka, okijli ika iuan yaskia Conmemoración. ¿Tleka melak omojkatlachix? Pampa tokniuj siuatl miyekpa okijlika iuan mauiya, san ika, yejua xkeman kinekiya yas. ¿Tleka aman okinek yas? Iueuentsin tokniuj kijtoua ika se tlayekanketl akin ikixmatiya okimakak se invitación niman okijli mauiya Conmemoración. Ipan yejon xiuitl yejua oyaj Conmemoración niman ijkon okichiuj ipan okseki xiujtin.

15. ¿Tlenon noneki tikilnamikiskej ijkuak tikijliaj yakaj mauiya Conmemoración?

¹⁵ Matikilnamikikan ika ijkuak yakaj tikijliaj touan manosentlali Conmemoración, kanaj uelis notlajtoltis seki tlemach, niman más tla xkeman yauj ipan totlanechikoluan. Ika yejon, kuajli yeskia tla tiknemiliaj tlenon ueliskia techtlajtoltis niman kenon tiknankiliskiaj (Col. 4:6). Kanaj yejua ueliskia notlajtoltis: “¿Tlenon ompa nochiua? ¿Kech uejkaui tlamachtijli? ¿Kenon noneki ninotlakentis? ¿Noneki niktlaxtlauas niman ijkon nikalakis? ¿Notlajtlani tomin?”. Kuakon, matiktlajtoltikan akin otiknotskej mauiya Conmemoración tla itlaj kineki kimatis niman matikijlikan tlen kasikamatisneki. Noijki uelis tikimititiskej videos Matikilnamikikan imikilis Jesús niman ¿Tlenon nochiua kampa tosentlaliaj? Niman noijki uelis tikititiskej libro ¡Nochipa uelis tiyolpakis! Ipan tlamachtijli 28 kiteneua seki tlemach tlen uelis tikijliskej.

16. ¿Tlenon ueliskia noijki notlajtoltis akin yauj Conmemoración?

¹⁶ Ijkuak yonopanolti Conmemoración, miyekej akin touan onosentlalijkej kinekij okseki kasikamatiskej. Kanaj ueliskia notlajtoltiskej: “¿Tleka xmiyekej okikuajkej pan niman okonikej vino? ¿Kemanon oksejpa tikilnamikiskej  imikilis Cristo?”. Niman kanaj kuelitaskiaj kimatiskej tla ipan nochi totlanechikoluan ijkon nochiua. Maski yejuin noteneua ipan Conmemoración, kanaj yejuamej kinekiskej okseki kasikamatiskej. Uelis tiktekitiltiskej tlamachtijli tlen onka ipan jw.org tlen itoka “¿Tleka iteixpantijkauan Jehová xkilnamikij imikilis Cristo ijkon ken okseki religiones?”, yejon kinpaleuis más makasikamatikan tlen notlajtoltiaj. Tiknekij tikchiuaskej nochi tlen tiueliskej niman ijkon tikinpaleuiskej akin kipiyaj kuajli inyojlo makinpaleui tlen nopanoltis. ¿Kemanon uelis ijkin tikchiuaskej? Ijkuak xipanoua Conmemoración, ijkuak panotika niman ijkuak yopanok (Hech. 13:48).

MATIKINPALEUIKAN AKIN YOUEJKAUJ XOK TOUAN NOSENTLALIAJ NIMAN XOK TENOJNOTSAJ

17. ¿Kenon tlayekankej uelis kinpaleuiskej akin youejkauj xok touan nosentlaliaj niman xok tenojnotsaj? (Ezequiel 34:​12, 16, TNM).

¹⁷ ¿Kenon tlayekankej uelis kinpaleuiskej akin youejkauj xok touan nosentlaliaj niman xok tenojnotsaj ijkuak nopanoltis Conmemoración? Tla kimititiaj ika najmanaj inpampa (xpoua Ezequiel 34:​12, 16, TNM). f Tlayekankej, achto nopanoltis Conmemoración xkominotsakan yejuin tokniuan, xkimititikan ika nenmajmanaj inpampa niman ika nenkinekij nenkinpaleuiskej. Xkimijlikan mauiyan Conmemoración niman kuajli xkinselikan tla yauej. Tla yopanok Conmemoración, oksejpa xkominotsakan yejuin tokniuan niman xkinpaleuikan manokuepakan ipan ikalpan Jehová (1 Ped. 2:25).

18. ¿Tlenon uelis tikchiuaskej para tikinpaleuiskej akin xok touan nosentlaliaj niman xok tenojnotsaj? (Romanos 12:10).

¹⁸ Tinochimej akin tinemij ipan tlanechikojli uelis tikinpaleuiskej tokniuan akin youejkauj xok touan nosentlaliaj. ¿Kenon uelis tikchiuaskej? Tla kualtsin tikinseliaj, tla tikimititiaj ika tikintlasojtlaj, tla tikinmasikamatij  niman tla tikintlakaitaj (xpoua Romanos 12:10). Matikilnamikikan ika yejuin tokniuan kanaj ouijtika okitakej oksejpa yaskej ipan Conmemoración. Kanaj kinmojtia tla tokniuan xkuajli okinselijkej. g Ika yejon, maka matikintlajtoltikan noso matikijtokan itlaj tlen uelis kichiuas maka kuajli manomachilikan (1 Tes. 5:11). Tejuamej ok tikintlasojtlaj yejuin tokniuan niman melak techyolpaktia ika oksejpa imiuan tikueyichiuaj Jehová (Sal. 119:176; Hech. 20:35).

19. ¿Kenon techpaleuis tla tikilnamikij imikilis Jesús?

¹⁹ Melak tiktlasojkamachiliaj Jesús pampa otechnauati matikilnamikikan imikilis nochi xiujtin, pampa yejon melak ueyi kijtosneki. Tla ijkon tikchiuaj, melak techpaleuis niman kinpaleuis oksekimej (Is. 48:​17, 18). Noijki techpaleuiya más matiktlasojtlakan Jehová niman Jesús. Techkauilia matikteititikan ika melak tiktlasojkamatij tlen yejuamej yokichiujkej topampa. Noijki, kichiua san sekan matinemikan imiuan tokniuan, niman techkauilia matikinpaleuikan oksekimej makimatikan tlenon noneki kichiuaskej para ijkon kiseliskej nochi tlen Jehová yokijto techmakas ipampa tlen Jesús okichiuj. Ika yejon, matokojtilikan matikchiuakan tlen noneki ipan Conmemoración pampa yejon tonajli melak ueyi kijtosneki.