1. ¿Kenijki uelis tikyolpaktiskej Jehová?

 MATIKONNEMILIKAN ika yakaj akin melak tiktlasojtlaj tikmakaj se kualtsin tetlayokolijli tlen melak kipaleuis. ¿Xmelak ika melak techajmanaskia tla tikitaj ika yejua san kejyeua niman hasta ompa kilkaua? San ika, melak tiyolpakiskiaj tla tikitaj ika kitekitiltia tlen otikmakakej niman nesi ika melak kitlasojkamati. ¿Tlenon techmachtia yejuin tlen yotikonitakej? Pampa Jehová otechmakak isenteKonetsin, kuajli tikmatstokej ika yejua melak yolpaki ijkuak kita ika tejuamej tiktlasojkamatij ika otechmakak yejon tetlayokolijli niman pampa otechititi tlasojtlalistli (Juan 3:16; Rom. 5:​7, 8).

 2. ¿Tlenon tikitaskej ipan yejuin tlamachtijli?

² Aman tej, tla yotiuejkaujkej ipan ikalpan Jehová, kanaj xok más tiktlasojkamatij tlaxtlauijli. Kema, tipakij pampa Jehová otechmakak yejon tetlayokolijli, san ika, yeskia kentla tla tikejyeuaskiaj niman ompa tikilkauaskiaj. Tla xtiknekij ijkon topan manochiua niman tiknekij nochipa tiktlasojkamatiskej yejon tetlayokolijli, noneki nochipa matitlanemilijtokan itech tlen Jehová niman Jesús okichiujkej topampa. Yejuin tlamachtijli techpaleuis ijkon matikchiuakan. Tikitaskej kenijki aman techpaleuiya tlaxtlauijli niman kenijki techpaleuis ika tlayekapan. Noijki tikitaskej kenijki uelis tikititiskej Jehová ika tiktlasojkamatij pampa melak techtlasojtla, niman más ijkuak yeajsis Conmemoración niman tla yopanok.

TLAXTLAUIJLI TECHPALEUIYA AMAN

 3. ¿Kenijki yetechpaleuijtika imikilis Cristo?

³ Imikilis Cristo yetechpaleuijtika. ¿Kenijki techpaleuiya? Aman Jehová yeueli techtlapojpoluiya. Niman yejua xsan techtlapojpoluiya pampa noneki ijkon kichiuas, yej pampa melauak kineki techtlapojpoluis. Sejpa, ipan se tlakuikajli, David  ijkin okijto: “Tejua noTEKO, kuajli moyojlo niman titetlapojpoluiya” (Sal. 86:5; 103:​3, 10-13).

 4. Ijkuak Jehová okitemakak iKonetsin, ¿inpampa akinomej okichiuj? (Lucas 5:32; 1 Timoteo 1:15).

⁴ Sekimej kinemiliaj ika xkinnamiki makintlapojpolui Jehová. San ika, tinochimej xtechnamiki matechtlapojpoluikan. Apóstol Pablo ijkin okijto: “Nion achijtsin xnechmelaua nechtokayotiskej apóstol”. San ika, satepan ijkin okijto: “Aman nejua niapóstol ipampa iueyitetlajsojtlalis Dios” (1 Cor. 15:​9, 10). Ijkuak titoyolkuepaj itech totlajtlakoluan, Jehová techtlapojpoluiya. ¿Tleka ijkon kichiua? Xpampa tla technamiki matechtlapojpolui, yej pampa techtlasojtla. Kuakon, tla titoyolkokouaj pampa tiknemiliaj ika xtechnamiki matechtlapojpolui Jehová, matikilnamikikan ika yejua xokitemakak iKonetsin inpampa akin xtlajtlakolejkej, yej okitemakak inpampa tlajtlakolejkej akin noyolkuepaj (xpoua Lucas 5:32; 1 Timoteo 1:15).

 5. ¿Tleka xnoneki tiknemiliskej ika technamiki matechtlapojpolui Jehová?

⁵ Xnoneki tiknemiliskej ika kinamiki matechtlapojpolui Jehová san pampa melak youejkauj tiktekichiuiliaj. Kema, yejua kipatiojkaita nochi tlen yotikchiujkej ipampa (Heb. 6:10). San ika, yejua xokitemakak iKonetsin para techtlaxtlauilis tlen tikchiuaj ipampa, yejua okitemakak ken se tetlayokolijli. Tla tejuamej tiknemiliaj ika yototlanilijkej itetlapojpoluilis Jehová pampa chikauak yotiktekichiuilijkej, kentla tikijtotoskiaj ika xnonekiya topampa mamiki Cristo (uelis tikitas Gálatas 2:21).

 6. ¿Tleka melak onokojtili Pablo chikauak kitekichiuilis Jehová?

⁶ Pablo kimatstoya ika maski melak nokojtiliskia kitekichiuilis Jehová, xueliskia kinotlanilis itetlapojpoluilis. Kuakon, ¿tleka melak onokojtili chikauak kitekichiuilis? Pampa kinekiya kiteititis ika melak kitlasojkamatiya iueyitetlasojtlalis Jehová (Efes. 3:7). Aman tejuamej noijki chikauak tiktekichiuiliaj Jehová, san ika, xtikchiuaj tla pampa tiknekij matechikneli, yej tikchiuaj pampa tiknekij tikititiskej ika melak tiktlasojkamatij pampa techiknelia.

 7. ¿Kenijki noijki techpaleuiya imikilis Jesús? (Romanos 5:1; Santiago 2:23).

⁷ Noijki, tejuamej ueli touikaj iuan Jehová pampa Jesús omik topampa. a Ken otikitakej ipan okse tlamachtijli, ijkuak tiuajnemij, xtouikaj iuan toTajtsin. San ika, pampa Jesús omik topampa, ueli tikpiyaj “yolseuilistli” iuan toTajtsin niman ueli iuan touikaj (xpoua Romanos 5:1; Santiago 2:23).

 8. ¿Tleka noneki tiktlasojkamachiliskej Jehová pampa uelij titeoyochiuaj?

⁸ Matitlajtokan itech itlaj tlen ueli tikchiuaj pampa touikaj iuan Jehová: ueli tikchiuiliaj teoyotl. Jehová xsan kinkaki teoyomej tlen nochiuaj ipan tlanechikojli, noijki kinkaki teoyomej tlen toseselti tikinchiuaj. Teoyotl xsan techyolseuiya niman kichiua kuajli matomachilikan, noijki techpaleuiya más kuajli matouikakan iuan toTajtsin, niman yejon tlen más kualtsin (Sal. 65:2; Sant. 4:8; 1 Juan 5:14). Ijkuak Jesús onen ipan tlaltikpaktli, nochipa kichiuaya teoyotl pampa kimatiya ika Jehová kinkakiya iteoyouan niman kimatiya ika yejon teoyomej kipaleuiskiaj más iuan manouika (Luc. 5:16). Melak tiktlasojkamatij ika Jesús omik topampa, pampa yejon kichiua matiuelikan matouikakan iuan Jehová niman hasta matiuelikan iuan matonotsakan.

 TLAXTLAUIJLI TECHPALEUIS IKA TLAYEKAPAN

 9. ¿Kenijki tlaxtlauijli kinpaleuis itekipanojkauan Jehová ika tlayekapan?

⁹ ¿Kenijki tlaxtlauijli kinpaleuis itekipanojkauan Jehová ika tlayekapan? Jehová kinmakas nemilistli tlen xkeman tlamis. Miyekej kinemiliaj ika xuelis nochipa tinemiskej pampa desde yeuejkaui miyekej tlaltikpaktlakamej uajmiktiuej. San ika, Jehová otexchijchiuj para nochipa matinemikan. Kanaj aman miyekej xueli kineltokaj tla uelis nochipa tinemiskej, san ika, kema uelis tikneltokaskej pampa tikmatstokej ika Jehová melak ueyi otlatlaxtlauj: otlatlaxtlauj ika imikilis iKonetsin (Rom. 8:32).

10. ¿Tlenon kichiaj tlapejpeniltin niman oksekimej borreguitos?

¹⁰ Maski nemilistli tlen xkeman tlamis techmakaskej ika tlayekapan, Jehová kineki ika desde aman itech matitlanemilikan. Tlapejpeniltin kichiaj nemiskej ne iluikak niman tekiuajtiskej ipan tlaltikpaktli iuan Cristo (Apoc. 20:6). Niman oksekimej borreguitos kichiaj nemiskej ipan se kualtsin Xochitlalpan kampa xok yakaj nokokos nion tlajyouis (Apoc. 21:​3, 4). ¿Tikchia tinemis para nochipa ipan tlaltikpaktli? Tla kema, xmatsto ika tlen tikchia noijki melak kualtsin ijkon ken tlen kichiaj tlapejpeniltin. Jehová otechchijchiuj para nochipa matinemikan ipan tlaltikpaktli, kuakon, melak mitsyolpaktis nochipa tinemis ipan Xochitlalpan.

11, 12. ¿Katlejua tlateochiualistin sa tikinchiatokej tikinseliskej ipan Xochitlalpan? (Noijki xkimita tlaixkopinaltin).

¹¹ Xkonnemili kenijki tinemis ipan Xochitlalpan. Ijkuakon, xok timajmanas tla otikualok noso tla otimik (Is. 25:8; 33:24). Jehová mitsmakas nochi tlen kuajli. ¿Tlenon tikuelitaskia tiuelis? ¿Tikuelitaskia tiuelis titlatsotsonas, tikonchiuas, titlaixkopinas noso tikuelitaskia más tiuelis itech yolkamej? Ipan Xochitlalpan nonekiskej kalchiujkej, tokakej, tlakualchiujkej, teposchiujkej niman oksekimej akin uelis tepaleuiskej (Is. 35:1; 65:21). ¡Melak miyek tiuelis pampa xkeman timikis!

¹² ¡Aman xkonnemili kenijki melak tiyolpakiskej ijkuak tikinseliskej akin yoliuiskej!  (Hech. 24:15). Noijki, melak tiyolpakiskej pampa más tikixmatiskej Jehová niman más tiueliskej itech tlen yejua okichijchiuj (Sal. 104:24; Is. 11:9). San ika, más techyolpaktis pampa uelis ika toyojlo tikueyichiuaskej Jehová pampa xok nonekis tiktlajtlanilijtoskej matechtlapojpolui. ¿Tikpatlaskia nochi tlen yotikonteneujkej san para timoyolpaktis aman? (Heb. 11:25). Nemilistli ipan Xochitlalpan más kualtsin yes xken tlen aman ueliskia tikpiyaskej ipan yejuin tlaltikpaktli. Ajsis tonajli ijkuak xok tikijtoskej “Tikchiaj mayejko Xochitlalpan”, pampa aman tikijtoskej “Yetinemij ipan Xochitlalpan”. Nochi yejuin nochiuas pampa Jehová melak otechtlasojtlak hasta okitemakak iKoneuj para mamiki topampa.

MATIKITITIKAN JEHOVÁ IKA TIKTLASOJKAMATIJ ITLASOJTLALIS

13. ¿Kenijki uelis tikteititiskej ika tiktlasojkamatij itlasojtlalis Jehová? (2 Corintios 6:1).

¹³ ¿Kenijki uelis tikititiskej Jehová ika tiktlasojkamatij tlaxtlauijli? Tla nochipa kachtopa yejua tiktekichiuiliaj (Mat. 6:33). Niman kinamiki ijkon matikchiuakan pampa Jesús omik “para on yejuan nemij maka kinoyaxkatikan innemilis, yej ma kimaktilikan on yejuan impampa omik niman onokuiteu ipan itlalkon” (2 Cor. 5:15). Jehová melak yotechikneli niman yotechtlapojpolui. Tla tokojtiliaj tiktekichiuiliskej Jehová, tikititiskej ika tikmatstokej nochi tlen yokichiuj topampa niman ika melak tiktlasojkamatij (xpoua 2 Corintios 6:1).

14. ¿Kenijki uelis tikteititiskej ika titlaneltokaj itech Jehová niman tiktlakamatij?

¹⁴ Noijki uelis tikteititiskej ika tiktlasojkamatij itlasojtlalis Jehová tla itech titlaneltokaj niman tiktlakamatij. ¿Kenijki uelis tikchiuaskej yejuin? Ijkuak itlaj tiktlapejpeniskej, kachtopa noneki tikitaskej tlenon kineki Jehová matikchiuakan, ken ijkuak tikitaskej kech tomachtiskej noso kanon titekitiskej (1 Cor. 10:31; 2 Cor. 5:7). Tla tejuamej nochipa tikchiuaj tlen makiteititi ika titlaneltokaj itech Jehová, panos itlaj tlen melak kualtsin: totlaneltok chikauis niman más touikaskej iuan toTajtsin. Noijki, más tikneltokaskej ika uelis nochipa tinemiskej (Rom. 5:​3-5; Sant. 2:​21, 22).

15. ¿Kenijki uelis tikititiskej Jehová ika tiktlasojkamatij tlen okichiuj topampa ijkuak yeajsis Conmemoración niman tla yopanok?

¹⁵ Noijki uelis tikititiskej Jehová ika tiktlasojkamatij ika Jesús omik topampa tla tokojtiliaj miyek tikchiuaskej ijkuak yeajsis niman tla yopanok Conmemoración. Matikxelokan yejon tonajli para tiaskej Conmemoración, san ika, noijki xkimijli oksekimej noijki mauiyan (1 Tim. 2:4). Ijkuak titenotsaskej, matikteijlikan tlenon tikchiuaj ijkuak tikilnamikij imikilis Cristo. Uelis tikimititiskej videos ¿Tleka omik Jesús? niman Matikilnamikikan imikilis Jesús, tlen onka ipan jw.org. Tlayekankej noneki kinnotsaskej tokniuan  akin youejkauj xok touan nosentlaliaj niman xok tenojnotsaj. San xkonnemili kenijki melak pakilo ne iluikak niman nikan ipan tlaltikpaktli ijkuak se iborreguito Jehová oksejpa itech nokuepa (Luc. 15:​4-7). Ipan Conmemoración maka san matikintlajpalokan akin tikimixmatij, yej noijki matikintlajpalokan akin xkeman yayaj noso akin melak youejkauj ika xyayaj. ¡Nochimej melak kuajli matikinselikan! (Rom. 12:13).

16. ¿Tleka melak kuajli tla más titenojnotsa ijkuak yeajsis Conmemoración niman tla yopanok?

¹⁶ ¿Uelis más chikauak titenojnotsas ijkuak yeajsis Conmemoración niman tla yopanok? Tla ijkon tikchiua, tikteititis ika melak tiktlasojkamati nochi tlen Jehová niman Jesús yokichiujkej mopampa. Ijkuak más titenojnotsas, más tikitas kenijki mitspaleuiya Jehová niman más itech titlaneltokas (1 Cor. 3:9). Noijki maka tikilkauas tikinnamapouas tlaxeloltin tlen nopouaj ipan Conmemoración, yejon uajnesij ipan folleto Mojmostla matomachtikan iTlajtol toTajtsin niman ipan se tabla tlen onka ipan toamatlajkuilol Tlen tomachtiskej niman tlen notekitiltis. Hasta uelis tikintekitiltis yejon tlaxeloltin niman ijkon más kuajli timomachtis.

17. ¿Tlenon kiyolpaktia Jehová? (Noijki xkita recuadro “ Ken uelis tiktlasojkamatiskej itlasojtlalis Jehová”).

¹⁷ Maka xmajmana tla tejua xueli tikchiua nochi tlen otikteneujkej ipan yejuin tlamachtijli. Xkilnamiki ika Jehová xkichia xchiua san noijki ken oksekimej. Yejua kita tlen onka ipan moyojlo niman melak yolpaki pampa kimatstok ika tejua melak tiktlasojkamati ika omitstlayokoli tlaxtlauijli (1 Sam. 16:7; Mar. 12:​41-44).

18. ¿Tlenon melak tikintlasojkamachiliaj Jehová niman Jesús?

¹⁸ Tlaxtlauijli techpaleuiya matouikakan iuan Jehová, matechtlapojpolui niman ika tlayekapan uelis tikseliskej nemilistli tlen xkeman tlamis. Jehová techinmaka yejuin tlateochiualistin pampa melak techtlasojtla, ika yejon, nochipa matikititikan ika melak tiktlasojkamatij itlasojtlalis (1 Juan 4:19). Niman noijki matikteititikan ika melak tiktlasojkamatij ika Jesús melak otechtlasojtlak hasta okitemakak inemilis topampa (Juan 15:13).