1. ¿Tlenon kichiuaj miyekej ipan yejuin tonaltin?

 IPAN yejuin tonaltin, miyekej san no yejuamej noueyiteneuaj. Miyekej melak kitlejkoltiaj ipan internet nochi tlen kichiuaj para makinueyiteneuakan. San ika, xmiyekej kiueyiteneuaj Jehová. Ipan yejuin tlamachtijli tikitaskej tlenon kijtosneki tikueyiteneuaskej Jehová, tleka tikueyiteneuaj, kenijki kinamiki matikueyiteneuakan niman kenijki Jehová kiueyiteneuas itoka ika tlayekapan.

¿TLENON KIJTOSNEKI TIKUEYITENEUASKEJ JEHOVÁ?

 2. ¿Kenijki okiteititi Jehová ipan tepetl Sinaí ika melak kojtik? (Xkita tlaixkopinajli).

² Biblia kiteititia ika Jehová melak ueyixtok. San matikonnemilikan kenijki Jehová okimititi israelitas ika melak kojtik sakin ika yokinmakixtijka ne Egipto. Se tonajli, melak miyekej israelitas onosentlalijkej itsintlan tepetl Sinaí para kikakiskej tlen toTajtsin kimijliskia. Ijkuak ompa nemiyaj, se moxtli okitlapacho yejon tepetl, opeuj popoka, opeuj chikauak tlalolini, tlapetlani, tlakomoni niman okakistik se chikauak tlapitsajli (Éx. 19:​16-18; 24:17; Sal. 68:8). Nochi tlen opanok melak okinmojkatlachialti israelitas pampa okitakej kenijki onoueyiteneuj Jehová.

 3. ¿Kenijki uelis tikueyiteneuaskej Jehová?

³ Tejuamej noijki uelis tikueyiteneuaskej Jehová. ¿Kenijki? Tla tikteijliaj ikualneskayouan niman nochi tlen kualtsin  okichijchiuj. Noijki, tikueyiteneuaj ijkuak tikteijliaj ika yejua techpaleuiya matikchiuakan tlen ueli tikchiuaj (Is. 26:12). Tekiuaj David ijkon okiueyiteneuj Jehová ijkuak okichiuj se teoyotl imixpan israelitas, yejua okijto: “NoTEKO, tejua moyaxka on ueyilistli, on poder, on ueyi yekteneualistli, on tetlanilistli niman nochi tlakaitalistli, pampa nochi on tlen onkaj ne iluikak niman ipan tlaltikpaktli nochi moyaxka”. Ijkuak otlan kinotsa Jehová, “nochimej okiueyitenejkej iminTEKO” (1 Crón. 29:​11, 20).

 4. ¿Kenijki Jesús okiueyiteneuj Jehová?

⁴ Ijkuak Jesús onen ipan tlaltikpaktli, nochipa okiueyiteneuj Jehová. Yejua nochipa kiteijliaya ika Jehová kipaleuiaya makinchiua milagros (Mar. 5:​18-20). Noijki, kiueyiteneuaya pampa nochipa kuajli itech tlajtouaya niman kichiuaya ijkon ken yejua. Sejpatsin, Jesús temachtijtoya teopan niman ompa nemiya se siuatsintli akin kuikaya 18 xiuitl ika kipiaya se xkuajli espíritu akin xok kikauiliaya manomelajkatelketsa. ¡Melak tlajyouijtoya yejon siuatsintli! Ijkuak Jesús okitak, melak okikneli niman okijli: “Siuatsintli, nimitskixtilia mokokolis”. Ijkuak Jesús ipan okintlali imauan, on siuatsintli onomelajkatelkets niman “opeuj kiueyiteneua toTajtsin” (Luc. 13:​10-13). Ijkon ken yejuin siuatsintli, tejuamej noijki uelis tikueyiteneuaskej Jehová.

¿TLEKA TIKUEYITENEUAJ JEHOVÁ?

 5. ¿Tleka tiktlakaitaj Jehová?

⁵ Tikueyiteneuaj Jehová pampa melak tiktlakaitaj. ¿Tleka tiktlakaitaj? Pampa san yejua melak kojtik niman ikojtilis xkeman tlami (Sal. 96:​4-7). Noijki pampa san yejua melak tlamachilise, yejuin tikitaj ipampa tlen okichijchiuj. Yejua otechmakak tonemilis niman nochi tlen ika tiyoltokej (Apoc. 4:11). Yejua nochipa melajkanemi (Apoc. 15:4). Nochipa kichiua tlen kijtoua niman kuajli onkisa nochi tlen kichiua (Jos. 23:14). Ika yejon, tekiuaj David okijto: “NoDios, tejua sanoyej tiueixtikaj pampa xakaj nemi okse ken tejua, niman xnemi okse dios. Yej san tejua tinemi ijkon ken yotechijlij” (2 Sam. 7:22). Ken tikitaj, tikpiyaj miyek tlen techititia ika noneki tiktlakaitaskej toTajtsin. San ika, xsan tiktlakaitaj Jehová, noijki melak tiktlasojtlaj.

 6. ¿Tleka tiktlasojtlaj Jehová?

⁶ Tikueyiteneuaj Jehová pampa melak tiktlasojtlaj. Jehová kinpiya kualtsitsintin kualneskayomej, ika yejon, melak tiktlasojtlaj. Yejua teiknelia niman kuajli iyojlo (Sal. 103:8). Ijkuak titlajyouiyaj, yejua techajsikamati niman kiyolkokoua ijkuak kita ika toyolkokouaj (Zac. 2:​8, TNM). Yejua techpaleuiya itech matonisiuikan niman iuan matouikakan (Sal. 25:14; Hech. 17:27). Noijki yolyemanki niman “uajnopachoua para uajtlacha ipan cielo niman ipan tlaltikpaktli” niman “kixtia on mayanki kampa sanoyej tlajyouiya” (Sal. 113:​6, 7). Nochi yejuin kichiua matiknekikan matikueyiteneuakan toueyiTajtsin (Sal. 86:12).

 7. ¿Tlenon ueli tikchiuaj?

⁷ Tikueyiteneuaj Jehová pampa tiknekij ika tlaltikpaktlakamej makixmatikan. Miyekej xkuajli tlanemiliaj itech toTajtsin pampa Satanás melak yokitlajtolchijchiuili niman yokimixtlapacho tlaltikpaktlakamej (2 Cor. 4:4). Satanás yotetlaneltokilti ika Jehová tetlakuepiltia, ika xkajmana tlen topan panoua niman ika nochi tlen xkuajli panoua yejua itlajtlakol. San ika, tikmatstokej ika yejon xmelauak. Niman tejuamej ueli tikinpaleuiyaj tlaltikpaktlakamej makimatikan kenijki toTajtsin niman ijkon noijki makiueyiteneuakan (Is. 43:10). Aman matikimitakan seki tlaxeloltin itech  Salmo 96, kampa tiueliskej kenijki kinamiki matikueyiteneuakan Jehová.

¿KENIJKI KINAMIKI MATIKUEYITENEUAKAN JEHOVÁ?

 8. Xkijto kenijki uelis tikueyiteneuaskej Jehová (Salmo 96:​1-3).

⁸ (Xpoua Salmo 96:​1-3). Uelis tikueyiteneuaskej Jehová ijkuak itech titlajtouaj. Ipan yejuin tlaxeloltin, kinyolchikaua itekipanojkauan toTajtsin makitlakuikilikan, makiyekteneuakan itoka, makiteijlikan ken temakixtia niman matlajtokan itech iueyilis ipan nochi kalpamej. Ijkuak ijkon tikchiuaj, tikueyiteneuaj toTaj iluikakchane. Yeuejkaui itekipanojkauan Jehová sa kinektoyaj kimijliskej oksekimej akinon Jehová, tlajtoskej itech ikualneskayouan niman kiteijliskej kenijki yokinpaleuijka (Dan. 3:​16-18; Hech. 4:29). ¿Kenijki uelis tikchiuaskej ijkon ken yejuamej?

9, 10. ¿Tlenon tiuelij itech Angelina? (Noijki xkita tlaixkopinajli).

⁹ Matikitakan tlenon ipan opanok tokniuj Angelina a akin chanti Estados Unidos. Yejua onoyolchikauj niman okimanoui itoka Jehová kampa tekiti. Yejua niman oksekimej akin noijki kemach ompa opeuj tekitij, okiminotskej mauiyan ipan se iluitsintli. Ompa okimijlijkej ika ueliskia itlaj kijtoskej itech yejuamej para makimixmatikan. Yejua okintlapejpeni seki tlaixkopinaltin niman ijkon kiteititis kenijki melak yolpaki pampa kitekichiuilia Jehová, san ika, achto yejua panoskia, opanok se icompañero akin okijto ika onoskalti ken iteixpantijkauj Jehová niman opeuj techpijpinaujtia ipampa tlen tikneltokaj. Angelina kijtoua: “Opeuj melak niyoltsitsikuika, san ika, oniknemili: ‘Xnoneki san ijkon ninokauas, noneki nikteijlis tlen melauak itech Jehová’”.

¹⁰ Ijkuak icompañero otlan tlajtoua, Angelina san ichtakatsin okinots Jehová. Sakin, oyemankatlajto niman okijto: “Nejua noijki oninoskalti ken iteixpantijkauj Jehová niman hasta aman niteixpantijkauj”. Ijkuak ijkon okijto, xok yakaj onauat. San ika, yejua nochipa oyemankatlajto. Kachtopa, yejua okinteititi kualtsitsintin tlaixkopinaltin kampa nesiya kenijki yejua iuan iamigas melak yolpakiyaj pampa kitekichiuiliaj Jehová niman san kualtsin okiteijli tlen tikneltokaj (1 Ped. 3:15). Ijkuak Angelina otlan  tlajtoua, icompañero xok kualantoya niman hasta okijto ika melak kualtsin tlen ipan opanok ijkuak nosentlaliaya imiuan iteixpantijkauan Jehová. Angelina kijtoua: “Melak kinamiki nochipa matikijtokan tlen melauak itech Jehová. ¡Niman melak teyolpakti ijkuak ijkon tikchiuas!”. Tejuamej noijki melak techyolpaktia tikueyiteneuaskej Jehová, niman más ijkuak oksekimej xkuajli tlajtouaj itech.

11. ¿Kenijki kuajchiujtiuej itekipanojkauan toTajtsin tlen noijtoua ipan Salmo 96:8?

¹¹ (Xpoua Salmo 96:8). Uelis tikueyiteneuaskej Jehová ika tlen tikpiyaj. Akin melauak itekipanojkauan Jehová nochipa ijkon yokichiujkej (Prov. 3:9). Yeuejkaui, israelitas okitemakakej tlen kipiayaj para tlapaleuiskej manochijchiua niman manotlajpiya teopan (2 Rey. 12:​4, 5; 1 Crón. 29:​3-9). Noijki sekimej inomachtijkauan Jesús kitemakayaj “tlen kipiayaj” para ijkon Jesús niman iapóstoles makipiyakan tlen nonekiya (Luc. 8:​1-3). Niman ipan kachtopa siglo, sekimej tokniuan okomontitlanilijkej tomintsin tokniuan akin xkipiayaj tlen kikuaskej (Hech. 11:​27-29). Aman tejuamej noijki uelis tikueyiteneuaskej Jehová ika tlen tiktemakaj.

12. ¿Kenijki tikueyiteneuaj Jehová ika tomintsin tlen tiktemakaj? (Noijki xkita tlaixkopinajli).

¹² Matikitakan kenijki tikueyiteneuaj Jehová ijkuak tiktemakaj tlen tikpiyaj. Ipan 2020, ne Zimbabue, ouejkauj ika xkiyauiya, ika yejon, miyekej hasta ueliskia mikiskiaj pampa xok kipiayaj tlen kikuaskej. Ompa chantiya se tokniuj akin itoka Prisca. Tokniuj nochi tonaltin miércoles niman viernes tenojnotsaya, maski xonkatka tlakuajli niman maski yoajsika tiempo para tokalos. Sekimej ivecinos san kiuejuetskiliayaj niman kijliayaj: “¡Xtikpiyas tlen tikuas!”. San ika, yejua xometlamatiya ijkuak ijkin kimijliaya: “Jehová xkeman san ijkon kinkaua itekipanojkauan”. Sakin, ika tomintsin tlen tiktemakaj, ikalpan toTajtsin ouel okimakak Prisca tlen kipolouaya. Ivecinos melak omojkatlachixkej niman okijlijkej: “ToTajtsin xkeman omitskauj, tiknekij más tikixmatiskej”. Niman chikomemej ivecinos opeuj yauej tlanechikoltin.

13. Ijkon ken kijtoua Salmo 96:​9, ¿tlenon noneki tikchiuaskej para tikueyiteneuaskej Jehová?

¹³ (Xpoua Salmo 96:9). Uelis tikueyiteneuaskej Jehová ika tlen tikchiuaj. Teopixkej nonekiya nopajpakaskej niman chipaujtiaskej ijkuak kitekichiuiliayaj Jehová ipan  tabernáculo niman ipan teopan (Éx. 40:​30-32). Tejuamej noijki tokojtiliaj tichipaujkej yeskej niman xtikchiuaskej tlen tsokuiltik ixpan Jehová (Sal. 24:​3, 4; 1 Ped. 1:​15, 16). Noneki tokojtiliskej tikpatlaskej tonemilis niman totlaliliskej “yenkuik nemilistli”. Yejuin kijtosneki ika xok noneki tiknemiliskej tlen xkuajli niman xok tikchiuaskej tlen xkuajli, yej noneki tokojtiliskej titlanemiliskej niman tikchiuaskej ken Jehová (Col. 3:​9, 10). Ika itlapaleuilis Jehová, hasta yakaj akin melak auilnemi niman melak tlauele uelis nopatlas niman kinotlalilis “yenkuik nemilistli”.

14. ¿Tlenon mitsmachtia tlen okichiuj Jack? (Noijki xkita tlaixkopinajli).

¹⁴ Matikitakan tlen okichiuj Jack. Yejua melak tlauele katka niman melak xkuajli tlen kitechiuiliaya, hasta kitokayotiayaj Demonio. Yejua okichiuj miyek tlen melak xkuajli niman hasta otemikti, yejua ika, tekiuajkej okitsakkej niman okijlijkej ika kimiktiskiaj. San ika, chika kichiaya maajsi tonajli ijkuak kimiktiskiaj, okinek nomachtis Biblia iuan se tokniuj akin ontenojnotsaya ipan cárcel. Maski Jack melak xkuajli tlen yokichiujka, yejua onopatlak niman hasta onoapolakti. Niman pampa yejua melak onopatlak, sekimej akin kitlajpiayaj ipan cárcel hasta oixayotejtenkej ijkuak okinajnauatijkej noso okipachiuitijkej pampa yekimiktiskiaj. Se soldado akin ompa tekitiya okijto: “Jack yejua akin más xkuajli tlakatl katka itech nochi akin nikan tsauktokej, san ika, aman yejua akin más kuajli tlen kichiuaya”. Ijkuak yopanoka se semana ika okimiktijkej, tokniuan oyajkej ipan cárcel para kipanoltiskej tlanechikojli niman okitakej ika ompa nemiya se tlakatl akin xkeman yaya. Yejua oyaj tlanechikojli pampa melak okimojkatlachialti kenijki Jack melak onopatlak niman kinekiya kimatis tlenon nonekiya kichiuas para kiueyichiuas Jehová. Kuajli nesi ika uelis tikueyiteneuaskej toTaj iluikakchane ika tlen tikchiuaj (1 Ped. 2:12).

¿KENIJKI JEHOVÁ KIUEYITENEUAS ITOKA IKA TLAYEKAPAN?

15. ¿Kenijki Jehová kiueyiteneuas itoka ika tlayekapan? (Salmo 96:​10-13).

¹⁵ (Xpoua Salmo 96:​10-13). Itlamiyan Salmo 96 kijtoua ika Jehová se Tekiuaj akin teyolkuitia ika melajkayotl. Kuakon, ¿kenijki Jehová kiueyiteneuas itoka ika tlayekapan?  Yejua teyolkuitis niman kipopolos Ueyixtika Babilonia pampa otekajkayauj niman okitsojkuiloti itoka (Apoc. 17:​5, 16; 19:​1, 2). Akin kitaskej kenijki kinpopolouaj nochi tlaneltokiltin xmelajkej, kanaj kinekiskej touan kiueyichiuaskej Jehová. Sakin, ipan Armagedón, Jehová kipopolos nochi tlen kiyekana Satanás. Niman kinpopolos nochimej akin kitlauelitaj niman kitsojkuilotiaj itoka, san ika, kinmakixtis akin kitlasojtlaj, kitlakamatij niman ika inyojlo kiueyiteneuaj (Mar. 8:38; 2 Tes. 1:​6-10). Tla yopanok sa ika tlami tetlatlatalistli, tlen panos ijkuak yotlan tekiuajti Cristo Mil Xiuitl, nochimej yekimatstoskej ika san Jehová kinamiki matikueyichiuakan (Apoc. 20:​7-10). Ipan yejon tiempo, nochimej kajsikamatiskej ika san Jehová ueyixtok niman yejon kajsikamatilistli tentos ipan tlaltikpaktli ijkon ken mar tentok ika atl (Hab. 2:14).

16. ¿Tlenon tiknektika tikchiuas? (Noijki xkita tlaixkopinajli).

¹⁶ ¡Melak kualtsin yes ijkuak nochimej kiueyiteneuaskej itoka Jehová ijkon ken kinamiki! Chika yejko yejon tonajli, matikitakan tlenon uelis tikchiuaskej para tikueyiteneuaskej toTajtsin. Melak noneki ijkin matikchiuakan, ika yejon, Grupo akin Tlayekana okijto ika ipan 2025 texto del año yes Salmo 96:8: “Xueyiteneuakan itoka Jehová ijkon ken kinamiki”.