1. ¿Tleka Jehová okitlali namiktilistli?

 JEHOVÁ se toTajtsin akin yolpaki niman kineki ika tejuamej noijki matiyolpakikan (1 Tim. 1:11). Ika yejon, yotechinmakak miyek tetlayokoliltin (Sant. 1:17). San se itetlayokolil matikonteneuakan: namiktilistli. Ijkuak se tlakatl niman se siuatl nonamiktiaj, noijliaj ika nochipa notlasojtlaskej, notlakaitaskej niman notlajpiyaskej. Ijkuak omemej melak notlasojtlaj, melak yolpakij (Prov. 5:18).

 2. ¿Tlenon kinchiuiliaj insiuauan sekimej tlakamej?

² Melak teajman ika ipan yejuin tlaltikpaktli melak miyekej akin yononamiktijkej xkichiuaj tlen okijtojkej ijkuak ononamiktijkej. Niman ipampa yejon, yejuamej xyolpakij ipan innamiktilis. Organización Mundial de la Salud kijtoua ika miyekej tlakamej kinmaaj, kinuijuikaltiaj niman kinyolkokouaj insiuauan. Kanaj teixpan melak kualtsin kinnotsaj, san ika, ijkuak san inselti nemij, kintlajyouiltiaj. Noijki, miyek namiktilistin xkuajli onkisaj pampa teueuentsin kita pornografía.

 3. ¿Tleka sekimej tlakamej kintlajyouiltiaj insiuauan?

³ ¿Tleka sekimej tlakamej kintlajyouiltiaj insiuauan? Kanaj intaj melak kitlajyouiltiaya innan niman aman yejuamej kinemiliaj ika xtlaj tlenon tla noijki ijkon kichiuiliaj insiuauj. Niman oksekimej kampa noskaltiaj kinmachtiaj ika tla yemelak tlakamej, noneki kimititiskej insiuauan akinon tlanauatia. Noso sekimej kanaj xokinmachtijkej manoteltikan ijkuak tlauelmikij. Niman oksekimej xkuajli tlanemiliaj intech siuamej niman itech sexo pampa kitaj pornografía. Noijki, sekimej tlaixmatkej kijtouaj ika ijkuak panotoya kokolistli COVID-19, más miyekej tlakamej opeuj kintlajyouiltiaj insiuauan. Aman tej, maski san kenijki, se teueuentsin xkeman nonekiskia kitlajyouiltis isiuatsin.

 4. ¿Itech tlenon noneki notlajpiyaskej teueuentsitsinuan, niman tleka?

⁴ Teueuentsitsinuan akin kichiuaj ken Cristo noneki notlajpiyaskej para xtlanemiliskej itech siuamej ijkon ken tlanemiliaj  tlaltikpaktlakamej. a ¿Tleka? Pampa miyekpa, tlen tiknemiliaj yejon tlen tikchiuaj. Matontlanemilikan itech tlanechikojli tlen onkatka ne Roma ipan kachtopa siglo, kampa nemiyaj tlapejpeniltin. Sakin ika onotlali tlanechikojli, Pablo ijkin okimijkuilouili tokniuan: “Maka sa xmouikakan ken on tlaltikpaktlakamej nouikaj” (Rom. 12:​1, 2). Tlen okijto apóstol Pablo techajsikamachiltia ika sekimej tokniuan ok tlanemiliayaj niman kichiuayaj ken tlaltikpaktlakamej. Ika yejon, okimijli ika nonekiya nopatlaskej. Yejuin tlen okijto Pablo aman noijki kinpaleuiya teueuentsitsinuan. Melak teajman ika miyekej tokniuan yopeuj tlanemiliaj ken tlaltikpaktlakamej niman kintlajyouiltiaj insiuatsitsinuan. b ¿Tlenon kinnauatia Jehová teueuentsitsinuan? Yejuin nonankilia ipan texto kampa nokixtia yejuin tlamachtijli.

 5. Ijkon ken kijtoua 1 Pedro 3:​7, ¿tlenon noneki kichiuas se teueuentsin?

⁵ (Xpoua 1 Pedro 3:7). Jehová kinnauatia tlakamej makintlakaitakan insiuauan. Se tlakatl kititia isiuatsin ika kitlakaita ijkuak kitlasojtla niman kualtsin kinotsa. Ipan yejuin tlamachtijli tikitaskej kenijki teueuentsitsinuan uelis kiteititiskej ika kintlakaitaj insiuauan. San ika, kachtopa tikitaskej tlenon xnoneki kichiuilis isiuatsin se teueuentsin.

MAKA XYOLKOKO MOSIUATSIN

 6. ¿Kenijki kita Jehová ijkuak se tlakatl kimaa isiuatsin? (Colosenses 3:19).

⁶ Maka xmaa mosiuatsin. Jehová kintlauelita akin xkuajkualtin (Sal. 11:5). Niman más kitlauelita ijkuak se tlakatl kiuisoki isiuatsin (Mal. 2:16; xpoua Colosenses 3:19). Ijkon ken kijtoua texto kampa onokixti yejuin tlamachtijli, 1 Pedro 3:​7, tla se tlakatl kichiuilia tlen xkuajli isiuatsin, xok kuajli nouikas iuan toTajtsin niman kanaj nion xok kinkakis iteoyouan.

 7. Ijkon ken kijtoua Efesios 4:​31, 32, ¿kenijki xnoneki kinnotsaskej tlakamej insiuauan? (Noijki xkita “Tlen noneki matikmatikan”).

⁷ Maka xkajua mosiuatsin. Sekimej tlakamej kintlauelnotsaj insiuauan niman kimijliaj tlen kinyolkokoua. Jehová kitlauelita tlaueltsajtsilistli, tetejteneualistli niman tlajtoltin tlen teyolkokouaj c (xpoua Efesios 4:​31, 32, TNM). d Jehová nochi kikaki niman kitstok kenijki tlakamej kinnotsaj insiuauan, maski ijkuak nemij kampa san iselti. Se tlakatl akin kitlauelnotsa isiuatsin niman san tlenon yokijli, xsan kijtlakoua inamiktilis, noijki kijtlakoua ken nouika iuan toTajtsin (Sant. 1:26).

 8. ¿Tlenon kinemilia Jehová itech pornografía, niman tleka?

⁸ Maka xkita pornografía. Jehová kitlauelita pornografía. Tla se tlakatl kimita tlaixkopinaltin tlen tsojkuiltikej, kijtlakoua ken nouika iuan Jehová niman xkitlakaita isiuatsin. e Jehová xkineki ika tlakamej makinkajkayauakan insiuatsitsinuan. Se teueuentsin xnoneki auilnemis iuan okse siuatl. ¡Nion xnoneki  konnemilis ika auilnentok! Jesús okijto ika se tlakatl akin kita se siuatl pampa kileuiya, yejua yeauilnentika pampa kentla ipan iyojlo notekaskia iuan on siuatl (Mat. 5:​28, 29). f

 9. ¿Tleka Jehová kitlauelita ijkuak se tokniuj kichiualtia isiuatsin makichiua tlen xkineki ijkuak san sekan notekaj?

⁹ Maka xchiualti mosiuatsin makichiua itlaj tlen xkineki ijkuak nenkichiuaskej sexo. Sekimej tlakamej kinchiualtiaj insiuauan makichiuakan tlen yejuamej xkinekij noso tlen kitlajyelitaj ijkuak san sekan notekaj. Ijkuak ijkon kinchiuiliaj, yejuamej tlajyouiyaj, notlajyelitaj niman kimachiliaj ika xkintlasojtlaj. Jehová kitlauelita ijkuak se tlakatl san itech tlanemilia niman xkinemilia kenijki nomachilis isiuatsin. ToTajtsin kineki ika tlakamej makintlasojtlakan insiuatsitsinuan, kualtsin makinnotsakan niman maka makinchiualtikan makichiuakan tlen ueliskia kipajsolos intlamachilis (Efes. 5:​28, 29). Aman tej, ¿tlenon uelis kichiuas se tokniuj tla yopeuj kichia tlen kemach yotikomonitakej ipan yejuin párrafos? ¿Tlenon uelis kichiuas niman ijkon kipatlas ken tlanemilia niman tlen kichiua?

TLEN UELIS KICHIUASKEJ TOKNIUAN PARA XOK KINYOLKOKOSKEJ INSIUAUAN

10. ¿Tlenon uelij teueuentsitsinuan itech Jesús?

¹⁰ ¿Tlenon uelis kinpaleuis tokniuan maka sa makichiuakan tlen kitlajyouiltia noso kiyolkokoua insiuatsin? Tla kichiuaj ken Jesús. Jesús xkeman ononamikti, san ika, melak kualtsin ken kiminotsaya inomachtijkauan niman kintlakaitaya, ika yejon, melak kuajli tla teueuentsitsinuan kichiuaj ken Jesús (Efes. 5:25). Matikitakan kenijki uelis kichiuaskej ken Jesús.

11. ¿Kenijki katka Jesús imiuan iapóstoles?

¹¹ Jesús nochipa okimititi iapóstoles ika kintlasojtlaya niman kintlakaitaya. Yejua xkeman okintlajyouilti nion xokimititi ika yejua tlanauatia. Maski yejua inTeko katka niman más ueyixtoya, nochipa yolyemanki katka niman hasta kintekichiuiliaya. Xkeman okimititi iapóstoles ika xuejueyixtokej katkaj nion xokichiuj tlen ueliskia kichiuas makimakasikan (Juan 13:​12-17). Okimijli inomachtijkauan: “Notech xuelikan, pampa nejua niyolsejki niman niyolyemanki. Nouan nenyolseuiskej” (Mat. 11:​28-30). Yakaj akin yolseujki xkijtosneki tla xkojtik, yej más kojtik pampa ueli san iselti noteltia. Ijkuak kikuakualaniaj, yejua nokojtilia xnimantsin kualanis.

12. ¿Kenijki tenotsaya Jesús?

¹² Jesús kualtsin kinnotsaya oksekimej, ika yejon, kinyolseuiaya niman kualtsin nomachiliayaj. Xkeman kintlauelnotsaya inomachtijkauan (Luc. 8:​47, 48). Niman ijkuak itlauelikniuan okiuijuikaltijkej niman kinekiyaj kikualaniskej, “yejua xotlanankilij ikan tlauijuikaltilistli” (1 Ped. 2:​21-23). Yejua kemantika hasta xkinnankiliaya (Mat. 27:​12-14). Teueuentsitsinuan, ¡melak kuajli tlen mechmachtia Jesús!

13. ¿Kenijki se teueuentsin uelis kiteititis ika setitika iuan isiuatsin? (Mateo 19:​4-6; noijki xkita tlaixkopinajli).

¹³ Jesús okimijli tlakamej maka makinkajkayauakan insiuatsitsinuan. Okijto tlen yokijtojka iTaj: “Tlakatl [ . . . ] nosetilis iuan isiuatsin” (xpoua Mateo 19:​4-6). Kampa kijtoua “nosetilis iuan” ika griego noijtoua “iuan nopepechos”. Yejuin kijtosneki ika ijkuak se tlakatl niman se siuatl nonamiktiaj, noneki melak kuajli setitoskej, kentla tla pepechiujtoskiaj. Ika yejon, ijkuak yakaj kiyolkokoua ixnamik, omemej tlajyouiyaj. Se tlakatl akin melak nouika iuan isiuatsin xkeman kinekis kitas pornografía. Yejua nimantsin oksekan ontlachias  niman xkitas tlen xtlaj ika tepaleui (Sal. 119:37). Yejua kentla notlajtolkauaskia iuan ixtololojuan para xkitas se siuatl akin xisiuauj ika xkuajli ileuilistli (Job 31:1).

14. ¿Tlenon noneki kichiuas se teueuentsin para oksejpa kuajli nouikas iuan isiuatsin niman iuan Jehová?

¹⁴ Tla se tlakatl kimaa isiuatsin noso kiyolkokoua, ¿tlenon noneki kichiuas para oksejpa kuajli nouikas iuan isiuatsin niman iuan Jehová? Kachtopa, kiselis ika xkuajli tlen kichiujtika. Jehová nochi kita, xtlaj uelis kiyanilis (Sal. 44:21; Ecl. 12:14; Heb. 4:13). Ika ome, maka sa makitlajyouilti isiuatsin niman manopatla (Prov. 28:13). Ika yeyi, makijli isiuatsin niman Jehová ika melak xkuajli tlen yokichiuj niman makintlajtlanili makitlapojpoluikan (Hech. 3:19). Makitlatlaujtili Jehová makipaleui makineki nopatlas. Noijki makitlajtlanili makipaleui kuajli matlanemili, kuajli matlajto niman makichiua tlen kuajli (Sal. 51:​10-12; 2 Cor. 10:5; Filip. 2:13). Ika naui, makichiua ijkon ken yokijli Jehová niman makitlauelita nochi tlen xkuajli niman nochi tlen tetlajyouiltia (Sal. 97:10). Ika makuijli, makintlajtlanili tlayekankej ipan tlanechikojli makipaleuikan, niman tlayekankej kipaleuiskej ika tlasojtlalistli (Sant. 5:​14-16). Niman ika chikuasen, makita tlenon uelis kichiuas para xok oksejpa kichiuas tlen xkuajli. Tla se teueuentsin kita pornografía, noijki noneki kichiuas nochi tlen yotikonitakej. Jehová kiteochiuas nochi kech nokojtilia para nopatlas (Sal. 37:5). San ika, xsan noneki kikajkauas ika kiyolkokoua isiuatsin, noijki noneki nomajmachtis kenijki kititis ika kitlakaita. Matikitakan kenijki uelis kichiuas yejuin.

KEN UELIS TIKTLAKAITAS MOSIUATSIN

15. ¿Kenijki se teueuentsin uelis kititis isiuatsin ika kitlasojtla?

¹⁵ Xkititi ika tiktlasojtla. Sekimej tlakamej akin melak ika inyojlo nemij iuan insiuatsin, mojmostla kititiaj ika melak kitlasojtlaj (1 Juan 3:18). Se tokniuj akin yononamikti uelis kititis isiuatsin ika kitlasojtla maski san ika itlaj tlen pitentsin, ken kajxilis imaj noso kinapalos. Noijki uelis  kontlajkuilouilis, ueliskia kitlajtoltis “¿Yotitlakua, nosiuatsin?”, noso kijlis “Melak nimitstlasojtla, nosiuatsin”. Niman ijkuak ajsis ichan, uelis kijlis ika melak kitlasojtla noso kemantika uelis kitkilis se xochitsintli noso itlaj tlen isiuatsin kuelita. Ijkuak se tlakatl kichiua yejuin, kitlakaita isiuatsin niman kichikaua inamiktilis.

16. ¿Tleka se teueuentsin noneki kiueyiteneuas isiuatsin?

¹⁶ Xkijli ika melak tikpatiojkaita. Se teueuentsin kitlakaita isiuatsin ijkuak kichiua kuajli manomachili niman ijkuak kijlia ika kipatiojkaita. ¿Kenijki uelis kichias yejuin? Uelis kitlasojkamachilis isiuatsin pampa nochipa melak kipaleuiya (Col. 3:15). Ijkuak se teueuentsin kiueyiteneua isiuatsin niman kijlia tleka kitlasojtla, isiuatsin kimachilia ika kitlasojtlaj, ika kitlakaitaj niman kuajli nomachilia (Prov. 31:28).

17. ¿Kenijki se teueuentsin uelis kititis isiuatsin ika kitlakaita?

¹⁷ Xtlakaita mosiuatsin niman xmalui. Se teueuentsin akin kitlasojtla isiuatsin kita ken se tesoro tlen Jehová yokimakak tlen melak patioj (Prov. 18:22; 31:10). Ika yejon, kipatiojkaita, kitlajpiya, kimaluiya niman kitlakaita, ijkon kichiua maski ijkuak san inselti nemij niman ijkuak san sekan notekaj. Ijkuak noteka iuan isiuatsin, xkichiualtia makichiua itlaj tlen yejua xkineki, tlen kitlayelita noso tlen kipajsoloua itlamachilis. g Niman noijki teueuentsin nokojtilia kipiyas chipauak itlamachilis ixpan Jehová (Hech. 24:16).

18. ¿Tlenon noneki kichiuas se teueuentsin? (Noijki xkita recuadro “ Naui tlemach ken uelis tikititis mosiuatsin ika tiktlakaita”).

¹⁸ Teueuentsin, kuajli xmatsto ika Jehová kita niman kipatiojkaita nochi tlen tikchiua para tikititis mosiuatsin ika tiktlakaita. Maka xchiua tlen kiyolkokos mosiuatsin, yej xchiuili tlen kuajli, xtlakaita niman xmalui. Ijkon tikititis ika tikpatiojkaita niman tiktlasojtla. Tla tiktlakaita mosiuatsin, xtikijtlakos ken timouika iuan Jehová (Sal. 25:14).