1. ¿Kenijki techpaleuiya pampa tikilnamikij imikilis Jesús sejse xiuitl?

 JEHOVÁ otechmakak se tetlayokolijli tlen melak patioj: otechmakak iKonetsin para mamiki topampa (2 Cor. 9:15). Aman ueli touikaj iuan Jehová niman uelis nochipa tinemiskej pampa Jesús omik topampa. Onka miyek tlen ika uelis tiktlasojkamachiliskej Jehová, akin okitemakak iKonetsin topampa pampa melak techtlasojtla (Rom. 5:8). Jesús otechnauati matikilnamikikan imikilis sejse xiuitl para ijkon xtikilkauaskej tlen yejua niman Jehová okichiujkej topampa (Luc. 22:​19, 20).

 2. ¿Tlenon tikitaskej ipan yejuin tlamachtijli?

² Ipan 2025, Conmemoración panos ipan tonajli sábado 12 de abril. Tinochimej yotikxelojkej yejon tonajli para tiaskej. Melak kuajli tla ijkuak yeajsis Conmemoración niman tla yopanok, matitlanemilijtokan a itech nochi tlen Jehová niman iKoneuj yokichiujkej topampa. Ipan yejuin tlamachtijli tikitaskej tlenon techmachtia tlaxtlauijli itech Jehová niman Jesús. Ipan okse tlamachtijli tikitaskej kenijki techpaleuiya imikilis Jesús niman kenijki uelis tikteititiskej ika tiktlasojkamatij.

TLENON TECHMACHTIA TLAXTLAUIJLI ITECH JEHOVÁ

 3. ¿Kenijki imikilis se tlakatl akin xkipiaya tlajtlakojli ueliskia kinmakixtis melak miyekej tlaltikpaktlakamej?

³ Tlaxtlauijli techititia ika Jehová kitlasojtla tlen melajki (Deut. 32:4). Matikilnamikikan ika Adán xokitlakamat toTajtsin, ika yejon, akin tiiuejkakoneuan otechpanoltili tlajtlakojli niman mikilistli (Rom. 5:12). Yejua ika, Jehová okuajtitlan  Jesús para matechmakixtiki itech tlajtlakojli niman mikilistli. San ika ¿kenijki imikilis se tlakatl akin xkipiaya tlajtlakojli ueliskia kinmakixtis melak miyekej tlaltikpaktlakamej? Apóstol Pablo okijto: “Ijkon ken miyekej onokuepkej tlajtlakolejkej san ipampa se tlakatl [Adán] xokitlakamat Dios, no ijki Dios miyekej kinselis ken yolmelajkej pampa se tlakatl [Jesús] okitlakamat Dios” (Rom. 5:19; 1 Tim. 2:6). Apóstol Pablo okijto ika pampa se tlakatl akin xkipiaya tlajtlakojli xokitlakamat toTajtsin, aman titlajtlakolejkej niman timikij. Kuakon, para timakisaskej itech tlajtlakojli niman mikilistli nonekiskia ika se tlakatl akin xkipiya tlajtlakojli makitlakamati toTajtsin.

 4. ¿Tleka Jehová xokinkauili ikoneuan Adán akin otetlakamatkej nochipa manemikan?

⁴ San ika ¿melak nonekiya mamiki Jesús para techmakixtis? ¿Xmás kuajli yeskia tla Jehová kinkauiliskia ikoneuan Adán akin tetlakamatiskiaj nochipa manemikan? Pampa titlajtlakolejkej, kanaj tiknemiliaj ika yejon más kuajli yeskia. San ika, matikilnamikikan ika Jehová xkipiya tlajtlakojli niman nochipa kichiua tlen melajki. Kuakon, yejua xueliskia san ijkon kikauas tlen okichiuj Adán.

 5. ¿Tleka kuajli tikmatstokej ika Jehová nochipa kichiua tlen kuajli?

⁵ ¿Tlenon panoskia tla Jehová xkitemakaskia iKoneuj ken tlaxtlauijli niman kinkauiliskia ikoneuan Adán akin tlajtlakolejkej nochipa manemikan? Kiteititiskia ika Jehová xkichiua tlen melajki niman kanaj tlaltikpaktlakamej notlajtoltiskiaj tla sakin oksejpa xkichiuaskia tlen melajki noso xkichiuaskia tlen yokijtojka. San ika, aman xijkon totlajtoltiaj pampa Jehová okichiuj tlen melajki maski ononek kitemakas iKonetsin akin melak kitlasojtlaya. Ika yejon, tejuamej kuajli tikmatstokej ika Jehová nochipa kichiua tlen kuajli.

 6. ¿Kenijki tlaxtlauijli techpaleuiya matikitakan kenijki melak techtlasojtla Jehová? (1 Juan 4:​9, 10, TNM).

⁶ Tlaxtlauijli techititia ika Jehová melajki, san ika, noijki techititia ika yejua sajnoye techtlasojtla (Juan 3:16; xpoua 1 Juan 4:​9, 10, TNM). b Jehová okuajtitlan iKoneuj para mamikiki topampa pampa kineki nochipa matinemikan niman matochiuakan ikoneuan. Ijkuak Adán otlajtlako, Jehová xok okitak ken ikoneuj. Ika yejon, tinochimej akin tiualeuaj itech Adán xok tiikoneuan Jehová. San ika, imikilis Jesús kichiuas ika akin tlaneltokaj itech toTajtsin niman kitlakamatij,  oksejpa manochiuakan ikoneuan. Tlaxtlauijli hasta yetechpaleuijtika pampa kichiua ika Jehová makintlapojpolui totlajtlakoluan niman matiuelikan iuan matouikakan niman matouikakan imiuan tokniuan. ¡Kuajli tikitaj ika Jehová melak techtlasojtla! (Rom. 5:​10, 11).

 7. Jesús melak otlajyoui ijkuak omik topampa, ¿kenijki techititia yejon ika Jehová melak techtlasojtla?

⁷ Uelis tikajsikamatiskej kenijki techtlasojtla Jehová tla titlanemiliaj itech nochi tlen ononek kichiuas para techmakixtis. Satanás okijto ika nion se itekipanojkauj toTajtsin uelis melajkanemis ijkuak tlajyouiya. Niman Jehová okitekauili matlajyoui Jesús achto mikis para kititis Satanás ika xmelauak tlen okijto (Job 2:​1-5; 1 Ped. 2:21). Jehová okitak ijkuak okipijpinaujtikej Jesús, ijkuak soldados okiuijuitekkej niman ijkuak okipilojkej ipan kojtli melaktik. Niman xsan yejon, noijki okitak kenijki iKoneuj melak otlajyoui ijkuak omik (Mat. 27:​28-31, 39). Jehová ueliskia kipaleuiskia Jesús ijkuak kitlajyouiltijtoyaj, ken ijkuak tlaltikpaktlakamej okijlijkej: “Yejua tlaneltoka itech toTajtsin; yejua makimakixti tla kineki kipaleuis” (Mat. 27:​42, 43). San ika, tla Jehová kipaleuiskia, Jesús xmikiskia topampa niman nion se tlaltikpakchane xkipiyaskia tlamachialistli. Ika yejon, Jehová okitekauili ika iKoneuj matlajyoui niman mamiki.

 8. ¿Kenijki kuajli tikmatstokej ika Jehová onoyolkoko ijkuak okitak ika kitlajyouiltijtoyaj iKoneuj? (Noijki xkita tlaixkopinajli).

⁸ ¿Kijtosneki ika Jehová xtlaj kimachilia pampa xokipaleui iKoneuj ijkuak okitak ika kitlajyouiltijtoya? Ka, xyejon kijtosneki. Yejua miyek kimachilia ijkon ken tejuamej, pampa yejua otexchijchiuj ken yejua. Ipan Biblia kijtoua ika kemantika yejua “onajman” niman “sanoyej onoyolkokoj” ipampa tlen kichiuayaj sekimej tlaltikpaktlakamej (Gén. 6:6). Aman matontlanemilikan itech Abrahán niman Isaac. Jehová okitlajtlanili Abrahán makimaka ikoneuj ken uentli (Gén. 22:​9-12; Heb. 11:​17-19). San xkonnemili kenijki melak noyolkokojtoya Abrahán ijkuak tlayektlalijtoya para kimiktis ikoneuj. Aman xkonnemili kenijki melak onoyolkoko Jehová ijkuak okitak kenijki melak kitlajyouiltijtoyaj iKoneuj hasta ijkuak omik. ¡Nion xueli tikonnemiliaj kenijki melak onajman niman onoyolkoko! (Xkita video Matitlaneltokakan ken yejuamej: Abrahán [parte 2], ipan jw.org).

 9. ¿Tlenon mitsmachtia Romanos 8:​32, 38, 39 itech kenijki Jehová mitstlasojtla niman kintlasojtla itekipanojkauan?

⁹ Tlaxtlauijli techititia kenijki melak techtlasojtla Jehová, nion se toamigo nion tochanejkauj akin melak iuan touikaj xtechtlasojtlaj ijkon ken Jehová techtlasojtla (xpoua Romanos 8:​32, 38, 39). Jehová hasta más techtlasojtla xijkon ken tejuamej totlasojtlaj. San xkonnemili yejuin: ¿tikneki nochipa tinemis?  Kuajli xmatsto ika Jehová más kineki nochipa xnemi. ¿Tikneki makintlapojpoluikan motlajtlakoluan? Kuajli xmatsto ika Jehová más kineki ijkon manochiua. San ika, yejua san itlaj techtlajtlanilia: matiktlasojkamachilikan nochi tlen yokichiuj topampa niman itech matitlaneltokakan. Kema, tlaxtlauijli techititia ika toTajtsin melak techtlasojtla. Niman ipan Xochitlalpan más tiueliskej itech itlasojtlalis Jehová (Ecl. 3:11).

TLENON TECHMACHTIA TLAXTLAUIJLI ITECH JESÚS

10. a) ¿Tlenon más kitekipachouaya Jesús ijkuak yekimiktiskiaj? b) ¿Kenijki okiteititi Jesús ika Satanás san tlakajkayaua? (Noijki xkita recuadro “ Ika imelajkayo Jesús onoteititi ika Satanás se tlakajkayaujketl”).

¹⁰ Jesús melak kitekipachoua tlen uelis kijtoskej itech iTaj (Juan 14:31). Jesús kajmanaya tlen tlaltikpaktlakamej ueliskia kijtoskej itech iTaj pampa yejua kimiktiskiaj ken yakaj akin okiuijuikalti toTajtsin niman ken yakaj akin okichiuj tlen melak xkuajli. Ika yejon, ijkin okijli iTaj: “NoTajtsin, tla tikneki, xnechejkuanili yejuin copa” (Mat. 26:39). Niman pampa Jesús omelajkanen itech Jehová hasta ijkuak omik, okiteititi ika Satanás san tlakajkayaujtoya pampa xmelauak katka nochi tlen okijto itech Jehová.

11. ¿Kenijki okiteititi Jesús ika melak kintlasojtlaya tlaltikpaktlakamej? (Juan 13:1).

¹¹ Tlaxtlauijli noijki techititia ika Jesús melak najmana inpampa tlaltikpaktlakamej, niman más najmana inpampa inomachtijkauan (Prov. 8:31; xpoua Juan 13:1). Jesús kimatiya ika melak tlajyouiskia ijkuak nemiskia ipan tlaltikpaktli niman ijkuak kimiktiskiaj. Maski ijkon, yejua xsan otenojnots pampa nonekiya ijkon kichiuas, yejua ika nochi iyojlo otenojnots, otemachti niman otepaleui. Niman ipan yeuajli ijkuak yekimiktiskiaj, hasta okimikxipajpak iapóstoles, okinyolchikauj niman  okinmachti (Juan 13:​12-15). Niman ijkuak yokipilojkaj, okinojnots se tlakatl akin iuan ompa pilkaya niman okijli Juan makitlajpiya inan, María (Luc. 23:​42, 43; Juan 19:​26, 27). Ijkuak Jesús otenojnots niman ijkuak omik topampa, kuajli okiteititi ika melak kintlasojtlaya tlaltikpaktlakamej.

12. Xteneua okseki tlen Jesús kichiua topampa.

¹² “Cristo tej, san sejpa omik para yeyika”, san ika, yejua ok miyek kichiujtok topampa (Rom. 6:10). ¿Tlenon kichiujtok? Yejua chikauak tekititok para techmakas miyek tlen kuajli, niman nochi yejon uelis techmakas pampa omik topampa. San xkonnemili nochi tlen kichiujtok pampa yejua Tekiuaj, Ueyi Teopixki niman tlayekanki ipan tlanechikojli (1 Cor. 15:25; Efes. 5:23; Heb. 2:17). Yejua kinsentlalijtikaj nochimej tlapejpeniltin niman akin chantiskej ipan yejuin tlaltikpaktli, niman yejuin tekitl noneki kitlamiltis achto tlamis ueyi tlajyouilistli (Mat. 25:32; Mar. 13:27). c Noijki kita ika nochimej itekipanojkauan makipiyakan tlen ika kichikauaskej intlaneltok ipan yejuin itlamiyan tonaltin (Mat. 24:45). Niman ijkuak tekiuajtitos ipan Mil Xiuitl, ok chikauak tekititos para techpaleuis. Kuajli nesi ika toTajtsin xsan okitemakak iKonetsin para mamiki topampa, yej noijki para makichiua miyek tlen kuajli topampa.

NOCHIPA XMOMACHTI

13. ¿Kenijki techpaleuiya más matiuelikan itech kenijki techtlasojtlaj Jehová niman Jesús ijkuak titlanemiliaj itech tlen kichiuaj topampa?

¹³ Tla titlanemiliaj itech nochi tlen yokichiujkej Jehová niman Jesús topampa, techpaleuis más matiuelikan itech kenijki melak techtlasojtlaj. Uelis tikamapouaskej se noso más libros itech Evangelios ijkuak yeajsis niman ijkuak yopanok Conmemoración. San ika, maka melak miyek matikamapouakan, yej san yolik matikamapoujtiakan niman ijkon uelis tiktejtemojtiaskej tlen techpaleuis más matiktlasojtlakan Jehová niman Jesús. Niman maka matikilkauakan tikimijliskej oksekimej tlen tiueltiuej.

14. Ijkon ken kijtoua Salmo 119:​97, ¿tlenon noneki tikchiuaskej niman ijkon más tiueliskej itech tlaxtlauijli niman itech okseki tlemach? (Noijki xkita tlaixkopinajli).

¹⁴ Tla tejua melak yotiuejkauj ipan ikalpan Jehová, kanaj timotlajtoltia tla ok onka tlen xtikmati itech tlen melak noixmati, ken itech  imelajkayo toTajtsin, itech itlasojtlalis niman itech tlaxtlauijli. San ika, tla timomachtia itech yejuin, tikitas ika nochipa tiknextis itlaj tlen xtikmatiya. Uelis tikintekitiltis toamatlajkuiloluan. Ijkuak xtikajsikamatis se tlaxelojli, xtejtemo ipan toamatlajkuiloluan tlen mitspaleuis xkajsikamati. Niman, ipan tonajli, xtlanemili itech tlen otimomachti niman itech tlen otiuel itech Jehová, itech iKoneuj niman itech kenijki melak mitstlasojtlaj (xpoua Salmo 119:97).

15. ¿Tleka noneki nochipa tiktejtemojtoskej tlen xetikmatij itech Biblia?

¹⁵ Maka xmajmana tla ijkuak tiuajmotlalia para tikamapouas noso timomachtis Biblia xtiknextia itlaj tlen temojkatlachialti noso itlaj tlen xetikmatiya. Ijkuak titomachtiaj Biblia, kentla tiktejtemoskiaj oro. Miyekej akin kitejtemouaj oro melak uejkauij kitejtemouaj, kemantika panoua miyek tonaltin niman xkinextiaj, san ika, yejuamej xnosiaujkauaj niman xkikajkauaj ika orotemouaj pampa maski san orotekuechtli, melak kipatiojitaj. Tlen tiknextiaj ipan Biblia más patioj xijkon ken oro (Sal. 119:127; Prov. 8:10). Ika yejon, maka xmosiaujkaua, nochipa xkamapoua niman xmomachti moBiblia (Sal. 1:2).

16. ¿Kenijki uelis tikchiuaskej ken Jehová niman Jesús?

¹⁶ Xmokojtili xchiujtiuj tlen tiueltiuj. Kanaj uelis timokojtilis xtitechikoitas niman ijkon tikixkopinas imelajkayo Jehová. Noijki uelis tikyejyekos titetlasojtlas ken Jesús, yejua melak kitlasojtlaya iTaj niman tlaltikpaktlakamej, hasta okinek tlajyouis para manoyekteneua itoka toTajtsin. Ijkin tikchiuas tla tikinpaleuiya tokniuan maski kemantika ouijtika yes niman tla titenojnotsa para oksekimej noijki makinpaleui tlaxtlauijli.

17. ¿Tlenon tikitaskej ipan okse tlamachtijli?

¹⁷ Más tiktlasojtlaskej Jehová niman iKonetsin tla tikajsikamatij niman tikpatiojkaitaj tlen okichiujkej topampa. Niman yejuamej noijki más techtlasojtlaskej (Juan 14:21; Sant. 4:8). Ika yejon, matiktekitiltikan nochi tlen Jehová techmaka para más matiuelikan itech tlaxtlauijli. Ipan okse tlamachtijli tikitaskej kenijki techpaleuiya tlaxtlauijli niman tlenon uelis tikchiuaskej niman ijkon tikteititiskej ika melak tiktlasojkamatij ken Jehová otechititi ika melak techtlasojtla.