1. ¿Tlenon tinochimej noneki tikchiuaskej, niman tleka kemantika ouijtika?

 MOJMOSTLA noneki tiktlapejpeniskej tlen tikchiuaskej. Seki xouijtika tiktlapejpeniaj, ken ijkuak tikitaj tlenon tijkuaskej noso tlen hora tikochiskej. San ika, seki kema ouijtika, ken ijkuak tiktlapejpeniaj kenijki titopajtiskej, kenijki más tiyolpakiskej, kenijki más yolpakiskej tochanejkauan niman kenijki tikueyichiuaskej toTajtsin. Tiknekiskiaj ika tlen tiktlapejpeniaj matechpaleui niman makinpaleui tochanejkauan, san ika, más tiknekiskiaj ika on tlen tiktlapejpeniaj makiyolpakti Jehová (Rom. 12:​1, 2).

 2. ¿Tlenon uelis tikchiuaskej niman ijkon tiktlapejpeniskej tlen más kuajli?

² Ipan yejuin tlamachtijli tikitaskej yeyi tlemach tlen uelis tikchiuaskej niman ijkon tiktlapejpeniskej tlen más kuajli: 1) tikmatiskej nochi tlen noneki, 2) totlajtoltiskej tlenon kinemilia Jehová itech tlen tiknekij tikchiuaskej niman 3) kuajli tikitaskej kenijki tonkisaskej tla tikchiuaj tlen tiknemilijtokej. Noijki tikitaskej kenijki uelis más tikpiyaskej kajsikamatilistli.

XMATI NOCHI TLEN NONEKI TIKMATIS

 3. ¿Tleka tikijtouaj ika para uelis tiktlapejpeniskej tlen kuajli kachtopa noneki tikmatiskej nochi tlen noneki? Xkijto se neskayotl.

³ Kachtopa noneki tikmatiskej nochi tlen noneki para uelis tiktlapejpeniskej tlen kuajli. ¿Tleka melak noneki ijkon matikchiuakan? San matikonnemilikan yejuin. Se kokoxki yauj onnopajtia pampa melak kualo. Tlapajtijketl kachtopa noneki kuajli kitas niman kitlatlajtoltis kenijki nomachilia para ijkon kimatis kenijki kipajtis. Noijki ijkon, tla tejuamej kachtopa tikmatij nochi tlen noneki, techpaleuis matiktlapejpenikan tlen kuajli. Matikitakan kenijki uelis tikchiuaskej yejuin.

 4. Ken kijtoua Proverbios 18:​13, ¿tlenon uelis tikchiuaskej para tikmatiskej nochi tlen noneki? (Noijki xkimita tlaixkopinaltin).

 ⁴ Tla titetlajtoltiaj, techpaleuis matikmatikan tlen noneki tikmatiskej. San matikonnemilikan ika sekimej tokniuan kichiuaj se iluitsintli niman technotsaj. ¿Tiaskiaj? Tla xtikmatij tlenon nochiuas ompa noso xtikmatij akinon kichiuas iluitsintli, nonekis tiktlajtoltiskej: “¿Kanon niman kemanon nosentlaliskej? ¿Kechmej yaskej? ¿Nemis yakaj akin kitas ika nochi kuajli manochiua? ¿Akinomej yaskej? ¿Tlenon nochiuas ompa? ¿Onias alcohol?”. Tla titetlajtoltiaj nochi yejuin, techpaleuis matiktlapejpenikan tlen kuajli (xpoua Proverbios 18:13).

 5. ¿Tlenon noneki tikchiuas tla yetikmati nochi tlen noneki tikmatis?

⁵ Tla yetikmati nochi tlen noneki tikmatis, aman xnemili tlen ueliskia panos. Matikontlalikan ika tikmati ika ipan iluitsintli kampa omitsnotskej yaskej miyekej akin xkintlakamatij itlanauatiluan Jehová, noso tikmati ika onias alcohol, san ika, xakaj nemis akin kitas ika nochi kuajli manochiua. Noso nesi ika ipan yejon iluitsintli ueliskia nochiuas itlaj tlen xkinamiki (1 Ped. 4:3). ¿Noso tlenon tikchiuaskia tla tikita ika tla tiauj ipan yejon iluitl timopolouilis motlanechikol noso xtontenojnotsas? Tla tiknemilia tlen ueliskia panos, mitspaleuis xtlapejpeni tlen kuajli. Tlen yotikonteneujkej melak mitspaleuis,  san ika, nonekis itlaj okse tikchiuas. Tejua yetikmati tlenon ueliskia panos, san ika ¿tlenon kinemilia Jehová itech yejon? (Prov. 2:6).

XKITA TLENON KINEMILIA JEHOVÁ

 6. Ijkon ken kijtoua Santiago 1:​5, ¿tleka noneki tiktlajtlaniliskej Jehová matechpaleui?

⁶ Xtlajtlanili Jehová mamitspaleui xkajsikamati tlenon kinemilia. Yejua kijtoua ika techmakas tlamachilistli pampa yejua “nochimej kinmaka, niman xitlaj kiteixkomaka” (xpoua Santiago 1:5). Tlamachilistli tlen techmakas Jehová techpaleuis matikajsikamatikan tla tlen tiknekij tiktlapejpeniskej kiyolpaktis noso ka.

 7. ¿Kenijki uelis tikmatis tlen kinemilia Jehová? Xkijto se neskayotl.

⁷ Tla tejua yotiktlajtlanili Jehová mamitsyekana, san xkitsto kenijki mitsnankilia. Matikontlalikan ika otipaxaloto niman otipoliuj. Tejua tiktlajtoltiskia yakaj akin ompa chanti kanon ika tias niman xtoneujteuaskia tla xemitsijlia kanon ika tias. Tejua tikchiaskia mamitsnankili niman kuajli tijkakiskia tlen mitsijlis. Noijki ijkon, tla tejua tiktlajtlanilia Jehová mamitsyekana, kuajli xkaki kenijki mitsnankilia itechkopa tlaxeloltin itech Biblia tlen uelis mitspaleuiskej itech tlen tiknemilijtika tiktlapejpenis. Oksejpa matontlanemilikan itech on iluitsintli kampa yomitsnotskej. Ijkuak tikitstos tla tias, uelis tiknemilis tlenon kijtoua Biblia itech iluimej kampa nochiua tlen xkinamiki niman kampa yauej akin xkitlakamatij toTajtsin. Noijki noneki tiknemilis ika Biblia kijtoua ika kachtopa noneki tikchiuaskej tlen techtlajtlanilia toTajtsin niman sakin  tlen tejuamej tiknekij (Mat. 6:33; Rom. 13:13; 1 Cor. 15:33).

 8. ¿Tlenon uelis tikchiuas tla tikneki tiknextis tlen mitspaleuis? (Noijki xkita tlaixkopinajli).

⁸ Aman tej, kanaj kemantika nonekis yakaj mamitspaleui xnexti tlen tikneki tikmatis. Ijkuak ijkon panos, se tokniuj tlakatl noso se tokniuj siuatl akin chikauak kipiya itlaneltok uelis mitsijlis tlenon ueliskia tikchiuas. San ika, melak noneki ika tejua noijki san moselti xtejtemo tlen mitspaleuis xtlapejpeni tlen kuajli. Uelis tiktekitiltis amatlajkuiloltin tlen intoka Tlen kinpaleuiya ika nomachtiaj iteixpantijkauan Jehová niman libro Textos bíblicos para la vida cristiana. Xkilnamiki ika tejua tikneki tiktlapejpenis tlen Jehová kuelita.

 9. ¿Kenijki uelis kuajli tikmatstoskej ika tlen tiktlapejpeniskej kiyolpaktis Jehová? (Efesios 5:17).

⁹ ¿Kenijki uelis kuajli tikmatstoskej ika tlen tiktlapejpeniskej kiyolpaktis Jehová? Kachtopa, noneki kuajli tikixmatiskej Jehová. Proverbios 9:10 kijtoua: “Tla tikixmati on Dios Yektitikaj, kijtosneki tikpiya kajsikamatilistli”. Yejon kijtosneki ika tla tiknekij tikpiyaskej kajsikamatilistli, noneki kuajli tikimixmatiskej ikualneskayouan Jehová, tlen yejua kineki, tlen kitlasojtla niman tlen kitlauelita. Xmotlajtolti: “Ika nochi tlen nikmati itech Jehová, ¿kiyolpaktis tlen niknemilijtika nikchiuas?” (xpoua Efesios 5:17).

10. ¿Tleka más noneki matikchiuakan ken kijtoua ipan Biblia xijkon ken tlen kichiuaj tochanejkauan noso tlen kichiuaj kampa tichantij?

¹⁰ Tla tiknekij tikyolpaktiskej Jehová, kemantika nonekis tikchiuaskej tlen tochanejkauan noso toamigos xkuelitaskej. Matontlanemilikan itech sekimej tajtin akin kinamiktisnekij imichpoch iuan yakaj akin kipiya tomin noso akin miyek uelis kinmakas noso kintlaxtlauilis ipampa imichpoch, san ika, yejuin tlakatl xchikauak itlaneltok. Yejuin tajtin kinamiktisnekij iuan yejon tlakatl pampa xkinekij ika imichpoch itlaj makipolo. San ika ¿akinon kipaleuis yejuin ichpochtli más manouika iuan toTajtsin? ¿Tlenon kinemilia Jehová itech yejon? Ipan Mateo 6:33 technankilia yejuin, ompa techyolchikaua kachtopa matiktlakamatikan toTajtsin. Maski tikintlakaitaj totajuan niman tochanikniuan, más noneki matikchiuakan tlen kiyolpaktis Jehová.

XKITA KENIJKI TONKISAS TLA TIKCHIUA TLEN TIKNEMILIJTOK

11. Ijkon ken kijtoua Filipenses 1:​9, 10, ¿katlejua kualneskayotl mitspaleuis kuajli xkita kenijki tonkisas tla tikchiua tlen tiknemilijtok?

¹¹ Tla yotikimitak seki tlaxeloltin kampa tlajtouaj itech tlen tikneki tiktlapejpenis, aman kuajli xkita kenijki tonkisas tla tikchiua tlen tiknemilijtok (xpoua Filipenses 1:​9, 10). ¿Kenijki uelis tikchiuas yejon? Xtekitilti mokajsikamatilis. Itech cada se tlen ueliskia tikchiuas, aman xnemilijtiuj tlenon ueliskia panos tla tikchiua yejon. Kemantika xouijtika tiktlapejpenis tlenon tikchiuas, san ika, kemantika ouijtika tikmatis tlenon más kuajli tikchiuas. Aman tej, mokajsikamatilis mitspaleuis xtlapejpeni tlen más kuajli maski ijkuak ouijtika yes.

12, 13. ¿Kenijki mokajsikamatilis mitspaleuis xtlapejpeni tlen más kuajli itech se tekitl?

¹² Xkonnemili ika tiktejtemojtinemi se tekitl para uelis tikintlakualtis mochanejkauan niman tiknextia ome tekitl. Kuajli tikita nochi tlen noneki tikmatis, ken tlenon tikchiuas, tlen hora tikalakis niman tlen hora tikisas, kech ika uejka niman okseki tlen noneki tikmatis. Ipan yejon ome tekitl xnochiua tlen Biblia kijtoua ika xkuajli. Niman kanaj tejua tikneki titekitis kampa más tikuelita noso kampa más ueyi mitstlaxtlauiliskej. San ika, noneki tikitas okseki tlemach achto tiktlapejpenis kanon titekitis.

 ¹³ Xmotlajtolti yejuin: “¿Se de yejon tekitl xnechkauilis nochipa maniuiya tlanechikoltin? ¿Xok nikpiyas tiempo para nikinpaleuis nochanejkauan mapakikan, kuajli manemikan niman nikinchikauilis intlaneltok?”. Tla timotlajtoltia yejuin, xsan tikitas kenijki más tiktlanis tomintsin, yej tikitas katlejua mitspaleuis xchiua tlen más noneki, ken tikueyichiuas Jehová niman tikintlajpiyas mochanejkauan. Tla ijkon tikchiua, Jehová kiteochiuas tlen tiktlapejpenis.

14. ¿Kenijki kajsikamatilistli niman tlasojtlalistli techpaleuis maka matikintlajkalikan oksekimej?

¹⁴ Kajsikamatilistli noijki techpaleuiya matitlanemilikan intech oksekimej niman ijkon xtikchiuaskej tlen ueliskia kintlajkalis (Filip. 1:​10, TNM). Melak noneki ijkin matikchiuakan ijkuak tiktlapejpeniskej kenijki totlakentiskej niman tokualnextiskej. Kanaj tejuamej tikpiyaj ken tikuelitaj tokualnextiskej, san ika, tlen tikuelitaj, ¿kintlajkalis tokniuan noso oksekimej akin xnomachtiaj? Kajsikamatilistli techpaleuis  maka matikchiuakan tlen oksekimej xkuajli kitaj. Niman tlasojtlalistli techpaleuis matiknekikan tikchiuaskej “on tlen kuajli para oksekimej” niman matokualnextikan san ken kinamiki (1 Cor. 10:​23, 24, 32; 1 Tim. 2:​9, 10). Nochi yejuin techpaleuis matiktlapejpenikan tlen makiteititi ika titetlasojtlaj niman titetlakaitaj.

15. ¿Itech tlenon noneki titlanemilis achto itlaj tikchiuas?

¹⁵ Tla tlen tiktlapejpenis melak ueyi kijtosneki, kuajli xnemili nochi tlen nonekis tikchiuas. Jesús okijto ika kachtopa noneki totlaliskej para tikitaskej tla techajxilis totomin (Luc. 14:28). Kuakon, xnemili nochi tlen nonekis tikpopolos, kech tiempo nonekis niman kech timokojtilis para uelis tikchiuas tlen yotiktlapejpeni. Kemantika kanaj nonekis san sekan nenkitaskej iuan mochanejkauan tlenon uelis nenkichiuaskej para uelis nochiuas tlen yonotlapejpeni. ¿Tleka melak kuajli tla ijkon tikchiua? Pampa yejon mitspaleuis xkita tla nonekis achijtsin tikpatlas tlen yotiktlapejpeni noso tla uelis tikchiuas itlaj okse tlen más kuajli. Niman tla tikimijlia mochanejkauan tlen yotiknemili niman kuajli tikaki tlen mitsijliaj, más kinektoskej mitspaleuiskej niman ijkon nochi kuajli onkisas (Prov. 15:22).

XTLAPEJPENI TLEN MITSPALEUIS

16. ¿Tlenon noneki tikchiuas para kuajli makisati tlen yotiktlapejpeni? (Noijki xkita recuadro “ Tlen mitspaleuis xtlapejpeni tlen kuajli”).

¹⁶ Tla yotikchiuj nochi tlen yotikonteneujkej, yeuelis tiktlapejpenis tlen más kuajli. Tejua yetikmati nochi tlen nonekiya tikmatis niman yotikimitak tlaxeloltin tlen yomitspaleuijkej xtlapejpeni tlen kiyolpaktia Jehová. Aman uelis tiktlajtlanilis Jehová mamitspaleui para nochi kuajli makisati.

17. ¿Tlenon mitspaleuis xtlapejpeni tlen kuajli?

¹⁷ Kanaj tlen yeuejkaui otiktlapejpeni kuajli okisato, maski ijkon, xkilnamiki ika maski miyek tikmati noso miyek yotiuel, noneki nochipa timopaleuis itech tlamachilistli tlen techmaka Jehová para uelis tiktlapejpenis tlen más kuajli. San yejua uelis miyek mitsmachtis niman mitsmakas kajsikamatilistli, niman yejon mitspaleuis xpiya tlamachilistli (Prov. 2:​1-5). Kema, Jehová uelis mitspaleuis xtlapejpeni tlen kiyolpaktis (Sal. 23:​2, 3).