NOCHIMEJ tlaltikpakchanejkej kinekij pakiskej. San ika, aman ipan yejuin itlamiyan tonaltin “sanoyej xkuajli” tlen tikixnamikij (2 Tim. 3:1). Pampa nochiua tlen xmelajki, onka kokolistli, xtlaj tekitl, onka tlajyouilistli, yejon uelis kichiuas ika tlaltikpakchanejkej maka mapakikan. Hasta itekipanojkauan toTajtsin noijki uelis najmanaskej niman ika yolik kipolojtiaskej inpakilis. Tla ijkon topan nochiua, ¿kenon uelis oksejpa tipakiskej?

Uelis tiknankiliskej yejuin tlajtoltilistli tla kachtopa tikasikamatij tlenon yemelak kijtosneki pakilistli, niman kenon sekimej tlaltikpakchanejkej xkipolouaj inpakilis maski kixnamikij tlaueltin. Sakin tikitaskej kenon xtikpoloskej niman noijki kenon tikiskaltiskej topakilis.

Melauak tipakis xsan noijki ken ika itlaj timopaktis. Matikitakan se neskayotl. Ijkuak yakaj tlauani, kanaj melak uejuetska. San ika, ijkuak tlatlacha, xok uetska niman kilnamiki ika ok kipiya miyek tlaueltin. Ipakilis san panoua. Xkipiya yemelak pakilistli (Prov. 14:13).

Pakilistli melak sejneka. Yejuin itlaj tlen tikmachiliaj tlen ualeua itech toyojlo, niman nomachilia ijkuak nopiya noso nochia itlaj tlen kuajli. Tikmachiliskej pakilistli kijtosneki tipakiskej maski panos tlen kuajli noso tlen xkuajli (1 Tes. 1:6). Yakaj uelis itlaj kajmanas niman maski ijkon pakis. Se neskayotl, itlatitlankauan Cristo okinuijuitekej pampa otlajtokej itech, san ika, Biblia kijtoua ika “ouajkiskej ne imixpan on tetlakanojnotskej ikan paktli, pampa Dios okinkauilij okimpijpinauijkej pampa kineltokayaj Jesús” (Hech. 5:41). Melauak, xopajkej pampa okinuijuitekej, opajkej pampa oyolmelaujkanenkej itech toTajtsin.

Xakaj uajnemi niman kuajkui pakilistli, nion xsan iselti kiskaltia. ¿Tleka? Pampa melauak pakilistli ualeua itech itlakilyo iespíritu toTajtsin. Yejuin espíritu techpaleuiya matikiskaltikan yenkuik tonemilis, niman pakilistli ompa kalaki (Efes. 4:24, TNM; Gál. 5:22, TNM). Niman, ijkuak tikpiyaj pakilistli, melak kuajli tikixnamikij tlen techajmana ipan tonemilis.

Ijkuak Jehová okichijchiuj tlaltikpaktli, kinekiya san manochiua tlen kuajli, xkinekiya manochiua nochi tlen xkuajli tlen aman tikitaj. Maski melauak ika tlaltikpakchanejkej kichiuaj tlen xkuajli, Jehová xkipoloua ipakilis. ITlajtol toTajtsin kijtoua: “Kampa chanti onka kojtilistli niman pakilistli” (1 Crón. 16:27). Noijki, iyojlo paki ijkuak kita ika itekipanojkauan kichiuaj tlen kuajli (Prov. 27:11).

¿Kenon uelis tikixkopinaskej Jehová? Maka melak matajmanakan ijkuak itlaj xkisa ken tiknekiyaj. Niman maka matikpolokan topakilis, matitlanemilikan itech tlen kuajli tikpiyaj aman, niman matikchiakan ika ijyouilistli ika tlen panotika manoyektlali. *

 Biblia tlajtoua intech miyekej itekipanojkauan toTajtsin akin xokipolojkej inpakilis maski okixnamijkej tlen ouijtika. Abrahán se intech yejuamej. Yejua okixnamik tlaueltin inpampa oksekimej niman noijki tlen ueliskia kichiuas makipolo inemilis (Gén. 12:10-20; 14:8-16; 16:4, 5; 20:1-18; 21:8, 9). San ika, yejua xkeman okipolo ipakilis. ¿Tleka? Pampa xkeman okilkauj tlamachialistli ika nemis ipan se yenkuik tlaltikpaktli kampa Mesías tlanauatis (Gén. 22:15-18; Heb. 11:10, TNM). Jesús okijto ika Abrahán “opak pampa okimat” ika yejua uajlaskia (Juan 8:56). Tejuamej noijki uelis tikchiuaskej ken Abrahán tla titlanemiliaj ika pakilistli itech nochi tlen kuajli tikseliskej tlayekapan (Rom. 8:21).

Ijkon ken Abrahán, Pablo, itlatitlankauj Cristo, niman Silas akin iuan kistinemiya nochipa tlanemilijtoyaj itech tlen toTajtsin yokijtoka kichiuas. Yejuamej xokipolojkej inpakilis maski okixnamijkej tlen ouijtika pampa intlaneltokil chikauak katka. Se tonajli, melak okinuijuitekej niman okintsajkej. Biblia kijtoua ika “ijkuak kanaj tlajkoiuan katka, Pablo niman Silas kichiuayaj oración niman kinokuikatiaya tlakuikaltin itech ika Dios” (Hech. 16:23-25). Ijkon ken intlamachialis kinmakaya kojtilistli, noijki pakiyaj pampa tlajyouijtoyaj ipampa itoka Cristo. Tla tiknekij noijki ijkon tikchiuaskej, noneki nochipa titlanemiliskej itech tlenon kuajli panoua ijkuak tiktekichiuiliaj toTajtsin ika tlaneltokijli (Filip. 1:12-14).

Aman noijki tikinpiyaj miyek kuajli neskayomej itech tokniuan akin xkipolouaj inpakilis maski kixnamikij tlaueltin. San matikonnemilikan itech ueyi ajakakiyaujtli Haiyan kenon melak otlaijtlako itlajkotian Filipinas ipan noviembre itech xiuitl 2013. Ipantsin 1,000 familias akin Teixpantijkej okipolojkej inkal. Ijkon ipan onochiuj tokniuj George, akin chanti ipan kalpan Tacloban. Yejua okijto: “Maski melak xkuajli tlen onochiuj, tokniuan pakij. Xniknextia tlajtoltin tlen ika nikijtos kenon melak tipakij”. Tla titlanemiliaj itech nochi tlen Jehová yokichiuj topampa niman tiktlasojkamatij, xtikpoloskej topakilis maski tikixnamikiskej tlen ouijtika. ¿Tlenon okseki yotechmakak Jehová tlen kichiua matipakikan?

Tlen kichiua melak matipakikan yejua pampa touikaj iuan Jehová. Tikixmatij akin Tekiuaj itech nochi tlen onka. Yejua akin toTajtsin, toTaj niman akin iuan touikaj (Sal. 71:17, 18).

Okse tlen ika uelis tipakiskej yejua pampa tiyoltokej niman pampa tiuelij toyolpaktiaj ipan tonemilis (Ecl. 3:12, 13). Noijki, pampa Jehová yokichiuj matiknisiuikan, tikmatij tlenon kineki kichiuas niman tlenon kineki matikchiuakan (Col. 1:9, 10). Ipampa yejuin, tejuamej tikmatij tleka nikan tinemij niman tikmatij tlenon tikchiuaskej ika tonemilis. Miyekej tlaltikpakchanejkej nion xkimatij tleka tinemij. Yejuin okiteneuj Pablo ijkuak okijto: “Dios yokinyektlalilij para on yejuan kintlajsojtlaj on tlajtlamach yejuan xakaj okitak nion okak nion okinemilij. Pero in tlajtlamach Dios yotechkauilij ma tikixmatikan itechkopa iEspíritu Santo” (1 Cor. 2:9, 10). ¿Xmelak ika tipakij pampa tikmatij tlenon kineki kichiuas toTajtsin?

Matikitakan okseki tlen Jehová yokichiuj ipampa ikalpan. Yokichiuj tlen nonekiya niman ijkon uelis techintlapopoluilis totlajtlakoluan (1 Juan 2:12). Niman ipampa iteiknelilis techmaka tlamachialistli ika tinemiskej ipan se yenkuik tlaltikpaktli, tlen melak nisiuj ionka (Rom. 12:12). Aman noijki techinmaka miyekej tokniuan akin imiuan uelis tikueyichiuaskej (Sal. 133:1). Noijki, Biblia kuajli techijlia ika Jehová kitlajpiya ikalpan itech Satanás niman intech xkuakualtin espíritus (Sal. 91:11). Tla titlanemiliaj itech yejuin tlateochiualistin tlen toTajtsin techmaka, mojmostla noskaltijtias topakilis (Filip. 4:4).

¿Uelis tikiskaltiskej topakilis? Jesús okijto: “Nejua ijkon nemechnojnotsa para nipakis nemopampa niman nemejuamej nemopakilis ajsitias” (Juan 15:11). Yejuin tlajtoltin techititiaj ika nochipa uelis tikiskaltiskej topakilis. Pakilistli yeskia kentla se tlitl. Tla tiknekij ika yejon tlitl maka maseui noneki tiktlatokilijtoskej. Noijki ijkon, tla tiknekij ika topakilis maueyiya, noneki tikiskaltijtoskej ika iespíritu toTajtsin. Ika yejon, nochipa matiktlajtlanilikan Jehová iespíritu niman matitlanemilikan itech Biblia, tlen yejua ika iespíritu okichiuj manoijkuilo (Sal. 1:1, 2; Luc. 11:13).

Tla tikchiuaj tlen Jehová kuelita, ijkon noijki uelis tikiskaltiskej topakilis (Sal. 35:27; 112:1). ¿Tleka ijkon tikijtouaj? Pampa yejua otexchijchiuj niman ijkon matikchiuakan tlen kineki. Biblia techijlia: “Xmojkaita akin melauak toTajtsin niman xtlakamati itlanauatiluan” (Ecl. 12:13). Yejua ika, melak tipakij ijkuak tiktekichiuiliaj Jehová. *

Tla tikpiyaj pakilistli, xsan kuajli tomachiliskej, noijki tikpiyaskej okseki tlen kuajli. Se neskayotl, ijkuak ika pakilistli tiktekichiuiliaj toTajtsin iluikakchane maski tikixnamikij tlaueltin, tikyolpaktiaj Jehová (Deut. 16:15; 1 Tes. 5:16-18). Melauak pakilistli techpaleuiya maka matiknekikan tikpiyaskej miyek tlemach, niman techyolchikaua matikchiuakan okseki tlemach ipampa Tekiuajyotl (Mat. 13:44). Ijkuak tikitaskej kenon kuajli onkisa tlen tikchiuaj, techpaleuis melak matipakikan, kuajli matomachilikan niman matikinpaktikan oksekimej (Hech. 20:35; Filip. 1:3-5).

Noijki, tla tikiskaltiaj topakilis, yejon uelis techpaleuis maka matikualokan. Biblia kijtoua: “Akin iyojlo paki kuajli tepajtia” (Prov. 17:22). Se ixtlamatki itech Universidad de Nebraska (Estados Unidos) okijto itlaj tlen notlajtolnamiki iuan Biblia. Okijto: “Tla aman tejua tinemi ika moyojlo niman tipaki ipan monemilis, uelis ika tlayekapan xsajnoye tikualos”.

Ken yotikitakej, maski tinemij ipan tonaltin tlen melak ouijtika, uelis tikmachiliskej melauak pakilistli. Yejua ika, noneki matikselikan espíritu santo, niman tlen techpaleuis matikpiyakan yejua teoyotl, tomachtiskej Biblia niman itech titlanemiliskej. Noijki, tla tiknekij tikiskaltiskej topakilis, noneki titlanemiliskej itech tlateochiualistin tlen tikpiyaj, noijki tikimixkopiniliskej intlaneltokil oksekimej itekipanojkauan toTajtsin niman tokojtiliskej tikchiuaskej tlen Jehová kineki. Ijkon uelis tikmachiliskej tlen kijtoua Salmo 64:10: “Akin yolmelaujki pakis itech Jehová niman itech yejua nopaleuis”.