1, 2. a) ¿Tlenon okasikamat se tokniuj? b) ¿Tlenon okichiuj tokniuj niman ijkon kiyektlalis yejon?

ROBERT onoapolakti ijkuak kipiaya 15 xiuitl, san ika, xsajnoye kipatiojkaitaya tlen melauak. Yejua kijtoua: “Xkeman onikchiuj tlen xkuajli, san ika, san yoninomatka niktekichiuilis toTajtsin. Niknemiliaya ika ninoyekanaya ika iespíritu santo toTajtsin pampa niaya ipan nochi tlanechikoltin niman ipan se xiuitl miyekpa ninochiuaya precursor auxiliar. San ika, itlaj nechpolouaya”.

² Robert xkasikamatiya tlen kipolouaya hasta ijkuak ononamikti. Yejua iuan isiuauj miyekpa nauiltiayaj ika notlatlajtoltiayaj itech tlen kijtoua Biblia. Isiuauj, akin chikauak katka itlaneltokil, nochipa kuajli tlanankiliaya, san ika, Robert miyekpa pijpinauiya pampa xkimatiya kenon tlanankilis. Yejua kijtoua: “Kentla xitlaj nikmatiskia. Kuakon oniknemili: ‘Tla nikneki nikyekanas nosiuauj, kipiya ika itlaj nikchiuasʼ”. Niman ijkon okichiuj Robert. Yejua kijtoua: “Opeuj ninomachtia, niman ninomachtia Biblia niman ijkon miyek onikasikamatstiaj”. Pampa ijkon okichiuj, kuajli okasikamat tlen melauak, niman tlen ueyi kijtosneki, melak oninonisiui itech Jehová.

3. a) ¿Tlenon tiuelij itech tlen ipan onochiuj Robert? b) ¿Tlenon tikitaskej ipan yejuin tlamachtijli?

³ Miyek tiuelij itech tlen ipan onochiuj Robert. Kanaj tejuamej  itikixmatstokej seki tlen kijtoua Biblia niman kanaj xtopolouiliaj tlanechikoltin noso kanaj nochipa titenojnotsaj. San ika, yejuin xkijtosneki tla yemelak toyekantokej ika iespíritu santo toTajtsin. Kanaj yotokojtilijkej tikchikauaskej ken toyekanaj ika iespíritu santo toTajtsin, san ika, sakin ika kuajli totlachiliaj uajnesi ika ok uelis tikyektlaliskej okseki (Filip. 3:16). Yejuin tlamachtijli techpaleuis matikchikauakan ken toyekanaj ika iespíritu santo toTajtsin ijkuak tikinnankiliskej yejuin yeyi tlajtoltilistin: 1) ¿Tlenon techpaleuis matikitakan tla toyekanaj ika iespíritu santo toTajtsin? 2) ¿Tlenon noneki tikchiuaskej niman ijkon tikchikauaskej ken toyekanaj ika iespíritu santo toTajtsin? 3) ¿Kenon techpaleuis ipan tonemilis tla nochipa ijkon toyekanaj?

4. ¿Akinomej noneki kichiuaskej tlen kijtoua Efesios 4:23, 24?

⁴ Ijkuak otipeujkej tiktekichiuiliaj toTajtsin, otopatlakej. Niman yejuin ones ipan nochi tlen tikchiuaj. Niman xotlan ika topatlaj ijkuak otoapolaktijkej. Biblia techijlia: “Noneki ika nochipa nenkiyenkuiliskej kojtilistli tlen onka ipan nenmotlanemilil” (Efes. 4:23, 24, TNM). Pampa titlajtlakolejkej, noneki nochipa topatlatiaskej. Hasta tokniuan akin yeuejkaui kuajtekichiuilijtiuej Jehová noneki kitlajpiyaskej ika manoyekanakan ika iespíritu santo toTajtsin (Filip. 3:12, 13).

5. ¿Katlejua tlajtoltilistin techpaleuiskej matotlachilikan?

⁵ Tla tiknekij tikchikauaskej niman xtikpoloskej ken toyekanaj ika iespíritu santo toTajtsin kipiya ika sa no tejuamej totlachiliskej. Tla titelpokamej noso itiuejueyimej, uelis totlajtoltiskej yejuin: “¿Nikita ika ninoyekantika ika iespíritu santo toTajtsin? ¿Nitlanemilia ken Cristo? ¿Tlenon kiteititia tlen nikchiua niman ken ninouika ipan tlanechikoltin? ¿Tlenon nesi ika nikneki ijkuak nitlajtoua imiuan oksekimej? ¿Tlenon kiteititia notech ken ninotlakentia, ken ninoyektlalia, ken ninomachtia niman ken nitenankilia ijkuak nexchikajkanotsaj? ¿Tlenon nikchiua ijkuak nikixnamiki tlen nechyoltilana? ¿Yonikchiuj tlen noneki niman yoninochiuj se akin kitoka Cristo akin chikauak itlaneltokil?” (Efes. 4:13). Titlanemiliskej itech ken tikinnankiliskej techpaleuis tikitaskej kech yotokojtilijkej tikchikauaskej ken toyekanaj ika iespíritu santo toTajtsin.

6. ¿Tlenon okseki techpaleuis matikitakan kenon toyekanaj ika iespíritu santo toTajtsin?

⁶ Kanaj kemantika nonekis oksekimej matechpaleuikan niman ijkon tikitaskej tla toyekanaj ika iespíritu santo toTajtsin. Pablo, itlatitlankauj Cristo, okijto ika akin noyekana ika iileuilisuan itlalnakayo xuelis kitas ika tlen kichiua xkuelita toTajtsin. San ika, akin noyekana ika iespíritu santo toTajtsin kasikamati tlenon kinemilia toTajtsin niman ika xkuelita kenon nemi akin noyekana ika iileuilisuan itlalnakayo (1 Cor. 2:14-16, TNM; 3:1-3). Pampa tlayekankej kipiyaj itlamachilis Cristo, miyekpa nimantsin kitaj ijkuak se peua noyekana ika iileuilisuan itlalnakayo. Ijkuak yejuamej technotsaj ipampa yejuin, ¿tikchiuaj tlen techijliaj? Tla ijkon tikchiuaj, tikteititiskej ika tiknekij tikchikauaskej ken toyekanaj ika iespíritu santo toTajtsin (Ecl. 7:5, 9).

7. ¿Tleka san tikixmatiskej tlen kijtoua Biblia xtechpaleuis matoyekanakan ika iespíritu santo toTajtsin?

⁷ Maka xkilkaua ika san tikixmatiskej tlen kijtoua Biblia xtechpaleuis nochipa matoyekanakan ika iespíritu santo toTajtsin. Tekiuaj Salomón melak miyek kixmatiya itech Jehová. Hasta itlajtoluan nestokej ipan Biblia. San ika, sakin yejua xoyolmelaujkanen itech Jehová niman xok onoyekan ika iespíritu santo toTajtsin (1 Rey. 4:29, 30; 11:4-6). Kuakon, ¿tlenon okseki noneki tikchiuaskej? Noneki tikitaskej ika totlaneltokil nochipa machikauak (Col. 2:6, 7). San ika ¿kenon tikchiuaskej yejon?

8, 9. a) ¿Tlenon techpaleuis nochipa matoyekanakan ika iespíritu santo toTajtsin? b) ¿Tlenon tiktejtemouaj ijkuak tomachtiaj niman titlanemiliaj? (Xkimita tlaixkopinaltin kampa peua tlen tomachtijtokej).

⁸ Pablo okimijli akin kichiuayaj ken Cristo ipan  kachtopa siglo ika nonekiya nokojtiliskej niman ijkon kichikauaskej intlaneltokil (Heb. 6:1). Tejuamej noijki noneki tikchiuaskej tlen okijto Pablo. Ika yejon, melak noneki matomachtikan amoxtli “Nochipa xnemikan itech itlasojtlalis toTajtsin”. Tla titlamij tomachtiaj yejuin amoxtli techpaleuis matikitakan kenon tikintlakamatiskej ipan tonemilis itlajtolyekanalisuan Biblia. Tla tejua yotitlan timomachtia yejuin amoxtli, ¿uelis tikimitas okseki amatlajkuiloltin tlen mamitspaleuikan nochipa xtlaneltoka? (Col. 1:23). Noijki, noneki matikchiuakan teoyotl niman matiknemilikan kenon uelis tikchiuaskej ipan tonemilis tlen tomachtiaj.

⁹ Maka xkilkaua ika ijkuak tomachtiaj niman titlanemiliaj tiktejtemouaj tikchikauaskej ika tiknekij tikyolpaktiskej Jehová niman tiktlakamatiskej itlanauatiluan (Sal. 40:8; 119:97). Niman noijki, tomachtiaj tikmapeuaskej tlen uelis kichiuas maka matikiskaltikan totlaneltokil (Tito 2:11, 12).

10. ¿Kenon telpokamej niman ichpokamej uelis kichikauaskej ken noyekanaj ika iespíritu santo toTajtsin?

¹⁰ Tla tejua titelpochtli noso tiichpochtli, ¿tikmatstok tlenon tikneki tikchiuas niman ijkon tiktekichiuilis Jehová? Se tokniuj akin tlapaleuiya Betel, ipan uejueyimej tlanechikoltin se tonajli, tlajtlatouani imiuan telpokamej akin noapolaktiskej. Tokniuj kintlajtoltia tlenon kinekij kichiuaskej ipan itekiyo toTajtsin. Ken miyekej kinankiliaj kiteititia ika kuajli kimatstokej tlen kinekij kichiuaskej sakin ipan itekiyo Jehová. Sekimej kinemilijtokej chikauak kitekichiuiliskej toTajtsin noso yaskej ontlapaleuiskej kampa nonekij tenojnotskej. San ika, kemantika nemij telpokamej akin xkimatij tlenon kijliskej. ¿Kijtosneki yejuin ika kinemiliaj ika xkinpoloua kitejtemoskej kenon sakin kitekichiuiliskej toTajtsin? Telpochtli noso ichpochtli, xmotlajtolti: “¿Niauj tlanechikoltin niman nontenojnotsa san pampa notajuan kinekij ijkon manikchiua? ¿Kuajli ninouika iuan Jehová?”. Yemelak ika tinochimej, maski tla titelpokamej noso itiuejueyimej, noneki tiktejtemoskej kenon sakin tiktekichiuiliskej Jehová. Yejuin techpaleuis matikchikauakan ken toyekanaj ika iespíritu santo toTajtsin (Ecl. 12:1, 13).

11. a) ¿Tlenon noneki matikchiuakan tla tiknekij tikchikauaskej totlaneltokil? b) ¿Akinon uelis tikixkopinaskej?

¹¹ Tla yotikitakej kanon uelis toyektlaliskej, aman kipiya ika topatlaskej. Yejuin melak ueyi kijtosneki. Pampa uelis kichiuas matikselikan nemilistli noso mikilistli (Rom. 8:6-8). Melauak ika, tikpiyas chikauak motlaneltokil xkijtosneki ika aman xok titlajtlakole. Niman Jehová techpaleuiya ika iespíritu. Maski ijkon, kipiya ika tokojtiliskej. Ikipiya seki xiujtin, John Barr, se tokniuj akin otekit ipan Grupo akin Tlayekana otlajto itech Lucas 13:24 niman okijto ika miyekej xuelij kichikauaj intlaneltokil “pampa xnokojtiliaj ken noneki”. Noneki tikchiuaskej ken Jacob, akin onoxixiko iuan se iluikaktekitketl hasta ijkuak okiteochiuj (Gén. 32:26-28). Maski tomachtiskej Biblia melak teyolpakti, xkipiya ika tikpouaskej kentla tikpouaskiaj se amoxtli tlen san ika toyolpaktiskej. Kipiya ika tokojtiliskej tiknextiskej tlen iyantika niman tlen techpaleuis.

12, 13. a) ¿Tlenon techpaleuis matikchiuakan tlen kijtoua 1 Corintios 2:16? b) ¿Tlenon tiuelij itech tlen ipan onochiuj Pedro niman itech tlen okijto? c) ¿Tlenon noneki matikchiuakan tla tiknekij tikchikauaskej totlaneltokil? (Xkita recuadro “ Tlen uelis tikchiuaskej tla tiknekij tikchikauaskej totlaneltokil”).

¹² Ijkuak tokojtiliaj toyekanaskej ika iespíritu santo toTajtsin, yejon espíritu techmaka kojtilistli tlen ika uelis tikpatlaskej ken titlanemiliaj. Ijkon ika yolik tipeuaskej titlanemiliskej ken Cristo (1 Cor. 2:16, TNM). Noijki techpaleuiya matikinpopolokan iileuilisuan totlalnakayo niman matikpiyakan kualneskayomej tlen kiyolpaktiaj toTajtsin (Gál. 5:16, 22, 23). Tla tikitaj ika san titlanemiliaj itech tlemach tlen uelis tikpiyaskej niman itech iileuilisuan totlalnakayo, maka matosiaujkauakan. Nochipa matiktlajtlanikan espíritu santo, niman Jehová techpaleuis ika totlanemililuan maoniakan ipan tlen kuajli (Luc. 11:13). Xkilnamiki Pedro, itlatitlankauj Cristo. Kemantika yejua okichiuj ken akin xnoyekana ika iespíritu santo  toTajtsin (Mat. 16:22, 23; Luc. 22:34, 54-62; Gál. 2:11-14). San ika, yejua xonosiaujkauj. Ika yolik, niman ika itlapaleuilis Jehová, Pedro ouel otlanemili ken Cristo. Tejuamej noijki tiueliskej ijkon tikchiuaskej.

¹³ Niman sakin, Pedro okiteneuj kualneskayomej tlen noneki tiktejtemoskej (xpoua 2 Pedro 1:5-8). Yejua okijto: “Xchiuakan kanika para uelis nenkichiuaskej on tlen kuajli”. Tla tokojtiliaj toselti toteltiskej, titlaxikoskej niman tikintlasojtlaskej oksekimej, techpaleuis matikchikauakan ken toyekanaj ika iespíritu santo toTajtsin. Melak kuajli yeskia tla mojmostla totlajtoltiaj: “¿Tlenon uelis nikchiuas aman niman ijkon nikchikauas ken ninoyekana ika iespíritu santo toTajtsin?”.

14. ¿Kenon techpaleuis ipan tonemilis tla toyekanaj ika iespíritu santo toTajtsin?

¹⁴ Tla titlanemiliaj ken Cristo nesis itech kenon titlajtouaj, kenon touikaj, ipan totekiyo noso ipan kaltlamachtijli, itech kenon titlajtouaj niman itech tlenon tiktlapejpeniaj tikchiuaskej mojmostla. Tlen tiktlapejpeniaj tikchiuaskej kiteititis tla tochikauaj tiktokaskej Cristo. Tla toyekanaj ika iespíritu santo toTajtsin xtijkauiliskej ika itlaj makijtlako ken touikaj iuan Jehová. Ijkuak tikixnamikiskej tlen xkuajli niman tlen teyoltilana, tikmapeuaskej. Niman ijkuak tiktlapejpeniskej tlenon tikchiuaskej, kachtopa totlajtoltiskej: “¿Katlejua itlajtolyekanalisuan Biblia nechpaleuis kuajli manikita tlenon nikchiuas? ¿Tlenon kichiuaskia Cristo tla ipan nochiujtoskia yejuin? ¿Tlenon kiyolpaktis Jehová?”. Kipiya tomachtiskej ika noneki nochipa ijkon titlanemiliskej. Matikitakan seki kampa uelis ijkon tikchiuaskej. Itech tlen tikitstiaskej, tikteneuaskej katlejua itlajtolyekanalis Biblia uelis techpaleuis matiktlapejpenikan tlen kuajli.

15, 16. Xkijto kenon techpaleuiya titlanemiliskej ken Cristo ijkuak: a) tiktlapejpeniaj iuan akinon tonamiktiskej; b) ijkuak tiktlapejpeniaj iuan akinon touikaskej.

¹⁵ Ijkuak tiktlapejpeniaj iuan akinon tonamiktiskej. Tiknextiaj itlajtolyekanalis Biblia ipan 2 Corintios 6:14, 15 (xpoua). Itlajtoluan Pablo kuajli kiteititiaj ika akin noyekana ika iespíritu santo toTajtsin niman akin noyekana ika iileuilisuan itlalnakayo xueliskej nouikaskej. ¿Kenon uelis tiktlakamatiskej yejuin tlajtolyekanalistli ijkuak tiktlapejpeniskej iuan akinon tonamiktiskej?

¹⁶ Ijkuak tiktlapejpeniaj iuan akinon touikaskej. Matikitakan itlajtolyekanalis Biblia ipan 1 Corintios 15:33 (xpoua). Akin kitekichiuiliaj toTajtsin xnouikaj imiuan akin ueliskej kimijtlakouiliskej intlaneltokil. Matiknemilikan kenon tikchiuaskej yejuin tlajtolyekanalistli itech tlen tikixnamikij. Se neskayotl, ijkuak tiktlapejpeniaj akinon imiuan tonojnotsaskej ipan Internet, noso ijkuak yakaj akin xtikixmatij technotsa iuan matauiltikan ipan Internet.

17-19. Xkijto kenon tla toyekanaj ika iespíritu santo toTajtsin techpaleuis: a) matikmapeuakan tlen xtechpaleuiya; b) matiknemilikan tlenon uelis tikchiuaskej ipan itekiyo toTajtsin; c) matikyektlalikan tlauejli tlen tikpiyaj iuan okse.

¹⁷ Tlen xtechkauilia matoyekanakan ika iespíritu santo toTajtsin. Itech tlen okijto Pablo, tiknextiaj tlajtoltin tlen texchikajkanotsaj (xpoua Hebreos 6:1, TNM). * Ijkuak Pablo kijtoua ika noneki tikmapeuaskej  “tlajtlamach tlen se kichiua niman tlen miktokej”, kijtosneki ika noneki tikmapeuaskej tlen xtechpaleuiya matoyekanakan ika iespíritu santo toTajtsin. Yejuin tlajtolyekanalistli uelis techpaleuis matiknankilikan tlen kemantika totlajtoltiaj. Ken yejuin: “¿Ipan itlaj nechpaleuiya yejuin tlen nikchiua? ¿Kinamiki manikseli yejuin tekitl kampa niktlanis miyek tomin? ¿Tleka xkipiya ninokalaktis kampa sekimej kitejtemouaj kiyektlaliskej tlaltikpaktli?”.

¹⁸ Tlen uelis tiknemiliskej tikchiuaskej ipan itekiyo toTajtsin. Ipan Tlamachtijli ipan Tepetl, Jesús kuajli techijlia itech tlenon uelis tiknemiliskej tikchiuaskej ipan tonemilis (Mat. 6:33, TNM). Se akin noyekana ika iespíritu santo toTajtsin kachtopa kitlalia Tekiuajyotl ipan inemilis. Tla xtikilkauaj yejuin tlajtolyekanalistli techpaleuis tiktlapejpeniskej tla tiaskej noso xtiaskej ipan uejueyimej kaltlamachtiltin, noso tla tikseliskej noso xtikseliskej se tekitl tlen techtekiuiltiaj.

¹⁹ Tlaueltin tlen tikpiyaj iuan oksekimej. Tiktlakamatiskej tlen Pablo okijli tlanechikojli tlen onkatka Roma techpaleuiya ijkuak tikpiyaj tlauejli iuan okse (Rom. 12:18). Pampa tiktokaj Cristo, tokojtiliaj tinemiskej ika yolseuilistli “iuan nochi tlakatl”. ¿Tlenon tikchiuaj ijkuak uajnesij tlaueltin? ¿Techtekiyomaka tikyektlaliskej, noso techixmatij ken akin nokojtiliaj nemiskej ika yolseuilistli iuan oksekimej? (Sant. 3:18).

20. ¿Tleka tikneki tikchikauas ken timoyekana ika iespíritu santo toTajtsin?

²⁰ Ken yotikitakej, ijkuak titlanemiliaj ipan itlajtolyekanalisuan Biblia techpaleuiya matiktlapejpenikan tlen kiteititis ika toyekanaj ika iespíritu santo toTajtsin. Yejuin kichiua matiyolpakikan ipan tonemilis. Robert, akin otikteneujkej ipeujyan yejuin tlamachtijli, kijtoua: “Ijkuak opeuj yemelak ninouika iuan Jehová, onechpaleui maninochiua se kuajli teueuentsin niman se kuajli tajtli. Melak ika noyojlo oninomachili”. Tejuamej noijki ijkon tikpiyaskej yejon tlateochiualistin tla kachtopa tiktejtemouaj kenon tikchikauaskej ken toyekanaj ika iespíritu santo toTajtsin. Noijki, tikpiyaskej se kuajli nemilistli ipan yejuin tonaltin, niman ika tlayekapan tikpiyaskej “on yejuan melauak nemilistli” (1 Tim. 6:19).