1, 2. ¿Tleka kineki Jehová matochiuakan ichanejkauan, niman tlenon yokichiuj pampa ijkon kineki?

JEHOVÁ kineki matochiuakan ichanejkauan. Yejua kimita ken ichanejkauan nochimej akin itech yonosentemakakej niman akin kuajli kineltokaj ika iKoneuj okitemakak inemilis topampa. Akin tiichanejkauan Jehová melak tiyolpakij. ¿Tleka ijkon tikijtouaj? Pampa aman itikmatstokej tlenon tikchiuaskej ipan tonemilis, niman techyolpaktia tikmatiskej ika ajsis tonajli ijkuak tikseliskej se nemilistli tlen xkeman tlamis, sekimej kiseliskej yejon nemilistli ne iluikak niman sekimej nikan ipan tlaltikpaktli.

² Pampa Jehová melak techtlasojtla, okichiuj itlaj niman ijkon uelis techitas ken ichanejkauan (Juan 3:16). Biblia techijlia ika Jehová “sanoyej patioj” otechkouj (1 Cor. 6:20). Ipampa yejon tlaxtlauijli, uelis kuajli touikaskej iuan Jehová. Uelis tikitaskej Jehová, akin melak ueyixtika, ken toTaj. Niman, ken otikitakej ipan tlamachtijli tlen youajpanok, xnemi okse Tajtli ken yejua.

3. ¿Tlenon ueliskia totlajtoltiskej? (Noijki xkita recuadro “ ¿Nechixmatstika Jehová?”).

³ Kanaj noijki totlajtoltiaj ijkon ken se itekipanojkauj toTajtsin akin okijkuilo Biblia, yejua onotlajtoltijka: “¿Kenijki uelis niktlaxtlauilis toTEKO nochi on tlen kuajli yokichiu nopampa?” (Sal. 116:12). Tikmatstokej ika xkeman uelis tiktlaxtlauiliskej toTajtsin nochi tlen yokichiuj topampa. Maski ijkon, pampa yejua techtlasojtla, tejuamej noijki tiknekij tiktlasojtlaskej.  Apóstol Juan okijkuilo: “Tejuamej tiktlajsojtlaj Dios pampa yejua achtopa otechtlajsojtlak” (1 Juan 4:19). Kuakon, ¿kenon uelis tikititiskej toTaj Jehová ika tiktlasojtlaj?

4. Ken kijtoua Santiago 4:8, ¿tleka noneki melak matokojtilikan tiknisiuiskej Jehová?

⁴ Jehová kineki matiknisiuikan niman matiknotsakan (xpoua Santiago 4:8). Ika yejon, techijlia ika nochipa matikchiuilikan teoyotl, niman yejua nochipa kinektok techkakis (Rom. 12:12). Yejua xkeman kijtos tla xok techkakis, pampa yejua xkeman siaui niman nochipa kipiya tiempo niman ijkon kinkakis toteoyouan. ¿Niman tejuamej kenon tijkakij Jehová? Ijkuak tikamapouaj iTlajtol, Biblia, niman okseki amatlajkuiloltin tlen techpaleuiya matikasikamatikan iTlajtol. Niman noijki tijkakij Jehová ijkuak kuajli titlakaktokej ipan totlanechikoluan. Matiknemilikan yejuin, kokonej kuajli nouikaj imiuan intajuan ijkuak nochipa nonojnotsaj. Yejua ika, tla tejuamej nochipa tiknotsaj Jehová, noijki kuajli iuan touikaskej.

5. ¿Tlenon techpaleuis más kuajli matikinchiuakan toteoyouan?

⁵ ¿Tlenon tikijtouaj ijkuak tiknotsaj toTajtsin? Yejua kinekiskia matikijlikan nochi tlen onka ipan toyojlo (Sal. 62:8). Yejua ika, melak kuajli tla totlajtoltiaj: “Ijkuak nikchiua teoyotl, ¿nochipa san no yejua tlajtoltin nikimijtoua, noso nikijlia Jehová nochi tlen nikmachilia niman niknemilia?”. Kuajli tikmatstokej ika melak tiktlasojtlaj Jehová niman tiknekiskiaj nochipa iuan touikaskej. ¿Tlenon techpaleuis nochipa iuan matouikakan Jehová? Tla nochipa tiknotsaj niman tla tikijliaj nochi tlen techyolpaktia niman tlen techyolajmana. Kuajli matikmatstokan ika nochipa uelis tiktlajtlaniliskej matechpaleui.

6. ¿Tlenon noneki tikchiuaskej tla tiknekij nisiuj tinemiskej itech Jehová?

⁶ Tla tiknekij nisiuj tinemiskej itech Jehová, noneki nochipa matiktlasojkamachilikan. Noijki titlanemiliaj ken se salmista, yejua okijto: “NoTEKO Dios, miyek tlajtlamach tetlatlachalistin yotikchiu para tejuamej, niman titechpiyalia nochi tlen kualtsin, noDios. ¡Xakaj ijki ken tejua! Tla niktetlajtlajtouiliskia nochi yejua in, xueliskia nikimpouaskia nochi pampa sanoyej miyek” (Sal. 40:5). San ika, tejuamej xsan tikmachiliaj ipan toyojlo ika tiktlasojkamachiliaj Jehová, noijki tikititiaj ika tlen tikijtouaj niman ika tlen tikchiuaj. Tejuamej xtikchiuaj ken oksekimej tlaltikpakchanejkej, akin xkitlasojkamatij tlen toTajtsin kichiua inpampa. Biblia yokijtoka ika miyekej ijkon kichiuaskiaj ijkuak tinemiskiaj ipan sa itlamiyan tonaltin (2 Tim. 3:1, 2). Maka keman matikchiuakan ken yejuamej.

7. ¿Tlenon kineki Jehová matikchiuakan, niman tleka?

⁷ Tajtin xkinekij ika inkoneuan manouijsokikan, yejuamej kinekij kuajli manouikakan. Jehová noijki kineki ijkon matikchiuakan. Pampa tikintlasojtlaj tokniuan, miyekej kitaj ika tejuamej melauak tikchiuaj ken Cristo (Juan 13:35). Se itekipanojkauj Jehová okijkuilo: “Xkitakan ken kuajli niman kualtsin ijkuak nemij san sekan ikoneuan Dios ikan tetlajsojtlalistli” (Sal. 133:1). ¿Xmelak ika noijki ijkon tomachiliaj ken yejuin salmista? Ijkuak tikintlasojtlaj tokniuan, noijki tikititiaj Jehová ika tiktlasojtlaj (1 Juan 4:20). Melak kualtsin ika tikinpiyaj miyekej tokniuan, yejuamej kuajli tenotsaj, tetlasojtlaj niman teikneliaj (Efes. 4:32).

8. Itech tlen kijtoua 1 Juan 5:3, ¿tleka tiktlakamatij Jehová?

⁸ Jehová kineki ika tekoneuan makintlakamatikan intajuan, niman yejua noijki  kinekiskia ika tejuamej matiktlakamatikan (Efes. 6:1). Niman kinamiki ijkon matikchiuakan pampa yejua akin otexchijchiuj, techmakatok tonemilis niman yejua toTaj akin melak tlamachilise. San ika, xsan ipampa yejon tiktlakamatij, tejuamej tiktlakamatij pampa tiktlasojtlaj (xpoua 1 Juan 5:3). Niman maski onka miyek tlemach tlen techititia ika noneki tiktlakamatiskej, yejua xkeman texchiualtia ijkon matikchiuakan. Yejua techkauilia matiktlapejpenikan tlenon tikchiuaskej, ika yejon, melak yolpaki ijkuak kita ika tiktlakamatij pampa tiktlasojtlaj.

9, 10. ¿Tleka noneki matikimixmatikan itlanauatiluan Jehová niman matikintlakamatikan?

⁹ Tajtin kinekiskiaj ika inkoneuan manemikan ika inyojlo. Ika yejon, kimijliaj kenon noneki nemiskej noso noyekanaskej. Kokonej akin kintlakamatij, kiteititiaj ika tlaneltokaj itech intajuan niman ika kintlakaitaj. Ika yejon, melak noneki ika tejuamej matikimixmatikan itlanauatiluan Jehová niman matikintlakamatikan. Tla ijkon tikchiuaj, tikititiskej Jehová ika tiktlasojtlaj niman tiktlakaitaj. Yejuin kichiuas kuajli matinemikan (Is. 48:17, 18). San ika, akin xkitlasojtla toTajtsin niman xkitlakamati itlanauatiluan xijkon ipan nochiua, sa no yejua notlajyouiltia (Gál. 6:7, 8).

¹⁰ Ijkuak tejuamej tikyekanaj tonemilis ijkon ken Jehová kineki, totlajpiyaj itech tlen uelis kichiuas matikualokan, itech tlen uelis techyolkokos noso itech tlen uelis kichiuas maka sa matouikakan iuan Jehová. Yejua kimatstika tlenon yemelak techpaleuis. Se tokniuj siuatl akin chanti Estados Unidos,  akin itoka Aurora, kijtoua: “Kuajli nikmatstika ika ijkuak se kitlakamati Jehová, melak kuajli nemi”. Niman melauak ika ijkon panoua. Ika yejon, matotlajtoltikan: “¿Kenon yonechpaleui nikchiuas tlen Jehová nechnauatia?”.

11. ¿Kenon techpaleuiya teoyotl?

¹¹ Teoyotl techpaleuiya matiktlakamatikan Jehová maski ijkuak ouijtika tikitaskej. Pampa titlajtlakolejkej, kemantika melak nonekis tokojtiliskej tiktlakamatiskej Jehová. San ika, xnoneki tosiaujkauaskej. Se salmista okitlajtlanili toTajtsin: “Xnechpaleui ma nikajsikamati motemachtil, niman ika nochi noyojlo niktlamakatis” (Sal. 119:34). Denise, se tokniuj akin precursora, okijto: “Tla nikita melak ouijtika niktlakamatis se itlanauatil Jehová, niktlajtlanilia Jehová manechpaleui manikchiua tlen kuajli”. Kuajli matikmatstokan ika Jehová nochipa technankilis ijkuak tiktlajtlaniliskej yejuin (Luc. 11:9-13).

12. ¿Tlenon technauatia matikchiuakan Efesios 5:1?

¹² (Xpoua Efesios 5:1). Pampa tiitlasojkakoneuan Jehová, tokojtiliaj tikchiuaskej ken yejua, ika yejon, titetlasojtlaj, kuajli titenotsaj niman titetlapopoluiyaj. Ijkuak akin xkixmatij toTajtsin kitaj ika tikchiuaj tlen kuajli, kanaj noijki kinekiskej kixmatiskej (1 Ped. 2:12). Tla tajtin kichiuaj tlen kuajli inpampa inkoneuan, ijkon ken kichiua Jehová, kanaj inkoneuan noijki kinekiskej nouikaskej iuan toTajtsin.

13. ¿Tlenon techpaleuis maka matipinauikan titlajtoskej itech Jehová?

 ¹³ Kokonej melak kinekij kiueyiteneuaskej intaj pampa kuelitaj tlen kichiua. Tejuamej noijki ijkon tikmachiliaj ipampa toTaj iluikakchane, ika yejon, tiknekij ika oksekimej makixmatikan. Tomachiliaj ken tekiuaj David, akin okijkuilo: “Nejua nikteneua noTEKO ipampa nochi on tlen onechchiu[i]lij” (Sal. 34:2). San ika, sekimej san tipijpinauij niman tomojtiaj titlajtoskej itech toTaj Jehová. ¿Tlenon techpaleuis maka ijkon matomachilikan? Tla tiknemiliaj ika uelis tikyolpaktiskej Jehová niman ika oksekimej melak kinpaleuis tla kixmatij. Jehová kichiuas matiyolchikaujkej. Ijkon ken okinpaleui tokniuan akin onenkej ipan kachtopa siglo, tejuamej noijki techpaleuis (1 Tes. 2:2).

14. ¿Tleka melak noneki matitenojnotsakan?

¹⁴ Jehová xtechikoita, niman melak kiyolpaktia kitas ika tikintlasojtlaj oksekimej maski san kanon maualeuakan (Hech. 10:34, 35). Ijkuak tikinnojnotsaj oksekimej, tikteititiaj ika tikintlasojtlaj (Mat. 28:19, 20). ¿Tlenon uelis panos tla yejuamej techkakij? Yejuamej uelis kipiyaskej se kualtsin nemilistli ipan yejuin tonaltin, niman ika tlayekapan uelis kiseliskej se nemilistli tlen xkeman tlamis (1 Tim. 4:16).

15, 16. ¿Tleka uelis tipakiskej?

¹⁵ Jehová se Tajtli akin melak tetlasojtla niman kineki ika ikoneuan mapakikan (Is. 65:14). Maski aman melak titlajyouiyaj, onka miyek tlemach tlen kichiua matipakikan. Uelis tipakiskej pampa kuajli tikmatstokej ika toTajtsin melak techtlasojtla. Noijki, yotikixmatkej tlen melauak temachtia Biblia (Jer. 15:16). Niman tinemij ipan ikalpan toTajtsin kampa tokniuan kitlasojtlaj Jehová, kitlasojtlaj itlanauatiluan niman noijki techtlasojtlaj (Sal. 106:4, 5).

¹⁶ Noijki uelis tipakiskej pampa tikmatstokej ika ajsis tonajli ijkuak melak kuajli tinemiskej xijkon ken aman. Tikmatij ika sa achijtsin poliui ijkuak Jehová kinpopolos akin xkuajkualtin, niman itechkopa iTekiuajyo, yejua kikuepas yejuin tlaltikpaktli se xochitlalpan. Xtiometlamatij ika akin yomijkej oksejpa yoliuiskej niman oksejpa touan nemiskej (Juan 5:28, 29). ¿Xmelak ika kualtsin yes? Niman tlen más ueyi kijtosneki: tikmatstokej ika sa achijtsin poliui ijkuak nochimej akin chantij ipan tlaltikpaktli niman ipan iluikak, kiueyichiuaskej niman kiueyiteneuaskej toTaj Jehová ijkon ken kinamiki.