IPAN ueyikalpan Baguio (Filipinas), omemej ichpokamej nejnentiayaj kampa tlanemakalo. Ijkuak ompa panotiayaj, okitakej se carrito tlen ika titenojnotsaj kampa tojlan nojuitilo, san ika, xononisiuijkej. Tokniuj Helen, akin nemiya inakastlan carrito, okomintak niman okimixuetskili. Yejon ichpokamej san se ojtli oyajkej, san ika, xokilkaujkej ken okimixuetskili tokniuj Helen.

Sakin, ijkuak yejuin ichpokamej nokueptoyaj inchan niman yayaj ipan autobús, okitakej se Kajli kampa tosentlaliaj kampa ijkuiliujtoyaj letras jw.org. Yejuamej okilnamijkej ika kemach okimitakaj yejuin letras ipan se carrito tlen ika titenojnotsaj. Otemokej ipan autobús niman okitakej letrero kampa nesi kemanon nopanoltiaj tlanechikoltin.

Yejon omemej ichpokamej oyajkej ipan se tlanechikojli. Niman, ¿akinon okitakej ijkuak okalajkej ipan Kajli kampa tosentlaliaj? ¡Tokniuj Helen! Yejuin ichpokamej nimantsin okilnamijkej ika yejua okimixuetskilijka. Helen kijtoua: “Ijkuak nechuajnisiuijtiayaj, opeuj ninomojtia. Oniknemili kanaj itlaj xkuajli onikinchiuilijka”. San ika, yejuamej san okijlikej Helen ika yokitakaj ipan carrito.

On omemej ichpokamej melak okuelitakej tlanechikojli niman melak kuajli onomachilijkej. Ijkuak otlan tlanechikojli niman okitakej ika tokniuan opeuj tlachipauaj, yejuamej noijki opeuj tlapaleuiyaj. Sakin, se ichpochtli ochantito ipan okse país, san ika, on okse ichpochtli opeuj yauj tlanechikoltin niman opeuj kimachtiaj itech Biblia... ¡nochi yejuin opanok pampa tokniuj okimixuetskili!