1. ¿Kenon uelis techmelajkatlaliskej, niman tleka noneki matechmelajkatlalikan?

TINOCHIMEJ noneki matechmelajkatlalikan. Kemantika san no tejuamej tikijliaj yakaj akin kuajli iuan touikaj matechijli tla kita ika itlaj noneki tikyektlaliskej. Niman kemantika, kanaj se tokniuj akin techtlasojtla, techijlis ika tikchiujtokej itlaj tlen uelis techtlajkalis “ipan tlajtlakojli” noso ika itikchiujtokej itlaj tlen sakin techyolkokos (Gál. 6:1). Noso kemantika techmelajkatlaliaj sakin ika yotikchiujkej itlaj tlen melak xkuajli. Maski san akinon matechmelajkatlali, noneki nochipa tijkakiskej tlen techijliaj pampa yejon techpaleuis niman hasta uelis techmakixtis (Prov. 6:23).

2. Itech tlen kijtoua Proverbios 12:15, ¿tleka noneki kuajli tijkakiskej akin techmelajkatlalia?

² Texto kampa onokixti yejuin tlamachtijli, techyolchikaua matijkakikan “tlinon kijtouaj on tlamatkej” (Prov. 22:17). Tejuamej xnochi tikmatij, nochipa nemis yakaj akin más tlamachilise yes noso akin más kimatis kenon nochiua itlaj (xpoua Proverbios 12:15). Yejua ika, ijkuak kuajli tijkakij akin techmelajkatlalia, tikteititiaj ika tiyolyemankej, ika tikasikamatij ika xnochi ueli tikchiuaj niman ika tikasikamatij ika noneki matechpaleuikan. Jehová okichiuj ika tekiuaj Salomón makijto ika “ijkuak se itlaj kichiuasneki” niman “achtoj kintlajtoltia on yejuan tlamatkej, sanoyej kuajli kisa” tlen kichiua (Prov. 15:22).

3. ¿Kenon tomelajkatlaliaj?

³ ¿Kenon tomelajkatlaliaj? Ijkuak san no tejuamej tikamapouaj ipan toBiblia noso se amatlajkuilojli itlaj tlen techititia ika  tikchiujtokej itlaj tlen xkuajli niman techyolchikaua matopatlakan (Heb. 4:12). Noso ijkuak yakaj techmelajkatlalia, ken se tlayekanketl noso se tokniuj akin chikaujtok itlaneltok techijlia ika noneki itlaj tikpatlaskej. Tla yakaj techmelajkatlalia ika Biblia, techititia ika melak techtlasojtla. Tejuamej tikteititiaj ika tiktlasojkamatij ijkuak techmelajkatlaliaj, tla tijkakij niman tikchiuaj tlen techijliaj.

4. Itech tlen kijtoua Eclesiastés 7:9, ¿tlenon xnoneki tikchiuaskej ijkuak yakaj techijlia ika itlaj noneki tikpatlaskej?

⁴ Tinochimej ouijtika tikitaj tijkakiskej yakaj akin techijlia ika noneki itlaj tikpatlaskej, niman kemantika kanaj hasta toyolkokouaj. Pampa maski tikmatij ika topopolouaj, xtikuelitaj ijkuak yakaj techijlia ika tikchiujtokej itlaj tlen xkuajli (xpoua Eclesiastés 7:9). Kanaj ijkuak yakaj techmelajkatlalia, okseki tlemach ika totlajtlamiyaj, tiknemiliaj ika techtlauelita noso hasta techyolkokoua tlen techijlia. Hasta tiknemiliaj: “¿Tleka yejua nechijlia maninopatla? ¡Yejua noijki nopopoloua!”. Niman tla techijlia itlaj tlen xtikuelitaj kanaj hasta xtikakisnekij. Niman kanaj hasta titlajtouaj iuan yakaj akin tikmatij ika techijlis tlen tejuamej tiknekij.

5. ¿Tlenon tikitaskej ipan yejuin tlamachtijli?

⁵ Ipan yejuin tlamachtijli titlajtoskej intech sekimej akin kinteneua Biblia akin okinokauilijkej makinmelajkatlalikan niman oksekimej akin xokinokauilijkej. Noijki tikitaskej tlenon techpaleuis matokauilikan matechmelajkatlalikan niman kenon techpaleuis tla ijkon tikchiuaj.

6. ¿Tlenon techmachtia tlen okichiuj Rehoboam?

⁶ Matikitakan tlen okichiuj Rehoboam. Ijkuak yejua opeuj tekiuajti Israel, israelitas okijlikej maka makintlajyouilti ijkon ken okichiuj itaj, Salomón. Kachtopa, Rehoboam okichiuj tlen kuajli pampa okintlajtolti tlayekankej akin nemiyaj Israel tlenon ueliskia kichiuas. Yejuamej okijlikej ika, tla kichiuaya tlen israelitas kitlajtlaniliayaj, kalpan Israel nochipa kipaleuiskia (1 Rey. 12:3-7). Pampa Rehoboam xokuelkak tlen okijlikej oyaj okintlajtoltito “on telpokamej yejuan iminuan onoskaltij”. Uelis tikijtoskej ika yejuamej itlamachilisejkej katkaj pampa ikipiayaj ipantsin 40 xiuitl (2 Crón. 12:13). San ika, yejuamej okijlikej más makintlajyouilti israelitas (1 Rey. 12:8-11). Rehoboam ueliskia kitlajtoltiskia Jehová tlenon nonekiya kichiuas, san ika, xokitlajtolti. Pampa okuelkak tlen okijlikej on tlakamej akin más telpokamej katkaj, yejon tlen okichiuj. Tlen okichiuj melak okijtlako, niman okimijtlako israelitas. Tejuamej, kanaj ijkuak yakaj techijlia ika noneki toyektlaliskej xtechijliaj tlen tejuamej tiknekiyaj tijkakiskej. San ika, tla tlen techijliaj kisa itech Biblia, noneki ijkon tikchiuaskej.

7. ¿Tlenon techmachtia tlen ipan onochiuj tekiuaj Uzías?

⁷Tekiuaj Uzías noijki xokinokauili makimelajkatlalikan. Yejua kinekiya kitlatis tlen ajuiyak, ika yejon okalak kampa Santísimo tlen onka teopan, kampa san teopixkej nonekiya kalakiskej. Teopixkej okijlikej Uzías: “Xkuajli para yej tejua tiktlatis kopajli ixpan toTEKO. Yejua in san kichiuaskej on tiopixkej”. ¿Tlenon okichiuj Uzías? Biblia kijtoua ika “sanoyej okualan”. ¿Niman tleka xokinokauili makimelajkatlalikan? Pampa yejua tekiuaj katka kanaj okinemili ika ueliskia kichiuas nochi tlen yejua kinekiya. San ika, Jehová xijkon kinemiliaya. Kanaj Jehová kitlapopoluiskia Uzías tla yejua noyolyemaniskia, kinokauiliskia makimelajkatlalikan niman kisaskia itech teopan. Pampa yejua xonoyolyemanili Jehová okichiuj makajsi lepra, niman yejua ijkon onen “hasta [...] ijkuak omik” (2 Crón.  26:16-21). ¿Tlenon techmachtia tlen ipan onochiuj Uzías? Ika maski san katlejua tekitl tikpiyaj ipan ikalpan, tla xtiktlakamatij tlen kijtoua Biblia, Jehová xok kinekis touan nouikas.

8. ¿Tlenon okichiuj Job ijkuak okimelajkatlalijkej?

⁸ Ipan Biblia noijki tlajtoua itech sekimej akin okinokauilijkej makinmelajkatlalikan niman toTajtsin okinteochiuj ipampa yejon. Matikitakan tlen okichiuj Job. Maski yejua kinekiya kiyolpaktis Jehová, noijki nopopolouaya. Ijkuak yejua okixnamik miyek tlen ouijtika, okijto tlen xkinamikiya. Ika yejon, Elihú niman Jehová okimelajkatlalijkej. ¿Tlenon okichiuj Job? Onoyolyemanili niman okinokauili makiyektlalikan, okijto: “Nejua nitlajtlajtouaya de on tlajtlamach tlen xnikajsikamatiya”. Noijki okijto: “Aman nikan ninoyolkokoua niman ninotlalia ipan tlalkuechtli niman ipan tlikonextli. Nimitstlajtlanilia, xnechtlapojpolui”. Jehová okiteochiuj Job pampa onoyolyemanili (Job 42:3-6, 12-17).

9. ¿Tlenon okichiuj Moisés ijkuak okimelajkatlali Jehová, niman tleka melak kuajli tla tikchiuaj ijkon ken yejua?

⁹Moisés noijki okinokauili makimelajkatlali Jehová sakin ika yokichiujka se ueyi tlajtlakojli. Sejpatipan, pampa melak kualantoya, xokiueyiteneuj Jehová. Yejua ika, yejua xok ouel okalak ipan tlajli tlen okinmakakej israelitas (Núm. 20:1-13). Ijkuak Moisés okijli Jehová ika melak najmanaya pampa xkikauiliskia makalaki ipan tlajli tlen kinmakaskia israelitas, Jehová okinankili: “¡Ma ijki! Maka sa más xnechijli on” (Deut. 3:23-27). Moisés xokualan niman otetlakamat, ika yejon, Jehová ok okikauili makinyekana israelitas (Deut. 4:1). Melak techpaleuis tla tikchiuaj ijkon ken Job niman Moisés. Job okipatlak ken tlanemiliaya niman okasikamat ika yonopopolojka. Niman Moisés okiteititi ika okinokauili makimelajkatlali Jehová pampa maski kimatstoya ika xok kiseliskia tlen melak kinekiya, ok okitekichiuili.

10. a) Itech tlen kijtoua Proverbios 4:10-13, ¿kenon techpaleuiya ijkuak tokauiliaj matechmelajkatlalikan? b) ¿Tlenon okichiujkej sekimej tokniuan ijkuak okinmelajkatlalijkej?

¹⁰ Melak kuajli tonkisaskej tla tikchiuaj ijkon ken Job niman Moisés (xpoua Proverbios 4:10-13). Miyekej tokniuan ijkon yokichiujkej. Tokniuj Emmanuel, * akin chanti República Democrática del Congo, okimelajkatlalijkej. Yejua kijtoua: “Sekimej tokniuan akin chikaujtok intlaneltok okitakej ika nejua xok kuajli chikaujtoya notlaneltok, niman onechpaleuijkej. Onikchiuj tlen onechijlikej niman yejon onechpaleui maka manikixnamiki tlen xkuajli”. Tokniuj Megan, akin precursora niman chanti Canadá, kijtoua: “Xonikuelitak ijkuak onechmelajkatlalijkej, san ika, melak onechpaleui”. Niman tokniuj Marko, akin chanti Croacia, kijtoua: “Onikpolo se tekitl tlen nikpiaya ipan tlanechikojli. San ika, ken onechmelajkatlalijkej, onechpaleui oksejpa kuajli maninouika iuan Jehová”.

11. ¿Tlenon okasikamat tokniuj Karl Klein?

¹¹ Tokniuj Karl Klein otlapaleui ipan Grupo akin tlayekana. Yejua okijto ika melak okipaleui pampa okichiuj tlen okijlikej ijkuak okimelajkatlalijkej. Ijkuak otlajto itech inemilis, okijto ika sejpatipan tokniuj Joseph Rutherford, akin melak kuajli iuan nouikaya, okimelajkatlali. Tokniuj Klein okijto ika xmás okuelkak tlen okijli tokniuj. Yejua okijto: “Sejpatipan, ijkuak oksejpa onechitak tokniuj Rutherford ika nochi iyojlo onechijli: ‘¿Kenon tinemi Karl?’. Pampa ok ninoyolkokojtoya xkuajli oniknankili. Yejua onechijli: ‘Karl, xmotlajpiya, Diablo kineki mitsajsis’. Melak  onipinauj, niman onikijli: ‘Xtlaj panoua nokniuj Rutherford’. San ika, kimatstoya ika yejon xmelauak. Ika yejon, oksejpa onechijli: ‘Kuajli. San xmotlajpiya, Diablo kineki mitsajsis’. Tlen okijto melauak, pampa ijkuak xtiktlapopoluiyaj se tokniuj, niman más tla yejua kinamikiya techmelajkatlalis [...], tijkauilijtokej matechajsi Satanás” * (Efes. 4:25-27). Tokniuj Klein okichiuj tlen tokniuj Rutherford okijli niman nochipa kuajli onouikakej.

12. ¿Kenon techpaleuiya tla tiyolyemankej? (Salmo 141:5).

¹²Tla tiyolyemankej, techpaleuis matokauilikan matechmelajkatlalikan. Niman noijki techpaleuiya matikilnamikikan ika titlajtlakolejkej niman ika topopolouaj. Ken yotikitakej, Job xkuajli ken otlanemili, san ika, sakin onopatlak. Onoyolyemanili niman okinokauili ika Elihú, akin más telpochtli katka, makimelajkatlali (Job 32:6, 7). Jehová okiteochiuj Job pampa yolyemanki katka. Tla tiyolyemankej, techpaleuis matokauilikan matechmelajkatlalikan ijkuak tiknemiliskej ika xtechnamiki matechyektlalikan. Niman tokauiliskej matechmelajkatlali yakaj akin xmás iueyi. Se tokniuj tlayekanketl akin chanti Canadá, kijtoua: “Tejuamej xtoitaj ijkon ken oksekimej techitaj. Ika yejon, ¿kenon uelis kuajli tikchiuaskej totekiyo tla xakaj techijlia kanon topopolojtokej?”. Tinochimej tokojtilijtokej tikchiuaskej ijkon ken toTajtsin techijlia, niman kuajli titemachtiskej (xpoua Salmo 141:5, TNM). *

13. ¿Tleka techmelajkatlalia Jehová?

¹³Jehová techmelajkatlalia pampa techtlasojtla. Jehová xkineki matitlajyouikan (Prov. 4:20-22). Yejua techititia ika techtlasojtla ijkuak techmelajkatlalia ika iTlajtol, ika amatlajkuiloltin noso itechkopa se tokniuj akin chikaujtok itlaneltok. Niman ken kijtoua Hebreos 12:9, 10, Jehová ijkon kichiua pampa kineki “techpaleuis”.

14. ¿Tlenon noneki kichiuas akin kimelajkatlaliaj?

¹⁴Maka san matikitakan ken techmelajkatlaliaj, yej kuajli matijkakikan tlen techijliaj. Kemantika kanaj uelis tiknemiliskej ika akin otechmelajkatlali xkuajli otechnots. Melauak, akin kineki temelajkatlalis noneki nokojtilis para maka teyolkokos (Gál. 6:1). * San ika, akin kimelajkatlaliaj noijki noneki kuajli kikakis tlen kijliaj, maski tla kinemilia ika xkuajli ken okijlikej. Kuakon, uelis totlajtoltiskej: “Maski xonikuelkak ken onechijli, ¿kanaj melauak  tlen kijtoua? ¿Uelis nikilkauas ken onechmelajkatlali niman nikchiuas tlen onechijli?”. Melak techpaleuis tla nochipa tikchiuaj tlen techijliaj ijkuak techmelajkatlaliaj (Prov. 15:31).

15. ¿Kenon techpaleuis tla tiktlajtlanij matechijlikan kenon toyektlaliskej?

¹⁵ Biblia kijtoua ika melak techpaleuis tla titetlajtoltiaj kenon noneki toyektlaliskej. Proverbios 13:10 kijtoua: “On tlamatkilistli onkaj intech on yejuan kinekij kakiskej tetlakanonotsalistli”. ¡Niman yejon melauak! Akin tetlajtoltiaj kenon más noyektlaliskej, más totoka chikaui intlaneltok. Kuakon, maka matikchiakan ika yakaj matechmelajkatlali, tejuamej matitetlajtoltikan tlenon noneki tikyektlaliskej.

16. ¿Kemanon uelis tikijliskej yakaj matechpaleui?

¹⁶ ¿Kemanon uelis tikijliskej yakaj matechpaleui? Seki matikitakan. 1) Se tokniuj siuatl kijlia okse tokniuj makuika kampa ontemachtis. Niman sakin kitlajtoltia kenon uelis más kuajli temachtis. 2) Se tokniuj ichpochtli kineki kinkouas seki pantalones, ika yejon, kitlajtoltia se tokniuj siuatl akin chikaujtok itlaneltok tlenon kinemilia itech on pantalones tlen yokintlapejpeni. 3) Se tokniuj tlakatl, akin xkeman kipanoltiaya se tlamachtijli ipan tlanechikojli, kitlajtlanilia se tokniuj akin youejkauj kinpanoltia tlamachtiltin kuajli makikaki itlamachtil. Niman sakin kitlajtoltia kanon noneki más kiyektlalis itlamachtil. Hasta tokniuan akin youejkauj kinpanoltiaj tlamachtiltin kintlajtoltiaj oksekimej tokniuan kenon uelis más kuajli kinyektlaliskej intlamachtiluan.

17. ¿Tlenon noneki tikchiuaskej ijkuak techmelajkatlaliaj?

¹⁷ Kanaj ipan okseki semanas noso metstin, yakaj techmelajkatlalis. Ijkuak techmelajkatlaliskej matikilnamikikan tlen yotikitakej ipan yejuin tlamachtijli. Matiyolyemankej, maka san matikitakan ken techmelajkatlaliaj, yej matijkakikan niman matikchiuakan tlen techijliaj. Tinochimej noneki matechpaleuikan para tikmatiskej tlenon noneki tikchiuaskej. Tla tijkakij niman tikchiuaj tlen techijliaj ijkuak techmelajkatlaliaj, Biblia kijtoua ika melak titlamachilisejkej yeskej (Prov. 19:20).