1. ¿Tlenon okimijli Jesús inomachtijkauan itech tlenon panoskia ijkuak sa achijtsin poliuiskia para toTajtsin tlapopolos, niman tlenon okimijli makichiuakan?

 SEKI tonaltin achto ika Jesús mikiskia, nauimej inomachtijkauan okitlajtoltijkej tlenon panoskia ijkuak itlapopoliuiskia (Mat. 24:3). Kanaj inomachtijkauan Jesús notlajtoltiayaj kenon ueliskiaj kimatiskej kemanon kixoxotoniskiaj Jerusalén niman iteopan. Ijkuak Jesús okinnankili, yejua okimijli tlenon panoskia ijkuak kixoxotoniskiaj Jerusalén niman iteopan, san ika, noijki okimijli tlenon panoskia ijkuak itlapopoliuiskia. Aman itinemij itlamiyan tonaltin niman sa achijtsin poliui para toTajtsin matlapopolo. Niman ijkuak Jesús otlajto itech yejuin tonaltin, okijto: “On tonajli niman on hora […] xakaj kimati, nion yejuamej on ángeles ne iluikak nemij, nion nejua, yejuan niiKoneu Dios. Yej san noTajtsin kimati”. Niman sakin ijkin okimijli: “Xtlachixtiakan” (Mar. 13:32-37).

2. ¿Tleka tokniuan akin chantiyaj Jerusalén nonekiya tlatlachixtoskej?

² Ipan kachtopa siglo, tokniuan akin judíos katkaj nonekiya tlatlachixtoskej niman ijkon ueliskia makisaskej. Jesús okimijli inomachtijkauan tlenon panoskia ijkuak kixoxotoniskiaj Jerusalén niman iteopan. Yejua okimijli: “Ijkuak nenkitaskej ika miyekej soldados yokiyejyeualojkej Jerusalén, ijkuakon xmatikan ika saniman kixoxotoniskej”. Niman ijkuak ijkin panoskia, judíos nonekiya kisaskej niman onnopaleuiskej ipan tepemej ijkon ken Jesús okimijli (Luc. 21:20, 21). Akin okitlakamatkej Jesús niman ocholojkej, omakiskej pampa sakin romanos oksejpa onokuepkej niman okixoxotonijkej Jerusalén.

3. ¿Tlenon tikitaskej ipan yejuin tlamachtijli?

³ Tejuamej itinemij ipan itlamiyan tonaltin, sa achijtsin poliui para tlapopoliuis. Ika yejon, noneki titlatlachixtoskej ijkon ken tokniuan akin nemiyaj ipan kachtopa siglo. Ipan yejuin  tlamachtijli tikitaskej kenon uelis kuajli titlanemiliskej ijkuak tikitaskej nochi tlen panoua ipan tlaltikpaktli. Noijki tikitaskej kenon noneki sa no tejuamej toitaskej niman tlenon uelis tikchiuaskej aman ika xitlapopoliui.

4. ¿Tleka tikuelitaj tikmatiskej tlen panoua ipan nochi tlaltikpaktli?

⁴ ¿Tleka tikuelitaj tikmatiskej tlen panotika ipan tlaltikpaktli niman ijkon tikitaskej tla nochiujtika se teotlajtojli? Pampa Jesús okiteneuj tlenon panoskia ijkuak sa achijtsin poliuiskia para kipopoloskej nochi tlen Satanás kiyekantika ipan yejuin tlaltikpaktli (Mat. 24:3-14). Apóstol Pedro okijto ika noneki tikitaskej kenon inochiujtokej teotlajtoltin itech Biblia niman ijkon machikaujto totlaneltok (2 Ped. 1:19-21). Niman sa ika tlami libro itech Biblia ijkin peua: “Ipan in tlajkuilolamatl nikijkuiloua on tlajtlamach yejuan Dios okinek para JesuCristo ma kinmachisti on itekitkauan on tlen saniman nochiuas” (Apoc. 1:1). Kuakon, melak kuajli tla tikuelitaj tikmatiskej tlenon panotika ipan tlaltikpaktli niman ijkon tikitaskej tla inochiujtika se teotlajtojli. Niman kanaj hasta tikuelitaj titlajtoskej imiuan tokniuan itech yejuin.

5. ¿Itech tlenon noneki totlajpiyaskej ijkuak titlajtoskej itech teotlajtoltin, niman tlenon noneki tikchiuaskej? (Noijki xkimita tlaixkopinaltin).

⁵ Ijkuak titlajtoskej imiuan tokniuan itech kenon inochiujtokej seki teotlajtoltin, noneki totlajpiyaskej. ¿Tleka? Pampa ueliskia tikijtoskej tlen tejuamej tiknemiliaj, niman yejon ueliskia kinxelos tokniuan. San se matikteneuakan itech tlen ueliskia panos niman tlen uelis tikchiuaskej: kanaj ueliskia tijkakiskej ika sekimej tekiuajkej kijtouaj ika kiyektlaliskej se tlauejli niman ika yejuamej kichiuaskej nochimej kuajli manemikan niman maonia yolseuilistli. Ijkuak ijkon tijkakiskej, maka nimantsin matiknemilijtiuetsikan ika inochiujtika teotlajtojli tlen uajlauj ipan 1 Tesalonicenses 5:3, yej noneki matikitakan tlenon yokijto ikalpan toTajtsin. Tla nochi tlen tikijtouaj tikixtiaj itech amatlajkuiloltin tlen ikalpan toTajtsin yotechmakak, tikinpaleuiskej tokniuan ipan tlanechikojli makipiyakan “san se tlanemilijli” (1 Cor. 1:10; 4:6).

6. ¿Tlenon techmachtia 2 Pedro 3:11-13?

⁶ (Xpoua 2 Pedro 3:11-13). Tlen okijto apóstol Pedro techpaleuiya kuajli matitlanemilikan ijkuak tomachtiskej teotlajtoltin tlen ualeuaj ipan Biblia. Yejua kijtoua ika noneki san tikitstoskej kemanon yejkos “tonajli ijkuak Dios kitlajtlakolmakas nochi tlaltikpaktli”. ¿Tleka ijkon okijto? Xpampa tiknekij tikmatiskej “on tonajli niman on hora” ijkuak yejkos Armagedón, yejua ijkon okijto pampa tiknekij kuajli tiktekitiltiskej totiempo para “titouikaskej ikan yolchipaualistli niman yolkuajlilistli” (Mat. 24:36; Luc. 12:40). Yejuin kijtosneki ika tiknekij tikchiuaskej tlen kuajli niman tiknekij tikitaskej tla tiktekichiuiliaj Jehová pampa tiktlasojtlaj. ¿Tlenon techpaleuis ijkon matikchiuakan? Tla sa no tejuamej toitaj.

7. ¿Tlenon noneki tikchiuaskej para sa no tejuamej toitaskej? (Lucas 21:34).

⁷ Jesús xsan okimijli inomachtijkauan makitstokan tlen nochiuaya ipan nochi tlaltikpaktli, noijki okimijli ika nonekiya sa no yejuamej noitaskej. Tlen okimijli tiknextiaj ipan Lucas 21:34 (xpoua). Yejua ijkin okijto: “Xmotakan sano nemejuamej”. ¿Tlenon kijtosneki toitaskej sa no tejuamej? Kijtosneki kuajli tikitstoskej nochi tlen ueliskia kichiuas maka sa matouikakan iuan Jehová niman xtikchiuaskej tlen ueliskia techijtlakos. Tla ijkon tikchiuaj, nochipa  touikaskej iuan toTajtsin (Prov. 22:3; Jud. 20, 21).

8. ¿Tlenon okimijli Pablo tokniuan?

⁸ Apóstol Pablo okimijli tokniuan ika nonekiya sa no yejuamej noitaskej. Sejpatsin, yejua ijkin okimijli tokniuan akin chantiyaj Éfeso: “Kuajli xmotakan sano nemejuamej ken nemouikaskej. Maka xmouikakan ken on yejuan xtlamatkej, yej xmouikakan ken tlamatkej” (Efes. 5:15, 16). Satanás kineki maka sa matouikakan iuan toTajtsin. Ika yejon, Biblia techijlia matikasikamatikan “on tlen kineki” Jehová niman ijkon uelis titlaxikoskej (Efes. 5:17).

9. ¿Kenon uelis tikasikamatiskej tlen Jehová kineki matikchiuakan?

⁹ Biblia xkiteneua nochi tlen ueliskia kichiuas maka sa matouikakan iuan Jehová noso xtechijlia tla kuajli noso xkuajli tlen tiknekij tiktlapejpeniskej. Tla tiknekij tikchiuaskej tlen kuajli, noneki tikasikamatiskej “on tlen kineki” Jehová. ¿Niman kenon uelis tikmatiskej tlen kineki Jehová? Tla mojmostla tomachtiaj iTlajtol toTajtsin niman itech titlanemiliaj. Ijkuak peuas más tikasikamatiskej tlen Jehová kineki matikchiuakan niman ijkuak tikmatiskej tlenon kinemilia Cristo, tikchiuaskej ijkon ken akin kipiyaj tlamachilistli. Niman maski xonias se tlanauatijli, tikmatstoskej tlenon tikchiuaskej (1 Cor. 2:14-16). Kemantika xouijtika tikitaj tikmatiskej tlenon xnoneki tikchiuaskej, san ika, kemantika kema ouijtika.

10. ¿Tlenon xnoneki tikchiuaskej?

¹⁰ San seki matikteneuakan itech tlenon xnoneki tikchiuaskej. Xnoneki san titeixuetskilijtinemiskej, titlauaniskej, sajnoye titlakuaskej, tikitaskej pornografía, tikmauisoskej kampa nesi kenon nouisokilo nion tikijtoskej tlen ueliskia teyolkokos (Sal. 101:3). Totlauelikniuj Diablo nochipa kitstika kenon uelis kichiuas maka sa matouikakan iuan Jehová (1 Ped. 5:8). Tla xtotlajpiyaj, Satanás ueliskia kitokas tlen xkuajli ipan toyojlo niman ipan totlamachilis. Niman yejon ueliskia kichiuas matipeuakan matitenexikolitakan, matitekajkayauakan, matitetlauelitakan, matoueyimatikan, matiknekikan tikpiyaskej miyek tlemach niman maka matiknekikan titetlapopoluiskej (Gál. 5:19-21). Kanaj ijkuak Satanás kemach techtlalilis yejon ipan toyojlo niman ipan totlamachilis, xmás tikchiuasnekiskej tlen xkuajli. San ika, tla xtokixtiliaj tlen okitokak ipan toyojlo niman ipan totlamachilis, peuas noskaltis niman peuas tikchiuaskej tlen melak xkuajli, niman yejon melak techijtlakos ijkon ken se xkuajli xiujtli tlen melak teijtlakoua (Sant. 1:14, 15).

11. ¿Tlenon ueliskia topan panos tlen ueliskia tiknemiliskej ika xtechijtlakos, niman tleka xnoneki tikchiuaskej yejon?

¹¹ Matikteneuakan itlaj tlen ueliskia topan panos niman tlen ueliskia tiknemiliskej ika xtechijtlakos: touikaskej imiuan akin xkitekichiuiliaj Jehová. Matikonnemilikan ika titekitij iuan yakaj akin xnomachtia Biblia. Tejuamej tiknekij makita ika akin tiiteixpantijkauan Jehová tikchiuaj tlen kuajli, ika yejon, kuajli tiknotsaj. Kanaj kemantika peua iuan titlakuaj, san ika, sakin nochipa iuan titlakuaj. Kemantika yejua tlajtoua itech auilnemilistli, tejuamej xtikuelitaj tlen kijtoua niman xtiknankiliaj. Sakin, pampa nochipa itech yejon tlajtojtika, xok tikitaj ika xkuajli ken tlajtoua. Niman se tonajli techijlia iuan matitlaonitij tla yotitlankej titekitij, niman tikijliaj ika kema. Sakin, tipeuaj titlanemiliaj ijkon ken yejua tlanemilia, niman tla nochipa iuan tikistinemij, peuas tikchiuaskej ijkon ken yejua. Tikmatstokej ika akin tomachtiaj tiknekij nochimej kuajli tikinnotsaskej niman tikintlakaitaskej. San ika, maka matikilkauakan ika tla tosentlaliaj imiuan akin kichiuaj tlen xkuajli,  noijki peuas tikchiuaskej tlen xkuajli (1 Cor. 15:33). Tla sa no tejuamej toitaj ijkon ken Jesús okijto, xsajnoye tosentlaliskej imiuan akin xkitlakamatij toTajtsin (2 Cor. 6:15). Tikitaskej ika uelis techijtlakos tla tosentlaliaj imiuan akin xnomachtiaj, ika yejon, ximiuan touikaskej.

12. ¿Tlenon nonekiya kichiuaskej inomachtijkauan Jesús hasta ijkuak tlapopoliuiskia?

¹² Jesús kinekiya ika inomachtijkauan makichiuakan tlen yejua okinnauatijteuj hasta ijkuak tlapopoliuiskia. Jesús okinnauati matenojnotsakan niman makiteijlikan on kuajli tlajtoltin “ne Jerusalén, niman imanian Judea, niman Samaria, niman nochiuiyan ipan in tlaltikpaktli” (Hech. 1:6-8). Melak ueyi tekitl okinmakakej. San ika, tla nochipa chikauak tenojnotsayaj, melak kuajli kitekitiltiskiaj intiempo hasta ijkuak tlapopoliuiskia.

13. ¿Tleka noneki kuajli tiktekitiltiskej totiempo? (Colosenses 4:5).

¹³ (Xpoua Colosenses 4:5). Tla tiknekij sa no tejuamej toitaskej, noneki tikitaskej kenon tiktekitiltiaj totiempo. ¿Niman tleka melak noneki matikchiuakan yejuin? Pampa ijkon ken kijtoua Eclesiastés 9:11, “nochimej ajsi tonajli ijkuak kiseliaj tlen kuajli noso xkuajli”. Hasta ueliskia san totoka timiktiuetsiskiaj.

14, 15. ¿Kenon uelis kuajli tiktekitiltiskej totiempo? (Hebreos 6:11, 12; noijki xkita tlaixkopinajli).

 ¹⁴ ¿Kenon uelis kuajli tiktekitiltiskej totiempo? Tla nochipa tikchiuaj tlen Jehová kuelita niman tla tikchiuaj nochi tlen techpaleuis más kuajli iuan matouikakan (Juan 14:21). Matikchiuakan ijkon ken techijlia yejuin tlaxelojli itech Biblia: “Xmelajkanemikan ipan nemotlaneltok. Maka xkauilikan itlaj ma mechejkuani itech nemotlaneltok. Nochipa xchiuakan itekiu toTEKO ikan nochi nemoyojlo” (1 Cor. 15:58). Tla ijkon tikchiuaj, ijkuak tomikiliskej noso ijkuak yejkos tonajli ijkuak toTajtsin tlapopolos, xtajmanaskej pampa tikmatstoskej ika chikauak otiktekichiuilijkej Jehová ijkuak tiueliyaj (Mat. 24:13; Rom. 14:8).

¹⁵ Ijkon ken yeuejkaui okijto Jesús, yejua ok kinyekantika inomachtijkauan para matenojnotsakan itech iTekiuajyo toTajtsin ipan nochi tlaltikpaktli. Yejua kitekitiltia ikalpan Jehová niman ijkon techmachtis kenon titenojnotsaskej itech kuajli tlajtoltin niman techmaka tlen techpaleuis matitenojnotsakan (Mat. 28:18-20). Aman tejuamej san noneki tikchiuaskej tlen Jesús yotechnauati: titenojnotsaskej, titemachtiskej niman titlatlachixtoskej chika tikchiaj matlapopolo Jehová. Nochipa tikmatstoskej ika nochiuas tlen tikchiaj tla tikchiuaj tlen kijtoua Hebreos 6:11, 12 (xpoua).

16. ¿Tlenon yotiknemilijkej tikchiuaskej?

¹⁶ Jehová yokijto kemanon kitlamiltis tlen Satanás kiyekantok. Ijkuak yejkos yejon tonajli, yejua kichiuas manochiuakan teotlajtoltin tlen uajlauej ipan Biblia. Niman, maski kemantika tikmachiliaj ika melak youejkauj ika xyejko itonal Jehová, Biblia kijtoua ika “xuejkauis ika yejkos” (Hab. 2:3, TNM). Ika yejon, kuajli yotiknemilijkej tikchiuaskej ijkon ken kijtoua Miqueas 7:7 itech Traducción del Nuevo Mundo: “Nejua nitlatlachixtos ipampa Jehová. Nejua ika noyojlo nitlamachias ipampa toTajtsin akin nechmakixtia”.