1. ¿Kenon kita Jehová tonemilis?

 XKONNEMILI ika se moamigo mitstlayokolia se kajli. Achijtsin yotlapalkis niman kipiya seki tlen yoijtlakauj. Maski ijkon, yejuin kajli melak patioj. ¿Xmelak ika tikpatiojkaitaskiaj niman tiktlajpiyaskiaj yejuin kajli? Noijki ijkon, Jehová yotechtlayokoli itlaj tlen melak patioj: tonemilis. Jehová melak kipatiojkaita tonemilis hasta okitemakak iKonetsin para mamiki topampa (Juan 3:16).

2. Ijkon ken kijtoua 2 Corintios 7:1, ¿tlenon kineki Jehová matikchiuakan?

² Itech Jehová “kisa nochi nemilistli” (Sal. 36:9). Yejon tlen kijtosnekiya apóstol Pablo ijkuak okijto: “Yejua otechmakak tinochimej tijyo, tonemilis, niman nochi tlajtlamach” (Hech. 17:25, 28). Yejua ika, uelis tikijtoskej ika tonemilis se itetlayokolil toTajtsin. Yejua techtlasojtla niman techmaka nochi tlen noneki para tiyoltoskej (Hech. 14:15-17). San ika, Jehová xkichiuas matiyoltokan ika milagros. Yejua kineki sa no tejuamej matotlajpiyakan para maka matikualokan niman para machikaujto totlaneltokil (xpoua 2 Corintios 7:1). ¿Tleka noneki totlajpiyaskej, niman kenon uelis tikchiuaskej yejon?

3. ¿Tleka totlajpiyaj para maka tikualoskej?

³ Tejuamej tiknekij kuajli tiktekichiuiliskej Jehová, ika yejon, totlajpiyaj para maka tikualoskej (Mar. 12:30). Xtikchiuaj tlen uelis kijtlakos totlalnakayo pampa tiknekij tikmakaskej  Jehová tonemilis “ken itlaj uentli yejuan yoltika niman yektli ijkon ken yejua kineki” (Rom. 12:1). San ika, maski melak matotlajpiyakan, ajsis se tonajli ijkuak tikualoskej. Maski ijkon, tokojtiliaj totlajpiyaskej pampa tiknekij tikititiskej toTajtsin ika tiktlasojkamatij ika otechmakak tonemilis.

4. ¿Tlenon kinekiya tekiuaj David?

⁴ Tekiuaj David melak kipatiojkaitaya inemilis tlen Jehová okitlayokolijka. Yejua ika, okijkuilo: “¿Tlinon tiktlanis tla nimikis niman nechontokaskej? ¡Tla yoninochiu tlajli, xok uelis nimitsmauistilis, nion uelis nikteijlis ika tejua nochipa [ti]kchiua tlen tikprometeroua!” (Sal. 30:9). Kanaj David okijkuilo yejuin achto mikis. Yejua ok kinekiya yoltos para kiueyichiuas Jehová. ¿Xmelak ika tejuamej noijki xtiknekij timikiskej pampa tiknekij nochipa tikueyichiuaskej Jehová?

5. ¿Tlenon ok uelis tikchiuaskej maski itiuejueyimej noso tikualoj?

⁵ Tla itiuejueyimej noso tikualoj, kanaj melak tajmanaj pampa xok ueli tikchiuaj tlen achto tikchiuayaj. San ika, yejon xkijtosneki tla xok noneki totlajpiyaskej. ¿Tleka? Pampa maski itiuejueyimej noso tikualoj, ok uelis tikueyichiuaskej Jehová, ijkon ken tekiuaj David. ¡Niman melak techyolchikaua tikmatiskej ika toTajtsin techtlasojtla niman techpatiojkaita maski titlajtlakolejkej! (Mat. 10:29-31). Yejua melak techtlasojtla, ika yejon, kuajli yotechijli ika techyolitis tla timikij (Job 14:14, 15). Kuakon, aman ika tiyoltokej, matotlajpiyakan.

6. ¿Tlenon kineki Jehová matiuelikan matikchiuakan?

⁶ Biblia xtlajtoua itech kenon uelis topajtiskej nion itech kenon noneki totlakualtiskej, san ika, kema kijtoua tlenon kinemilia Jehová itech yejuin. Yejua techijlia: “Xkixti ipan monemilis nochi tlen xkuajli” (Ecl. 11:10). Biblia kijtoua ika melak techkualotlas tla sajnoye titlakuaj noso tla melak titlauanij (Prov. 23:20). Jehová kineki matiuelikan san toselti matoteltikan ijkuak tikitaskej tlenon tijkuaskej niman kech tijkuaskej noso ijkuak tikitaskej tlenon tikoniskej niman kech tikoniskej (1 Cor. 6:12; 9:25).

7. ¿Kenon uelis tikchiuaskej tlen kijtoua Proverbios 2:11 niman ijkon totlajpiyaskej?

⁷ Tla tiknekij tiktlasojkamachiliskej toTajtsin ika yotechmakak tonemilis, noneki kuajli tiknemiliskej tlenon tikchiuaskej (Sal. 119:99, 100; xpoua Proverbios 2:11). San matikteneuakan yejuin: noneki kuajli titlanemiliskej ijkuak tiktlapejpeniskej tlenon tijkuaskej. Tla itlaj melak tikueliliaj, san ika, tikmatij ika texchiuilia, más kuajli tla xtijkuaj. Totlamachilis tlen toTajtsin otechmakak noijki techpaleuiya matikasikamatikan ika noneki kuajli tikochiskej, miyekpa tikchiuaskej ejercicio, taltiskej niman titlachipauaskej tochan.

8. Itech tlen Biblia kijtoua, ¿tleka tikijtouaj ika Jehová kineki matotlajpiyakan?

⁸ Jehová okimijli israelitas tlenon ueliskia kichiuaskej para maka itlaj inpan nochiuas kampa chantij niman kampa tekitij (Éx. 21:28, 29; Deut. 22:8). Tla se israelita kimiktiaya yakaj maski xkinekiya, melak xkuajli tlen kichiuiliayaj (Deut. 19:4, 5). Noijki, Tlanauatijli tlen okimakakej Moisés kijtouaya ika tla itlaj kichiuiliayaj se koneuatsin niman kikokouayaj ikonetsin akin xiuajnemiya, nonekiya tlatlaxtlauas noso hasta ueliskia kimiktiskiaj (Éx. 21:22, 23). Biblia kuajli kijtoua ika Jehová kineki matotlajpiyakan para maka tiktechiuiliskej tlen xkuajli noso para maka topan manochiua tlen xkuajli.

9. ¿Tlenon uelis tikchiuaskej para maka itlaj topan nochiuas? (Noijki xkimita tlaixkopinaltin).

 ⁹ Uelis tikititiskej toTajtsin ika tikpatiojkaitaj tonemilis tla totlajpiyaj para maka itlaj topan nochiuas kampa titekitij noso kampa tichantij. Tla tikpiyaj itlaj tlen tlateki, ken cuchillos noso machetes, noso itlaj tlen uelis teijtlakos, ken cloro, medicamentos, pajtli para tlayojli, pajtli para kimichimej noso para okse yolkatsin, noneki tikimejyeuaskej kampa kokonej xuelis kontilanaskej. Niman tla xok tikintekitiltiskej, noneki tikitaskej kenon tikintlajkaliskej. Noijki noneki totlajpiyaskej ijkuak titlatlatiskej, ijkuak itlaj tikposoniskej niman ijkuak tikintekitiltiskej aparatos tlen tekitij ika electricidad. Noijki, maka matitlanejnemiltikan tla yotikonikej alcohol noso tla xkuajli otikochkej noso tla yotiktolojkej se medicina tlen ueliskia kichiuas maka kuajli matitlanejnemiltikan. Niman noijki xnoneki tikitstiaskej toteléfono ijkuak titlanejnemiltiskej.

10. ¿Tlenon uelis tikchiuaskej achto itlaj panos niman ijkuak ijkon panotos?

¹⁰ Tikmatstokej ika kemantika uelis itlaj panos  tlen ueliskia techijtlakos. Kemantika kampa tichantij uajnesi se ueyi kokolistli, tlaixpoliui noso noixnamikilo. San ika, ijkuak ijkon panos, noneki tikintlakamatiskej tekiuajkej pampa yejon uelis techpaleuis maka itlaj topan mapano niman matimakisakan. Kemantika yejuamej kitlaliaj se hora ijkuak xok noneki tikistinemiskej ipan ojtli, teijliaj ika noneki tikisaskej niman oksekan tontopaleuiskej noso technauatiaj itlaj okse (Rom. 13:1, 5-7). Noijki, kemantika kema uelis itlaj tikchiuaskej achto itlaj panos. Yejua ika, melak kuajli tla tikintlakamatij tekiuajkej ijkuak techijliaj matiksentlalikan atl, tlakuajli tlen xnimantsin ijtlakaui niman seki tlemach tlen uelis techpaleuis tla itlaj topan nochiua.

11. ¿Tlenon noneki tikchiuaskej tla onka se ueyi kokolistli?

¹¹ ¿Tlenon uelis tikchiuaskej tla kampa tichantij onka se ueyi kokolistli? Matikintlakamatikan tekiuajkej ijkuak techijliskej matomapajpakakan, maka melak matikinnisiuikan oksekimej, matotlalilikan cubrebocas niman matokauakan tochan tla tikualoj. Tla xsan tikauilmatij nochi yejuin, tikteititiskej ika tikpatiojkaitaj tonemilis tlen toTajtsin yotechmakak.

12. ¿Kenon techpaleuiya Proverbios 14:15 matikitakan tlenon tikneltokaskej niman tlenon ka ijkuak san totoka itlaj panos?

¹² Ijkuak panoua itlaj tlen xakaj kichiaya, kanaj toamigos, kanaj akin tikimixmatij noso ipan noticias uelis techijliskej itlaj tlen xmelauak. Ijkuak ijkon panos, maka nochi matikneltokakan. San matikneltokakan tlen tekiuajkej niman tlapajtikej kijtouaj (xpoua Proverbios 14:15). Noijki, noneki tiktlakamatiskej Grupo akin Tlayekana niman sucursales ijkuak techijliskej itlaj itech totlanechikoluan noso itech totenojnotsalis. Uelis intech titlaneltokaskej pampa yejuamej kuajli nomachtiaj achto itlaj kitlapejpeniskej (Heb. 13:17). Tla tikchiuaj tlen techijliaj, techpaleuis maka matikualokan niman maka matikinmauakan oksekimej. Niman kanaj yejon kichiuas kuajli matlajtokan itech iteixpantijkauan Jehová (1 Ped. 2:12).

13. Ijkuak kinekiskej techtlaliliskej yestli, ¿kenon uelis tikteititiskej ika tikpatiojkaitaj tonemilis?

¹³ Akin tiiteixpantijkauan Jehová techixmatij pampa tikpatiojkaitaj yestli. Jehová techijlia ika xnoneki totlaliliskej yestli, ika yejon, tejuamej tiktlakamatij niman xtotlaliliaj maski kemantika melak noneki matechtlalilikan (Hech. 15:28, 29). San ika, yejon xkijtosneki tla tiknekij timikiskej. ¡Ka! Tejuamej melak tikpatiojkaitaj tonemilis pampa toTajtsin yotechtlayokoli. Ika yejon, tikintejtemouaj tlapajtijkej akin kinekiskej techpajtiskej niman xtechtlaliliskej yestli.

14. ¿Tlenon uelis tikchiuaskej tla xtiknekij topan manochiua tlen xkuajli niman tla xtiknekij matexchiuilikan se operación?

¹⁴ Tla totlajpiyaj niman tla tikchiuaj ijkon ken kemach yotikonitakej ipan yejuin tlamachtijli, kanaj xsanoyej tikualoskej niman xnonekis matechpajtikan noso matexchiuilikan se operación. Niman tla kema nonekis operación, matikilnamikikan ika tla kuajli ototlajpixkej, melak techpaleuis nimantsin matipajtikan. Noijki, tla totlajpiyaj kampa tichantij niman kampa titekitij niman tla tiknejnemiltiaj tocarro ken tlanauatiaj tekiuajkej, kanaj xtlaj topan nochiuas nion xnonekis texchiuiliskej se operación.

15. a) ¿Tleka noneki kuajli matiktemiltikan noso matikyektlalikan toDPA? (Noijki xkita tlaixkopinajli). b) Ijkon ken kijtoua video, ¿tlenon noneki tikchiuaskej para kuajli tiktlapejpeniskej kenon noneki topajtiskej?

¹⁵ Noijki tikteititiskej ika tikpatiojkaitaj tonemilis tla tiktemiltiaj on amatsintli kampa  kijtoua ika xtikseliaj yestli niman tla nochipa tikitkitinemij. b Ipan yejuin amatsintli kijtoua ika tejuamej xtikseliaj yestli niman noijki tiktlaliaj kenon tiknekij matechpajtikan. ¿Tejua kuajli yotiktemilti yejuin amatsintli? Tla ka, nimantsin xtemilti noso xyektlali. Tla tikijkuilouaj tlen yotiktlapejpenijkej, xnonekis tikintomilijtoskej tlapajtikej kenon tiknekij matechpajtikan niman más nimantsin kitaskej kenon techpaleuiskej. Noijki, yejuin amatsintli techpaleuis para maka matechtlalilikan itlaj tlen techijtlakos. c

16. ¿Tlenon uelis tikchiuas tla xtikmati kenon tiktemiltis amatsintli DPA?

¹⁶ Maski tla xitiuejueyimej noso xmás tikualouanij, tinochimej uelis itlaj topan nochiuas noso peuas tikualoskej (Ecl. 9:11). Kuakon, melak kuajli tla nochipa tikpiya amatsintli DPA. ¿Niman tlenon uelis tikchiuas tla xtikmati kenon tiktemiltis? Maka xmajmana. Tokniuan tlayekankej kuajli kimatstokej kenon kitemiltiskej niman uelis mitspaleuiskej. San ika, yejuamej xmitsijliskej tlenon noneki tiktlapejpenis pampa yejon san tejua kinamiki xchiua (Gál. 6:4, 5). Yejuamej kema uelis mitspaleuiskej xkasikamati tlenon tikchiuas niman uelis mitspaleuiskej xkijkuilo.

17. ¿Kenon uelis tikteititiskej ika tikimasikamatij oksekimej ijkuak kitlapejpeniaj tlenon kichiuaskej?

¹⁷ Tla kuajli tikmachtiaj totlamachilis ika tlen kijtoua Biblia, uelis kuajli tiktlapejpeniskej kenon topajtiskej (Hech. 24:16; 1 Tim. 3:9). Ijkuak tiktlapejpeniskej tlenon tikchiuaskej niman titlajtoskej imiuan oksekimej, noneki tikilnamikiskej tlen kijtoua Filipenses 4:5: “Nochi tlakatl mamech[i]ta ika nentenotskej”. Uelis tikteititiskej ika titeasikamatij tla xsan tiknemilijtokej kenon xtikualoskej niman tla xtikinchiualtiaj oksekimej matlanemilikan ken tejuamej ijkuak nopajtiskej. Tikintlasojtlaj niman tikintlakaitaj tokniuan maski xsan noijki kitlapejpeniaj ken tejuamej (Rom. 14:10-12).

18. ¿Kenon uelis tikteititiskej ika tikpatiojkaitaj tonemilis?

¹⁸ Ijkon ken otikijtokej ipeujyan yejuin tlamachtijli, Jehová yejua akin techmakatika tonemilis. Uelis tikititiskej ika tikpatiojkaitaj tonemilis tla totlajpiyaj niman chikauak tiktekichiuiliaj (Apoc. 4:11). Aman tinochimej tikualoj niman tikpiyaj tlauejli, san ika, Jehová xijkon kinekiya matinemikan. Yejua ika, yokijto ika kichiuas matinemikan ipan se kualtsin tlaltikpaktli kampa xok titlajyouiskej nion xtimikiskej (Apoc. 21:4). Chika yejko yejon tonajli, matiktlajpiyakan tonemilis niman chikauak matiktekichiuilikan toTajtsin Jehová.