Okitakej kenon tokniuan melak notlasojtlaj
YEYIMEJ ikniujtin, akin intoka Yomara, Marcelo niman Hiver, xtlachiaj niman chantij ipan se kalpan tlen onka Guatemala. Yomara opeuj nomachtia Biblia imiuan iteixpantijkauan Jehová, niman sakin ikniuan noijki opeujkej nomachtiaj. San ika, onkatka itlaj tlen kintsakuiliaya: yejuamej xueliyaj tlaamapouayaj ika braille. Kuakon, akin kinmachtiaya nonekiya kinamapouilis párrafos niman tlaxeloltin itech Biblia.
Noijki, ouijtika kitayaj yaskej tlanechikoltin. Kajli kampa nosentlaliayaj iteixpantijkauan Jehová uejka katka 40 minutos, niman xueliyaj ajsiyaj san inselti. Ika yejon, tokniuan nopatlatiayaj para kinuikaskej ipan tlanechikojli. Niman, ijkuak opeujkej kinpanoltiaj tlamachtiltin ipan tlanechikoltin tlen nochiuaj itlajkotian semana, tokniuan kinpaleuiayaj makitsontekontlalikan tlen nonekiya kijtoskej.
Ipan mayo de 2019, tokniuan opeujkej kinpanoltiaj tlanechikoltin kampa chantij Yomara, Marcelo niman Hiver. Niman se tokniuj iuan isiuatsin akin tlapaleuijtoyaj ken precursores regulares ompa onochantitoj. Yejuin tokniuan xueliyaj kiamapouayaj braille nion xueliyaj kijkuilouayaj. Maski ijkon, kinekiyaj kinmachtiskej yejon yeyimej ikniujtin para mauelikan makiamapouakan niman makijkuilokan braille. Kuakon, oyajkej ipan se biblioteca para nomachtiskej braille niman para ueliskej kenon temachtiskej.
Marcelo tlanankilijtika ipan se tlanechikojli.
San ipan seki metstli yejuin yeyimej ikniujtin youelkaj tlaamapouayaj ika braille, niman yejon okinpaleui más kuajli makitekichiuilikan Jehová. a Aman, Yomara, Marcelo niman Hiver tlapaleuiyaj ken precursores regulares, niman Marcelo tlapaleuijketl ipan tlanechikojli. Yejuamej chikauak kitekichiuiliaj Jehová nochi semanas. Melak yolpakij pampa kitekichiuiliaj Jehová niman yejon kichiua ika oksekimej noijki mayolpakikan.
Yejuin yeyimej ikniujtin melak kintlasojkamachiliaj tokniuan pampa melak okinpaleuijkej niman pampa okimititijkej ika kintlasojtlaj. Yomara kijtoua: “Tokniuan yotechititijkej ika melak techtlasojtlaj desde ijkuak otikimixmatkej”. Niman Marcelo kijtoua: “Melak kuajli touikaj imiuan tokniuan ipan tlanechikojli niman tikmatstokej ika ipan nochi tlaltikpaktli tikpiyaj se familia akin melak notlasojtla”. Yomara niman ikniuan sa kichiatokej ika nochi inyojlo mayejko tonajli ijkuak kitaskej kenon tlaltikpaktli kikuepaskej se xochitlalpan (Sal. 37:10, 11; Is. 35:5).
a Folleto tlen itoka Aprenda a leer braille okichijchiujkej para kinpaleuiskej akin xueli tlachiaj noso akin xkuajli tlachiaj niman ijkon mauelikan makiamapouakan niman makijkuilokan braille.
Puede que también le interese
KEN TIKINTEKITILTIAJ DONACIONES
Puntitos tlen melak tepaleuiyaj
Xsan tikinchijchiuaj amatlajkuiloltin ika braille noijki tikinmachtiaj oksekimej matlaamapouakan ika braille.
