1. ¿Kenon tikmatij ika Jesús kipatiojkaitaya iTlajtol toTajtsin?

 XKONNEMILI kenon melak kualtsin katka tijkakis kenon Jesús temachtiaya. Yejua kintsontekontlaliaya tlaxeloltin itech Biblia niman nochipa kinteneuaya ijkuak temachtiaya. Niman ijkon tikmatij pampa sakin ika Jesús onoapolakti, okinteneuj seki tlaxeloltin itech Biblia, niman achto ika mikis noijki ijkon okichiuj (Deut. 8:3; Sal. 31:5; Luc. 4:4; 23:46). b Niman ipan yeyi xiuitl uan tlajko, Jesús nochipa okiamapouj Biblia ijkuak otenojnots. Noijki, nochipa okinteneuj tlaxeloltin ijkuak temachtiaya niman nochipa kiteijliaya tlenon kijtosneki (Mat. 5:17, 18, 21, 22, 27, 28; Luc. 4:16-20).

2. ¿Tlenon okichiuj Jesús ijkuak kemach noskaltijtoya para kuajli kixmatis iTlajtol toTajtsin? (Xkita tlaixkopinajli tlen nesi ixpan yejuin revista).

² Ijkuak Jesús xipeuaya tenojnotsaya, yejua ikiamapouaya iTlajtol toTajtsin niman kikakiya ijkuak oksekimej kiamapouayaj niman itech tlajtouayaj. Niman ichan kinkakiya María niman José ijkuak kinteneuayaj seki tlaxeloltin itech Biblia ijkuak imiuan tlajtouaya (Deut. 6:6, 7). c Noijki kuajli tikmatstokej ika Jesús yaya nochi sábados teopan iuan ichanejkauan niman kuajli tlakakiya ijkuak kiamapouayaj iTlajtol toTajtsin (Luc. 4:16). Niman sakin san yejua opeuj kiamapoua iTlajtol toTajtsin. Pampa Jesús ijkon kichiuaya, xsan kimatstoya tlen kijtouaya iTlajtol toTajtsin, noijki kitlasojtlaya niman kichiuaya tlen ompa ueliya. San matikonteneuakan tlen opanok teopan ijkuak yejua san kipiaya 12 xiuitl. Akin kuajli kixmatiyaj Tlanauatijli tlen okimakakej  Moisés niman temachtiayaj ipan ueyi teopan, melak omojkatlachixkej ijkuak okitakej kenon Jesús melak kuajli kasikamatiya iTlajtol toTajtsin niman ijkuak okikakkej kenon tlanankiliaya (Luc. 2:46, 47, 52).

3. ¿Tlenon tikitaskej ipan yejuin tlamachtijli?

³ Tejuamej noijki uelis tikixmatiskej niman tiktlasojtlaskej iTlajtol toTajtsin tla miyekpa tikamapouaj. San ika ¿tlenon uelis tikchiuaskej tla tiknekij matechpaleui tlen tikamapouaj ipan iTlajtol toTajtsin? Para tikmatiskej, matikitakan tlen Jesús okimijli akin kuajli kixmatiyaj Tlanauatijli, ken escribas, fariseos niman saduceos. Maski akin tlayekanayaj ipan tlaneltokiltin nochipa kiamapouayaj iTlajtol toTajtsin, xtlaj ika kinpaleuiaya. Jesús okijto yeyi tlemach tlen nonekiya kichiuaskej yejuin tlakamej para ueliskia kinpaleuis iTlajtol toTajtsin. Tlen okijto Jesús techpaleuis 1) kuajli matikasikamatikan tlen tikamapouaj, 2) tiknextiskej tlen uelis techpaleuis niman 3) tijkauiliskej ika iTlajtol toTajtsin matechpaleui.

4. Ijkon ken kijtoua Lucas 10:25-29, ¿tlenon xkuajli kichiuaya “sen temachtijketl ikan itlanauatil Dios”, niman tejuamej tlenon noneki tikchiuaskej?

⁴ Tejuamej tiknekij tikasikamatiskej tlen tikamapouaj ipan Biblia pampa san ijkon uelis techpaleuis. Matitlanemilikan itech tlen Jesús okijli “sen temachtijketl ikan itlanauatil Dios” (xpoua Lucas 10:25-29). Yejuin tlakatl kinekiya kimatis tlenon nonekiya kichiuas para uelis nochipa nemis, niman Jesús okipaleui matlanemili itech iTlajtol toTajtsin. Okitlajtolti: “¿Tlinon tlajkuilolnestikaj ipan on tlanauatijli? ¿Kenijki tikajsikamati?”. Yejuin tlakatl kuajli ken otlanankili. Okiteneuj tlen kijtoua iTlajtol toTajtsin niman okijto ika nonekiya kitlasojtlas toTajtsin niman itlaltikpakikniuj (Lev. 19:18; Deut. 6:5). San ika, sakin yejuin tlakatl otetlajtolti: “¿Akinonon notlaltikpakikniu yejuan noneki niktlajsojtlas?”. Pampa ijkin otetlajtolti, okiteititi ika xkasikamatiya tlen yokiamapoujka. Ika yejon, xkimatiya kenon kichiuas tlen kijtoua iTlajtol toTajtsin.

5. ¿Tleka más kuajli tikasikamatij Biblia ijkuak tikchiuaj teoyotl niman ijkuak xtotlasiuitiaj?

⁵ Melak noneki matikchiuakan tlen uelis techpaleuis matikasikamatikan tlen kijtoua Biblia. Matikteneuakan seki tlen uelis tikchiuaskej. Kachtopa, noneki tikchiuaskej teoyotl ijkuak tipeuaskej tikamapouaskej Biblia. Xuelis tikasikamatiskej iTlajtol toTajtsin tla xtechpaleuiya Jehová, ika yejon, tiktlajtlaniliaj matechmaka iespíritu santo niman ijkon kuajli tikitstiaskej tlen tikpouaskej. Sakin, matikpouakan toBiblia, san ika, maka melak matotlasiuitikan pampa tla ijkon tikchiuaj, xtikasikamatiskej tlen tikpoujtiaskej. Uelis chikauak tikpouaskej noso, tla onka ika totlajtol, uelis tiktlaliskej se grabación itech Biblia niman tikitstiaskej ipan toBiblia. Ijkuak tijkakij grabaciones niman tikitstiuej ipan toBiblia, techpaleuiya más matikasikamatikan, matiuelikan niman maka matikilkauakan tlen tikamapouaj ipan iTlajtol toTajtsin (Jos. 1:8). Ijkuak titlamiskej tikamapouaskej Biblia, oksejpa matiknotsakan Jehová niman matiktlasojkamachilikan pampa otechmakak iTlajtol niman matiktlajtlanilikan matechpaleui matikchiuakan tlen kemach otikonamapoujkej.

6. ¿Kenon techpaleuiya tla totlajtoltiaj niman tikijkuilouaj tlen tiuelij ijkuak tikamapouaj toBiblia? (Noijki xkita tlaixkopinajli).

⁶ ¿Tlenon más uelis tikchiuaskej? Uelis totlajtoltiskej tlen techpaleuis más matikasikamatikan tlen tikpoujtokej. Uelis totlajtoltiskej yejuin: “¿Akinomej nikan noteneujtokej? ¿Akinon tlajtotika? ¿Akinon kijlitokej tlen nikan  kijtoua niman tleka? ¿Kanon niman kemanon opanok tlen nikan nikpoujtika?”. Tla totlajtoltiaj yejuin, techpaleuis más kuajli matitlanemilikan niman más kuajli matikitakan tlen techpaleuis. Noijki uelis titlajkuiloskej. Ijkuak tikijkuilouaj tlen tikpouaj, más titlanemiliaj itech yejon niman techpaleuiya más matikasikamatikan tlen tikpouaj. ¿Tlenon ueliskia tikijkuiloskej? Tlen otiuelkej, tlen ototlajtoltijkej ijkuak otikamapoujkej Biblia, tlen otomachtijkej ipan okseki amatlajkuiloltin, ken ueliskia tikintekitiltiskej tlaxeloltin tlen otikinpoujkej noso san uelis tikijkuiloskej tlen otikmachilijkej ijkuak otikamapoujkej toBiblia. Tla nochipa tikchiuaj yejuin ijkuak tikamapouaskej Biblia, tikmachiliskej kentla Jehová yejua akin technotstoskia.

7. ¿Tlenon noneki tikchiuaskej ijkuak tikamapouaskej Biblia, niman tleka? (Mateo 24:15).

⁷ Jesús okijto ika uelis tikasikamatiskej Biblia tla melak kuajli titlanemiliaj itech tlen tikamapouaj (xpoua Mateo 24:15). ¿Kenon uelis tikchiuaskej yejuin? Noneki titlanemiliskej itech kenon tlen tikamapoujtokej notlajtolnamiki iuan okseki tlaxeloltin itech Biblia. Noijki noneki tikitaskej tlen xnimantsin nasikamati. Niman ijkon ken Jesús okijto, tla kuajli titlanemiliaj itech tlen tikamapouaj ipan Biblia, tikinmasikamatiskej teotlajtoltin tlen ompa uajnestiuej. Tla ijkon tikchiuaj, Biblia melak techpaleuis.

8. ¿Tlenon uelis tikchiuaskej tla tiknekij kuajli titlanemiliskej ijkuak tikamapouaskej Biblia?

⁸ Jehová kinpaleuiya itekipanojkauan matlanemilikan itech tlen kiamapouaj. Ika yejon, noneki tikchiuiliskej teoyotl niman tiktlajtlaniliskej matechpaleui (Prov. 2:6). San ika, xsan noneki tikchiuaskej teoyotl. Noijki noneki san yolik tikpouaskej Biblia niman tikitaskej kenon tlen tikamapoujtokej notlajtolnamiki ika tlen yotiuelkaj. Tikinpiyaj miyek amatlajkuiloltin tlen techpaleuiyaj kuajli matikasikamatikan Biblia, ken amatlajkuilojli Tlen kinpaleuiya ika nomachtiaj iteixpantijkauan Jehová. Tla tomachtiaj  yejuin amatlajkuiloltin, uelis tikasikamatiskej tlen kijtoua Biblia niman noijki tikitaskej kenon uelis tikchiuaskej tlen tiuelij (Heb. 5:14). Tla kuajli titlanemiliaj ijkuak tikamapouaj Biblia, más kuajli tikasikamatiskej.

9. ¿Tlenon xokinejkej kineltokaskej saduceos?

⁹ Maski saduceos kuajli kixmatiyaj on makuijli libros tlen ika peuayaj Tlajkuiloltin ika Hebreo, xkinekiyaj kichiuaskej tlen ompa ueliyaj. Matikilnamikikan tlen Jesús okimijli saduceos ijkuak okitlajtoltijkej itech yoliuilistli. Jesús okintlajtolti: “¿Xe nenkimomachtiaj iamamox Moisés kampa okijkuiloj ika Dios nemiya ijtik on tlakotepajsojli, niman okinots Moisés niman ijkin okijlij: ‘Nejua niiDios Abraham, niiDios Isaac, niman niiDios Jacob’?” (Mar. 12:18, 26). Kanaj saduceos miyekpa yokinamapoujkaj yejon tlaxeloltin, san ika, tlen Jesús okintlajtolti okiteititi ika xkinekiyaj tlaneltokaskej itech yoliuilistli (Mar. 12:27; Luc. 20:38). d

10. ¿Tlenon noneki tikchiuaskej ijkuak tikamapouaskej toBiblia?

¹⁰ ¿Tlenon tiuelij itech tlen Jesús okintlajtolti saduceos? Ika ijkuak tikamapouaskej Biblia, noneki kuajli tikitstiaskej tlenon techmachtia se tlaxelojli noso tlenon techmachtia tlen ipan opanok akin ompa noteneua. Onka seki tlaxeloltin tlen uelis nimantsin tiknextiliskej tlen techmachtia, san ika, xsan yejon tiknekij tikchiuaskej. Noneki más tiktejtemouiliskej tlen uelis techmachtis, kentla tiktejtemoskiaj se tesoro pampa melak noneki tokojtiliskej para uelis tiknextiskej.

11. Ijkon ken kijtoua 2 Timoteo 3:16, 17, ¿kenon uelis tiknextiskej ipan Biblia tlen uelis techpaleuis?

¹¹ ¿Tlenon noneki tikchiuaskej ijkuak tikamapouaskej Biblia tla tiknekij tikasikamatiskej tlen iyantika? Matikitakan tlen kijtoua 2 Timoteo 3:16, 17 (xpoua). Ompa kijtoua ika “nochi Yektlajkuilojli […] techpaleuiya” pampa 1) “techmachtia on tlen melauak”, 2) “techchikajkanotsa”, 3) “kiyektlalia on tlen xkuajli” niman 4) “temachtia kenijki onyas sen nemilistli melajki”. Hasta libros itech Biblia tlen xmás tikinpouanij uelis melak techpaleuiskej. Ijkuak tikamapouaskej Biblia, matikitakan tlenon techmachtia itech Jehová, itech tlen kineki kichiuas noso itech tlen uelis techpaleuis ipan tonemilis. Niman tla tiknekij matexchikajkanotsa tlen tikpouaj ipan Biblia, noneki tiktejtemoskej tlen techpaleuis matikitakan tlen xkuajli tikchiujtokej, tlen techpaleuis matikmapeuakan tlen xkuajli niman tlen techpaleuis nochipa matimelajkanemikan itech Jehová. Noijki, matitlanemilikan itech kenon se tlaxelojli ueli kiyektlalia tlen yakaj xkuajli kinemilia. Uelis titlanemiliskej kenon ueliskia kiyektlalis tlen xkuajli kineltoka se tlaltikpakchane akin otiknojnotskej. ¿Niman tlenon uelis tikchiuaskej tla tiknekij ika tlen tikpouaj matechmachti “kenijki  onyas sen nemilistli melajki”? Noneki tiktejtemoskej nochi tlen matechpaleui matitlanemilikan ijkon ken Jehová. Tla tikchiuaj yejuin naui tlemach tlen kemach yotikonteneujkej, más tiknextiskej tlen uelis techpaleuis ijkuak tikpouaskej Biblia.

12. ¿Tleka Jesús okintlajtolti fariseos tla xkeman kiamapouayaj tlen kijtoua iTlajtol toTajtsin?

¹² Fariseos xika inyojlo kipouayaj iTlajtol toTajtsin. ¿Kenon tikmatij? Pampa Jesús okintlajtolti tla xkeman kipouanij tlen kijtoua iTlajtol toTajtsin (Mat. 12:1-7). e Ijkuak ijkon opanok, fariseos okimijlikaj inomachtijkauan Jesús ika yejuamej xokitlakamatkej tlanauatijli kampa kijtouaya ika xnonekiya tekitiskej sábado. Ijkuak Jesús okinnankili, okinteneuili ome neskayomej tlen uajnestiuej ipan Biblia niman se tlaxelojli itech Oseas. Ijkon, Jesús okiteititi ika fariseos xteikneliayaj niman ika xkasikamatiyaj tleka onotemakak yejon tlanauatijli. Yejuin tlakamej kiamapouayaj iTlajtol toTajtsin, san ika, xtlaj ika kinpaleuiaya. ¿Tleka? Pampa melak noueyimatiyaj niman san kiamapouayaj para tetejteneuaskej. Yejon fariseos xkuajli kasikamatiyaj tlen kiamapouayaj ipan iTlajtol toTajtsin pampa xika inyojlo kiamapouayaj (Mat. 23:23; Juan 5:39, 40).

13. ¿Kenon noneki tikamapouaskej Biblia, niman tleka?

¹³ Tlen okijto Jesús techmachtia ika ijkuak tikpouaskej Biblia, noneki ika toyojlo tikchiuaskej. Maka matikchiuakan ijkon ken fariseos, yej matoyolyemanilikan niman matijkauilikan Jehová matechmachti. Matikchiuakan tlen kijtoua Santiago 1:21, kampa kijtoua: “Xselikan ikan yolyemanilistli itemachtil Dios yejuan okitlalij ne ipan nemoyojlo”. Tla tiyolyemankej, tijkauiliskej ika iTlajtol toTajtsin maajsi ipan toyojlo. Ijkuak tikamapouaskej Biblia, maka  matoueyimatikan niman maka matiknemilikan kenon nopopolouaj oksekimej. Tla xtoueyimatij niman tla xsan tikitstokej kenon nopopolouaj oksekimej ijkuak tikamapouaj Biblia, más titeikneliskej niman titetlasojtlaskej.

14. ¿Kenon uelis tikmatiskej tla tokauilijtokej matechpaleui Biblia? (Noijki xkimita tlaixkopinaltin).

¹⁴ Ken tikimitaj oksekimej niman tlen intech tikijtouaj, kiteititia tla Biblia yemelak techpaleuijtika. Pampa fariseos xkinokauiliayaj makinpaleui Biblia, kintlajtlakolmakayaj akin xkipiayaj tlajtlakojli (Mat. 12:7). Kuakon, matikitakan tlenon tiknemiliaj niman tlenon tikijtouaj intech oksekimej. Matitlanemilikan itech yejuin: ¿Nochipa titlajtouaj itech tlen oksekimej kuajli kichiuaj, noso san tikitstokej tlen xkuajli kichiuaj? ¿Tiknektokej titetlapopoluiskej, noso san titetejteneuaj niman titetlauelitstokej? Ken tikinnankiliskej yejuin tlajtoltilistin, kiteititis tla Biblia techpaleuijtika itech tlen tiknemiliaj, tlen tikmachiliaj niman tlen tikchiuaj (1 Tim. 4:12, 15; Heb. 4:12).

15. ¿Kenon kitaya Jesús iTlajtol toTajtsin?

¹⁵ Jesús melak kitlasojtlaya iTlajtol toTajtsin. Salmo 40:8 okijtojka kenon Jesús melak kipatiojkaitaskia iTlajtol toTajtsin: “Nejua nikuelita nikchiuas tlinon tejua tikneki noDios. Motlanauatil nikejeua ipan noyojlo”. Pampa Jesús melak okipatiojkaitak Biblia, okipaleui mayolpaki niman nochipa makitekichiuili Jehová. Tejuamej noijki ijkon techpaleuis tla tokojtiliaj tikamapouaj iTlajtol toTajtsin niman tiktlasojtlaj (Sal. 1:1-3).

16. ¿Tlenon uelis tikchiuas tla tikneki ika Biblia más mamitspaleui ijkuak tikamapouas? (Xkita recuadro “ Tlen Jesús okijto techpaleuiya matikasikamatikan tlen tikamapouaj”).

¹⁶ Tlen Jesús okijto niman tlen okichiuj techpaleuiya más matiknekikan kuajli tikamapouaskej niman tomachtiskej Biblia. Tla tiknekij más kuajli tikasikamatiskej tlen tikamapouaj, matikchiuilikan teoyotl Jehová, san yolik matitlaamapouakan, matochiuilikan seki tlajtoltilistin niman matikijkuilokan tlen tiuelij. Tla tiknekij kuajli titlanemiliskej itech Biblia, maka san totoka matikamapouakan niman okseki matiktejtemokan ipan toamatlajkuiloluan. Tla tiknekij kuajli tikixmatiskej iTlajtol toTajtsin, kuajli matiktejtemokan tlen uelis techpaleuis, hasta ipan tlaxeloltin tlen xmás tikimixmatij. Niman tla tiknekij ika iTlajtol toTajtsin matechpaleui, nochipa matikamapouakan ika nochi toyojlo. Tla tikchiuaj nochi yejuin, Biblia más techpaleuis ijkuak tikamapouaskej niman más tiknisiuiskej Jehová (Sal. 119:17, 18; Sant. 4:8).