1, 2. ¿Kenon onomachili Jehová ijkuak okijtojkej tlen xmelauak itechkopa? Xkijto se neskayotl.

 XKONNEMILI ika yakaj akin tiktlasojtla melak xkuajli mitstejteneua. Maski tejua tikmatstika ika xmelauak tlen motech okijto, sekimej kineltokiliaj, niman sakin yejuamej noijki peuaj mitstejteneuaj. ¿Kenon timomachiliskia? Melak timajmanaskia pampa aman miyekej xkuajli mitstejteneuaj (Prov. 22:1).

² Tlen otikonteneujkej techpaleuiya matikasikamatikan kenon onomachili Jehová ijkuak se iángel okijto tlen xmelauak itechkopa niman okitsojkuilo itoka. Eva okineltokak tlen okijto yejon ángel, yejua ika, akin kachtopa totajuan katkaj xok okitlakamatkej Jehová. Ika yejon, aman tinochimej titlajtlakouaj niman timikij (Gén. 3:​1-6; Rom. 5:12). Aman onka mikilistli, guerras niman tlajyouilistli ipan nochi tlaltikpaktli pampa Satanás okijto tlen xmelauak itech toTajtsin ipan jardín de Edén. ¿Kenon onomachili Jehová ipampa tlen xkuajli okiteneuilijkej niman ipampa nochi tlen xkuajli opanok? Yejua melak okiyolkoko, san ika, yejon xokichiuj ika san nochipa yejon makinemilijto noso san makualanto. Biblia kijtoua ika yejua se toTajtsin akin yolpaki (1 Tim. 1:11).

3. ¿Tlenon uelis tikchiuaskej?

³ Tinochimej uelis titlapaleuiskej para tikchipauaskej itoka Jehová niman para tikteititiskej ika xmelauak tlen xkuajli  itech okijtojkej. ¿Kenon uelis tikchiuaskej? Tla tiktlakamatij yejuin tlajtoltin: “Xkueyiteneuakan toTEKO” (Sal. 113:1). ¿Niman kenon uelis tikueyiteneuaskej? Tla kuajli titlajtouaj itech Jehová. ¿Tejua tikneki tikueyiteneuas? Matikitakan yeyi tlemach tlen uelis techpaleuis matiknekikan tikueyiteneuaskej itoka toTajtsin.

TIKYOLPAKTIAJ JEHOVÁ

4. ¿Tleka Jehová melak yolpaki ijkuak kita ika tikueyiteneuaj? Xkijto se neskayotl (noijki xkita tlaixkopinajli).

⁴ Jehová yejua toTaj iluikakchane, niman yejua kuelita matikueyiteneuakan itoka (Sal. 119:108). Kuakon, ¿toTajtsin noijki ijkon ken tlaltikpakchanejkej akin kinekij makinueyiteneuakan para más kuajli nomachiliskej? Ka, yejua xijkon. ¿Tleka ijkon tikijtouaj? Matontlanemilikan itech se ichpokatsin. Yejua kinapaloua itaj niman ijkin kijlia: “¡Notaj, melak nimitstlasojtla!”. Yejon tajtli melak kiyolpaktia tlen iichpokatsin okijli. ¿Niman tleka yolpaki? ¿Nonekiya ika iichpokatsin makijli ika melak kitlasojtla para kuajli nomachilis? Ka. Yejon tajtli yolpaki pampa kuelita kitas ika iichpokatsin kititia ika kitlasojtla. Kimatstika ika ijkuak noskaltis, melak yolpakis pampa melak tetlasojtlani niman tetlasojkamachiliani. Noijki ijkon, toTaj Jehová melak techtlasojtla niman melak yolpaki ijkuak kita ika tikueyiteneuaj.

5. ¿Tlenon tikteititiaj ijkuak tikueyiteneuaj Jehová?

⁵ Ijkuak tikueyiteneuaj Jehová, tikititiaj Satanás ika xmelauak tlen okijto totechkopa. Satanás okijto ika tla peua tikixnamikij tlen xkuajli, tejuamej xuelis timelajkanemiskej niman xuelis titlapaleuiskej machipaui itoka Jehová (Job 1:​9-11; 2:4). San ika, Job okiteititi ika xmelauak tlen okijto Satanás. ¿Niman tejuamej noijki uelis tikteititiskej ika Satanás san tekajkayaua? Kema, uelis ijkon tikchiuaskej tla tikueyiteneuaj Jehová. Melak tiyolpakij ika tinochimej uelis titlapaleuiskej machipaui itoka Jehová niman ika uelis tikyolpaktiskej tla itech timelajkanemij (Prov. 27:11).

6. ¿Kenon uelis tikchiuaskej ken David niman levitas? (Nehemías 9:5).

⁶ Akin kitlasojtlaj toTajtsin kinekij kiueyiteneuaskej itoka. Tekiuaj David okijkuilo: “Nikyekteneuas toTEKO ikan nochi noalma. Nikyekteneuas iyektokatsin ikan nochi nonemilis” (Sal. 103:1). David kimatstoya ika tikueyiteneuas “iyektokatsin” Jehová niman tikueyiteneuas Jehová san noijki. Ijkuak tijkakij itoka Jehová, titlanemiliaj itech kenon yejua, itech ikualneskayouan niman itech nochi tlen kualtsin yokichiuj.  David kichipajkaitaya itoka Jehová niman kiueyiteneuaya. Levitas noijki okiueyiteneujkej itoka Jehová. Yejuamej okasikamatkej ika Jehová melak ueyixtika niman ika inueyiteneualis “xkajxilia kech yejuan noneki kiselis ueyiteneualistli” (xpoua Nehemías 9:5). ¡Jehová melak oyolpak ijkuak okitak kenon yejuamej kiueyiteneuayaj ika nochi inyojlo!

7. ¿Kenon uelis tikueyiteneuaskej Jehová?

⁷ Uelis tikueyiteneuaskej Jehová tla ijkuak itech titlajtouaj tikteititiaj ika melak tiktlasojtlaj niman ika melak tiktlasojkamatij nochi tlen yokichiuj topampa. Tejuamej titenojnotsaj pampa tiknekij ika tlaltikpakchanejkej makinekikan más makixmatikan Jehová niman makitlasojtlakan ijkon ken tejuamej tiktlasojtlaj (Sant. 4:8). Tikuelitaj tikimititiskej ipan Biblia kenon yejua melak tetlasojtla, yolmelajki, tlamachilise niman kojtik. Noijki uelis tikueyiteneuaskej Jehová niman tikyolpaktiskej tla tokojtiliaj tikchiuaskej ijkon ken yejua (Efes. 5:1). Ijkuak ijkon tikchiuaj, oksekimej nimantsin kitaj ika titlamantikej niman kanaj notlajtoltiaj tleka xtikchiuaj ken tlaltikpakchanejkej (Mat. 5:​14-16). Ijkuak imiuan titlajtoskej, uelis tikimijliskej tleka xtikchiuaj ijkon ken oksekimej. Niman akin kipiyaj kuajli inyojlo kinekiskej nonisiuiskej itech toTajtsin. Melak tikyolpaktiaj Jehová ijkuak kita ika ijkin tikueyiteneuaj (1 Tim. 2:​3, 4).

TIKYOLPAKTIAJ JESÚS

8. ¿Tleka tikijtouaj ika san Jesús melak kuajli yotechititi kenon noneki tikueyiteneuaskej Jehová?

⁸ San Jesús melak kuajli kixmatstok iTaj (Mat. 11:27). Yejua melak kitlasojtla toTajtsin niman san yejua melak kuajli yotechititi kenon noneki tikueyiteneuaskej Jehová (Juan 14:31). Achto mikiskia, Jesús okichiuili se teoyotl iTaj niman okijli tlen okichiuj ipan itenojnotsalis. Yejua ijkin okijto: “Yonikinmachistij akin tejua” (Juan 17:26). San ika ¿kenon okichiuj yejuin?

9. ¿Katlejua neskayotl okitekitilti Jesús niman ijkon temachtis kenon Jehová?

⁹ Jesús xsan otemachti kenon itoka toTajtsin pampa judíos ikimatstoyaj yejon. Yejua otemachti kenon Jehová (Juan 1:​17, 18). Matikteneuakan kenon sejpatsin otemachti. Ipan Tlajkuiloltin ika Hebreo ikijtouaya ika Jehová tetlasojtla niman teiknelia (Éx. 34:​5-7). Jesús okitekitilti se neskayotl para más kuajli temachtis kenon Jehová. Yejua otlajto itech se tekoneuj akin yopoliujka. Ijkuak yejuin tekoneuj onokuep ichan, itaj okontak ijkuak “sanken uejka uajlaya”. Tajtli nimantsin okinamikito, okinapalo niman okitlapopolui (Luc. 15:​11-32). Yejuin neskayotl melak okinpaleui tlaltikpakchanejkej más kuajli makasikamatikan kenon melak tetlasojtla Jehová niman kenon melak teiknelia.

10. a) ¿Kenon tikmatij ika Jesús okitekitilti itoka iTaj niman ika kinekiya ika oksekimej noijki makitekitiltikan? (Marcos 5:19; noijki xkita tlaixkopinajli). b) ¿Tlenon kineki Jesús matikchiuakan?

¹⁰ Jesús kinekiya ika oksekimej makitekitiltikan itoka iTaj. Sekimej tlayekankej ipan tlaneltokiltin kinemiliayaj ika xnonekiya tikijtos itoka toTajtsin pampa melak chipauak. San ika, Jesús kimatstoya ika tlen kineltokayaj yejuin tlayekankej xnesiya ipan Biblia, ika yejon, yejua nochipa okitekitilti itoka iTaj niman okiueyiteneuj. Matontlanemilikan itech tlen okichiuj Jesús kampa chantiyaj gerasenos. Yejua okipajti se tlakatl akin kinpiaya demonios. Akin ompa chantiyaj melak onomojtijkej niman okitlajtlanilijkej Jesús mauiya (Mar. 5:​16, 17). San ika, Jesús kinekiya nochimej makixmatikan itoka Jehová. Ika yejon, okijli yejon tlakatl makiteijli ika Jehová okipajti, niman ika xyejua akin okichiujka yejon milagro (xpoua Marcos  5:19). a ToTekiuaj, Jesús, kineki matikchiuakan ijkon ken yejua. Kineki nochimej matikinmachtikan kenon itoka iTaj (Mat. 24:14; 28:​19, 20). Ijkuak ijkon tikchiuaj, melak tikyolpaktiaj Jesús.

11. ¿Tlenon okimijli Jesús inomachtijkauan makijtokan ijkuak kichiuaskej teoyotl? Niman, ijkon ken kijtoua Ezequiel 36:​23, ¿tleka melak noneki manochiua yejuin?

¹¹ Jesús kimatstoya ika Jehová melak kineki manochipaua itoka, yejuin kijtosneki ika kineki manoteititi ika xmelauak nochi tlen xkuajli yokijtokej itechkopa. Ika yejon, ijkin okimijli inomachtijkauan makichiuakan teoyotl: “ToTajtsin akin tinemi ne iluikak, machipaui motoka” (Mat. 6:​9, TNM). Jesús kimatstoya ika melak nonekiya ijkin manochiua (xpoua Ezequiel 36:​23, TNM). b Niman san yejua melak yonokojtili kichipauas itoka Jehová. Para yejua melak ueyi tlajtlakojli katka tiktsojkuilos itoka Jehová. San xkonnemili kenon onomachili ijkuak itlauelikniuan okajsikej pampa okijtojkej ika yejua yokitsojkuilojka itoka iTaj. Biblia kijtoua ika ijkuak xikajsiyaj, “yejua sanoyej noyolkokojtikatka” (Luc. 22:​41-44). Kanaj ijkon nomachiliaya pampa kimatstoya ika ijkon kitlajtolchijchiuiliskiaj.

12. ¿Tlenon ononek kixikos Jesús para manochipaua itoka iTaj?

¹² Jesús otlaxiko ijkuak okitlajyouiltijkej, ijkuak okiuijuikaltijkej niman ijkuak okitlajtolchijchiuilijkej pampa kinekiya manochipaua itoka iTaj. Yejua kimatstoya ika nochipa okitlakamat iTaj (Heb. 12:2). Noijki kimatstoya ika Satanás yejua kichiuilijtoya nochi tlen xkuajli ipan panotoya (Luc. 22:​2-4; 23:​33, 34). Diablo kinekiya ika Jesús makitlalkaui Jehová, san ika, xijkon opanok. Jesús okiteititi ika Satanás melak tekajkayaua niman ika kema nemij akin melajkanemij itech Jehová maski kixnamikij tlen ouijtika.

13. ¿Tlenon noneki tikchiuaskej tla tiknekij tikyolpaktiskej toTekiuaj Jesucristo?

¹³ ¿Tikneki tikyolpaktis toTekiuaj Jesucristo? Tla kema, kuakon xchiua ijkon ken yejua: xueyiteneua itoka Jehová niman xkinnojnotsa oksekimej itech kenon yejua (1 Ped. 2:21).  Tla ijkon tikchiua, melak tikyolpaktis Jehová niman tikteititis ika itlauelikniuj, Satanás, san tekajkayaua.

TIKINPALEUIYAJ OKSEKIMEJ

14, 15. ¿Tlenon panoua ijkuak tikinmachtiaj oksekimej itech kenon Jehová?

¹⁴ ¿Tleka tikijtouaj ika ijkuak tikueyiteneuaj itoka Jehová tikinpaleuiyaj oksekimej? Pampa Satanás “yokintlamachilispoloj” tlaltikpakchanejkej (2 Cor. 4:4). Yejua yokijto miyek tlen xmelauak itech Jehová. Ika yejon, miyekej kinemiliaj ika toTajtsin xnemi, ika uejka nemi, ika xnajmana topampa noso ika nochipa kintlajyouiltia akin xkuajkualtin. Nochi yejon yokitsojkuilo itoka Jehová niman miyekej xok kinekij itech nonisiuiskej. San ika, ijkuak titenojnotsaj niman ijkuak titemachtiaj itech kenon Jehová, tikueyiteneuaj itoka niman xtijkauiliaj Satanás más makitsojkuilo itoka Jehová. Matikitakan tlenon panoua ijkuak titenojnotsaj.

¹⁵ Tlen temachtia Biblia melak tepaleui. Tlaltikpakchanejkej kentla ixtlapachijtoskiaj pampa kineltokaj tlen Satanás temachtia. San ika, ijkuak peua tikinmachtiaj akinon Jehová niman kenon yejua, kentla ixtlapouiskiaj pampa iuelij kitaj Jehová ken tejuamej tikitaj. Melak mojkatlachiaj ijkuak kasikamatij ika Jehová melak kojtik (Is. 40:26). Melak kuajli nomachiliaj ijkuak kimatij ika toTajtsin nochipa kichiua tlen melajki (Deut. 32:4). Melak kuelitaj ijkuak kasikamatij ika toTajtsin sajnoye tlamachilise (Is. 55:9; Rom. 11:33). Niman melak yolseuij ijkuak kasikamatij ika toTajtsin yejua tlasojtlalistli (1 Juan 4:8). Ijkuak nonisiuiyaj itech Jehová, kasikamatij ika uelis nochipa nemiskej niman nochiuaskej ken ikoneuan. Melak tiyolpakij ijkuak tikinpaleuiyaj oksekimej manonisiuikan itech toTajtsin. Niman ijkuak ijkon tikchiuaj, tikpaleuijtokej Jehová (1 Cor. 3:​5, 9).

16. ¿Kenon kinpaleuiya oksekimej ijkuak kimatij itoka toTajtsin? Xkijto se neskayotl.

¹⁶ Ijkuak yakaj tiknojnotsaj, kanaj kachtopa tikijliaj ika toTajtsin itoka Jehová. Niman tla yejua kuajli iyojlo, yejon kichiuas manopatla niman makineki kixmatis toTajtsin. Matitlajtokan itech se ichpochtli akin  itoka Alía. c Ichanejkauan kipiayaj se religión kampa xkinmachtiayaj itech Biblia. San ika, yejua xmás kuelitaya tlen ompa kinmachtiayaj niman xkimachiliaya tla toTajtsin nisiuj nemiya. Sakin, opeuj nomachtia imiuan iteixpantijkauan Jehová, niman melak okimojkatlachialti ijkuak okitak ika ipan seki Biblias xok okitlalijkej itoka toTajtsin niman san okitlalijkej toTeko. Ijkuak tokniuan okimachtijkej kenon itoka toTajtsin, opeuj kita ken se iamigo. Yejua ijkin okijto: “¡Noamigo kipiya itoka! Melak niyolpaki pampa onikixmat toTajtsin”. Aman matikteneuakan tlen ipan opanok Steve. Yejua tlatsotsonketl katka, niman ifamilia judíos katkaj. Yejua xkeman okinek nokalaktis ipan se religión pampa kitaya ika miyekej xkichiuayaj tlen kinmachtiayaj. San ika, ijkuak inan omik, okinek nomachtis imiuan iteixpantijkauan Jehová. Yejuamej okimachtijkej kenon itoka toTajtsin niman yejon oajsik ipan iyojlo. Yejua kijtoua: “Xnikmatiya ika toTajtsin kipiya itoka, niman ijkuak onikmat, onikitak toTajtsin ken yakaj akin yemelak nemi. Ijkuakon, onikasikamat ika ueliskia ninouikas iuan toTajtsin”.

17. ¿Tleka tikneki tikueyiteneuas itoka Jehová? (Noijki xkita tlaixkopinajli).

¹⁷ Ijkuak titenojnotsaj noso ijkuak titemachtiaj, ¿tikteijliaj kenon itoka toTajtsin niman kenon yejua? Tla kema, kuakon tikueyiteneujtokej itoka Jehová. Niman ¿tlenon panoua ijkuak titemachtiaj kenon Jehová? Tikinpaleuiyaj tlaltikpakchanejkej, tikchiuaj ijkon ken toTekiuaj Jesucristo niman melak tikyolpaktiaj toTaj Jehová. Matikijtokan ijkon ken akin okijkuilo Salmo 145:2: “Xkeman nijkauas ika nikueyiteneuas motokayo”.