Maski ijkon, Jehová xkineki matosiaujkauakan niman yejua kineki matikchiakan on tonajli tlen yejua yokitlali ijkuak tlapopolos. ¿Tleka Jehová kineki ijkon matikchiuakan? Niman ¿tlenon techpaleuis matipakikan chika titlamachiaj?

TLEKA JEHOVÁ KINEKI MATITLAMACHIAKAN

Biblia kijtoua: “ToTEKO mechcha, para mechiknelis. Yejua kinektikaj mechititis itetlajsojtlalis, pampa toTEKO yejua sen Dios yejuan kichiua tlen melajki. ¡Dios kintiochiuas on yejuan itech yejua kitlaliaj iminyojlo!” (Is. 30:18). Isaías okimijli yejuin tlajtoltin judíos akin xtetlakamatiyaj (Is. 30:1). San ika, ijkuakon noijki nemiyaj judíos akin tetlakamatiyaj. Yejuin tlajtoltin melak okinpaleui para makichiakan ijkuak Jehová kinpaleuiskia, niman aman yejuin tlajtoltin noijki melak techpaleuiyaj.

Kuakon, ¿tleka noneki titlamachiaskej? Pampa Jehová noijki tlamachixtok. Yejua kichiatok mayejko tonajli niman hora tlen yejua yokitlali para kipopolos nochi tlen xkuajli (Mat. 24:36). Ijkuak yejkos yejon tonajli, kuajli nesis ika nochi tlen Diablo okijto itech Jehová niman itech itekipanojkauan xmelauak. Ijkuakon, noijki kipopolos Satanás niman nochimej akin kinyekana. San ika, Jehová yokijto ika kimiknelis itekipanojkauan.

Ipan yejuin tonaltin, Jehová xkipopolos tlen tikixnamikij. San ika, kema techijlia ika uelis tiyolpakiskej. Ijkon ken okijto Isaías, uelis tiyolpakiskej chika tikchiaj mayejko yejon tonajli ijkuak nochiuas tlen kuajli (Is. 30:18). a Niman, ¿kenijki uelis tiyolpakiskej? Matikitakan naui tlemach tlen techpaleuis matiyolpakikan.

KENIJKI UELIS TIYOLPAKISKEJ CHIKA TITLAMACHIAJ

Matikitakan tlen kuajli topan panoua. Tekiuaj David okitak miyek tlen xkuajli nochiuaya (Sal. 37:35). Maski ijkon, yejua ijkin okijkuilo: “Maka itlaj xkijto ixpan toTEKO, yej xtlamacha ikan yolseuilistli hasta ijkuak yejua mitspaleuis. Maka xmotenmati tla on xompayejyeuamej [noso on xkuajkualtin] kichiuaj tlen xkuajli ken yejuamej kinekij” (Sal. 37:7). David okichiuj tlen okijkuilo. Yejua san kinemilijtoya ika Jehová yokijlijka ika kimakixtiskia. Niman noijki melak kitlasojkamatiya ijkuak toTajtsin kipaleuiaya (Sal.  40:5). Tla tejuamej noijki tikitaj tlen kuajli topan panoua niman xsan tikitstokej tlen xkuajli topan nochiua, techpaleuis matitlamachixtokan hasta ijkuak Jehová kichiuas tlen yokijto.

Nochipa matikueyiteneuakan Jehová. Akin okijkuilo Salmo 71, ijkin okijli Jehová: “Pero nejua nochipa nikpiyas tlamachalistli para xnechpaleui, niman más [ . . . ] nimitsyekteneuas” (Sal. 71:14). Nesi ika yejuin salmo okijkuilo David. Niman ¿tlenon kichiuaya para kiueyiteneuas Jehová? Yejua itech tlajtouaya niman kikuikatiliaya (Sal. 71:​16, 23). Tejuamej uelis tikchiuaskej ijkon ken David niman tikueyiteneuaskej Jehová ijkuak titenojnotsaskej, ijkuak titlajtoskej itech Jehová imiuan toamigos niman tofamilia niman ijkuak tokuikatiskej. Ika yejon, ijkuak tokuikatiskej totlakuikaluan, kuajli matijkakikan tlen ompa tikijtouaj. Tla ijkin tikchiuaj, uelis tiyolpakiskej chika tikchiaj ika Jehová makichiua tlen yokijto.

Matosentlalikan imiuan tokniuan. Ijkuak David okixnamik tlen ouijtika, yejua ijkin okijli Jehová: “Nochipa motech niktlalis noyojlo inmixpan on yolchipajkej, pampa tejua sanoyej kuajli moyojlo” (Sal. 52:9). David nochipa onosentlali imiuan itekipanojkauan Jehová para makiyolchikauakan. Aman tejuamej noijki uelis toyolchikauaskej imiuan tokniuan ijkuak tiaskej tlanechikoltin, ijkuak tontenojnotsaskej noso maski san kemanon (Rom. 1:​11, 12).

Nochipa matikneltokakan ika nochiuas tlen tikchiaj. Salmo 62:5 kijtoua: “Nejua, san itech Dios niknextia yolseuilistli, pampa notlamachalis onkaj san yejua itech”. Melak noneki matikneltokakan ika tlen tikchiaj yemelak nochiuas, maski kemantika ueliskia tiknemiliskej ika melak youejkauj ika xyejko yejon tonajli. Matiknektokan matitlamachiakan maski san kech uejkauis niman matikmatstokan ika Jehová kichiuas tlen yotechijli. Melak noneki matomachtikan iTlajtol toTajtsin niman teotlajtoltin. Noijki noneki matikitakan kenijki nochi Biblia notlajtolnamiki niman matikitakan tlenon techmachtia itech Jehová. Nochi yejuin techpaleuis más matikneltokakan ika nochiuas tlen tikchiaj (Sal. 1:​2, 3). Noijki noneki matiknotsakan Jehová niman matiktlajtlanilikan iespíritu niman ijkon uelis nochipa iuan touikaskej chika tikchiaj matechmaka nemilistli tlen xkeman tlamis (Jud. 20, 21).

Ijkon ken tekiuaj David, kuajli matikmatstokan ika Jehová kita tlen inpan nochiua akin kichiatokej makinmakixti niman ika melak kintlasojtla (Sal. 33:​18, 22). Kuakon, nochipa matikitakan tlen kuajli topan panoua, matikueyiteneuakan toTajtsin, matosentlalikan imiuan tokniuan niman matikneltokakan ika tlen tikchiaj yemelak nochiuas. Tla ijkon tikchiuaj, melak tiyolpakiskej chika tikchiaj matechmakixti Jehová.