TLAMACHTIJLI 7
TLAKUIKAJLI 15 Matikueyilikan iYenkuiyoj Jehová
Kenijki mitspaleuiya itlapojpoluilis Jehová
“Tejua titechtlapojpoluiya” (SAL. 130:4).
TLEN TIKITASKEJ
Biblia kintekitiltia seki neskayomej tlen techpaleuiyaj matikajsikamatikan niman matikpatiojkaitakan itlapojpoluilis Jehová.
1. Ijkuak yakaj techijlia ika techtlapojpoluiya, ¿tleka kemantika xtikmatij tlenon yemelak techijlisneki?
“NIMITSTLAPOJPOLUIYA”. ¡Melak kualtsin tomachiliaj ijkuak yakaj akin otikyolkokojkej ijkon techijlia! San ika ¿tlenon yemelak kijtosneki ijkuak yakaj techijlia ika techtlapojpoluiya? Kemantika ouijtika tikmatiskej pampa xnochimej san noijki ken tetlapojpoluiyaj. Kanaj techijlisneki ika ok uelis kuajli iuan touikaskej. Noso techijlisneki ika kilkauas tlen opanok, san ika, xok touan nouikas ken yeuejkaui.
2. ¿Tlenon kijtoua Biblia itech itetlapojpoluilis Jehová? (Noijki xkita nota).
2 ¡Jehová xijkon ken tejuamej! Nion se tlaltikpaktlakatl xueli tetlapojpoluiya ken Jehová. Se salmista okijli: “Motech onka melauak tetlapojpoluilistli, niman ijkon mamitsueyiteneuakan” (Sal. 130:4, TNM). a Kema, melak kualtsin ken tetlapojpoluiya Jehová. Tla tiknekij tikmatiskej tlenon on melauak tetlapojpoluilistli, noneki tikitaskej tlen kichiua Jehová. Ipan Tlajkuiloltin ika Hebreo, notekitiltia se tlajtojli para noijtos ika Jehová tetlapojpoluiya, san ika, xkeman notekitiltia yejon tlajtojli para noijtos ika se tlaltikpaktlakatl tetlapojpoluiya.
3. ¿Tleka tikijtouaj ika melak kualtsin ken Jehová tetlapojpoluiya? (Isaías 55:6, 7).
3 ¡Melak kualtsin ken tetlapojpoluiya Jehová! Ijkuak yejua yakaj kitlapojpoluiya, nochi kilkaua niman kinektok oksejpa kuajli iuan nouikas. Melak tiktlasojkamatij ika Jehová kinektok miyekpa techtlapojpoluis (xpoua Isaías 55:6, 7).
4. ¿Tlenon yokichiuj Jehová niman ijkon techajsikamachiltis tlenon kijtosneki melauak tetlapojpoluilistli?
4 San toselti xuelis tikajsikamatiskej kenijki tetlapojpoluiya Jehová pampa yejua melak tlamantik ken tetlapojpoluiya. San ika, Jehová kintekitiltia seki neskayomej tlen uajlauej ipan Biblia niman ijkon techpaleuis matikajsikamatikan kenijki yejua tetlapojpoluiya. Ipan yejuin tlamachtijli tikimitaskej seki neskayomej. Yejon techpaleuis matikajsikamatikan kenijki Jehová kinpopoloua totlajtlakoluan niman ijkon kichiua oksejpa iuan matouikakan. Ijkuak tomachtijtiaskej yejuin neskayomej, techpaleuis más tiktlasojtlaskej niman tiktlasojkamachiliskej toueyiTajtsin akin melak tetlasojtla niman teiknelia.
JEHOVÁ KIMITKI TOTLAJTLAKOLUAN
5. ¿Tlenon panoua ijkuak Jehová kintlapojpoluiya totlajtlakoluan?
5 Ipan Biblia miyekpa noijtoua ika totlajtlakoluan yeskia ken se yetik tlamamajli. Ika yejon, tekiuaj David okijto: “Notlajtlakoluan sanoyej nopan yoyetiyakej. In sen tlamamajli yejuan xok niueli nikeua” (Sal. 38:4). San ika, ipan Salmo 25:18 niman 32:5 kijtoua ika Jehová kintlapojpoluiya akin noyolkuepaj intech intlajtlakoluan. Ipan yejuin tlaxeloltin tlajtojli “kintlapojpoluiya”, ika hebreo kijtosneki “kinmajkokui” noso “kimitki”. Yejuin techajsikamachiltia ika Jehová yeskia ken se kojtik tlakatl akin kinmajkokui totlajtlakoluan niman kimitki.
“Xnechintlapojpoluili [noso “xkinmajkokui”, “xkimitki”]” (Sal. 25:18).
6. ¿Kanon kimitki Jehová totlajtlakoluan?
6 ¿Niman kanon kimitki Jehová totlajtlakoluan? Ipan Salmo 103:12 tiknextiaj se neskayotl tlen techpaleuiya matikmatikan, ompa kijtoua: “Totlajtlakoluan okinmejkuanij totech sanoyej uejka, ijkon ken uejka ikisayan tonaltsintli hasta kampa ikalakiyan”. Ikisayan tonaltsintli niman ikalakiyan melak uejka nokaua. Kuakon, yejuin tlaxelojli techititia ika ijkuak Jehová techtlapojpoluiya, melak uejka kimitki totlajtlakoluan, hasta kampa nion xtikonnemiliaj. ¡Yejuin techititia ika Jehová melauak techtlapojpoluiya!
“Ijkon ken uejka ikisayan tonaltsintli hasta kampa ikalakiyan” (Sal. 103:12).
7. ¿Tlenon kichiua Jehová ika totlajtlakoluan? (Miqueas 7:18, 19, TNM).
7 Ijkuak Jehová uejka kimitki totlajtlakoluan, ¿kijtosneki ika ompa kinsentlalijtiuj? Ka, pampa tekiuaj Ezequías okijli: “Tikomintlajkali mokuitlapan nochi notlajtlakoluan” (Is. 38:9, 17, TNM). Kuakon, ijkuak toyolkuepaj, Jehová kinmajsi totlajtlakoluan niman komontlajkali kampa xok keman uelis kimitas. Yejuin tlaxelojli noijki ueliskia ijkin notlajtolkuepas: “Otikchiuj kentla xkeman nitlajtlakoskia”. Biblia techpaleuiya más kuajli matikajsikamatikan yejuin ika okse neskayotl tlen kijtoua Miqueas 7:18, 19 itech Traducción del Nuevo Mundo (xpoua). b Ompa kijtoua ika Jehová komontlajkali nochi totlajtlakoluan ipan mar kampa melak uejkatlan. Yeuejkaui, tla itlaj onuetsiya ipan mar, xok ueliya tijkixtis.
“Tikomintlajkali mokuitlapan nochi notlajtlakoluan” (Is. 38:17, TNM).
“Tejua tikomintlajkalis intlajtlakoluan kampa tlauejkatlan ipan mar” (Miq. 7:19, TNM).
8. ¿Tlenon yotiuelkej hasta aman?
8 Ika yejuin neskayomej tlen yotikomontakej, yotiuelkej ika ijkuak Jehová techtlapojpoluiya, kimitki totlajtlakoluan niman ijkon xok titlamamajtoskej. Melauak tlen okijto David: “Sanoyej tlatiochijtin on yejuan Dios yokintlapojpoluilij nochi on tlen xkuajli okichijkej niman kipopoloua intlajtlakol. Sanoyej tlatiochijtli on tlakatl akin toTEKO xkitlajtlakolmaka ipampa itlajtlakoluan” (Rom. 4:6-8). ¡Yejon yemelak tetlapojpoluilistli!
JEHOVÁ KINPOPOLOUA TOTLAJTLAKOLUAN
9. ¿Katlejua neskayomej kintekitiltia Jehová para techititis kenijki techtlapojpoluiya?
9 Matikimitakan okseki neskayomej itech Biblia para tikajsikamatiskej kenijki ipampa tlaxtlauijli, Jehová kinpopoloua intlajtlakoluan akin noyolkuepaj. Biblia kijtoua ika Jehová kinpaka niman kinchipaua tlajtlakoltin, niman ijkon kichipaua akin tlajtlakole (Sal. 51:7; Is. 4:4; Jer. 33:8). Jehová techijlia tlenon panoua ijkuak ijkin kichiua: “Xuajlakan, ma tikitakan ken tikchiuaskej para tikixtiskej in tlen xkuajli. Maski nemoyojlo sanoyej ijtlakauki ipampa nemotlajtlakoluan, nejua nemechchipauas niman nemechkauas istak ken itlaj nieve. Maski xueli kisa on nemotlajtlakol kenon tlapajli yejuan sanoyej tekoltik ika chichiltik yejuan sanoyej tekuik, nejua nemechistalis ken iichkayo borrego” (Is. 1:18). Ijkuak tiktsojkuilotiaj se tlakentli ika tlapajli tlen sajnoye tekoltik ika chichiltik, melak ouijtika tijkixtilis. Ika yejuin neskayotl Jehová techijlijtika ika yejua uelis kuajli kinkixtis totlajtlakoluan niman nion xok nesiskej.
“Maski nemoyojlo sanoyej ijtlakauki ipampa nemotlajtlakoluan, nejua nemechchipauas niman nemechkauas istak ken itlaj nieve” (Is. 1:18).
10. ¿Katlejua okse neskayotl kitekitiltia Jehová para techajsikamachiltis kenijki techtlapojpoluiya?
10 Ipan okse tlamachtijli, otikitakej ika totlajtlakoluan yeskiaj ken itlaj tlen tikteuikiliaj (Mat. 18:32-35). Kuakon, ijkuak titlajtlakouaj ixpan Jehová, kentla más totlaneuiyaj niman más ueyi tikuikiliaj. San ika, ijkuak yejua techtlapojpoluiya, yejua kentla kipopoloskia nochi tlen tikuikiliaj niman xok noneki tiktlaxtlauiliskej. Kuakon, yejua xtechchiualtia matikintlaxtlauilikan totlajtlakoluan tlen yotechintlapojpoluili. ¡Melak techyolseuiya ika Jehová kuajli techtlapojpoluiya!
“Maka xnechtlaxtlauili tlen tinechuikiliaya” (Mat. 18:32).
11. ¿Tlenon kijtosneki ijkuak ipan Biblia kijtoua ika Jehová kinpopoloua totlajtlakoluan? (Hechos 3:19).
11 Jehová kuajli kinpopoloua nochi totlajtlakoluan, yejua xsan kijtoua ika xok itlaj tikuikiliaj (xpoua Hechos 3:19). Yejuin kanaj techtlanemililtia itech se tlanemakaketl akin kijkuilojtiuj kech kuikiliaj akin kintlanemakiltia, niman ijkuak kitlaxtlauiliaj, kitlalilia se raya. San ika, maski kitlalilia raya, ok nesij números. Más kuajli yeskia tla kuajli kinpopoloskia números ken yeuejkaui nochiuaya. Yeuejkaui, tlajkuilouayaj ika se tlapajli tlen kichijchiuayaj ika tekojli, goma niman atl. Kuakon, xouijtika kipopolouayaj ika se ichkatl tlen patstik tlen kijkuilouayaj. Yejua ika, ijkuak kipopolouayaj tlen yakaj kiteuikiliaya, kuajli popoliuiyaj números niman xok yakaj ueliya kitaya tlen ompa ijkuiliujtoya, yeskia kentla tla xkeman kinotlaneuiskiaj. ¡Melak tiktlasojkamachiliaj Jehová ika ijkuak techtlapojpoluiya, kuajli kinpopoloua totlajtlakoluan! (Sal. 51:9).
“Nemotlajtlakol popoliuis” (Hech. 3:19).
12. ¿Tlenon tiuelij itech on ueyi moxtli tlen Jehová okijto ipan se neskayotl?
12 Ipan amoxtli Isaías, Jehová kitekitiltia okse neskayotl para techijlis tlenon kinchiuilia totlajtlakoluan, ompa kijtoua: “Nejua nikchiuas maka sa manesi tlen xkuajli yotikchiuj, kentla tla niktlapachoskia ika se moxtli, niman motlajtlakoluan kentla nikintlapachoskia ika se ueyi moxtli” (Is. 44:22, TNM). Ijkuak Jehová techtlapojpoluiya, kentla kintlapachoskia totlajtlakoluan ika se ueyi moxtli niman ijkon maka yakaj makimita totlajtlakoluan.
“Nejua nikchiuas maka sa manesikan tlen xkuajli yotikchiuj, kentla tla nikintlapachoskia ika se moxtli” (Is. 44:22, TNM).
13. ¿Kenijki timomachilia ijkuak tikmati ika Jehová mitstlapojpoluiya?
13 ¿Tlenon techmachtiaj nochi yejuin neskayomej? Ijkuak Jehová techtlapojpoluiya, xnoneki totlajtlakoltijtoskej ipampa totlajtlakoluan. Iyesyo Jesucristo yokintlaxtlauj totlajtlakoluan, ika yejon, tejuamej xok noneki titlatlaxtlauaskej. Totlajtlakoluan kuajli yokinpopolojkej, yeskia kentla tla xkeman titlajtlakoskiaj. Ijkuak toyolkuepaj intech totlajtlakoluan, Jehová melauak techtlapojpoluiya.
JEHOVÁ KINEKTOK OKSEJPA IUAN MATOUIKAKAN
Ueli touikaj iuan toTajtsin pampa yejua techtlapojpoluiya. (Xkita párrafo 14).
14. ¿Tleka uelis kuajli tikmatstoskej ika Jehová kuajli techtlapojpoluiya? (Noijki xkimita tlaixkopinaltin).
14 Ijkuak Jehová techtlapojpoluiya, uelis kuajli tikmatstoskej ika oksejpa kuajli iuan touikaj. Pampa tikmatij yejuin, techpaleuiya maka matotlajtlakoltijtokan niman maka matomojtijtokan tla Jehová techtlauelitstos noso san kitejtemojtos kemanon itlaj techchiuilis. ¡Yejon xkeman panos! ¿Tleka ijkon tikijtouaj? Pampa yejua ijkin okijli teotlajtojketl Jeremías: “Nejua niktlapojpoluis tlen xkuajli okichiuj niman xok nikilnamikis itlajtlakol” (Jer. 31:34, TNM). Apóstol Pablo okiteneuj yejuin tlaxelojli ijkuak okijto: “Xkaman oksejpa nikelnamikis intlajtlakoluan” (Heb. 8:12). ¿Tlenon kijtosneki yejuin?
“Xok nikilnamikis itlajtlakol” (Jer. 31:34, TNM).
15. ¿Tlenon kijtosneki Jehová ijkuak kijtoua ika xkimilnamikis totlajtlakoluan?
15 Ipan Biblia, tlajtojli tikilnamikis, xnochipa kijtosneki tikilnamikis tlen yeuejkaui opanok, kemantika kijtosneki itlaj tikchiuas. Para más tikajsikamatiskej, matontlanemilikan itech yejon xkuajli tlakatl akin okipilojkej inakastlan Jesús. Ijkuak pilkatoya, okijli Jesús makilnamiki ijkuak peuaskia tekiuajtis (Luc. 23:42, 43). San ika, yejon tlakatl xkijlijtoya Jesús makilnamiki ipan yejon tonajli, yej kijlijtoya itlaj makichiua ipampa. Niman Jesús okajsikamachilti ika kiyolitiskia. Kuakon, ijkuak Jehová kijtoua ika xok kimilnamikis totlajtlakoluan, kijtosneki ika xtlaj techchiuilis ipampa totlajtlakoluan. Noijki, pampa yotechtlapojpolui, xkeman techixkoijlis.
16. Ijkon ken kijtoua Biblia, ¿kenijki tomachiliaj ijkuak Jehová techtlapojpoluiya?
16 Matikitakan okse neskayotl tlen kiteneua Biblia tlen techpaleuiya matikajsikamatikan kenijki tomachiliaj ijkuak Jehová techtlapojpoluiya. Pampa tinochimej titlajtlakolejkej, uelis tikijtoskej ika titlakeualtin itech on tlajtlakojli, san ika, ijkuak Jehová techtlapojpoluiya, kentla kikotonaskia tlen ika tisalijtokej niman ijkon techmanauiya itech on tlajtlakojli (Rom. 6:17, 18; Apoc. 1:5). Ijkuak tikmatij ika Jehová techtlapojpoluiya, melak tiyolpakij ijkon ken yolpaki se tlakeuajli ijkuak kimakauaj.
“Omechmanauij itech on tlajtlakojli” (Rom. 6:18).
17. ¿Tleka uelis tikijtoskej ika ijkuak Jehová techtlapojpoluiya kentla tla techpajtiskia? (Isaías 53:5).
17 (Xpoua Isaías 53:5). Matikitakan sa ika tlami neskayotl. Biblia kijtoua ika tlajtlakojli yeskia ken se ueyi kokolistli tlen temikti. Ijkuak titlajtlakouaj, xok touikaj iuan toTajtsin. San ika, Jehová yotechpajti itechkopa imikilis isenteKonetsin, niman yejon kichiua oksejpa iuan matouikakan (1 Ped. 2:24). Ijkuak yakaj melak kualo niman pajti, melak yolpaki. Noijki ijkon, tejuamej melak tiyolpakij ijkuak Jehová techtlapojpoluiya niman oksejpa kuajli iuan touikaj.
“On nekokojli yejuan okipix, tejuamej ika otipajtikej” (Is. 53:5).
KENIJKI TECHPALEUIYA PAMPA JEHOVÁ TECHTLAPOJPOLUIYA
18. ¿Tlenon yotechmachtijkej neskayomej itech itlapojpoluilis Jehová? (Noijki xkita recuadro “Ken techtlapojpoluiya Jehová”).
18 Aman ika yotikimitakej nochi yejuin neskayomej, ¿tlenon yotiuelkej itech itlapojpoluilis Jehová? Ika ijkuak yejua techtlapojpoluiya, totlajtlakoluan kuajli popoliuij niman xkeman techixkoijlis. Yejon kichiua kuajli matouikakan iuan toTajtsin. Aman tej, Jehová xtechtlapojpoluiya tla pampa technamiki, yej pampa melak techiknelia niman techtlasojtla (Rom. 3:24).
![Tlaixkopinaltin itech neskayomej tlen onoitakej ipan yejuin tlamachtijli. Miyek tlaixkopinaltin: Kimitki totlajtlakoluan. 1. “Xnechintlapojpoluili [noso “xkinmajkokui”, “xkimitki”] ”: Se matli kajkokui se ueyi costal tlen melak yetik tlen kimamajtiaya se tokniuj. 2. “Ijkon ken uejka ikisayan tonaltsintli hasta kampa ikalakiyan”: Kalaki tonaltsintli. 3. “Tikomintlajkali mokuitlapan nochi notlajtlakoluan”: Se ueyi costal tlen melak yetik kontlajkalij ikuitlapan itrono Jehová. 4. “Tejua tikomintlajkalis intlajtlakoluan kampa tlauejkatlan ipan mar”: Se ueyi costal tlen melak yetik yopolak ipan mar. Miyek tlaixkopinaltin: Kinpopoloua totlajtlakoluan. 1. “Maski nemoyojlo sanoyej ijtlakauki ipampa nemotlajtlakoluan, nejua nemechchipauas niman nemechkauas istak ken itlaj nieve”: Se tokniuj siuatl kinakijtika ikoton istak niman kita ika yotsojkuiliuj ika tlapajli uan tekochichiltik. Sakin, tokniuj oksejpa kinakiya ikoton, san ika, xok tlapalyo. 2. “Maka xnechtlaxtlauili tlen tinechuikiliaya”. Seki matin kitlajkotsayanaj se amatl chika se tokniuj kijtojtika tlen kimachilia. 3. “Para nemotlajtlakol popoliuis”: Se matli kipopolojtika ika ichkatl tlen ijkuiliujtika ipan se amatl. 4. “Nejua nikchiuas maka sa manesikan tlen xkuajli yotikchiuj, kentla tla nikintlapachoskia ika se moxtli”: Moxtli tlen melak tilauak. Miyek tlaixkopinaltin: Jehová oksejpa kinektok iuan matouikakan. 1. “Xok nikilnamikis itlajtlakol”: Se tokniuj ajkotlachixtok. 2. “Omechmanauij itech on tlajtlakojli”: Seki matin kikotonaj se cadena. 3. “On nekokojli yejuan okipix, tejuamej ika otipajtikej”: Jesús pilkatika ipan kojtli melaktik. Ipan okse tlaixkopinajli nesi se tokniuj kichiua teoyotl ipan se parque.](https://assetsnffrgf-a.akamaihd.net/assets/m/2025291/NHG/wpub/2025291_NHG_cnt_12_xs.jpg)
19. a) ¿Tlenon melak tiktlasojkamatij? (Romanos 4:8). b) ¿Tlenon tikitaskej ipan okse tlamachtijli?
19 (Xpoua Romanos 4:8). Melak tiktlasojkamatij ika itech Jehová “onka melauak tetlapojpoluilistli” (Sl. 130:4, TNM). San ika, tla tiknekij matechtlapojpolui Jehová, noijki noneki matitetlapojpoluikan pampa tla xijkon tikchiuaj, ueliskia panos ijkon ken okijto Jesús: “Tla xnenkintlapopoluiyaj oksekimej, nemoTajtsin noijki xmechtlapopoluis” (Mat. 6:14, 15). Kuakon, noneki matitetlapojpoluikan ijkon ken Jehová. Ipan okse tlamachtijli tikitaskej kenijki uelis ijkon tikchiuaskej.
TLAKUIKAJLI 46 Timitstlasojkamachiliaj Jehová
a Ika hebreo notekitiltiaj seki tlajtoltin tlen kiteajsikamachiltiaj ika san Jehová ueli melauak tetlapojpoluiya. Ipan miyek Biblias tlen yonotlajtolkuepkej xkiteajsikamachiltiaj yejuin.
b Miqueas 7:18, 19: “18 Xakaj nemi se toTajtsin ijkon ken tejua, akin tetlapopoluiya niman xsan nochipa kilnamiktok ken nopopolouaj akin okinkouj. Xnochipa kualantos, pampa yejua kiyolpaktia tetlasojtlas niman xtekauas. 19 Oksejpa techiknelis; kintlanis totlajtlakoluan. Tejua tikomintlajkalis intlajtlakoluan kampa tlauejkatlan ipan mar”.
