Mary iuan iueuentsin John a chantij ipan se país kampa miyekej akin ualeuaj Filipinas ompa ontekitij niman yejuamej kinnojnotsaj. Ijkuak panotoya kokolistli COVID-19, Mary opeuj kinmachtia miyekej tlaltikpakchanejkej niman xsan ipan yejon país, noijki akin chantiyaj ipan okseki países. ¿Kenijki okichiuj yejon?

Mary ijkin kintlajtoltiaya akin kinmachtiaya: “¿Tikixmati yakaj akin kuelitaskia nomachtis Biblia?”. Tla yejuamej kijtouayaj ika kema, kimijliaya tla ueliskia kimixmatis. Pampa ijkin kintlajtoltiaya, melak kuajli okisato. ¿Tleka? Pampa tlaltikpaktlakamej akin kipatiojkaitaj iTlajtol toTajtsin kinekij kimijliskej inchanejkauan niman akin imiuan nouikaj tlen uelij. Matikitakan tlenon okichiuj Mary.

Se akin kimachtiaya Mary, akin itoka Jasmin, okichiuj makimixmati nauimej akin kinekiyaj nomachtiskej Biblia. Se de yejuamej itoka Kristine, yejua melak kuelitaya nomachtis Biblia hasta okitlajtlan makimachtikan okpa ipan se semana. Ijkuak Mary okitlajtolti tla kimixmatiya sekimej akin kuelitaskiaj nomachtiskej Biblia, Kristine ijkin okinankili: “Kema, nikimijlis sekimej akin imiuan ninouika mamitsixmatikan”. San opanokej seki semanas, Kristine okichiuj ika Mary makimixmati nauimej itlasojkaikniuan akin kinekiyaj nomachtiskej Biblia. Sakin Kristine okichiuj ika Mary makimixmati oksekimej tlaltikpakchanejkej akin noijki kinekiyaj nomachtiskej, niman sekimej de yejon tlaltikpakchanejkej noijki ijkon okichiujkej.

Sakin ika Kristine yokichiujka ika Mary makimixmati akin imiuan nouika, noijki kinekiya makimixmati ichanejkauan para manomachtikan Biblia. Kuakon, okijli ichpoch, Andrea. Kachtopa Andrea ijkin kinemiliaya: “Iteixpantijkauan Jehová se religión tlen melak tlamantik. Yejuamej xtlaneltokaj itech Jesús niman san kitekitiltiaj Antiguo Testamento”. Sakin ika onomachti, okitak ika xijkon ken yejua kinemiliaya. Ijkuak kimachtiayaj, yejua ijkin kijtouaya: “Tla Biblia ijkon kijtoua, ¡kuakon melauak!”.

Sakin, Andrea okichiuj ika omemej akin imiuan nouika niman se akin iuan tekiti makixmatikan Mary, niman noijki opeuj nomachtiaj Biblia. Noijki, ijkuak Andrea nomachtiaya Biblia, itía Angela, akin xueli tlachia, ompa tlakaktoya. Se tonajli, Angela okijli Andrea ika kinekiya kixmatis Mary pampa noijki kinekiya nomachtis Biblia. Angela melak okuelitak tlen onomachti, hasta xeajsiya se metstli, yejua yokintsontekontlalijka miyek tlaxeloltin itech Biblia. Niman hasta okijto ika kinekiya makimachtikan nakpa ipan se semana. Niman pampa Andrea okipaleui, Angela opeuj kinkaki tlanechikoltin ipan videoconferencia.

 Ijkuak Kristine nomachtiaya, iueuentsin, Joshua, ompa nisiuj ontlakaktoya. Ijkuak Mary okitak, okitlajtolti tla kuelitaskia imiuan nomachtis Biblia. Yejua ijkin okinankili: “Maski, san ika, san nitlakakis. Maka itlaj xnechtlajtolti, tla amo tej, nias”. Hasta xepanouaya 5 minutos, Joshua melak miyek yotetlajtoltijka xijkon ken Kristine niman hasta yokijtojka ika kinekiya nomachtis Biblia.

Pampa Mary ijkon tetlajtoltiaya, miyekej tlaltikpakchanejkej opeujkej nomachtiaj Biblia. Yejua okitak kenijki uelis kichiuilis para sekimej akin kinmachtiaya, manomachtikan imiuan sekimej tokniuan. ¡Ika nochi, 28 tlaltikpakchanejkej itech naui países opeuj nomachtiaj Biblia iuan Mary!

Jasmin, akin kachtopa opeuj kimachtiaj, onoapolakti ipan abril de 2021. Kristine onoapolakti ipan mayo de 2022 niman aman oksejpa chanti Filipinas iuan ichanejkauan. Oksekimej omemej akin Kristine okichiuj makixmatikan Mary, noijki onoapolaktijkej. Seki metstin sakin, onoapolakti Angela niman aman precursora regular. Niman iueuentsin Kristine, Joshua, niman ichpoch, Andrea niman oksekimej akin noijki onomachtijkej Biblia iuan Mary kuajli nomachtijtokej.

Ipan itonaluan Jesús niman apóstoles, miyekej kimijliayaj inchanejkauan niman intlasojkaikniuan tlen ueliyaj itech Jesús (Juan 1:​41, 42a; Hech. 10:​24, 27, 48; 16:​25-33). ¿Tleka xtikintlajtoltia akin tikinmachtia niman oksekimej akin kinekij nomachtiskej iTlajtol toTajtsin tla kixmatij yakaj akin kuelitaskia nomachtis Biblia? Tla ijkin titetlajtoltia, uelis miyekej peuas tikinmachtis.