1. ¿Tlenon okichiuj Jehová sakin ika Adán niman Eva otlajtlakojkej? (Génesis 3:15).

 SAKIN ika Adán niman Eva otlajtlakojkej, Jehová okimijli inkoneuan ika kichiuaskia itlaj inpampa. Niman tlen okimijli tiknextiaj ipan Génesis 3:15 (xpoua).

2. ¿Tleka melak ueyi kijtosneki teotlajtojli tlen onka ipan Génesis 3:15?

² Yejuin se teotlajtojli tlen kachtopa onoijto ipan Biblia. Niman melak ueyi kijtosneki. ¿Tleka ijkon tikijtouaj? Pampa nochi Biblia tlajtoua itech Génesis 3:15. Niman nochi libros tlen kinpiya Biblia notlajtolnamikij iuan yejuin teotlajtojli. ¿Niman itech tlenon tlajtoua yejuin teotlajtojli? Kijtoua ika toTajtsin kuajtitlanis akin techuajmakixtis niman ijkon kipopolos Diablo niman akin kitekichiuiliaj. * Ijkuak tlamis nochiuas yejuin teotlajtojli, nochimej itekipanojkauan Jehová melak yolpakiskej.

3. ¿Tlenon tiknankiliskej ipan yejuin tlamachtijli?

³ Ipan yejuin tlamachtijli tiknankiliskej: ¿akinomej kinteneua teotlajtojli tlen onka ipan Génesis 3:15?, ¿kenon uajnochiujtiuj yejuin teotlajtojli? niman ¿kenon techpaleuiya?

4. ¿Akinon on “kouatl”, niman kenon tikmatij?

⁴ Ipan Génesis 3:14, 15 noteneua se “kouatl”, iuejkakoneuan yejon “kouatl”, se “siuatl” niman iuejkakoneuan yejon “siuatl”. Niman Biblia techijlia akinomej. * Kachtopa matitlajtokan itech “kouatl”. Yejuin “kouatl” xueliskia yeskia se yolki pampa xkasikamatiskia tlen Jehová okijli ipan xochitlalpan Edén, ka, yejon “kouatl” melak tlamachilise. Kuakon, ¿akinon yejon “kouatl”? Biblia kijtoua ipan Apocalipsis 12:9 ika “on kouatl yejuan desde yeuejkaui nemi, itoka diablo noso Satanás”. ¿Niman akinomej iuejkakoneuan?

5. ¿Akinomej iuejkakoneuan “kouatl”?

⁵ Ijkuak Biblia kitekitiltia tlajtojli iuejkakoneuan tlajtojtika intech akin tlanemiliaj niman kichiuaj ijkon ken intaj. Kuakon, ¿akinomej iuejkakoneuan “kouatl”? Nochimej iluikaktekitkej niman tlaltikpakchanejkej akin kixnamikij Jehová niman ikalpan, ijkon ken kichiua Satanás. Ken iluikaktekitkej akin xokitlakamatkej toTajtsin ipan itonaluan Noé niman tlaltikpakchanejkej akin kichiuaj ken intaj, Diablo (Gén. 6:1, 2; Juan 8:44; 1 Juan 5:19; Jud. 6).

6. ¿Tleka tikijtouaj ika Eva xyejua on “siuatl” akin noteneua ipan Génesis 3:15?

⁶ Aman tej, ¿akinon on “siuatl” akin noteneua ipan Génesis 3:15? ¿Kanaj noteneujtoya Eva? Ka. Pampa teotlajtojli kijtoua ika iuejkakoneuan yejon “siuatl” kikuapatlachoskiaj yejon “kouatl”. Niman ken yotikitakej, yejon “kouatl” se xkuajli iluikaktekitketl akin melak kojtik, Satanás. Kuakon, se iuejkakoneuj Eva, akin tlajtlakole, xueliskia  kitlanis Satanás. ¿Akinon ueliskia kitlanis Satanás?

7. ¿Kenon techpaleuiya Apocalipsis 12:1, 2, 5, 10 matikmatikan akinon yejon “siuatl” akin noteneua ipan Génesis 3:15?

⁷ Apocalipsis techijlia akinon yejon “siuatl” akin noteneua ipan Génesis 3:15 (xpoua Apocalipsis 12:1, 2, 5, 10). Yejuin “siuatl” xse tlaltikpakchane, xkipiya itlalnakayo nion iomiyouan. Ikxitlan yejuin “siuatl” onka metstli niman kimantika se corona tlen kipiya 12 sitlalimej. Noijki kinemitia se konetsintli, niman yejon konetsintli kineskayotia iTekiuajyo toTajtsin. Yejon Tekiuajyotl onka iluikak, ika yejon, uelis tikijtoskej ika yejon “siuatl” noijki nemi iluikak. Kuakon, ¿akinon on “siuatl”? Ikalpan toTajtsin tlen onka iluikak, kampa nemij nochimej iluikaktekitkej akin melajkanemij itech Jehová (Gál. 4:26).

8. ¿Akinon kachtopa onochiuj iuejkakoneuj yejon “siuatl”, niman kemanon opanok? (Génesis 22:15-18)

⁸ Biblia noijki techijlia akinon kachtopa onochiuj iuejkakoneuj yejon “siuatl”. Se teotlajtojli techijlia ika iuejkakoneuj ualeuaskia itech Abrahán (xpoua Génesis 22:15-18). Niman ijkon onochiuj pampa Jesús ompa oualeuj (Luc. 3:23, 34). San ika, iuejkakoneuj yejon “siuatl” xnonekiya yes se tlaltikpakchane pampa nonekiya kikuapatlachos Satanás niman kipopolos. Kuakon, ¿tleka tikijtouaj ika Jesús yejua teuejkakoneuj? Pampa ijkuak Jesús kipiaya kanaj 30 xiuitl, Jehová okitlapejpeni ika iespíritu santo niman ijkon onochiuj iKoneuj. Ijkuakon, yejua akin kachtopa onochiuj iuejkakoneuj yejon “siuatl” (Gál. 3:16). Sakin ika omik niman oyoliuj, toTajtsin okimakak “ueyilistli niman tetlakaitalistli” niman “nochi tekiuajyotl” para tekiuajtis “ne iluikak niman nikan ipan in tlaltikpaktli”. Noijki okinauati makipopolo nochi tlen kichiua Diablo (Heb. 2:7; Mat. 28:18; 1 Juan 3:8).

9, 10. a) ¿Akinomej noijki nochiuaj iuejkakoneuan “siuatl”, niman kenon nochiuaj iuejkakoneuan? b) ¿Aman tlenon tikitaskej?

⁹ San ika, Biblia kijtoua ika yejuin “siuatl” kinpiyaskia oksekimej iuejkakoneuan. Apóstol Pablo okijto akinomej ijkuak ijkin okimijli tokniuan tlapejpeniltin: “Tla nenteyaxkauan itech Cristo, tla ijkon, nentekoneuan itech Abraham, niman iuan Abraham nenkiseliskej on herencia yejuan Dios okitlalij ipan ipromesa” (Gál. 3:28, 29). Ijkuak Jehová kitlapejpenia se tokniuj ika iespíritu santo, nochiua iuejkakoneuj yejon “siuatl”. Kuakon, Jesucristo niman 144,000 akin iuan tekiuajtiskej, yejuamej iuejkakoneuan “siuatl” (Apoc. 14:1). Yejuamej nokojtiliaj tlanemiliskej niman kichiuaskej ijkon ken inTaj, Jehová.

¹⁰ Yotikitakej akinomej noteneuaj ipan Génesis 3:15. Aman matikitakan tlenon yokichiuj Jehová para manochiua tlen okijto ipan yejon teotlajtojli niman sakin tikitaskej kenon techpaleuiya.

11. ¿Kenon okikxikokojkej iuejkakoneuj “siuatl”?

¹¹ Génesis 3:15 kijtoua ika “kouatl” kikxikokoskia iuejkakoneuj “siuatl”. ¿Niman yejon kemanon onochiuj? Ijkuak Satanás okichiuj ika judíos niman romanos makimiktikan iKoneuj toTajtsin (Luc. 23:13, 20-24, TNM). Ijkuak yakaj nokxikokoua xueli nejnemi seki tonaltin. Noijki ijkon, ijkuak Jesús okimiktijkej kentla okikxikokojkej niman yeyi tonajli xitlaj ouel okichiuj pampa nemiya ipan itlalkon (Mat. 16:21).

12. ¿Kemanon niman kenon kikuapatlachoskej “kouatl”?

 ¹² Génesis 3:15 kijtoua ika iuejkakoneuj “siuatl” kikuapatlachoskia “kouatl”. Kuakon, Jesús xueliskia nokauaskia ijtik itlalkon, nonekiya pajtis kampa okikxikokojkej. Niman kema opajtik pampa ika yeyi tonajli Jesús oyoliuj ken se iluikaktekitketl akin xok keman ueli miki. Niman ijkuak toTajtsin kijtos, Jesús kikuapatlachos Satanás niman kipopolos (Heb. 2:14). Yejon 144,000 kipaleuiskej Jesucristo ijkuak kinpopoloskej itlauelikniuan toTajtsin nikan ipan tlaltikpaktli, iuejkakoneuan “kouatl” (Apoc. 17:14; 20:4, 10). *

13. ¿Kenon techpaleuiya pampa youajnochiujtia Génesis 3:15?

¹³ Tla tejua yotimosentemakak itech toTajtsin, kuakon, imitspaleuijtika yejuin teotlajtojli. Ijkuak Jesús ouajla ipan tlaltikpaktli ken se tlaltikpakchane, okiteititi kenon iTaj (Juan 14:9). Ika yejon, aman tejuamej itikixmatij Jehová niman ueli tiktlasojtlaj. Jesús noijki yotechpaleui pampa yotechmachti niman pampa kuajli kinyekantika tlanechikoltin. Noijki yotechmachti kenon tikyolpaktiskej Jehová. Niman ijkuak Satanás okikxikoko Jesús, noso ijkuak omik, hasta aman techpaleuiya. Pampa ijkuak oyoliuj, okitemakak iyesyotsin para matexchipauilikan “nochi totlajtlakoluan” (1 Juan 1:7).

14. ¿Kenon tikmatij ika tlen okijto Jehová ipan xochitlalpan Edén xnimantsin nochiuaskia?

¹⁴ Tlen okijto Jehová ipan xochitlalpan Edén techititia ika xnimantsin nochiuaskia yejon teotlajtojli. Nonekiya tiempo niman ijkon “siuatl” makinpiya iuejkakoneuan niman noijki para Diablo makinsentlali akin kipaleuiskej. Niman noijki nonekiya tiempo para yejuin ome grupo manotlauelitakan. Tla tejuamej kuajli tikasikamatij yejuin teotlajtojli, melak techpaleuis. ¿Tleka? Pampa ijkon tikmatij ika Satanás kintlauelitaskia itekipanojkauan Jehová. Niman Jesús noijki ijkon okimijli inomachtijkauan, okimijli ika kintlauelitaskiaj (Mar. 13:13; Juan 17:14). Niman ikipiya 100 xiuitl ika yotikitakej kenon uajnochiujtiuj yejuin teotlajtojli. ¿Tleka ijkon tikijtouaj?

15. a) ¿Tleka aman miyekej melak techtlauelitaj? b) ¿Tleka xnoneki tikmakasiskej Satanás?

¹⁵ Jesús onochiuj tekiuaj ipan 1914 niman okuajtlajkal Satanás ipan yejuin tlaltikpaktli. Aman Diablo sa ueli tlayekana nikan ipan tlaltikpaktli niman pampa kimatstika ika sa achijtsin poliui para kipopoloskej, melak kintlaueltoka itekipanojkauan toTajtsin (Apoc. 12:9, 12, 13, 17). Ika yejon, aman miyekej techtlauelitaj. San ika, xnoneki tikmakasiskej Satanás niman akin kipaleuiyaj. Matikijtokan ken apóstol Pablo, yejua okijto: “Tla Dios kipiya iyojlo para techpaleuis, ¿akinon uelis techixnamikis?” (Rom. 8:31). Kuakon, uelis más titlaneltokaskej itech Jehová pampa yotikitakej kenon uajnochiujtiuj teotlajtojli tlen onka ipan Génesis 3:15.

16-18. ¿Kenon yokinpaleui Curtis, Ursula, niman Jessica pampa yokasikamatkej Génesis 3:15?

¹⁶ Tlen Jehová okijto ipan Génesis 3:15 techpaleuiya matitlaxikokan ijkuak tikixnamikij tlen ouijtika. Curtis, se tokniuj akin tlapaleuiya ken misionero ne Guam, kijtoua: “Kemantika nikixnamiki tlen ouijtika niman nikmachiliani ika xuelis nimelajkanemis itech Jehová. San ika, ijkuak nitlanemilia itech tlen kijtoua Génesis 3:15 nechpaleuiya  más manitlaneltoka itech Jehová”. Curtis sa kinektika mayejko yejon tonajli ijkuak Jehová kipopolos nochi tlen techtlajyouiltia.

¹⁷ Tokniuj Ursula, akin chanti Baviera (Alemania), kijtoua ika ijkuak kuajli okasikamat tlen kijtoua Génesis 3:15, más okineltokak ika Biblia iTlajtol toTajtsin. Ursula noijki melak okimojkatlachialti ijkuak okitak ika nochi teotlajtoltin notlajtolnamikij ika tlen kijtoua Génesis 3:15. Yejua kijtoua: “Ijkuak onikitak kenon Jehová nimantsin itlaj okichiuj niman ijkon techmakas se tlamachialistli, onechpaleui más maniktlasojtla”.

¹⁸ Tokniuj Jessica, akin chanti Micronesia, kijtoua: “Xueli nikilkaua kenon oniyolpak ijkuak oniknexti tlen melauak. ¡Inochiujtoya teotlajtojli tlen onka ipan Génesis 3:15! Pampa yonikasikamat yejuin teotlajtojli, yonechpaleui manikita ika Jehová xkinekiya matichantikan ijkon ken aman tichantij. Niman yejuin teotlajtojli nechpaleuiya manikasikamati ika tla niktekichiuilia Jehová, yejua nechpaleuis kuajli maninemi aman niman ika tlayekapan”.

19. ¿Tleka tikmatstokej ika nochiuas nochi tlen kijtoua Génesis 3:15?

¹⁹ Yotikitakej kenon youajnochiujtia tlen kijtoua Génesis 3:15. Aman itikmatij akinomej iuejkakoneuan “siuatl” niman akinomej iuejkakoneuan “kouatl”. Jesús, akin kachtopa onochiuj iuejkakoneuj “siuatl”, yopajtik kampa okikxikokojkej niman aman itekiuajtitika ne iluikak niman xok keman uelis mikis. Aman Jehová itlantok kintlapejpenia akin noijki yeskej iuejkakoneuan “siuatl”. Yotikitakej ika yonochiuj seki tlen kijtoua yejuin teotlajtojli niman kuajli matikmatstokan ika kema nochiuas tlen poliui: ¡kikuapatlachoskej “kouatl”! Ijkuak kipopoloskej Satanás, nochimej tlaltikpakchanejkej akin melajkanemiskej itech Jehová melak yolpakiskej. Ika yejon, maka matosiaujkauakan. Kuajli matikmatstokan ika toTajtsin, itechkopa iuejkakoneuj “siuatl”, kinteochiuas “nochi naciones ipan in tlaltikpaktli” (Gén. 22:18).