1. Itech tlen kijtoua 3 Juan 3, 4, ¿tlenon melak techyolpaktia?

MATIKONNEMILIKAN kenon melak oyolpak apóstol Juan ijkuak okitekakili ika akin okinpaleuijka makixmatikan tlen melauak ok kitekichiuilijtoyaj Jehová. Apóstol Juan kimitaya yejuin tokniuan kentla ikoneuan. Pampa melak miyek tlen kixnamiktoyaj, melak onokojtili kinchikauilis intlaneltokil. Tejuamej noijki melak tiyolpakij ijkuak tokoneuan noso akin tikinmachtiaj nosentemakaj itech Jehová niman xkikajkauaj ika kitekichiuiliaj (xpoua 3 Juan 3, 4).

2. ¿Tleka Juan okimijkuilo yeyi iamatlajkuiloluan?

² Ipan xiuitl 98, Juan kanaj chantiya Éfeso noso ompa ika nisiuj. Achto ompa onchantis, yejua tsauktoya ipan se isla tlen itoka Patmos. Ijkuakon, iespíritu santo Jehová okipaleui apóstol Juan makimijkuilo yeyi amatlajkuiloltin. Juan okimijkuilo yejuin amatlajkuiloltin pampa kinekiya kinyolchikauas tokniuan nochipa matlaneltokakan itech Jesús niman nochipa manemikan ipan tlen melauak.

3. ¿Tlenon tiknankiliskej ipan yejuin tlamachtijli?

³ Ipan yejon tonaltin, nochi apóstoles yomijkaj, san Juan yonokaujka. Niman yejua najmanaya pampa yokalajkaj ipan tlanechikojli akin temachtiayaj tlen xmelauak (1 Juan 2:18, 19, 26). * Yejuin tlakamej akin temachtiayaj tlen xmelauak kijtouayaj ika kixmatstoyaj toTajtsin, san ika, nion xkitlakamatiyaj. Ipan yejuin tlamachtijli, titlajtoskej itech tlen Juan okijkuilo ipan iamatlajkuiloluan niman tikinnankiliskej yeyi tlajtoltilistin: ¿Tlenon kijtosneki nochipa tinemis ipan tlen melauak? ¿Tlenon tikixnamikij? niman ¿tlenon techpaleuis nochipa matinemikan ipan tlen melauak?

4. Itech tlen kijtoua 1 Juan 2:3-6 niman 2 Juan 4, 6, ¿tlenon noneki tikchiuaskej niman ijkon nochipa tinemiskej ipan tlen melauak?

⁴ Tla tiknekij nochipa tinemiskej ipan tlen melauak, kachtopa noneki tikixmatiskej tlen melauak, tlen onka ipan iTlajtol toTajtsin, Biblia. Noijki, noneki tikintlakamatiskej itlanauatiluan Jehová (xpoua 1 Juan 2:3-6; 2 Juan 4, 6). Jesús nochipa okitlakamat Jehová. Kuakon, tla tiknekij tiktlakamatiskej Jehová, noneki nochipa tokojtiliskej tikchiuaskej ijkon ken Jesús (Juan 8:29; 1 Ped. 2:21).

5. ¿Tlenon noneki kuajli tikneltokaskej?

⁵ Tla tiknekij nochipa tinemiskej ipan tlen melauak, noneki kuajli tikneltokaskej ika Jehová nochipa kijtoua tlen melauak niman ika nochi tlen ijkuiliujtika ipan iTlajtol noijki melauak. Niman noneki tikneltokaskej ika Jesús yejua Mesías akin yonoijtoka uajlaskia. Ipan yejuin tonaltin, miyekej xkineltokaj ika Jesús okitlapejpenijkej yejua matlayekana ipan iTekiuajyo toTajtsin. Juan okijto ika nemiyaj “miyekej tlakajkayajkej”, akin ueliskiaj kinkajkayauaskej akin xmás kuajli kineltokayaj tlen melauak itech Jehová niman Jesús (2 Juan 7-11). Juan okijkuilo: “¿Akinon tlakajkayajketl? Kuajli tikmatstokej ika tlakajkayajketl on yejuan kijtoua ika Jesús xejua Cristo” (1 Juan 2:22). Xakaj uelis techkajkayauas tla tomachtiaj iTlajtol toTajtsin. San ijkin uelis tikixmatiskej Jehová niman Jesús (Juan 17:3). Niman san yejuin techpaleuis kuajli matikmatstokan ika tinemij ipan tlen melauak.

6. ¿Tlenon kixnamikij nochimej telpokamej akin kitekichiuiliaj Jehová?

⁶ Tinochimej akin tiktekichiuiliaj Jehová noneki totlajpiyaskej maka tikneltokaskej tlen tlaltikpakchanejkej temachtiaj (1 Juan 2:26). Niman noneki más notlajpiyaskej tokniuan telpokamej. Alexia, * se tokniuj akin kipiya 25 xiuitl niman ualeua Francia, kijtoua: “Ijkuak ninemiya ipan escuela, nechmachtiayaj itech evolución niman tlen ixtlamatkej kinemiliaj. Yejuin okichiuj maniknemili ika tlen nikneltokaya itech Jehová xmelauak katka. Kemantika nikuelkakiya tlen nechmachtiayaj. San ika, noijki oniknemili ika xkuajli yeskia tla nochi nikneltokaya tlen nechititiayaj ipan escuela niman nion xnikitaya tlen kijtouaya Biblia”. Alexia opeuj nomachtia amoxtli La vida... ¿cómo se presentó aquí? ¿Por evolución, o por  creación? San ipan seki semanas, Alexia xok ometlamatiya. Yejua kijtoua: “San no nejua onikasikamat ika Biblia kipiya tlen melauak. Niman kuajli onikasikamat ika tla nikchiuaya tlen toTajtsin technauatia, nipakiskia niman ninemiskia ika yolseuilistli”.

7. ¿Itech tlenon noneki totlajpiyaskej, niman tleka?

⁷ Tinochimej akin tiktekichiuiliaj Jehová, maski tla titelpokamej noso itiuejueyimej, noneki tokojtiliskej maka ichtaka tikchiuaskej tlen xkuajli. Juan okijto ika xkuajli “tla tikijtouaj ika tinemij san sekan iuan Dios niman sanken titlajtlakouaj” (1 Juan 1:6). Tla tiknekij tikyolpaktiskej toTajtsin ipan yejuin tonaltin niman ika tlayekapan, noneki nochipa tikilnamikiskej ika Jehová kita tlen tikchiuaj. Maski kanaj miyekej xkitaj tlen yakaj san kiichtakachiua, toTajtsin kema nochi ueli kita (Heb. 4:13).

8. ¿Tlenon xnoneki tikchiuaskej?

⁸ Noijki noneki totlajpiyaskej maka ijkon titlanemiliskej ken akin xkitekichiuiliaj Jehová, yejuamej kijtouaj ika xtlajtlakojli tla xtikintlakamatij itlanauatiluan toTajtsin. Apóstol Juan okijkuilo: “Tla tikijtouaj xtitlajtlakolejkej, sano tejuamej titokajkayauaj, niman xtikijtouaj on tlen melauak” (1 Juan 1:8). Ipan itonaluan Juan, akin temachtiayaj tlen xmelauak kijtouayaj ika se uelis nouikas iuan toTajtsin maski kichiujtinemi tlen xkuajli. Aman, miyekej noijki ijkon tlanemiliaj. Kijtouaj ika tlaneltokaj itech toTajtsin, san ika, yejuamej kitaj ika xtlajtlakojli tlen toTajtsin kita ika tlajtlakojli. Xkuelitaj tlen kijtoua Jehová itech sexo. Kimatstokej ika onka seki tlemach tlen Jehová kijtoua ika tlajtlakojli, san ika, yejuamej kijtouaj ika tla yakaj kiyolpaktia kichiuas yejon, uelis kichiuas.

9. ¿Kenon kinpaleuis telpokamej tla nochipa kitlakamatij tlen youelkej itech Biblia?

⁹ Telpokamej akin kitekichiuiliaj Jehová noneki nokojtiliskej xtlanemiliskej ken miyekej akin imiuan nomachtiaj niman akin imiuan tekitij. Matitlanemilikan itech tlen okijto  se tokniuj akin itoka Aleksandar. Yejua kijtoua: “Sekimej ichpokamej kinekiyaj nexchiualtiskej imiuan maninoteka. Nechijliayaj ika kanaj nikinuelitaya tlakamej pampa xnikpiaya nonovia”. Tejua, telpochtli, kanaj noijki yejon tikixnamiktika. San ika, xkilnamiki ika melak kuajli tinemis tla nochipa tiktlakamati tlen yotiuel itech Biblia, xsan timopijpinaujtis, xtikualos, xsan timajmantos niman nochipa kuajli timouikas iuan Jehová. Niman ijkuak más tikinxikos tlatlatalistin, más xouijtika tikitas tikchiuas tlen kineki Jehová. Maka xkilkaua ika Satanás kixnamiki tlen kijtoua Jehová itech sexo niman kineki maka xtlakamati toTajtsin. Ijkuak tejua timokojtilia xtitlanemilis ijkon ken akin xkitekichiuiliaj Jehová, tiktlani Satanás (1 Juan 2:14).

10. ¿Kenon techpaleuiya 1 Juan 1:9 matiktekichiuilikan Jehová ika toyojlo niman maka san matotlajtlakoltijtokan?

¹⁰ Kuajli tikmatstokej ika san Jehová kinamiki kijtos tlenon tlajtlakojli niman tlenon xtlajtlakojli. Niman tejuamej tokojtiliaj xtikchiuaskej tlen tikmatij ika tlajtlakojli. San ika, ijkuak titlajtlakouaj, tikijliaj Jehová tlen xkuajli yotikchiujkej (xpoua 1 Juan 1:9). Niman, tla otikchiujkej se ueyi tlajtlakojli, tikimijliaj tlayekankej pampa Jehová yokintekitlali matechtlajpiyakan (Sant. 5:14-16). Aman tej, xnoneki san nochipa totlajtlakoltijtoskej ipampa tlen otikchiujkej yeuejkaui. ¿Tleka xnoneki ijkon tikchiuaskej? Pampa Jehová techtlasojtla niman okitemakak iKoneuj niman ijkon uelis techtlapopoluis. Ijkuak Jehová kijtoua ika kintlapopoluis nochimej akin noyolkuepaj, yejua kema kintlapopoluiya. Kuakon, uelis tiktekichiuiliskej Jehová ika toyojlo niman xsan totlajtlakoltijtoskej (1 Juan 2:1, 2, 12; 3:19, 20).

11. ¿Kenon uelis totlajpiyaskej itech tlen xmelauak kijtouaj itech ikalpan Jehová?

¹¹ Noijki noneki totlajpiyaskej itech tlen xmelauak kijtouaj itech ikalpan Jehová. Desde yeuejkaui, Diablo yokiyejyeko kinkajkayauas nochimej tokniuan akin yolmelajkanemij. Ika yejon, ijkuak itlaj tijkakiskej, melak  noneki kuajli matikitakan tla yejon melauak noso xmelauak. * Akin techtlauelitaj uelis techtlajtolchijchiuiliskej niman kinkuiskej Internet niman redes sociales niman ijkon kichiuaskej maka ok matitlaneltokakan itech Jehová niman maka ok matikintlasojtlakan tokniuan. Maka matikinkakikan yejon tlakajkayaualistin, pampa ualeuaj itech Satanás (1 Juan 4:1, 6; Apoc. 12:9).

12. ¿Tleka noneki chikauak tikpiyaskej totlaneltokil?

¹² Tla xtiknekij matechkajkayaua Satanás, noneki más titlaneltokaskej itech Jesús niman tikneltokaskej ika Jehová yokimakak se ueyi tekitl. Noijki noneki titlaneltokaskej itech “tekitketl” yolmelauak niman tlamachilise, akin Jehová yokitekitlali makiyekana ikalpan (Mat. 24:45-47). Tla mojmostla tomachtiaj Biblia, chikauak tikpiyaskej totlaneltokil niman yes ken se kojtli tlen melak uejkatlan kipiya ineluayouan. Pablo okiteneuj yejuin ijkuak okomintlajkuilouili colosenses, yejua okijto: “Ijkon ken nemejuamej onenkiselijkej Cristo Jesús para nemoTEKO, no xnemikan san sekan iuan. Yejua ipan xpiyakan nemoneluayo ken on kojtli noneluayotia ipan tlajli. Niman yejua ipan xmokits[k]ikan ken on tepantli nokits[k]ia ipan on cimiento. Niman más xmokojtilikan ipan nemotlaneltok” (Col. 2:6, 7). Tla ijkin chikauak tikpiyaj totlaneltokil, nion Satanás nion akin kichiuaj ken yejua xueliskej kiyemaniliskej totlaneltokil (2 Juan 8, 9).

13. ¿Tlenon tikmatstokej akin tikchiuaj ken Cristo, niman tleka?

¹³ Akin tikchiuaj ken Cristo tikmatstokej ika miyekej techtlauelitaskej (1 Juan 3:13). Juan techilnamiktia ika “on diablo ipan ima kimpiya nochimej on tlakamej de in tlaltikpaktli” (1 Juan 5:19). Sa achijtsin poliui ijkuak Jehová kipopolos nochi tlen xkuajli ipan tlaltikpaktli, ika yejon, Satanás melak kualantika (Apoc. 12:12). Satanás kineki matijkauakan Jehová, kineki matiauilnemikan niman matikneltokakan tlen xmelauak kijtouaj itech ikalpan toTajtsin. San ika, xsan yejon, yejua noijki techtlaueltoka. Yejua kimatstika ika sa achijtsin poliui ijkuak kipopoloskej, yejua ika, chikauak tekititika niman ijkon maka ok matitenojnotsakan niman maka matitlaneltokakan itech Jehová. Xtechmojkatlachialtia ika ipan seki países xok kinkauiliaj tokniuan matikueyichiuakan Jehová. Maski ijkon, tokniuan ok tlaxikojtokej. Yejuamej kuajli kiteititiaj ika, maski san tlenon texchiuilis Diablo, xkeman tijkauaskej Jehová.

14. ¿Kenon tikinpaleuiyaj tokniuan nochipa manemikan ipan tlen melauak?

¹⁴ Uelis tikinpaleuiskej tokniuan nochipa manemikan ipan tlen melauak tla tejuamej tikimikneliaj (1 Juan 3:10, 11, 16-18). Noneki tikintlasojtlaskej tokniuan ijkuak yejuamej kuajli nemiskej niman noijki ijkuak kixnamikiskej tlen ouijtika. ¿Tikixmatstokej se tokniuj akin yonomijkati niman noneki makiyolseuikan noso makipaleuikan? ¿Yotiktekakilijkej ika noneki noyektlaliskej seki Kaltin kampa tosentlaliaj noso inkaluan tokniuan pampa itlaj otlaixpolo kampa chantij? Tejuamej yemelak tikintlasojtlaj tokniuan niman tikimikneliaj, xsan tikijtouaj ika ijkon tikchiuaj, tejuamej tikimititiaj.

15. Itech tlen kijtoua 1 Juan 4:7, 8, ¿tlenon noneki tikchiuaskej?

¹⁵ Ijkuak totlasojtlaj se iuan okse, tikchiuaj ken toTajtsin akin melak tetlasojtla (xpoua 1 Juan 4:7, 8). Tikteititiaj ika titetlasojtlaj ijkuak tikintlapopoluiyaj oksekimej. Tla titetlasojtlaj, tiktlapopoluiskej akin techyolkokoua niman tikilkauaskej tlen otexchiuili (Col. 3:13). Matikitakan tlenon ipan onochiuj se tokniuj  akin itoka Aldo. Yejua melak onajman ijkuak okikak ika se tokniuj akin melak kitlakaitaya xkuajli otlajto itech ikalpan. Aldo kijtoua: “Miyekpa oniktlajtlanili Jehová manechpaleui maka niktlauelitas yejon tokniuj”. San ika, xsan yejon okichiuj, yejua noijki okijli tla ueliskia iuan ontenojnotsas. Ijkuak tenojnotstinemiyaj, Aldo okijli tokniuj kenon nomachiliaya. Aldo kijtoua: “Ijkuak tokniuj okasikamat ika onechyolkokojka, onechtlajtlanili maniktlapopolui. Niman ijkuak tonojnotstoyaj, kakistiya ika yemelak xkinekiya nechyolkokos. Ototlapopoluijkej niman otikilkaujkej tlen opanok”.

16, 17. ¿Tlenon yotikijtokej tikchiuaskej?

¹⁶ Apóstol Juan okimijkuilo yeyi amatlajkuiloltin kampa kuajli nesi ika melak kintlasojtlaya tokniuan niman ika kinekiya chikauak makipiyakan intlaneltokil. Melak techyolchikaua tikmatiskej ika yejon tlakamej niman siuamej, akin yaskej iluikak niman ijkon tekiuajtiskej iuan Jesús, noijki melak tetlasojtlaj ijkon ken Juan (1 Juan 2:27).

¹⁷ Maka matikilkauakan tlen yotomachtijkej. Nochipa matinemikan ipan tlen melauak niman nochipa matiktlakamatikan Jehová. Matomachtikan iTlajtol niman matikneltokakan tlen ompa kijtoua. Más matitlaneltokakan itech Jesús. Matotlajpiyakan maka titlanemiliskej ken akin xkitekichiuiliaj Jehová niman maka matikinkakikan akin xkuajli tlajtouaj itech ikalpan. Matokojtilikan maka tikchiuaskej se tlajtlakojli noso san ichtaka tikchiuaskej tlen xkuajli. Nochipa matiktlakamatikan tlen Jehová techijlia. Noijki matikintlapopoluikan tokniuan ijkuak techyolkokoskej niman matikinpaleuikan ijkuak itlaj kixnamikiskej. Tla ijkon tikchiuaj, maski san katlejua tlauejli tikixnamikiskej, nochipa tinemiskej ipan tlen melauak.