TLAJTOUA ITECH INEMILIS
San yonikchiuj tlen nonekiya nikchiuas
DONALD RIDLEY, katka se abogado akin okinpaleui iteixpantijkauan Jehová ipan tribunales. Ijkon okichiuj ipantsin treinta xiuitl. Melak otepaleui manasikamati ika akin kualoj uelis kijtoskej ika xkinekij makintlalilikan yestli, noijki okinpaleui iteixpantijkauan Jehová matetlanikan ixpan tribunales ipan seki estados tlen onka Estados Unidos. Iamigos kixmatiyaj ken Don. Niman yejuin tokniuj melak tekitki katka, yolyemanki katka niman nochipa kinektoya tepaleuis.
Ipan 2019, okijlikej Don ika kipiaya ipan itsontekon se kokolistli tlen xmás noixmati, niman noijki okijlikej ika xok ueliskia pajtis. Don más opeuj kualo niman omik ipan 16 de agosto de 2019. Matitlajtokan itech.
Oninemiko ipan 1954, ne Saint Paul (Minnesota). Nochanejkauan católicos katkaj. Nikinpiya naui nokniuan: se akin más iueyi niman yeyimej más pipitikej. Ijkuak nipitentsin katka, nonnomachtiaya teopan niman nikpaleuiaya teopixki, san ika, san achijtsin nikmatiya itech Biblia. Maski nikneltokaya ika nemiya se toTajtsin akin nochi okichijchiuj, xnikneltokaya tlen temachtiayaj ipan teopan.
NECHMACHTIAJ TLEN MELAUAK
Ijkuak kemach nikuikaya se xiuitl ika ninomachtijtoya ipan escuela Facultad de Derecho William Mitchell, iteixpantijkauan Jehová onechnojnotskej. Pampa nitlapaktoya, onechijlikej ika sakin nokuepaskiaj. Ijkuak ouajnokuepkej, onikintlajtolti: “¿Tleka más kuajli nemij akin kichiuaj tlen xkuajli?” niman “¿Tlenon noneki tikchiuaskej tla tiknekij tiyolpakiskej?”. Onechmakakej se libro tlen itoka La verdad que lleva a vida eterna niman Traducción del Nuevo Mundo de las Santas Escrituras, tlen xoxojki katka. Noijki oniknek manechmachtikan. Miyek tlen onikasikamat. Onechmojkatlachialti nikmatis ika san iTekiuajyo toTajtsin uelis kuajli techyekanas. Onikasikamat ika tekiuajkej xuelij tlayekanaj niman ika san yokichiujkej matitlajyouikan niman matikixnamikikan tlen xkuajli.
Oninosentemakak itech Jehová ipan 1982 niman oninoapolakti ipan yejon xiuitl ipan Asamblea de Distrito “Verdad del Reino” ipan estadio St. Paul Civic Center. Se semana sakin, oksejpa ompa oniaj niman ijkon nikchijchiuas se examen tlen nechpaleuiskia manitekiti ken abogado. Niman ipeujyan octubre onikmat ika kuajli onikchijchiujka noexamen niman ueliskia nitekitis ken abogado.
Ipan yejon ueyi tlanechikojli onikixmat Mike Richardson, akin tekitiya ipan Betel tlen onkatka Brooklyn (Nueva York). Onechijli ika kampa noyekanaj nochi sucursales onochijchiujka Oficina de Asuntos Legales. Kuakon onikilnamik tlen okijto eunuco etíope ipan Hechos 8:36 niman oninotlajtolti: “¿Tlenon nechteltia manitlapaleui ipan Oficina de Asuntos Legales?”. Kuakon, oniktemilti se solicitud niman ijkon nitlapaleuis Betel.
Notajuan xokuelitakej ika oninochiuj iteixpantijkauj Jehová. Notaj onechtlajtolti kenon nechpaleuiskia tla nitlapaleuiya Betel. Onikijli ika nejua niknekiya ompa nitlapaleuis niman ika nechmakaskiaj 75 dólares ipan se metstli, ijkon kinmakayaj yeuejkaui nochimej betelitas.
Xnimantsin ouel oniaj Betel pampa yopeujka nitekiti ipan se tribunal, kuakon, ipan 1984 oniaj Betel tlen onkatka Brooklyn. Onechijlikej manitlapaleui ipan Oficina de Asuntos Legales. Ompa más kuajli nitepaleuiskia pampa yonitekitka ipan se tribunal.
KIYEKTLALIAJ TEATRO STANLEY
Ken onkatka Teatro Stanley ijkuak okikoujkej.
Ipan noviembre de 1983, iteixpantijkauan Jehová okikoujkej Teatro Stanley, tlen onka Jersey City (Nueva Jersey). Tokniuan kinekiyaj kiyektlaliskej tlauijli niman atl ipan yejuin teatro, ika yejon, okintlajtoltijkej tekiuajkej tla kinkauiliskiaj ijkon kichiuaskej. Ijkuak onosentlalijkej imiuan tekiuajkej, tokniuan okiteijlikej ika iteixpantijkauan Jehová kinekiyaj kikuiskej yejon teatro niman ijkon ompa kinchiuaskej uejueyimej tlanechikoltin. San ika, tekiuajkej okijtokej ika onkatka se tlanauatijli kampa kijtouaya ika religiones xueliskiaj kinpiyaskej intlanechikoluan ipan centro de Jersey City. Kuakon, xokinkauilijkej matlayektlalikan. Sakin, tokniuan oksejpa okintlajtlanilijkej tekiuajkej makinkauilikan matlayektlalikan, san ika, oksejpa xokinejkej.
Ijkuak kemach onajsika Betel, tokniuan okiteijlitoj ipan tribunal federal de distrito ika tekiuajkej xkinkauiliayaj matlayektlalikan ipan Teatro Stanley. Pampa onitekitka ome xiuitl ipan tribunal federal de distrito de Saint Paul (Minnesota), nikmatstoya tlenon nochiuaya. Se toabogado okijto ika miyekpa yonokuika Teatro Stanley niman ijkon ompa kinpanoltiskej películas niman conciertos de rock. Kuakon, ¿tleka tekiuajkej xkinekiyaj ika se religión ompa manosentlali? Yejon okichiuj ika tribunal makijto ika Jersey City xkuajli tlen kichiujtoya pampa xtechkauilijtoya matikueyichiuakan toTajtsin. Kuakon okinnauati tekiuajkej matechkauilikan matitlayektlalikan. Ijkuakon onikitak kenon Jehová techpaleuiya ijkuak tikimijliaj tekiuajkej matechkauilikan matiktekichiuilikan toTajtsin. Melak nipakiya pampa nitepaleuiaya maski san achijtsin.
Tokniuan otlankej tlayektlaliaj ipan Teatro Stanley ijkuak nion xikajxiltiayaj se xiuitl. Ipan 8 de septiembre de 1985, tokniuan ompa onosentlalijkej ijkuak otlan iTlamachtil Galaad número 79. Ijkuakon, yejon teatro onoixmat ken Salón de Asambleas de Jersey City. Onikitak ika se ueyi tlateochiualistli ika ouel onitlapaleui ipampa iTekiuajyo toTajtsin imiuan oksekimej tokniuan. Yejuin melak onechyolpakti xijkon ken okse tekitl tlen oksekan ueliskia nikchiuaskia ken abogado. Xkeman oniknemili ika Jehová nechmakaskia okseki tekitl ken yejuin.
NITLAPALEUIYA MANASIKAMATI IKA SE UELIS KITLAPEJPENIS TLA KISELIS NOSO XKISELIS YESTLI
Itech 1980 ika tlayekapan, miyekej tlapajtikej niman hospitales xkitlakaitayaj tlen tokniuan kijtouayaj. Tokniuan kiteijliayaj maka makintlalilikan yestli, san ika, yejuamej xijkon kichiuayaj. Niman más ijkon kinchiuiliayaj akin koneuajkej katkaj, pampa jueces miyekpa kijtouayaj ika yejuamej xueliskiaj kijtoskej ika xkiseliskej yestli, pampa tla nantli mikiya, konetsintli xkipiyaskia inan.
Ipan 29 de diciembre de 1988, tokniuj Denise Nicoleau okipolo miyek yestli sakin ika okipix ikonetsin. Itlapajtijkauj kinekiya kitlalilis yestli pampa melak achijtsin hemoglobina kipiaya. San ika, yejua xokinek. Uajmostla, hospital okijli se juez matlanauati makitlalilikan yestli. Juez nimantsin otlanauati makitlalilikan yestli niman nion xokimijli tokniuj Denise nion iueuentsin.
Ipan viernes 30 de diciembre, tokniuj okitlalilijkej yestli maski iueuentsin niman ichanejkauan xkinekiyaj. Niman sakin, okintsajkej sekimej ichanejkauan niman sekimej tokniuan tlayekankej. Hospital okijto ika yejuamej okiyejyekojkej kinteltiskej akin ompa tekitiyaj niman ijkon maka makitlalilikan yestli tokniuj Denise. Ipan sábado 31 de diciembre ne Nueva York niman ompa nisiuj okijtokej ipan noticias ika tokniuan tsauktoyaj.
Ninemi iuan Philip Brumley ijkuak titelpokamej katkaj.
Otiajkej ipan okse tribunal tlen más ueyixtika, niman lunes ika kualkan onitlajtoto iuan juez Milton Mollen. Onikijli tlen opanok niman kuajli onikijli ika on okse juez san yejua otlanauatijka matetlalilikan yestli. Juez Mollen onechijli manipano kampa tekiti niman ijkon titlajtoskej itech tlen opanok niman tlenon ueliskia nochiuas. Oniaj iuan tokniuj Philip Brumley. Juez noijki okinots iabogado hospital. Melak otokamatlajtlankej. Niman tokniuj Brumley hasta onechijkuilouili ipan icuaderno: “San yolik xtlajto”. Oniktlasojkamat ika ijkon onechijli pampa melak yonikualanka, niknekiya niktlanis yejon abogado.
Itech toopochma ika toyekma: Richard Moake, Gregory Olds, Paul Polidoro, Philip Brumley, nejua niman Mario Moreno ijkuak otiajkej ipan Tribunal Supremo de Estados Unidos. Ompa otechtitlankej ijkuak tribunal kiyektlalijtoya yejon tlauejli tlen itoka katka Watchtower contra Stratton (Xkimita tlamachtiltin: “El origen del conflicto”, “El Tribunal Supremo admite el caso a trámite”, “El primer obstáculo: la vista oral ante el Tribunal Supremo” niman “El Tribunal Supremo falla a favor de la libertad de expresión”, itech ¡Despertad! del 8 de enero de 2003).
Otiuejkaujkej se hora imiuan tonojnotstoyaj niman juez Mollen otechijli ika uajmostla yejon tlen tribunal kachtopa kitaskia. Ijkuak itikistoyaj, juez okijto ika ouijtika katka ika iabogado hospital matechtlani. Onikmat ika Jehová nechijlitoya ika kema ueliskia titetlaniskej. Onechmojkatlachialti kenon Jehová techkuitoya niman ijkon manochiua tlen yejua kineki.
Melak otitlayouilijkej pampa tikitstoyaj tlenon tikijtoskiaj imixpan jueces. Tribunal xuejka onkatka itech Betel tlen onkatka Brooklyn, kuakon tokniuan akin noijki tekitiyaj ipan Oficina de Asuntos Legales san onejnenkej. Ijkuak on naui jueces otechkakej, okijtokej ika xnonekiya kitlaliliskej yestli tokniuj Denise. Tokniuan otetlankej pampa tribunal okijto ika xakaj uelis itlaj tlanauatis manochiua tla xkachtopa kikaki tlen kineki akin kualo, kuakon, tlapajtikej xnonekiya kitlaliliskej yestli.
Sakin, tribunal tlen más ueyixtika ipan Nueva York oksejpa okijto ika tokniuj Denise Nicoleau uelis kijtos tla xkineki makitlalilikan yestli. Naujpa onitlapaleui ipan tribunales kampa otikinpaleuijkej tokniuan maka makintlalilikan yestli (xkita recuadro “ Tlaueltin tlen onoyektlalijkej ipan tribunales tlen más uejueyixtokej”). Noijki yonitekit Betel imiuan oksekimej abogados kampa yotikitakej kenon uelis noyektlaliskej seki tlaueltin. Kemantika noneki noitas akinon kinamiki makintlajpiya kokonej ijkuak inchanejkauan kipiyaj tlauejli, tlenon noneki nochiuas ijkuak akin yononamiktijkej nokauaj, niman tlenon noneki nochiuas niman ijkon manotlakamati tlen kijtouaj tlanauatiltin itech tlaltin niman kaltin.
NINONAMIKTIA NIMAN NIKINPIYA NOCHANEJKAUAN
Iuan nosiuatsin, Dawn
Ijkuak onikixmat Dawn, kinpiaya yeyimej ikoneuan niman iueuentsin yokikaujka. Tekitiya niman precursora katka. Maski miyek tlen yokixnamijka, melak onechmojkatlachialti ika melak kuajli kitekichiuiliaya Jehová. Ipan 1992, otiajkej ipan Asamblea de Distrito “Portadores de Luz” ne Nueva York niman onikijli ika niknekiya nikixmatis. Opanok se xiuitl niman otonamiktijkej, niman nejua ok nikinpaleuiaya tokniuan akin nemiyaj Betel. Jehová onechtlayokoli se nosiuatsin akin melak kuelita kitekichiuilis niman akin melak yolpaktinemi. Ken kijtoua Proverbios 31:12, Dawn yonechmakak nochi tlen kuajli ipan nochi nonemilis.
Ijkuak otonamiktijkej, itelpokauan Dawn kipiayaj 11, 13 niman 16 xiuitl. Pampa niknekiya kuajli nikchiuas notekiyo ken tajtli, onikinpouj niman onikchiuj tlen kijtouayaj toamatlajkuiloluan itech kenon tikintlajpiyas motlakpakoneuan. Miyek tlen yotikixnamijkej, san ika, nechyolpaktia ika telpokamej nechitaj ken intaj akin kintlasojtla niman ken iminamigo. Nochipa kuajli tikinseliayaj iminamigos tokoneuan niman tikuelitayaj ika ompa nemiyaj.
Ipan 2013, Dawn niman nejua otichantitoj Wisconsin niman ijkon tikintlajpiyaskej totajuan. Melak onechmojkatlachialti pampa Betel onechijli tla ueliskia nikinpaleuis seki tonaltin, ijkon nikinpaleuis makimatikan tlenon uelis kichiuaskej ijkuak kipiyaskej se tlauejli imiuan tekiuajkej.
ITLAJ ONOPATLAK
Ipan septiembre de 2018, onikitak ika nochipa ijkuak niknekiya nitlajtos, kachtopa nonekiya melak ninakokoyekchiuas. Tlapajtiketl akin nochipa nechitaya xokimat tlenon nikpiaya. Sakin, okse tlapajtiketl onechijli manikitati se neurólogo. Ipan enero de 2019, neurólogo onechijli ika kanaj nikpiaya se kokolistli ipan notsontekon tlen xmiyekej kixmatij, yejuin kokolistli itoka parálisis supranuclear progresiva (PSP).
Yeyi tonajli sakin, ijkuak nikchiujtoya patinaje ipan hielo, oniuets niman onimatepostek. Ijkuakon onikitak ika notsontekon xok kuajli tekititoya pampa nejua nochipa nikchiuaya patinaje niman melak niueltoya. Yejuin kokolistli melak nechijtlakojtika pampa xok más kuajli nitlajtoua, xok más ueli ninouiyonia niman xok más ueli nitlatoloua.
Nechyolpaktia ika ouel onikpaleui ikalpan Jehová ika notekiyo ken abogado. Noijki nechyolpaktia ika onikimijkuilo miyek tlamachtiltin ipan revistas tlen ixtlamatkej kintekitiltiaj. Noijki miyekpa oniaj kampa tlapajtikej niman abogados nosentlaliaj niman nejua nikinnojnotsaya. Ipampa nochi yejuin, miyekej yokasikamatkej ika itekipanojkauan toTajtsin ueliskej kijtoskej ika xkinekij kiseliskej yestli ijkuak kinpajtiskej. Maski ijkon, ken kijtoua Lucas 17:10, san niitekipanojkauj toTajtsin niman xtlaj nechnamiki nikselis, san yonikchiuj tlen nonekiya nikchiuas.
