1. ¿Tlenon yokichiuj Jehová topampa?

¿KENON otochiujkej iteixpantijkauan Jehová? Kachtopa, yakaj otechnojnots itech Biblia kanaj totajuan, yakaj akin iuan titekitiyaj, yakaj akin iuan tiayaj escuela noso kanaj se tokniuj akin tenojnotstiaya techajchan (Mar. 13:10). Sakin, yakaj okikauj tiempo niman ijkon nochipa techonmachtis Biblia, niman pampa nochipa techonmachtiayaj opeuj tiktlasojtlaj Jehová niman otiuelkej ika yejua noijki techtlasojtla. Jehová otechuajuikak ipan ikalpan niman pampa aman itikchiuaj ijkon ken Cristo, uelis tikpiyaskej se nemilistli tlen xkeman tlamis (Juan 6:44). Melak tiktlasojkamachiliaj Jehová pampa okitekitilti se tokniuj para techmachtis tlen melauak niman pampa techkauilia matiktekichiuilikan.

2. ¿Tlenon tikitaskej ipan yejuin tlamachtijli?

² Aman ika itikixmatij tlen melauak noijki uelis tikinpaleuiskej oksekimej makipiyakan nemilistli tlen xkeman tlamis. Sekimej xouijtika kitaj tenojnotsaskej techajchan, san ika, kema ouijtika kitaj kinmachtiskej oksekimej. ¿Noijki ijkon topan nochiua? Tla kema, melak techpaleuis tlen tikitaskej ipan yejuin tlamachtijli. Tikitaskej tleka titemachtiaj niman tlenon uelis tikchiuaskej tla ouijtika tikitaj titemachtiskej. Kachtopa, tikitaskej tleka noneki titemachtiskej niman xsan titenojnotsaskej.

3. ¿Tleka titenojnotsaj?

³ Ijkuak Jesús nemiya nikan ipan tlaltikpaktli, okinnauati inomachtijkauan makichiuakan se tekitl tlen ojkan xeliujtok. Kachtopa, okimijli matenojnotsakan itech iTekiuajyo toTajtsin niman okimititi kenon kichiuaskiaj (Mat. 10:7; Luc. 8:1). Niman okimijli tlenon nonekiya kichiuaskiaj ijkuak kinkakiskiaj noso xkinkakiskiaj akin kinnojnotsayaj (Luc. 9:2-5). Jesús okijto ika “kuajli tlajtoltin itech Tekiuajyotl notenojnotsas ipan nochi tlaltikpaktli” (Mat. 24:14, TNM; Hech. 1:8). Maski tla kinkakiskiaj noso xkinkakiskiaj, nonekiya kinnojnotsaskej itech iTekiuajyo toTajtsin niman itech tlen kichiuas.

4. Ken kijtoua Mateo 28:18-20, ¿tlenon más noneki tikchiuaskej?

⁴ ¿Tlenon más okinnauati Jesús inomachtijkauan? Noijki, okimijli makinmachtikan oksekimej makitlakamatikan nochi tlen yejua yokinnauati. ¿Kijtosneki ika san tokniuan akin onenkej ipan kachtopa siglo nonekiya tenojnotsaskej niman temachtiskej? Ka. Pampa Jesús okijto ika yejuin tekitl nochiuaskia “hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli” (xpoua Mateo 28:18-20, TNM). * Nesi ika Jesús okijto yejuin ijkuak ononexti imixpan ipantsin 500 inomachtijkauan (1 Cor. 15:6). Ipan Apocalipsis 22:17 kijtoua ika Jesús okijli Juan ika kineki ika nochimej inomachtijkauan makinpaleuikan oksekimej makixmatikan Jehová.

5. Itech tlen apóstol Pablo okijto ipan 1 Corintios 3:6-9, ¿kentla tlenon tikchiujtoskiaj ijkuak titenojnotsaj niman titemachtiaj?

⁵ Apóstol Pablo okijto ika ijkuak titemachtiaj yeskia kentla titokaskiaj, ijkon okiteititi ika xsan nonekiya tikonxiniskej xinachtli. Yejuin tlen okimilnamikti tokniuan akin chantiyaj Corinto: “Nejua oniktokak on xinachtli ipan nemoyojlo, niman Apolos okatekij [...] niman nemejuamej sano ijki ken on tlajli yejuan Dios kitekiti” (xpoua 1 Corintios 3:6-9). Akin titekitij ipan “on tlajli yejuan Dios kitekiti” xsan tiktokaj on xinachtli, noijki tikatekiyaj niman kuajli tikitaj ken noskaltijtiuj (Juan 4:35). San ika, kuajli tikmatstokej ika toTajtsin kiskaltia yejon xinachtli.

6. ¿Tlenon kichiua akin temachtia?

⁶ Tikintejtemouaj akin yemelak kinekij kipiyaskej se nemilistli tlen xkeman tlamis (Hech. 13:48). Tla tiknekij ika yejuamej manochiuakan inomachtijkauan Cristo, noneki tikinpaleuiskej 1) makasikamatikan, 2) makineltokakan niman 3) makichiuakan tlen nomachtijtokej ipan Biblia (Juan 17:3; Col. 2:6, 7; 1 Tes. 2:13). Tinochimej uelis tikinpaleuiskej akin kinmachtiaj Biblia. ¿Kenon? Tla tikimititiaj ika tikintlasojtlaj niman kuajli tikinseliaj ijkuak yauej tlanechikojli (Juan 13:35). Kanaj akin temachtia noneki nokojtilis niman kikauas tiempo para kipaleuis akin kimachtia makikajkaua tlen xkuajli kichiua niman tlen kineltoka (2 Cor. 10:4, 5). Kanaj kemantika tiuejkauij miyek metstin para tikpaleuiskej manoapolakti akin tikmachtiaj, san ika, ijkuak xtosiaujkauaj melak tiyolpakij.

7. ¿Tleka titenojnotsaj niman titemachtiaj?

⁷ ¿Tleka titenojnotsaj niman titemachtiaj? Kachtopa, pampa tiktlasojtlaj Jehová. Ijkuak tokojtiliaj titenojnotsaskej niman titemachtiskej, tikteititiaj ika tiktlasojtlaj toTajtsin (1 Juan 5:3). San matikonnemilikan yejuin, pampa tiktlasojtlaj Jehová ouel titenojnotsaj techajchan, san ika, ijkuak otipeujkej, ouijtika otikitakej. Kanaj melak otomojtikej ijkuak otontenotskej ipan kachtopa kajli. San ika, ouel otikchiujkej pampa tikmatstokej ika Jesús yejon tlen kineki matikchiuakan. Kanaj aman xok ouijtika tikitaj titenojnotsaskej techajchan, san ika, kanaj tomojtiaj titemachtiskej. Tla tiktlajtlaniliaj Jehová matechpaleui maka matomojtikan niman matechyolchikaua para titemachtiskej, yejua techpaleuis.

8. Ken kijtoua Marcos 6:34, ¿tleka tiknektokej tikinmachtiskej tlaltikpakchanejkej?

⁸ Ika ome, titemachtiaj pampa tikintlasojtlaj tlaltikpakchanejkej. Se tonajli, Jesús iuan inomachtijkauan melak siaujtoyaj pampa chikauak yotenojnotskaj, ika yejon, okitejtemojkej kanon uelis noseuiskej. San ika, kampa oajsikej melak miyekej ompa kinchiatoyaj. Jesús sajnoye okimikneli niman opeuj “kinmachtia miyek tlajtlamach” (xpoua Marcos 6:34). ¿Tleka Jesús opeuj kinmachtia maski melak siaujtoya? Pampa okimasikamat akin ompa nemiyaj niman kinekiya kinpaleuis. Kimatstoya ika noyolkokojtoyaj niman ika kinekiyaj makinyolseuikan. Ipan yejuin tonaltin, miyekej akin nesi ika melak yolpaktokej noijki kinekij makinyolseuikan. Yejuamej “ken itlaj borregos yejuan xkipiyaj intlajpixkau”. Apóstol Pablo okijto ika yejuamej xkinyekana toTajtsin niman xkipiyaj tlamachialistli (Efes. 2:12). Niman yauej ipan “on ojtli tlen teuika ipan tlapopolouilistli” (Mat. 7:13, TNM). Tlaltikpakchanejkej akin tikinnojnotsaj noijki ijkon nemij. San ika, pampa tikintlasojtlaj tejuamej tikinpaleuiyaj. ¿Kenon? Ijkuak tikintlajtoltiaj tla kinekij nomachtiskej Biblia.

9. Ken kijtoua Filipenses 2:13, ¿kenon uelis techpaleuis Jehová?

⁹ Kemantika kanaj xtiknekij yakaj tikmachtiskej pampa tikmatij ika noneki tijkauaskej miyek tiempo. Tla ijkon tiknemiliaj, matikijlikan Jehová kenon tomachiliaj niman matiktlajtlanilikan matechpaleui matiknekikan titemachtiskej (xpoua Filipenses 2:13). Apóstol Juan kuajli otechijli ika toTajtsin technankilis ijkuak tiktlajtlaniliskej tlen yejua kuelita (1 Juan 5:14, 15). Kuakon, kuajli tikmatstokej ika Jehová techpaleuis matiknekikan tikinmachtiskej oksekimej itech Biblia.

10, 11. ¿Kanaj tleka xtipeuaj titemachtiaj?

¹⁰ Kuajli tikmatstokej ika melak noneki titemachtiskej. San ika, kemantika xueli tikchiuaj ijkon ken tikuelitaskiaj. Matikitakan seki tlen kemantika ouijtika tikitaj tikchiuaskej niman noijki tlenon techpaleuis maka ijkon matitlanemilikan.

¹¹ ¿Tiknemiliaj ika xuelis titemachtiskej pampa tikixnamiktokej itlaj tlen ouijtika? Tla tejuamej itiueuentsitsintin noso tikpiyaj se ueyi kokolistli, matiknemilikan tlen yotechmachti COVID-19: yotikitakej ika uelis titemachtiskej ipan teléfono noso internet. Kuakon, uelis titemachtiskej desde tochan. Niman xsan yejon, sekimej kinektokej nomachtiskej Biblia, san ika, xuelij nomachtiaj ijkuak tokniuan kinnojnotsaj. ¿Uelis tikinmachtiskej  ijkuak yejuamej uelij, kanaj ika kualkan noso ika tlayoua? Jesús ijkon okichiuj, yejua okimachti Nicodemo ika tlayoua (Juan 3:1, 2).

12. Tla tikmachiliaj ika xueli titemachtiaj pampa xmás tiuelij, ¿tlenon uelis techpaleuis?

¹² ¿Tiknemiliaj ika xuelis titemachtiskej pampa xmás tiuelij? Kanaj tiknemiliaj ika xmás tiuelij tlen kijtoua Biblia, ika yejon, xtipeuaj titemachtiaj. Tla ijkon titlanemiliaj, matikitakan tlen uelis techpaleuis. Kachtopa, Jehová kimati ika kema tiueliskej titemachtiskej (2 Cor. 3:5). Ika ome, Jesús, akin tlayekana “ne iluikak niman nikan ipan in tlaltikpaktli”, yotechnauati matitemachtikan (Mat. 28:18). Ika yeyi, xsan toselti tinemij. Ijkon ken Jesús, kuajli tikmatstokej ika Jehová noijki techpaleuis matikteijlikan tlen noneki (Juan 8:28, TNM; Juan 12:49). Noijki, uelis tikijliskej tokniuj akin kikixtia grupo ijkuak tontenojnotsaj, se precursor noso se tokniuj akin youejkauj temachtia matechpaleui matiknextikan akin tikmachtiskej. Tla tikinuikaj ijkuak ontemachtiaj, tikitaskej kenon uelis más titemachtiskej.

13. ¿Tleka noneki tiknektoskej tikpatlaskej ken titemachtiaj?

¹³ ¿Tiknemiliaj ika ouijtika tikpatlaskej ken titemachtiaj niman tlen ika titemachtiaj? Yonopatlak ken titemachtiaj. Aman tiktekitiltiaj libro ¡Nochipa uelis tiyolpakis!, yejuin amatlajkuilojli sejneka tiktekitiltiaj. Pampa noneki más tomachtiskej, más titlajtlajtoskej imiuan akin tikinmachtiaj, xok tikinpouaskej miyek párrafos niman noneki más tikintekitiltiskej videos niman aplicaciones, ijkon ken JW Library^®. Tla ouijtika tikitaj tikchiuaskej yejuin, uelis tikijliskej se tokniuj matechpaleui. Kemantika xueli tikpatlaj ken titemachtiaj pampa tiknemiliaj ika ijkon ken tikchiuaj más kuajli. San ika, tla tiktlajtlaniliaj Jehová niman tokniuan matechpaleuikan, xouijtika tikpatlaskej ken titemachtiaj niman melak tiyolpakiskej. Se precursor okijto ika tlen aman tiktekitiltiaj melak kipaleuiya akin kimachtiaj niman akin temachtia.

14. a) ¿Tlenon noneki tikilnamikiskej tla xtechkakij kampa titenojnotsaj? b) ¿Kenon techyolchikaua 1 Corintios 3:6, 7?

¹⁴ ¿Tiknemiliaj ika ouijtika tiknextiskej akin tikmachtiskej pampa kampa titenojnotsaj xtechkakisnekij? Kanaj kampa titenojnotsaj miyekej xtechkakisnekij niman kanaj hasta sekimej techtlauelitaj. ¿Tlenon uelis techpaleuis para maka matijkajkauakan ika titenojnotsaj? Matikilnamikikan ika nochi nopatla. Kanaj hasta akin tikinnojnotsaj uelis nimantsin nopatlaskej. Sekimej akin xkinekiyaj techkakiskej sakin kasikamatij ika noneki makinmachtikan Biblia (Mat. 5:3). Sekimej akin xkinekiyaj kinseliskej toamatlajkuiloluan, sakin opeujkej nomachtiaj Biblia. Noijki tikmatstokej ika Jehová yejua itlatki “on tlatoktli” (Mat. 9:38). Kineki nochipa matitokakan niman matitlaatekikan. San ika, “yejua kiskaltia” on xinachtli (1 Cor. 3:6, 7). Noijki, melak techyolchikaua tikmatiskej ika maski aman xakaj tikmachtiaj, Jehová techteochiua pampa tokojtiliaj tiktejtemoskej akin tikmachtiskej. Yejua xsan kitstika tla miyekej noso xmiyekej tikinmachtiaj. *

15. ¿Kenon nomachilia Jehová ijkuak se peua nomachtia niman kichiua tlen nomachtijtiuj?

¹⁵ Jehová melak yolpaki ijkuak yakaj peua nomachtia Biblia niman ijkuak yejua peua kintlajtlajtouilia oksekimej itech tlen nomachtia  (Prov. 23:15, 16). Jehová melak kiyolpaktia tlen aman kichiujtokej itekipanojkauan. Pampa maski ipan xiuitl 2020 opeuj se ueyi kokolistli, 7,705,765 okinmachtijkej itech Biblia niman 241,994 onosentemakakej itech Jehová niman onoapolaktijkej. Aman, yejuin tokniuan noijki kinmachtiskej oksekimej (Luc. 6:40). Ken tikitaj, ijkuak titenojnotsaj niman titemachtiaj, melak tikyolpaktiaj Jehová.

16. ¿Tlenon noneki tikchiuaskej?

¹⁶ Se noneki nokojtilis para kinmachtis oksekimej makitlasojtlakan Jehová. San ika, uelis tikchiuaskej pampa Jehová techpaleuiya. ¿Uelis tokojtiliskej tiktejtemoskej se akin uelis tikmachtiskej itech Biblia? Uelis tikimijliskej nochimej akin tikinnojnotsaj tla kinekij matikinmachtikan Biblia. Kanaj hasta techmojkatlachialtis ken technankiliskej. Kuajli matikmatstokan ika Jehová techteochiuas tla tejuamej tokojtiliaj.

17. ¿Kenon tomachiliskej tla peua titemachtiaj?

¹⁷ Melak techyolpaktia pampa Jehová techkauilia matitenojnotsakan niman matitemachtikan. Apóstol Pablo, akin okinpaleui miyekej akin chantiyaj Tesalónica manochiuakan inomachtijkauan Cristo okijto ken nomachiliaya: “¿Akinomej yes on yejuan inka tikpiyaskej totlamachalis, topakilis niman tocoronas yejuan techyolpaktis, tla xsano nemejuamej? Melauak nentopakilis yeskej ijkuak toTEKO uajnokuepas. On melauak ika nemejuamej nentoueyilis niman nentopakilis” (1 Tes. 2:19, 20; Hech. 17:1-4). Ipan yejuin tonaltin, miyekej tokniuan noijki ijkon yolpakij. Tokniuj Stéphanie, akin iuan iueuentsin yokinpaleuijkej miyekej manoapolaktikan, kijtoua: “Melak teyolpakti ijkuak tikinpaleuis oksekimej manosentemakakan itech Jehová”.