1, 2. ¿Kenon techpaleuiya ok matitlaxikojtokan tlen kijtoua Isaías 65:16, 17?

“¡XTLAXIKO!”, ijkon itoka katka ueyi tlanechikojli yeyi tonajli tlen onopanolti ipan xiuitl 2017. Ipan yejon ueyi tlanechikojli otikitakej kenon uelis tikxikoskej nochi tlen ouijtika. Yopanok naui xiuitl, niman ok nikan titlaxikojtokej.

² Kanaj aman titlajyouijtokej pampa yomik se tochanejkauj noso toamigo, pampa tikpiyaj se ueyi kokolistli, itiuejueyimej, yotlaixpoliuj, nochiua tlen xkuajli, techtlaueltokaj noso titlajyouiyaj ipampa COVID-19. ¿Xmelak ika tiknekiskiaj mapopoliujtiuetsi nochi tlen techtlajyouiltia? Kema. Niman kuajli tikmatstokej ika ajsis se tonajli ijkuak xok keman tikilnamikiskej nochi yejuin niman xok titlajyouiskej (xpoua Isaías 65:16, 17).

3. ¿Tlenon noneki tikchiuaskej, niman tleka?

³ Aman tikixnamikij tlen ouijtika niman ika tlayekapan kanaj noijki tikixnamikiskej itlaj tlen más ouijtika (Mat. 24:21). Yejua ika, matokojtilikan matikitakan kenon uelis más titlaxikoskej. Jesús okijto ika tla titlaxikouaj tikseliskej “on nemilistli yejuan para nochipa” (Luc. 21:19). Tla tikitaj kenon oksekimej kixikouaj tlen tejuamej tikixnamikij, melak techpaleuis matitlaxikokan.

4. ¿Tleka tikijtouaj ika Jehová yejua akin más yotlaxiko?

⁴ Jehová yejua akin más yotlaxiko. ¿Tleka ijkon tikijtouaj? Pampa ipan yejuin tlaltikpaktli, kampa Satanás tlayekantok, nochiujtok miyek tlen xkuajli. Jehová ueliskia nimantsin kipopolos nochi tlen techtlajyouiltia, san ika, xkichiua pampa xiajsi yejon tonajli (Rom. 9:22). Chika yejko yejon tonajli, yejua  ok tlaxikojtika. Matikitakan chiknaui tlemach tlen Jehová yokitlapejpeni kixikos.

5. ¿Tleka miyekej xkitlakaitaj itoka toTajtsin, niman kenon timomachilia ijkuak ijkon tikita?

⁵ Ijkuak kita kenon xkitlakaitaj itoka. Jehová kitlasojtla itokatsin niman kineki ika nochimej makitlakaitakan (Is. 42:8). San ika, ikipiya kanaj 6,000 xiuitl ika miyekej kuajtsojkuilotijtiuej itokatsin (Sal. 74:10, 18, 23). Nochi opeuj ipan xochitlalpan Edén, ijkuak Diablo (tlen kijtosneki “tetlajtolchijchiuilijketl”) okimijli Adán iuan Eva ika toTajtsin xkinkauiliaya mayolpakikan (Gén. 3:1-5). Desde ijkuakon, Satanás kualijtojtiuj ika Jehová xtechmaka nochi tlen techpoloua. Jesús melak najmanaya pampa kitaya ika miyekej xkitlakaitayaj itoka iTajtsin. Yejua ika, okimijli inomachtijkauan ika yejuin makijtokan ijkuak kichiuaskej teoyotl: “ToTajtsin akin tinemi ne iluikak, machipaui motoka” (Mat. 6:9, TNM).

6. ¿Tleka Jehová xnimantsin kiteititia ika san yejua kinamiki matlayekana?

⁶ Ijkuak kita kenon kijtouaj ika xkinamiki matlayekana. San Jehová kinamiki matlayekana ne iluikak niman nikan ipan tlaltikpaktli, niman xnemi okse tekiuaj akin melak kuajli matlayekana ijkon ken yejua (Apoc. 4:11). San ika, Diablo kinkajkayauasneki iluikaktekitkej niman tlaltikpakchanejkej, kineki makinemilikan ika toTajtsin xkinamiki matlayekana. Noneki tiempo niman ijkon noteititis ika tlen kijtoua Diablo, xmelauak. Pampa toTajtsin kineki ika tlaltikpakchanejkej san no yejuamej makitakan ika tla yejua xkinpaleuiya xuelis kuajli nemiskej, melak youejkauj yokitekauili ika san inselti manoyekanakan (Jer. 10:23). Pampa Jehová xnosiaujkaua, ajsis se tonajli ijkuak kuajli noteititis ika tlen kijtoua Diablo, xmelauak. Ipan yejon tonajli, kuajli noteititis ika san Jehová kinamiki matechyekana niman ika san iTekiuajyo uelis kichiuas matinemikan ika yolseuilistli ipan yejuin tlaltikpaktli.

7. ¿Akinomej yokixnamijkej Jehová, niman tlenon kinchiuilis?

⁷ Ijkuak kita kenon sekimej ikoneuan kixnamikij. Ijkuak Jehová okinchijchiuj iluikaktekitkej niman tlaltikpakchanejkej, yejuamej xkipiayaj tlajtlakojli. San ika, se iluikaktekitketl akin itoka Satanás (tlen kijtosneki “teixnamijketl”) okichiuj ika Adán niman Eva, akin noijki xtlajtlakolejkej katkaj, makixnamikikan Jehová. Oksekimej iluikaktekitkej niman tlaltikpakchanejkej noijki okixnamijkej toTajtsin (Jud. 6). Sakin, sekimej israelitas noijki okixnamijkej Jehová niman opeuj kinueyichiuaj oksekimej tajtsitsintin (Is. 63:8, 10). Yejua ika, Jehová melak onoyolkoko. San ika, yejua xnosiaujkaua niman tlaxikojtos hasta maajsi on tonajli ijkuak kinpopolos nochimej akin xkuajkualtin. Ijkuakon, itekipanojkauan akin itech yolmelajkanemij, akin aman noijki kixikojtokej nochi tlen xkuajli nochiujtok, ika inyojlo nemiskej.

8, 9. ¿Tlenon kijtouiliaj Jehová, niman kenon uelis tikteititiskej ika yejon xmelauak?

⁸ Ijkuak kita kenon Diablo uajtlakajkayaujtiuj. Satanás okijto ika Job niman oksekimej itekipanojkauan toTajtsin san kiueyichiuayaj Jehová ipampa tlen kinmakaya (Job 1:8-11; 2:3-5). Diablo hasta amanin ijkon kinuajchiuilijtiuj itekipanojkauan toTajtsin (Apoc. 12:10). Tejuamej uelis tikteititiskej ika xmelauak tlen kijtoua Satanás. ¿Kenon? Tla titlaxikouaj niman timelajkanemij itech Jehová pampa melauak tiktlasojtlaj. Tla tejuamej titlaxikouaj, Jehová techteochiuas ijkon ken okiteochiuj Job (Sant. 5:11).

 ⁹ Intechkopa tlayekankej itech tlaneltokiltin tlen xmelajkej, Satanás kijtoua ika Jehová yejua akin melak techtlajyouiltijtika. Niman, ijkuak miki se konetsintli, miyekej kijtouaj ika toTajtsin okuikak ne iluikak pampa kinekiya okse angelito. ¡Sajnoye xkuajli tlen kijtouiliaj Jehová! San ika, tejuamej tikmatstokej ika yejon xmelauak. Yejua ika, ijkuak tikpiyaj se ueyi kokolistli noso miki yakaj akin tiktlasojtlaj, xtiktlajtlakoltiaj toTajtsin. Tejuamej kuajli tikmatstokej ika ajsis se tonajli ijkuak kipopolos tlen techtlajyouiltia. Nochimej matikimijlikan ika Jehová techtlasojtla. Ijkon Jehová kiteititis ika xmelauak nochi tlen kijtouiliaj (Prov. 27:11).

10. ¿Tlenon techmachtia itech Jehová tlen kijtoua Salmo 22:23, 24?

¹⁰ Ijkuak kita kenon tlajyouiyaj itekipanojkauan. Jehová melak teiknelia. Yejua ika, kiyolkokoua ijkuak kita kenon itekipanojkauan tlajyouiyaj pampa kintlaueltokaj, kualoj noso noyolkokouaj inpampa intlajtlakoluan (xpoua Salmo 22:23, 24). Yejua kuajli techasikamati. Kineki kipopolos nochi tlen techtlajyouiltia, niman ijkon kichiuas (uelis tikitas Éxodo 3:7, 8; Isaías 63:9). Ajsis tonajli ijkuak toTajtsin “kimpopouilis nochi iminixayo, niman xok onyas mikilistli, nion chokistli, nion ajmantli, nion kokolistli” (Apoc. 21:4).

11. ¿Tlenon kimachilia Jehová ijkuak kimilnamiki itekipanojkauan akin yomijkej?

¹¹ Ijkuak kita kenon mikij iamigos. ¿Tlenon kimachilia Jehová ijkuak kimilnamiki itekipanojkauan akin yomijkej? ¡Yejua sa kinektika oksejpa kimitas! (Job 14:15). San matikonnemilikan kenon melak kitemoua iamigo, Abrahán (Sant. 2:23). Noso kenon kitemoua Moisés, akin melak kuajli iuan nonojnotsaya (Éx. 33:11). ¡Noso kenon sa kinektika kikakis David niman oksekimej salmistas akin  kualtsin kitlakuikiliayaj! (Sal. 104:33). Maski yejuin iamigos yomijkej, yejua xkimilkaua (Is. 49:15). Jehová kuajli kilnamiki kenon tlanemiliayaj niman tlenon kichiuayaj “pampa para yejua melauak nochimej kipiyaj nemilistli” (Luc. 20:38). Sa achijtsin poliui ijkuak oksejpa kinyolitis, oksejpa kinkakis inteoyouan niman oksejpa kiueyichiuaskej ken yejua kuelita. Tinochimej akin yomik se tochanejkauj noso yakaj akin tiktlasojtlaj, melak techyolchikaua yejuin.

12. ¿Tlenon melak kiyolkokoua Jehová?

¹² Ijkuak kita kenon tetlajyouiltiaj akin xkuajkualtin. Ijkuak Satanás okixnamik Jehová ipan xochitlalpan Edén, Jehová kuajli kimatstoya ika nochiuaskia tlen xkuajli. ToTajtsin kitlauelita nochi tlen xkuajli aman nochiujtika. Yejua kimiknelia akin xueli nomanauiyaj, ken akin iknotsitsintin niman siuakaualtsitsintin (Zac. 7:9, 10). Niman más noyolkokoua ijkuak kita kenon kintlajyouiltiaj niman kintsakuaj itekipanojkauan. Nochimej akin tlaxikojtokej, uelis kuajli kimatstoskej ika Jehová melak kintlasojtla.

13. ¿Tlenon yokitak Jehová ika miyekej kichiuaj, niman tlenon kinchiuilis?

¹³ Ijkuak kita kenon aman más miyekej auilnemij. Ijkuak toTajtsin okinchijchiuj tlaltikpakchanejkej, okichiuj mauelikan makichiuakan tlen kuajli ijkon ken yejua, san ika, Satanás kuelita techijtlakos. Ipan itonaluan Noé, “toTEKO okitak ika on tlakamej kichiuayaj nochi tlen sanoyej xkuajli [...]. Yejua ika, toTEKO onajman ika okinchijchiu on tlaltikpaktlakamej, niman sanoyej onoyolkokoj” (Gén. 6:5, 6, 11). Desde ijkuakon, más youajtlaijtlakaujtia. Diablo melak kuelita ijkuak sekimej auilnemij niman ijkuak se tlakatl noteka iuan okse tlakatl noso se siuatl noteka iuan okse siuatl (Efes. 4:18, 19). Niman más yolpaki ijkuak se itekipanojkauj Jehová kichiua se tlajtlakojli. ToTajtsin xnochipa kixikojtos yejuin, ajsis se tonajli ijkuak kinpopolos nochimej akin auilnemij.

14. ¿Tlenon kichiuilijtokej tlaltikpakchanejkej yejuin tlaltikpaktli niman yolkamej?

¹⁴ Ijkuak kita kenon kijtlakojtokej tlaltikpaktli. Tlaltikpakchanejkej san no yejuamej noijtlakouaj. San ika, xsan yejon, noijki xkitlajpixtokej tlaltikpaktli nion yolkamej, ijkon ken Jehová yokinnauatijka (Ecl. 8:9; Gén. 1:28). Sekimej ixtlamatkej kijtouaj ika seki xiujtin sakin, tlaltikpakchanejkej uelis kinpopoloskej se millón tlatlamantikej yolkamej. ¡Yejua ika, melak najmanaj yejuin ixtlamatkej! San ika, tejuamej melak tiyolpakij pampa Jehová yokijto ika kinpopolos nochimej akin kijtlakojtokej yejuin tlaltikpaktli niman kichiuas manokuepa se xochitlalpan (Apoc. 11:18; Is. 35:1).

15, 16. ¿Tlenon techpaleuis matitlaxikojtokan iuan Jehová? Xkijto se neskayotl.

¹⁵ Matitlanemilikan itech nochi tlen Jehová yokuajxikojtia (xkita recuadro “ Tlen Jehová kixikojtika”). Tla Jehová kinekiskia, ueliskia nimantsin kipopolos nochi tlen xkuajli. San ika, ¡melak yotechpaleui pampa xiijkon kichiua! San matontlanemilikan itech yejuin, sekimej tajtin kimijliaj ika ijkuak inkonetsin uajnemis melak kualos, tlajyouis niman xuejkauis nemis. Maski kimatij ika kixnamikiskej miyek tlen ouijtika, ijkuak uajnemi melak kitlasojtlaj. Pampa yejuin tajtin kitlasojtlaj inkonetsin, kixikouaj nochi tlen ouijtika niman nokojtiliaj kuajli kitlajpiyaskej.

¹⁶ Noijki ijkon, tejuamej tiuajnemij ijkon ken on konetsintli. Tiuajnemij ika tlajtlakojli pampa Adán niman Eva otechpanoltilijkej. Maski  ijkon, Jehová techtlasojtla niman techtlajpiya (1 Juan 4:19). Melauak, on tajtin akin otikominteneujkej xuelis itlaj kichiuaskej para kipaleuiskej inkonetsin, san ika, Jehová kema uelis techpaleuis. Yejua ikimatstok kemanon kipopolos nochi tlen kintlajyouiltia ikoneuan (Mat. 24:36). ¿Xmelak ika pampa techtlasojtla techyolchikaua ok matitlaxikojtokan?

17. ¿Kenon techyolchikaua matitlaxikojtokan tlen kijtoua Hebreos 12:2, 3?

¹⁷ Jehová kuajli techititia kenon titlaxikoskej. Niman Jesús noijki otlaxiko ijkon ken iTaj. Pampa Jesús techtlasojtla, ijkuak ouajlajka ipan tlaltikpaktli, otlaxiko maski okuijuikaltijkej, okipijpinaujtijkej niman okipilojkej ipan se kojtli melaktik (xpoua Hebreos 12:2, TNM; * Hebreos 12:3). Kuajli tikmatij ika Jesús otlaxiko pampa yokitaka kenon iTajtsin tlaxikoua. Tejuamej noijki uelis techpaleuis tlen kichiua.

18. ¿Kenon 2 Pedro 3:9 kuajli techititia ika melak tepaleui pampa Jehová tlaxikojtika?

¹⁸ (Xpoua 2 Pedro 3:9). Jehová kuajli kimatstika kemanon kinamiki kipopolos nochi tlen xkuajli nochiujtika. Pampa yejua xitlapopoloua, aman miyekej kitekichiuiliaj niman kiueyichiuaj. Yejuamej melak kitlasojkamachiliaj Jehová pampa yejua tlaxikojtika, yejon yokinpaleui makixmatikan, makitlasojtlakan niman itech manosentemakakan. Ijkuak tikseliskej nochi tlen toTajtsin yotechijli ika techmakas, kuajli nesis kenon melak otepaleui pampa yejua otlaxiko.

19. ¿Tlenon noneki tikchiuaskej, niman tlenon tikseliskej tla ijkon tikchiuaj?

¹⁹ Tlen kichiua Jehová techititia ika noneki titlaxikoskej niman tiyolpakiskej, pampa yejua xkikajkaua ika yolpaki maski kita kenon Satanás melak tetlajyouiltia (1 Tim. 1:11). Tinochimej matiyolpaktokan chika tikchiaj ijkuak Jehová kichipauas itoka, kiteititis ika san yejua kinamiki matlayekana niman ijkuak kipopolos tlen xkuajli niman nochi tlen techtlajyouiltia. Matokojtilikan titlaxikoskej niman matopaleuikan itech Jehová, akin noijki tlaxikojtika. Tla ijkon tikchiuaj, kuajli tikitaskej ika yemelak tlen kijtoua Santiago 1:12: “Tlatiochijtli yes sen tlakatl yejuan kixikos on pajsolouilistli, pampa ijkuak kuajli yokixikoj, kiselis sen corona ken itetlayokolil. Kiselis yenkuik nemilistli para nochipa yejuan Dios okitlalij ipan ipromesa para on yejuan kitlajsojtlaj”.