¿KEMANTIKA melak yotiajmankamijka? Noso ¿yotikmachilijka ika xok ueliskia titlaxikos? Xsan tejua ijkon timomachiliani. Miyekej ijkon nomachiliaj pampa kitlajpiyaj se inchanejkauj, yomik yakaj akin melak kitlasojtlaj, yotlaixpoliuj kampa chantij noso kixnamiktokej itlaj tlen melak ouijtika. Ijkuak yakaj kipiya se ueyi ajmantli uelis kisiauitis (Prov. 12:25). ¿Tlenon uelis techpaleuis tla melak tiajmankamikij? a

Matikitakan tlen okichiuj tekiuaj David. Yejua noijki oajmankamik pampa okixnamik miyek tlen ouijtika niman pampa kinekiyaj kimiktiskej (1 Sam. 17:34, 35; 18:10, 11). San ika ¿tlenon okichiuj David? Niman ¿kenon uelis tikchiuaskej ijkon ken yejua?

Matikitakan tlenon okixnamik David. Yejua cholojtinemiya pampa tekiuaj Saúl kinekiya kimiktis. Se tonajli, ijkuak David iuan isoldados otlaixnamikitoj niman ouajnokuepkej, okitakej ika intlauelikniuan yokintlachtekilijkaj, yokintlatilijkaj inkaluan niman yokinuikakaj inchanejkauan. Biblia kijtoua ika ijkuakon David iuan isoldados “opeu sanoyej chokaj, hasta kaman ochokis tlankej”. Niman xsan yejon tlen okixnamik, isoldados noijki okijtokej ika kinekiyaj “kitemojmotlaskej” (1 Sam. 30:1-6). Kuakon, David miyek tlen kixnamiktoya: yokinuikakaj ichanejkauan, isoldados kinekiyaj kimiktiskej niman tekiuaj Saúl kitejtemojtinemiya. ¡San matikonnemilikan kenon melak oajmankamik David!

¿Tlenon okichiuj David? Yejua “onoyolchikauj itech iteko Dios”. ¿Kenon? Nochipa kinotsaya Jehová para makipaleui niman tlanemiliaya itech kenon yokipaleuijka (1 Sam. 17:37; Sal. 18:2, 6). David noijki kimatstoya ika nonekiya makiyekana Jehová, ika yejon, okitlajtolti tlenon nonekiya kichiuas. Ijkuak Jehová okijli David tlenon nonekiya kichiuas, yejua nimantsin ijkon okichiuj. Niman ¿sakin tlenon opanok? Jehová okinpaleui David niman isoldados makintlanikan intlauelikniuan niman ijkon ouel okitekuilijkej tlen okinmichtekilijkaj niman okimanatoj inchanejkauan (1 Sam. 30:7-9, 18, 19). Ken tikitaj, David okinots Jehová para makipaleui, otlanemili itech ken toTajtsin yokipaleuijka niman okichiuj tlen Jehová okijli. Matikitakan kenon uelis tikchiuaskej ijkon ken David.

1. Xnotsa Jehová. Ijkuak sajnoye tiajmankamikis xnotsa Jehová niman ijkon tikmatis tlenon tikchiuas. Xkijli nochi tlen mitsajmana niman nochi tlen tikmachilia niman tikitas ika tiuajyolseuis. Niman tla xueli chikauak tiknotsa, uelis san ipan moyojlo tiknotsas. Ijkuak tikijliaj Jehová matechpaleui, tikteititiaj ika itech titlaneltokaj, ijkon ken okichiuj David. Sejpa, yejua okijto: “Tejua tinoDios yejuan ken tisen tetl kampa niniyana; ¡tinechejeua niman tinechmanauiya!” (Sal. 18:2). Se precursora akin itoka Kahlia kijtoua: “Ijkuak niknotsa Jehová niuajyolseui. Niman noijki nikita ika peua nitlanemilia ken Jehová niman más itech nitlaneltoka”. Kuajli tikitaj ika Jehová melak  techtlasojtla pampa techkauilia matiknotsakan ijkuak tiajmankamikij.

2. Xnemili kenon Jehová yomitspaleui. ¿Kemantika itlaj otikixnamijka niman otiknemili ika xueliskia tikxikos? Kanaj kema, san ika, kanaj noijki otikitak kenon Jehová omitspaleui xtlaxiko. Tla tejua tiknemilia kenon Jehová yomitspaleui niman kenon yokinpaleui itekipanojkauan, ijkuak oksejpa tikixnamikis tlen ouijtika kuajli tikmatstos ika Jehová mitspaleuis niman yejon mitsyolseuis (Sal. 18:17-19). Se tlayekanketl akin itoka Joshua kijtoua: “Nejua nikijkuiloua tlenon niktlajtlanilia Jehová niman kenon nechnankilia. Ijkon xnikilkaua kenon Jehová yonechpaleui”. Kuakon, tla tiknemiliaj kenon yotechpaleui Jehová, techpaleuis maka sajnoye matiajmankamikikan.

3. Xchiua tlen Jehová mitsijlia. Ijkuak itlaj tiktlapejpenis, kachtopa xkita tlenon kijtoua Biblia (Sal. 19:7, 11). Miyekej melak kuajli nomachtiaj se tlaxelojli itech Biblia pampa ijkon más kasikamatij tlenon kineki Jehová makichiuakan. Se tlayekanketl akin itoka Jarrod kijtoua: “Nikuelita nikitas tlenon kijtoua toamatlajkuiloluan itech se tlaxelojli pampa ijkon más kuajli nikasikamati, más ajsi ipan noyojlo niman nechpaleuiya manikchiua ijkon ken yoninomachti”. Ijkuak tomachtiaj Biblia niman tikchiuaj tlen ompa techtlajtlanilia, techpaleuiya maka sajnoye matiajmankamikikan.

David kimatstoya ika san Jehová ueliskia kiyolseuis ijkuak melak ajmankamikiya. Niman ijkuak kitaya kenon kipaleuiaya melak kitlasojkamatiya. Yejua okijto: “Tinechpaleuis para nikpanos imintepanchinan”. Niman noijki okijto: “Dios yejua nechyolchikaua” (Sal. 18:29, 32). Kanaj ijkuak tikixnamikij tlen ouijtika noijki tikitaj kentla tepantin tlen melak uejkapamej, san ika, Jehová uelis techpaleuis matikinpanauikan noso matitlaxikokan. Tla tiknotsaj Jehová, tla titlanemiliaj itech ken yejua yotechpaleui niman tla tikchiuaj tlen yejua techijlia, tikitaskej kenon yejua techyolseuiya ijkuak sajnoye tiajmankamikij.