Ijkuak ijkon panos, tejuamej noneki tikasikamatiskej ika tokniuj oksejpa kuajli yononamikti ijkon ken kitlajtlanij tekiuajkej. ¿Tleka ijkon tikijtouaj? Matikitakan tlen okijto Jesús itech tlen panoua ijkuak yakaj kikaua ixnamik niman oksejpa nonamiktia.

Ipan Mateo 19:9 Jesús okijto: “San akinon yejuan noxotonis iuan isiuau, pero xpampa on siuatl iuan onotekak okse tlakatl, niman nonamiktis iuan okse siuatl, yejua siuapapatla”. ¿Tlenon techmachtia yejuin? Kachtopa, ika yakaj san uelis kikauas ixnamik tla ixnamik onotekak iuan yakaj okse. Niman ika ome, ijkuak se tlakatl kikaua ixnamik niman oksejpa nonamiktia san pampa ijkon okinek, kijtosneki ika auilnemi. a

Ika tlen okijto Jesús ipan Mateo 19:9, ¿kijtosneki ika tla se tlakatl noteka iuan okse siuatl niman kikaua isiuauj, uelis oksejpa nonamiktis? Kema uelis. San ika, ijkuak yakaj auilnemi, akin kiyolkokouaj yejua kitlapejpenis tla kitlapopoluis ixnamik noso ka. Tla xkitlapopoluiya niman kuajli nokauaj imixpan tekiuajkej, uelis oksejpa nonamiktiskej.

San ika, kanaj kemantika tesiuauj kineki kitlapopoluis iueuentsin niman xkineki kikauas. ¿Tlenon panoua tla teueuentsin akin oauilnen kikaua isiuauj maski yokitlapopolui? Biblia kijtoua ika yejua xok uelis oksejpa nonamiktis pampa isiuauj yokitlapopolui niman kineki iuan nemis. Tla teueuentsin xkineki kichiuas tlen kijtoua Biblia niman oksejpa nonamiktia, kuakon, oksejpa auilnentoskia niman tlayekankej noneki kimelajkatlaliskej pampa yokichiuj se tlajtlakojli (nochiuas se comité judicial) (1 Cor. 5:1, 2; 6:9, 10).

Tla se tlakatl xkitlakamati Biblia niman oksejpa nonamiktia, ¿kenon noneki kitaskej tokniuan yejon tlakatl iuan isiuauj? Niman ¿kenon noneki kitaskej akin isiuauj katka? Ijkon ken kijtoua Biblia, ¿yejuin tlakatl ok isiuauj akin kachtopa iuan ononamikti? ¿Akin isiuauj katka ok uelis kitlapopoluis, noso ka? ¿Kijtosneki ika yejuin tlakatl niman akin aman isiuauj auilnentokej?

Hasta aman tikasikamatiyaj ika ijkuak teueuentsin kikaua isiuauj niman oksejpa nonamiktia, yejua auilnentika. Niman noijki tikijtouayaj ika kikajkaua ika auilnemi ijkuak akin isiuauj katka oksejpa nonamiktia, ijkuak noteka iuan yakaj okse noso ijkuak miki. San ika, ijkuak Jesús okiteneuj ika yakaj uelis kikauas ixnamik niman oksejpa nonamiktis, xokiteneuj akin okikaujkej. Ka, Jesús okijto ika se tlakatl auilnemi pampa xkichiua ijkon ken Biblia kijtoua ijkuak kikaua isiuauj niman oksejpa nonamiktia. Kuakon, ijkuak se tlakatl kikaua isiuauj niman oksejpa nonamiktia yejua auilnentika niman akin isiuauj katka xok noneki kitas ken iueuentsin.

 Ijkuak se tlakatl kikaua isiuauj niman oksejpa nonamiktia, isiuauj xok noneki kinemilijtos tla kitlapopoluis noso ka. Niman tokniuan xnoneki kinemiliskej ika yejon tlakatl niman akin aman isiuauj auilnentokej pampa akin isiuauj katka ok nemi, xinonamiktia noso xinoteka iuan okse tlakatl, pampa yejon namiktijli otlan ijkuak onokaujkej. b

Ijkuak otiuajpeujkej otikijtokej tlenon panoua ijkuak se teueuentsin auilnemi niman kikaua isiuauj. San ika ¿tlenon panoua tla se teueuentsin kikaua isiuauj maski xauilnemi niman oksejpa nonamiktia? Noso ¿tlenon panoua tla se teueuentsin noteka iuan okse siuatl sakin ika yonokaujkej niman oksejpa nonamiktia maski akin isiuauj katka kinekiya kitlapopoluis? Yejua yoauilnen, pampa yotekauj niman pampa oksejpa yononamikti. Ika yejon, akin isiuauj katka xok noneki kitas ken iueuentsin. La Atalaya del 15 de febrero de 1980, página 30, kijtoua: “Akin oksejpa yononamikti xnoneki san ijkon kuajkauas akin aman isiuauj niman oksejpa yas iuan akin isiuauj katka pampa yejua otekauj, oauilnen niman okse isiuauj kipiya”.

Maski yonopatlak ken tikasikamatij yejuin, xnoneki tiknemiliskej ika xse ueyi tlajtlakojli tla se kikaua isiuauj noso iueuentsin. Tla se tlakatl xkitlakamati tlen kijtoua Biblia niman kikaua isiuauj niman oksejpa nonamiktia, tlayekankej noneki kimelajkatlaliskej pampa yokichiuj se tlajtlakojli (nochiuas se comité judicial). (Tla akin iuan ononamikti noijki iteixpantijkauj Jehová, tlayekankej noneki kichiuiliskej se comité judicial pampa yotlajtlako). Maski yejuin tlakatl niman akin aman isiuauj xok tikijtouaj ika auilnentinemij, noneki panos miyek xiujtin para yejuin tokniuj tlakatl kimakaskej se tekitl ipan tlanechikojli. Ijkuak kinemiliskej tla kimakaskej se tekitl ipan tlanechikojli noneki kitaskej tla miyekej yokilkaujkej tlen okichiuj, noijki noneki kitaskej kenon nomachilia akin isiuauj katka pampa kanaj san okinek kikajkayauas niman noijki noneki kitaskej kenon nomachiliaj ikoneuan pampa kanaj yejua okinkaujteuj (Mal. 2:14-16).

Yotikitakej tlenon panoua ijkuak yakaj xkitlakamati Biblia niman kikaua ixnamik niman oksejpa nonamiktia, ika yejon, akin tikchiuaj ken Cristo xtiknekij tikchiuaskej tlen Jehová kitlauelita niman tiknekij tikchipaujkaitaskej namiktilistli (Ecl. 5:4, 5; Heb. 13:4).