1. ¿Tlenon otiuel ijkuak opeuj mitsmachtiaj Biblia?

 ¿TIKILNAMIKI nochi tlen otiuel ijkuak mitsmachtijtoyaj Biblia? Kanaj omitsmojkatlachialti ijkuak otikmat ika toTajtsin kipiya se itoka. Niman kanaj omitsyolseui ijkuak otikmat ika xonka se infierno kampa toTajtsin tetlajyouiltia. Noijki, kanaj melak otiyolpak ijkuak otikmat ika akin yomijkej oksejpa yoliuiskej niman ika uelis imiuan tinemis ipan xochitlalpan.

2. ¿Kenon más otikteititi ika chikaujtiaya motlaneltok? (Efesios 5:1, 2).

² Ijkuak timomachtijtoya Biblia, opeuj más tiktlasojtla Jehová. Niman pampa tiktlasojtlaya opeuj tikchiua tlen tiueltiaya. Biblia omitspaleui kuajli xtlapejpeni tlenon tikchiuas. Noijki, pampa tiknekiya tikyolpaktis toTajtsin opeuj tikpatla ken titlanemilia niman tlen tikchiua. Ijkon ken se konetl kichiua ken itaj, tejua noijki opeuj tikchiua ijkon ken moTajtsin akin nemi iluikak (xpoua Efesios 5:1, 2).

3. ¿Tlenon uelis totlajtoltiskej?

³ Uelis totlajtoltiskej: “¿Aman más niktlasojtla Jehová xijkon ken ijkuak oninoapolakti? ¿Aman más nikchiua niman nitlanemilia ijkon ken Jehová ijkuak nikimititia nokniuan ika nikintlasojtla?”. Maka matoyolkokokan tla tikitaj ika xijkon tikchiujtokej. Noijki ijkon inpan onochiuj tokniuan akin onenkej ipan kachtopa siglo. San ika, Jesús xokinemili tla xueliskia nopatlaskej, niman noijki xijkon kinemilis totech (Apoc. 2:4, 7). Kimatstika ika oksejpa uelis tiktlasojtlaskej toTajtsin ijkon ken ijkuak opeuj tomachtiaj.

4. ¿Tlenon tikitaskej ipan yejuin tlamachtijli?

 ⁴ Ipan yejuin tlamachtijli tikitaskej tlenon uelis tikchiuaskej para más tiktlasojtlaskej Jehová niman tikintlasojtlaskej oksekimej. Niman sakin tikitaskej kenon techpaleuiya niman kinpaleuiya oksekimej ijkuak ijkon tikchiuaj.

5, 6. ¿Tlenon okixnamik apóstol Pablo ijkuak tenojnotstinemiya, niman tleka xonosiaujkauj?

⁵ Apóstol Pablo melak oyolpak ijkuak kitekichiuilijtoya toTajtsin, san ika, noijki okixnamik miyek tlen ouijtika. Maski ipan itonaluan ouijtika katka oksekan yas, yejua kemantika uejka onejnen. Ijkuak oksekan yaya, kemantika hasta iamimikiya ipan atentin, ikimiktiskiaj “on tlachtekkej” niman hasta okitlajyouiltijkej itlauelikniuan (2 Cor. 11:23-27). Noijki, tokniuan xnochipa okipatiojkaitakej tlen kichiuaya inpampa (2 Cor. 10:10; Filip. 4:15).

⁶ ¿Tlenon okipaleui Pablo maka manosiaujkaua? Yejua miyek youelka itech Jehová ipampa tlen yokipoujka ipan iTlajtol niman ipampa tlen yokixnamijka. Kuajli kimatstoya ika Jehová kitlasojtlaya (Rom. 8:38, 39; Efes. 2:4, 5). Niman Pablo noijki melak okitlasojtlak toTajtsin. Yejua ijkon okiteititi pampa nochipa okinpaleui tokniuan (Heb. 6:10).

7. ¿Tlenon techpaleuis más matiktlasojtlakan Jehová?

⁷ Tla tiknekij más tiktlasojtlaskej toTajtsin, noneki melak kuajli tomachtiskej iTlajtol. Ijkuak tikamapouaskej se tlaxelojli itech Biblia, noneki tikitaskej tlenon techmachtia itech Jehová. Uelis totlajtoltiskej: “¿Kenon yejuin tlaxeloltin nechititiaj ika Jehová nechtlasojtla? ¿Kenon nechpaleuiyaj más maniktlasojtla Jehová?”.

8. ¿Kenon teoyotl techpaleuiya más matiktlasojtlakan toTajtsin?

⁸ Noijki, más tiktlasojtlaskej Jehová tla mojmostla tikijliaj tlen tikmachiliaj (Sal. 25:4, 5). Jehová kuajli yotechijli ika kinnankilis toteoyouan (1 Juan 3:21, 22). Khanh, b se tokniuj siuatl akin chanti Asia, kijtoua: “Kachtopa, san niktlasojtlaya Jehová ipampa tlen yoniuelka ipan Biblia. San ika, opeuj más niktlasojtla ijkuak onikitak kenon kinnankiliaya noteoyouan, niman yejon yonechpaleui manikneki manikchiua tlen yejua kuelita”.

9. ¿Kenon Timoteo okiteititi ika kintlasojtlaya tokniuan?

⁹ Sakin ika Pablo onochiuj inomachtijkauj Cristo, okixmat se telpochtli akin itoka katka Timoteo. Yejua kitlasojtlaya Jehová niman kintlasojtlaya oksekimej. Pablo yejuin tlen okimijli filipenses itech Timoteo: “Xnikpiya okse yejuan no ijki kinemilia ken nejua, yejuan melauak notekimakas kichiuas tlen kuajli para nemejuamej” (Filip. 2:20). Pablo xokiueyiteneuj Timoteo pampa kuajli kichiuaya itekiyo noso pampa kuajli kinpanoltiaya itlamachtiluan. Kuajli nesi ika Pablo kipatiojkaitaya Timoteo pampa kintlasojtlaya tokniuan. Kuajli tikmatstokej ika tokniuan de tlanechikoltin sa kichiatoyaj ika Timoteo makintlajpaloti (1 Cor. 4:17).

10. ¿Kenon Anna niman iueuentsin okiteititijkej ika kintlasojtlayaj tokniuan?

¹⁰ Tejuamej noijki tikyejyekouaj tikinpaleuiskej tokniuan (Heb. 13:16). ¿Nenkilnamikij Anna, akin otikteneujkaj ipan tlamachtijli tlen youajpanok? Sakin ika yopanoka se ueyi ajakakiyaujtli, yejua iuan iueuentsin  okitlajpalotoj se familia. Okitakej ika oijtlakauj tlen ika tlapachiujtoya inkal tokniuan. Yejua ika, xkipiayaj tlen ika notlakenpatlaskej. Anna techijlia tlenon okichiujkej: “Otikimitkikej intlakenuan, otikinpajkej, otikinpetsojkej, otikinkuekuelpachojkej niman sakin otikinmakakej. Xueyi tlen otikchiujkej, san ika, yejon okichiuj kuajli matouikakan”. Anna iuan iueuentsin okinpaleuijkej tokniuan pampa kintlasojtlayaj (1 Juan 3:17, 18).

11. a) ¿Kenon nomachiliaj oksekimej ijkuak tikimititiaj ika tikintlasojtlaj? b) Ijkon ken kijtoua Proverbios 19:17, ¿kenon nomachilia Jehová ijkuak tikimititiaj oksekimej ika tikintlasojtlaj?

¹¹ Tejuamej tikteititiaj ika titlanemiliaj niman tikchiuaj ijkon ken Jehová, ijkuak tikimititiaj oksekimej ika tikintlasojtlaj niman tikimikneliaj. Niman xsan nenka tlen tikchiuaj. Kemantika kanaj xuelis tikmatiskej kenon oksekimej kipatiojkaitaj tlen tikchiuaj inpampa. Khanh, tokniuj siuatl akin otikteneujkej ipan párrafo 8, kuajli kimilnamiki akin okipaleuijkej. Yejua kijtoua: “Melak nikintlasojkamachilia nochimej tokniuan siuamej akin onechuikakej imiuan manitenojnotsati. Nechuajtemouayaj, nechijliayaj imiuan manitlakuati niman sakin nechuajkauayaj nikan nochan. Aman nikita ika maski ouijtika, yejuamej okichiujkej ika nochi inyojlo”. Yemelak ika xnochimej techtlasojkamachiliskej tlen tikchiuaj inpampa. Khanh, yejuin kijtoua intech akin okipaleuijkej: “Nikuelitaskia itlaj nikchiuas inpampa akin onechpaleuijkej, san ika, nion xnikmati kanon chantij. San ika, Jehová kema kimati niman niktlajtlanilia makintlaxtlauili nopampa”. Kema, Jehová kita tlen tikchiuaj inpampa oksekimej maski xmás ueyi. Kita kentla se ueyi uentli niman ken itlaj tlen  noneki kitlaxtlauas (xpoua Proverbios 19:17).

12. ¿Kenon tokniuan tlakamej akin yonoapolaktijkej uelis kimititiskej oksekimej ika kintlasojtlaj? (Noijki xkimita tlaixkopinaltin).

¹² Tla tejua titlakatl, ¿kenon uelis tikimititis tokniuan akin nemij ipan motlanechikol ika tikintlasojtla? Tla tikinpaleuiya. Se telpochtli, akin itoka Jordan, okitlajtolti se tlayekanketl tlenon ueliskia kichiuas para más kinpaleuis tokniuan. Tokniuj tlayekanketl okijli ika melak kuajli nochi tlen yokuajchiujtia niman okijli okseki tlen nonekiya kichiuas. Okijli más nimantsin maajsi ipan Kajli kampa tosentlaliaj niman makintlajpalo oksekimej. Okijli matlanankili ipan tlanechikoltin, matenojnotsa ipan igrupo niman makita kenon más kinpaleuis tokniuan. Nochi yejuin okipaleui Jordan makiseli más tekitl niman más makintlasojtla tokniuan. Niman noijki okasikamat ika ijkuak se tokniuj tlakatl kitlaliaj ken tlapaleuijketl, xkijtosneki tla peua tepaleuiya; yej, kijtosneki ika desde yeuejkaui nokojtilijtika kinpaleuis oksekimej (1 Tim. 3:8-10, 13).

13. ¿Tlenon okipaleui Christian oksejpa makitlalikan ken tlayekanketl?

¹³ ¿Xok titlapaleuiya ken tlayekanketl noso tlapaleuijketl? Jehová xkilkaua nochi tlen ika moyojlo otikchiuj (1 Cor. 15:58). Niman ok kitstika kenon tikteititia ika titetlasojtla. Se tokniuj akin itoka Christian melak onajman ijkuak okijlikej ika xok tlayekanketl yeskia. San ika, xonosiaujkauj. Yejua ijkin kijtoua: “Onikijto ika, maski xok nitlayekanketl, nikchiuaskia nochi tlen niueli pampa niktlasojtla Jehová”. Sakin okijlikej tla oksejpa uelis tlapaleuis ken tlayekanketl. Christian kijtoua: “Xnikmatiya tla oksejpa nikseliskia yejon tekitl. San ika, oniknemili  ika, tla Jehová nechiknelijtoya niman nechkauilijtoya oksejpa manitlapaleui ken tlayekanketl, kema nikseliskia pampa niktlasojtla Jehová niman tokniuan”.

14. ¿Tlenon tiuelij itech tlen okijto tokniuj Elena?

¹⁴ Akin tiiteixpantijkauan Jehová, noijki tikimititiaj ika tikintlasojtlaj akin xtokniuan (Mat. 22:37-39). Tokniuj Elena, akin ualeua Georgia, kijtoua: “Kachtopa, nontenojnotsaya san pampa niktlasojtlaya Jehová. San ika, pampa más opeuj niktlasojtla, okichiuj más manikintlasojtla oksekimej. Nikyejyekouaya nitlanemilis itech tlen kixnamikij niman niknemiliaya tlenon ueliskia nikimijlis para manechkakikan. Nochi yejuin, okichiuj más manikneki nikinpaleuis” (Rom. 10:13-15).

15, 16. Ijkon ken nesi ipan tlaixkopinaltin, ¿kenon tepaleuiya ijkuak tikimititiaj oksekimej ika tikintlasojtlaj?

¹⁵ Xsan tokniuan kinpaleuiya ijkuak tikimititiaj ika tikintlasojtlaj. Ijkuak panotoya kokolistli COVID-19, Paolo niman isiuatsin okinpaleuijkej miyekej tokniuan siuamej akin iuejueyimej makintekitiltikan inteléfonos noso intabletas niman ijkon tenojnotsaskej. Se de yejuamej más ouijtika kitaya kitekitiltis tecnología, san ika, ouel niman okimijli ichanejkauan makikakikan tlen nopanoltiskia ipan Conmemoración. Melak teyolpakti ika 60 ichanejkauan okikakkej Conmemoración ika videoconferencia. Kuakon tikitaj ika yejuin tokniuj niman ichanejkauan  okinpaleui tlen okichiuj Paolo niman isiuatsin. Tokniuj, yejuin okijkuilouili Paolo: “Tlaxtlaui pampa nentechmachtiaj tejuamej akin itiuejueyimej. Xkeman nikilkauas kenon Jehová otechititi ika najmana topampa, niman kenon nemejuamej onemokojtilijkej nintechpaleuiskej”.

¹⁶ Yejuin tlen opanok, okititi Paolo itlaj tlen melak ueyi kijtosneki. Okitak ika más tepaleui tla tikteititiaj ika titetlasojtlaj, xijkon ken tla tikteititiaj ika miyek tikmatij noso miyek tlemach ueli tikchiuaj. Paolo ijkin okijto: “Nejua nitlapaleuiaya ken tlayekanketl ipan circuito. Kanaj tokniuan xok kimilnamikij notlamachtiluan, san ika, kema kilnamikij kenon onikinpaleui”.

17. ¿Akinon noijki kipaleuiya ijkuak tikteititiaj ika titetlasojtlaj?

¹⁷ Ijkuak tikteititiaj ika titetlasojtlaj, san no tejuamej techpaleuiya. Ijkon kiteititia tlen ipan onochiuj se tokniuj de Nueva Zelanda. Se sábado, Jonathan okitak ika se precursor san iselti tenojnotstoya maski melak tona katka. Kuakon opeuj iuan tenojnotsa sábados ika teotlak. Yejua xkimatiya ika yejon tlen kichiujtoya noijki melak kipaleuiskia. Jonathan ijkin kijtoua: “Ijkuakon xmás nikuelitaya nitenojnotsas. San ika, ijkuak onikitak kenon yejon precursor kuajli temachtiaya niman kenon kuajli kikakiyaj, noijki opeuj más nikuelita nitenojnotsas. Pampa más kuajli opeuj iuan ninouika yonechpaleui machikaujto notlaneltok, más manikuelita manitenojnotsa niman kuajli maninouika iuan Jehová”.

18. ¿Tlenon kineki Jehová matikchiuakan?

¹⁸ Jehová kineki más matiktlasojtlakan niman más matikintlasojtlakan oksekimej. Ken yotikitakej, tla tiknekij más tiktlasojtlaskej Jehová noneki mojmostla tiknotsaskej, tikpouaskej Biblia niman itech titlanemiliskej. Noijki, tla tiknekij tikimititiskej tokniuan ika tikintlasojtlaj, noneki tikinpaleuiskej. Tla más titetlasojtlaj, más touikaskej iuan Jehová niman imiuan tokniuan. ¡Nochipa uelis imiuan touikaskej!