1. ¿Kenon uelis tikchiuaskej ijkon ken seki kojtin? (Noijki xkita tlaixkopinajli).

 “AJAKATL xueli kiposteki se kojtli tlen ueli nokuelpachoua noso noliui”. Yejuin tlajtoltin kiteititiaj ika ijkuak melak ajaka se kojtli melak kipaleuiya tla ueli noliui. Tla tiknekij nochipa machikaujto totlaneltok, noijki noneki tonoloskej, kijtosneki, ika noneki tikimasikamatiskej oksekimej. ¿Kenon uelis ijkon tikchiuaskej? Tla tikpatlaj tlen tikchiuayaj ijkuak nopatla itlaj ipan tonemilis niman tla tiktlakaitaj tlen kinemiliaj niman tlen kitlapejpeniaj oksekimej.

2. ¿Tlenon techpaleuis matitlaxikokan ijkuak itlaj nopatlas, niman tlenon tikitaskej ipan yejuin tlamachtijli?

² Nochimej akin tiktekichiuiliaj Jehová tiknekij tikteititiskej ika titeasikamatij. Niman noijki tiknekij tiyolyemankej yeskej niman titeikneliskej. Ipan yejuin tlamachtijli, tikitaskej kenon sekimej tokniuan ouel otlaxikojkej pampa okiteititijkej ika teasikamatij, ika yolyemankej niman teikneliaj. Niman noijki tikitaskej kenon uelis ijkon tikchiuaskej. San ika, kachtopa tikitaskej kenon Jehová niman Jesús kiteititiaj ika melak teasikamatij.

3. ¿Kenon tikmatij ika Jehová teasikamati?

³ Miyekan, Biblia kijtoua ika Jehová yeskia ken se ueyi Tetl, kijtosneki ika xkipatla tlen yokijto (Deut. 32:4). San ika, noijki kiteititia ika teasikamati. ¿Kenon tikmatij yejon? Pampa maski miyek tlemach youajnopatlatiaj, Jehová yokuajchiujtia  nochi tlen noneki para kichiuas tlen desde yeuejkaui kinekiya kichiuas. Niman tejuamej noijki ueli ijkon tikchiuaj pampa Jehová otexchijchiuj niman ijkon matitlanemilikan ken yejua. Jehová yotechmakak iTlajtol niman ijkon tikmatiskej tlenon tiktlapejpeniskej maski san tlenon tikixnamikij. Tlen kichiua niman tlen yotechnauati ipan iTlajtol kiteititia ika maski xkipatla tlen yokijto, kema teasikamati.

4. Xkijto kenon Jehová okimititi israelitas ika kimasikamati (Levítico 5:7, 11).

⁴ Nochi tlen Jehová technauatia melak techpaleuiya niman kiteititia ika techasikamati. Yejua xmiyek techtlajtlanilia nion xtechtlajtlanilia tlen xuelis tikchiuaskej. Matikitakan kenon okiteititi ika kimasikamatiya israelitas. Yejua xkitlajtlaniya ika nochimej, akin kipiayaj tomin niman akin xkipiayaj tomin, san no yejua uentli makitemakakan. Kemantika, Tlanauatijli kiteneuaya seki tlen israelitas ueliskia kiuentlaliskej niman tlen Jehová kema kiseliskia (xpoua Levítico 5:7, 11).

5. Xkijto kenon Jehová okiteititi ika yolyemanki niman teiknelia.

⁵ Jehová kiteititia ika teasikamati pampa yolyemanki niman teiknelia. Yejua okiteititi ika yolyemanki ijkuak ikinpopoloskia akin chantiyaj Sodoma. Jehová okintekitilti sekimej iluikaktekitkej niman ijkon makijlitij Lot mauiya kampa tepeyoj, san ika, Lot nomojtiaya ompa yas. Yejua ika, okitlajtlanili makinkauili yejua niman ifamilia mauiyan ne Zóar, se kalpantsin tlen Jehová noijki kinemilijtoya kipopolos. Jehová ueliskia kichiualtis Lot makichiua ijkon ken yokinauatijka, san ika, xijkon okichiuj. Yejua okikak Lot, maski yejon kijtosnekiya ika xok kipopoloskia Zóar (Gén. 19:18-22). Miyek xiuitl sakin, Jehová okiteititi ika okimikneli ninivitas. Yejua okontitlan teotlajtoketl Jonás niman ijkon kimijlis ika kinpopoloskiaj yejuamej niman inueyikalpan pampa kichiujtoyaj tlen xkuajli. San ika, ijkuak ninivitas onoyolkuepkej, Jehová okimikneli niman okintlapopolui (Jon. 3:1, 10; 4:10, 11).

6. ¿Kenon okiteititi Jesús ika noijki teasikamati ijkon ken Jehová?

⁶ Ijkuak Jesús nemiya nikan ipan tlaltikpaktli, okiteititi ika noijki teasikamati ijkon ken Jehová. Sejpatipan, se siuatl akin xisraelita katka, okitlajtlanili Jesús makipaleui maski yejua san yokuajtitlankaj para makinpaleui akin israelitas katkaj. Yejon siuatl okitlajtlanili makipajti ichpoch akin kipiaya “sen xkuajli espíritu niman sanoyej temojtij” kitlajyouiltiaya, Jesús okikneli yejon siuatl niman okipajti ichpoch (Mat. 15:21-28). Noijki matitlanemilikan itech tlen Jesús okijto sakin ika yopeujka tenojnotsa, yejua okijto: “On yejuan nechnenekiskej imixpan on tlakamej, nejua no nikinnenekis” (Mat. 10:33). San ika ¿kanaj Jesús xok okiseli Pedro san pampa yexpa okijto ika xkixmatiya? Ka. Yejua kimatstoya ika Pedro yonoyolkuepka niman  ika yolmelajkanemiya. Sakin ika oyoliuj, Jesús okinojtiti Pedro niman kanaj okititi ika yokitlapopoluijka niman kitlasojtla (Luc. 24:33, 34).

7. Ken kijtoua Filipenses 4:5, ¿kenon tiknekij matechixmatikan?

⁷ Yotikitakej ika Jehová niman Jesús kiteititiaj ika teasikamatij. ¿Niman tejuamej? Jehová kichia ika noijki matiteasikamatikan (xpoua Filipenses 4:5). Uelis totlajtoltiskej: “¿Oksekimej kinemiliaj ika niteasikamati niman xnimantsin nikualani? ¿Nechixmatij pampa nochipa nikneki manochiua ijkon ken nejua nikijtoua? ¿Nikuelita nikinkakis oksekimej niman ijkuak niueli, nikchiua ijkon ken nechijliaj?”. Tla más tokojtiliaj titeasikamatiskej, más tikchiuaskej ijkon ken Jehová niman Jesús. Aman, matikitakan kenon uelis tikteititiskej ika titeasikamatij ijkuak itlaj nopatla ipan tonemilis niman ijkuak oksekimej xtlanemiliaj nion xkichiuaj ijkon ken tejuamej.

8. ¿Tlenon uelis techpaleuis matitlaxikokan ijkuak itlaj nopatlas ipan tonemilis? (Noijki xkita nota).

⁸ Ijkuak itlaj nopatlas ipan tonemilis, noneki tikasikamatiskej ika noijki nonekis tikpatlaskej seki tlen tikchiuayaj. Tinochimej uelis san nimantsin tikualoskej, xok tikpiyaskej tlen ika topanoltiskej noso políticos kichiuaskej itlaj tlen kipatlas ken tinemij. Niman nochi yejuin uelis kichiuas matikixnamikikan itlaj tlen xtikchiayaj (Ecl. 9:11; 1 Cor. 7:31). Noijki, uelis ouijtika tikitaskej ijkuak techpatiliaj totekiyo ipan ikalpan Jehová. Maski ijkon, uelis titlaxikoskej tla tikchiuaj yejuin: 1) tla tikasikamatij ika yonopatlak tonemilis, 2) tla xtitlanemiliaj itech tlen yeuejkaui otikchiujkej, 3) tla titlanemiliaj itech tlen kuajli niman 4) tla tikinpaleuiyaj oksekimej. b Matikitakan kenon tokniuan yokitakej ika yejuin kema tepaleuiya.

9. ¿Tlenon okichiuj se tokniuj iuan isiuauj niman ijkon tlaxikoskej?

⁹ Matikasikamatikan ika yonopatlak tonemilis. Emanuele niman Francesca tlapaleuiyaj ken misioneros niman okomintitlankej ipan okse país. Ijkuak oajsikej, opeuj nomachtiaj tlajtojli tlen ompa tlajtouayaj niman opeujkej kimixmatij tokniuan akin ompa chantiyaj. San ika, opeuj kokolistli COVID-19 niman xok ouel onosentlalijkej imiuan tokniuan. Noijki, inan Francesca nimantsin onomikili. Francesca melak kinekiya yas imiuan ichanejkauan, san ika, xouel oyaj pampa panotoya kokolistli. ¿Tlenon okinpaleui makixikokan nochi yejuin? Kachtopa, Emanuele niman Francesca san sekan okinotskej Jehová niman okitlajtlanilijkej makinpaleui niman ijkon kimatiskej tlenon kichiuaskej niman xajmankamikiskej. Ika amatlajkuiloltin niman videos, Jehová okinpaleui yejuin tokniuan ijkuak más nonekiya. Yejuamej melak okinyolchikauj se video, kampa se tokniuj okijto: “Ijkuak más nimantsin tikasikamatij ika yonopatlak tonemilis, oksejpa más nimantsin tiyolpakij. Yejuin noijki techpaleuiya matikitakan tlenon uelis tikchiuaskej aman”. c Ika ome, yejuamej okitakej kenon más kuajli tenojnotsaskej ipan teléfono, niman hasta opeuj kimachtiaj yakaj. Niman, ika yeyi, okinokauilijkej ika sekimej tokniuan makinyolchikauakan niman makinpaleuikan. Niman yejuamej melak okitlasojkamatkej nochi tlen okichiujkej tokniuan.  Se tokniuj siuatl mojmostla ipan se xiuitl okintitlanili se mensaje ika se texto. ¿Tlenon techmachtia yejuin? Ika tla nimantsin tikasikamatij ika yonopatlak tonemilis más tiyolpakiskej.

10. ¿Tlenon okichiuj Christina niman ijkon yolpakis maski itlaj onopatlak?

¹⁰ Matiknemilikan tlen kuajli niman maka san matitlanemilikan itech tlen tikchiuayaj. Christina, se tokniuj akin ualeua Rumania niman tlapaleuiya Japón, melak onoyolkoko ijkuak opopoliuj tlanechikojli de inglés kampa yejua tlapaleuiaya. San ika, yejua xsan tlanemilijtoya itech tlen yeuejkaui kichiuaya, yej opeuj tlapaleuiya ipan se tlanechikojli kampa tlajtouaj japonés niman ika nochi iyojlo tenojnotsaya ika yejon tlajtojli. Okitlajtlanili se siuatl akin iuan tekitiya makipaleui más kuajli matlajto japonés. Okijli ika ijkuak kimachtis makitekitilti Biblia niman amatlajkuilojli ¡Nochipa uelis tiyolpakis! Christina opeuj más ueli tlajtoua japonés. Niman yejon siuatl akin okipaleui, okinek más kimatis itech Biblia. ¿Tlenon techmachtia yejuin? Ika tla tiknemiliaj tlen kuajli niman xsan titlanemilijtokej itech tlen yeuejkaui tikchiuayaj, maski itlaj nopatla ipan tonemilis uelis tikitaskej ika Jehová techteochiua.

11. ¿Tlenon okichiuj se tokniuj iuan isiuauj ijkuak xok kipiayaj tomintsin?

¹¹ Matikinpaleuikan oksekimej. Se tokniuj niman isiuauj, opeuj kixnamikij tlen ouijtika pampa xok kipiayaj tlen ika nopanoltiskej. ¿Tlenon okichiujkej? Kachtopa, onokojtilijkej nemiskej san ika achijtsin. Ika ome, yejuamej xsan tlanemilijtoyaj itech tlen kixnamiktoyaj, yej opeujkej kinpaleuiyaj oksekimej niman más chikauak tenojnotsaj (Hech. 20:35). Iueuentsin okijto: “Pampa chikauak titenojnotsayaj, xtikpiayaj tiempo para tiknemiliskej tlen xkuajli niman tikpiayaj más tiempo para tikchiuaskej tlen toTajtsin kineki”. ¿Tlenon techmachtia yejuin? Tla itlaj nopatla ipan tonemilis, matikilnamiktokan ika melak noneki tikinpaleuiskej oksekimej niman más ijkon tikchiuaj ijkuak titenojnotsaj.

12. ¿Kenon uelis tikchiuaskej ken Pablo ijkuak titenojnotsaskej?

¹² Tejuamej titlajtouaj imiuan akin tlamantik tlaneltokaj niman imiuan akin oksekan ualeuaj, ika yejon, melak noneki matikpapatlatiakan ken titenojnotsaj. ¿Tleka techpaleuis tla tikitaj tlen okichiuj apóstol Pablo? Pampa yejua kipapatlatiaya ken tenojnotsaya. Jesús okitlali ken apóstol para miyekan matenojnotsa (Rom. 11:13). Yejua ika, Pablo okinnojnots judíos, griegos, akin tlamachilisejkej, akin xmás onomachtijkej, akin uejueyixtokej niman tekiuajkej. Pablo okipapatlatiaj tlen kimijliaya akin kinnojnotsaya pampa kinekiya ajsis ipan inyojlo (1 Cor. 9:19-23). Ijkuak kinnojnotsaya, tlanemiliaya itech kanon ualeuayaj niman tlenon kineltokayaj. ¿Tlenon techmachtia yejuin? Ika tla kachtopa kuajli tiknemiliaj tlenon tikimijliskej akin tikinnojnotsaskej, yejuamej más kuajli techkakiskej.

13. ¿Kenon tepaleuis tla tiktlakaitaj ken tlanemiliaj oksekimej? (1 Corintios 8:9).

¹³ Tla titeasikamatij, xouijtika tikitaskej tiktlakaitaskej ken oksekimej tlanemiliaj. Matitlanemilikan itech yejuin. Sekimej tokniuan siuamej kuelitaj kinotlaliliskej maquillaje, san ika, sekimej ka. Sekimej tokniuan kuelitaj koniskej achijtsin alcohol, san ika, sekimej xkuelitaj nion achijtsin koniskej. Niman, maski tinochimej akin tikchiuaj ken Cristo tiknekij totlajpiyaskej niman xtiknekij tikualoskej, xsan noijki ken totlajpiyaj. Tla  tiknemiliaj ika nochipa noneki nochiuas ijkon ken tejuamej tiknekij niman tikchiuaj ika oksekimej noijki ijkon makinemilikan, uelis kichiuas ika tokniuan maka sa manouikakan iuan Jehová niman uelis titexeloskej. ¡Tejuamej xkeman tiknekiskiaj ijkon tikchiuaskej! (Xpoua 1 Corintios 8:9; 10:23, 24). Tla toyekanaj ika tlen toTajtsin technauatia, tikmatiskej tlenon tikchiuaskej niman kuajli touikaskej imiuan oksekimej. Matikitakan kenon uelis tikchiuaskej.

14. ¿Tlenon uelis techpaleuis kuajli matotlakentikan niman matokualtsintilikan?

¹⁴ Ken totlakentiaj niman ken tokualtsintiliaj. Jehová xtechinmaka miyek tlanauatiltin itech kenon totlakentiskej. Yejua san techmaka tlen ika uelis toyekanaskej. Ken totlakentiaj noneki kiteititis ika tikimasikamatij oksekimej niman ika tiktlakaitaj toTajtsin (1 Tim. 2:9, 10; 1 Ped. 3:3). Ika yejon, xtiknekij san makitakan totlaken. Tlen Jehová technauatia ipan iTlajtol noijki uelis kinpaleuis tlayekankej maka makimijlikan oksekimej kenon notlakentiskej niman kenon nopetsoskej. Matitlanemilikan itech tlen opanok ipan se tlanechikojli kampa sekimej telpokamej ijkuak noximayaj kinokauiliayaj seki intson achijtsin ueueyak niman nesiya kentla xnopetsouayaj. Ijkon kichiuayaj pampa ijkuakon, miyekej akin xnomachtiaj Biblia ijkon kistinemiyaj. Tlayekankej kinekiyaj kinpaleuiskej yejon telpokamej, ¿kenon ueliskia kichiuiliskej para maka manesi kentla kinnauatijtoskiaj? Tlayekanketl ipan circuito okimijli ijkin makimijlikan: “Tla tikpanoltia se tlamachtijli, niman akin mitskakij san kitaj kenon tinesi niman xkikakij tlen tikijtoua, ¿tiknemilia ika kuajli ken otimotlakenti noso ken otimokualtsintili?”. Ijkon, tokniuan tlayekankej ouel okinpaleuijkej telpokamej. d

15. ¿Tlenon uelis techpaleuis kuajli matiktlapejpenikan kenon topajtiskej? (Romanos 14:5).

 ¹⁵ Ken topajtiaj. Tinochimej akin tikchiuaj ken Cristo noneki tiktlapejpeniskej kenon topajtiskej (Gál. 6:5). Ijkuak tikitaskej kenon topajtiskej, xnoneki totlaliliskej yestli nion tiaskej itech akin tetlatemouiliaj (Hech. 15:20; Gál. 5:19, 20). Xnochimej kuelitaj san noijki nopajtiskej, sekimej kuelitaj yaskej itech doctor niman ijkon makinmaka medicamentos niman oksekimej kuelitaj nopajtiskej ika xiujtsitsintin noso okseki tlemach. Kanaj tejuamej itikpiyaj ken tikuelitaj topajtiskej, san ika, noneki titetlakaitaskej pampa tokniuan noijki kinnamiki kitlapejpeniskej ken nopajtiskej. Yejua ika, noneki tikilnamikiskej yejuin: 1) ika san iTekiuajyo toTajtsin uelis kichiuas maka sa matikualokan (Is. 33:24); 2) toseselti noneki tikitaskej tlenon más techpaleuis (xpoua Romanos 14:5); 3) maka matikintejteneuakan oksekimej nion matikinchiualtikan makichiuakan tlen tejuamej tiknekij (Rom. 14:13), niman 4) akin kichiuaj ken Cristo, notlasojtlaj niman kitaj ika más tepaleui tla nochimej kuajli nouikaj (Rom. 14:15, 19, 20). Tla ijkon tikchiuaj, kuajli touikaskej imiuan tokniuan niman xonias tlauejli ipan tlanechikojli.

16. ¿Kenon tlayekankej uelis kiteititiskej ika kimasikamatij oksekimej tlayekankej? (Noijki xkimita tlaixkopinaltin).

¹⁶ Tokniuan tlayekankej noneki kiteititiskej ika teasikamatij (1 Tim. 3:2, 3). Noijki, se tlayekanketl xkichia nochipa manoseli tlen kijtoua san pampa yejua akin más iueyi. Kimatstika ika iespíritu Jehová uelis kiyekanas maski san akinon niman ijkon makijto itlaj tlen uelis kichiuas manotlapejpeni tlen tepaleuis. Tla miyekej tlayekankej itlaj kitlapejpeniaj niman tlen okitlapejpenijkej kiteititia ika kitlakamatstokej itlanauatiluan toTajtsin, se tlayekanketl akin teasikamati noneki ijkon kichiuas maski yejua xijkon tlanemilia.

17. ¿Kenon techpaleuis tla tikteititiaj ika titeasikamatij?

¹⁷ ToTajtsin melak techteochiuas tla tikteititiaj ika titeasikamatij. Yejua uelis kichiuas más kuajli matouikakan imiuan tokniuan niman ika toyojlo matinemikan ipan tlanechikojli. Maski ipan ikalpan toTajtsin tinochimej tlamantik ken titlanemiliaj niman oksekan tiualeuaj, san sekan tikueyichiuaj Jehová. Niman tiyolpakij pampa tikmatstokej ika tikchiujtokej ijkon ken toTajtsin, akin melak teasikamati.