1, 2. a) ¿Tlenon okijto Jesús? b) ¿Tleka inomachtijkauan okitlalkauijkej Jesús? (Noijki xkimita tlaixkopinaltin).

 SEJPA, inomachtijkauan Jesús okijlijkej ika xkeman kitlalkauiskiaj, san ika, sakin, Jesús ijkin okimijli: “On nemoespíritu kineki kichiuas kuajli, pero nemotlalnakayo xkojtik” (Mat. 26:35; Mat. 26:41b). a Ijkuak Jesús ijkin okijto, okiteititi ika yejua techasikamati ijkuak topopolouaj, san ika, noijki otechijli maka matiknemilikan ika xkeman topopoloskiaj. Niman ijkuak inomachtijkauan okijlijkej ika xkeman kitlalkauiskiaj, yejuamej kinekiyaj kichiuaskej tlen kuajli, san ika, yejuamej xkimatiyaj kenijki melak ouijtika yeskia tikchiuas tlen kuajli ijkuak itlaj tikixnamikis. Ika yejon, Jesús okimijli: “Xtlachixtiakan niman xchiuakan oración para maka mechtlanis tetlatlatalistli” (Mat. 26:41a).

² ¿Tlenon okichiujkej inomachtijkauan Jesús ijkuak okajsikej Jesús? Xokichiujkej tlen okijtojkaj. Yejuamej okitlalkauijkej pampa xonotlajpixkej niman xtlatlachixtoyaj (Mat. 26:56).

3. a) Tla tiknekij timelajkanemiskej itech Jehová, ¿tleka xnoneki tiknemiliskej ika xkeman topopoloskej? b) ¿Tlenon tikitaskej ipan yejuin tlamachtijli?

³ Tejuamej xnoneki tiknemiliskej ika xkeman topopoloskej. Maski yotikijtokej ika xkeman tiktlalkauiskej Jehová, ueliskia tiknekiskiaj tikchiuaskej itlaj tlen xkuajli pampa titlajtlakolejkej (Rom. 5:12; 7:​21-23). Kemantika ueliskia tiknekiskej tikchiuaskej  itlaj tlen tikileuiyaj niman kanaj ouijtika tikitaskej tikxikoskej. Tla tiknekij nochipa timelajkanemiskej itech Jehová niman itech Jesús, noneki nochipa matitlatlachixtokan ijkon ken Jesús techijlia. Niman yejuin tlamachtijli techpaleuis ijkon matikchiuakan. Kachtopa, tikitaskej kanon noneki más totlajpiyaskej. Ika ome, tikitaskej kenijki uelis totlajpiyaskej ijkuak itlaj tikileuiskej. Niman ika yeyi, tikitaskej tlenon uelis tikchiuaskej para nochipa titlatlachixtoskej.

¿KANON NONEKI MÁS TOTLAJPIYASKEJ?

4, 5. ¿Tleka noneki titlatlachixtoskej para xtikchiuaskej tlajtlakoltin tlen xmás uejueyimej?

⁴ Seki tlajtlakoltin xmás uejueyimej, san ika, maski ijkon uelis kichiuas maka sa matouikakan iuan Jehová. Niman tla tikchiuaj se tlajtlakojli ken yejon, ueliskia kichiuas matikchiuakan se tlajtlakojli tlen más ueyi.

⁵ Tinochimej tikixnamikij itlaj tlen uelis kichiuas matitlajtlakokan. Ika yejon, tinochimej tlatlamantik tlen tikixnamikij. Sekimej noxijxikotokej iuan tlen xkuajli kileuiyaj. Kanaj sekimej kinekij auilnemiskej, noso sekimej noneki iuan noxijxikoskej xkichiuaskej tlen tsokuiltik: ken nomajmatokaskej noso kitaskej pornografía. Noso sekimej nokojtilijtokej xkichiuaskej tlen xkuajli kichiuaj tlaltikpakchanejkej ken akin xkinekij makinnauatikan, akin nimantsin kualanij noso akin xkichiuaj tlen kuajli pampa kinmojtia tlen oksekimej kinemiliskej intechkopa. Ika yejon, Santiago okijto: “Sano yejua on xkuajli ieleuilis sen tlakatl kitlatlata para ma tlajtlako” (Sant. 1:14).

6. ¿Tlenon noneki tikmatstoskej?

⁶ ¿Tikmatstok tejua tlenon iuan timoxijxikoua? Melak techijtlakoskia tla tiknemiliskiaj ika xtlaj iuan toxijxikouaj noso ika xkeman tikchiuaskej se tlajtlakojli pampa melak chikaujtok totlaneltok. Tla ijkon titlanemiliskiaj, san no tejuamej tokajkayaujtoskiaj (1 Juan 1:8). Matikilnamikikan ika Pablo okijto ika hasta akin kitlakamatij “on espíritu santo” melak noneki manotlajpiyakan para maka itlaj kintlatlatas (Gál. 6:1). Kuakon, melak noneki matikitakan tlenon iuan toxijxikouaj noso tlenon ueliskia kichiuas matitlajtlakokan (2 Cor. 13:5).

7. ¿Kanon noneki más totlajpiyaskej? Xkijto se neskayotl.

⁷ Tla yotikitakej iuan tlenon toxijxikouaj, ipan yejon noneki más totlajpiyaskej. Matontlanemilikan itech tlen yeuejkaui panouaya. Ipan kalpamej tlen tsauktoyaj ika tepantin, más nemiyaj tlajpixkej kampa onkatka puerta pampa ompa ueliskia nimantsin kalakiskej intlauelikniuan. Aman tejuamej noijki noneki  más totlajpiyaskej kampa tikitaskej ika ueliskia tikchiuaskej se tlajtlakojli (1 Cor. 9:27).

¿KENIJKI UELIS TOTLAJPIYASKEJ?

8, 9. ¿Tlenon nonekiya kichiuas telpochtli akin noteneua ipan Proverbios capítulo 7 niman ijkon xauilnemis? (Proverbios 7:​8, 9, 13, 14, 21).

⁸ ¿Tlenon uelis tikchiuaskej niman ijkon xtitlajtlakoskej? Matikitakan tlenon techmachtia Proverbios capítulo 7. Ompa noteneua se telpochtli akin oauilnen iuan se “siuaauilnenki”. Ipan tlaxelojli 22 kijtoua: “Amanaman on telpochtli okitokak on siuatl”. Yejuin ueliskia techasikamachiltis ika yejuin telpochtli san totoka ouets ipan yejuin tlajtlakojli. San ika, tla tikimitaj okseki tlaxeloltin tlen onka tlakuitlapan, tikitaskej ika yejua okichiuj okseki tlemach tlen okichiuj matlajtlako.

⁹ ¿Tlenon okichiuj yejuin telpochtli achto tlajtlakos? Kachtopa, ijkuak itlayoua katka “oyaj ipan on kalpanojtli nisiu on esquina kampa on siuaauilnenki chanti”. Sakin, okitlamelauili (xpoua Proverbios 7:​8, 9). Niman ijkuak okitak on “siuaauilnenki”, xokinemili nokuepas niman oksekan yas, yej okinokauili makitenkua noso makipipitso niman yejuin siuatl opeuj kijlia ika yejua yokitemakaka “uentli de yoltlalilistli”, niman kanaj ijkin okijli para makinemili ika yejua se kuajli siuatl katka (xpoua Proverbios 7:​13, 14, 21). Tla yejuin telpochtli xkichiuaskia nochi yejuin, yejua xkipiyaskia yejuin tetlatlatalistli niman xauilnemiskia.

10. Ijkon ken telpochtli akin noteneua ipan Proverbios, ¿tlenon ueliskia kichiuas matitlajtlakokan?

¹⁰ Tinochimej akin tiktekichiuiliaj Jehová ueliskia topan panos ijkon ken telpochtli akin yotikonteneujkej. Ueliskia tikchiuas se ueyi tlajtlakojli niman ueliskia tikmachilis ika san totoka ijkon otikchiuj. Ueliskia tikijtos: “Xnikmati tleka ijkon nopan opanok”. San ika, tla peua tiknemilia tlenon tikuajchiujtiaya, tikitas ika kanaj yopeujka tikchiuaya tlen xnonekiya niman yejon okichiuj xtlajtlako. Kanaj opeuj timouika iuan yakaj akin xkitlasojtla Jehová, kanaj opeuj timoyolpaktia ika tlen xkuajli, kanaj opeuj tikita tlen xkuajli ipan internet noso kanaj opeuj tiauj kampa xnoneki yaskej akin nomachtiaj. Noso kanaj xok tiknotsaya Jehová, xok timomachtiaya moBiblia, xok tiaya tlanechikoltin noso xok tontenojnotsaya. Niman ijkon ken telpochtli akin noteneua ipan Proverbios, kanaj ika yolik opeuj tikchiua tlen xnonekiya, niman yejon okichiuj xchiua se ueyi tlajtlakojli.

11. ¿Tlenon noneki tikchiuaskej tla xtiknekij titlajtlakoskej?

¹¹ ¿Tlenon tiuelij? Ika xsan noneki totlajpiyaskej xtikchiuaskej se tlajtlakojli, noijki noneki totlajpiyaskej itech tlen ueliskia kichiuas matitlajtlakokan. Niman yejon tlen okijto Salomón ijkuak otlan kijtoua tlenon inpan opanok on telpochtli niman on “siuaauilnenki”. Yejua okijto: “Maka xmokauili ma mitsyekana [on siuatl] ipan on xkuajli iojui” (Prov. 7:25). Noijki okijto: “Xtlalkaui on siuatl, nion achijtsin maka xnisiui ichan” (Prov. 5:​3, 8). Yejuin kijtosneki ika tla xtiknekij titlajtlakoskej, noijki xnoneki tikchiuaskej tlen ueliskia kichiuas matitlajtlakokan. b Onka seki tlemach tlen uelis tikchiuaskej pampa Biblia xkijtoua tla se tlajtlakojli, san ika, tla tikmatstokej ika itlaj ueliskia kichiuas matikileuikan tlen xkuajli, xnoneki tikchiuaskej (Mat. 5:​29, 30).

12. ¿Tlenon okijto Job, niman kenijki yejon kipaleuiskia maka maauilnemi? (Job 31:1).

¹² Tla xtiknekij tikchiuaskej tlen ueliskia kichiuas matitlajtlakokan, uelis tikchiuaskej tlen  okichiuj Job. Yejua xkinekiya kimitas siuamej ika xkuajli ileuilistli. Ika yejon, okijto ipan iyojlo tlenon kichiuas. Yejua okijto: “Nejua oninonauatij ika xkaman nikintas on ichpokamej ikan xkuajli eleuilistli” (xpoua Job 31:1). Yejuin kipaleuiskia maka maauilnemi. Aman tejuamej noijki uelis tikijtoskej ipan toyojlo tlenon xnoneki tikchiuaskej niman ijkon xtikileuiskej tlen xkuajli tlen uelis kichiuas matitlajtlakokan.

13. ¿Tleka xnoneki tiknemiliskej tlen xkuajli? (Noijki xkimita tlaixkopinaltin).

¹³ Noijki noneki totlajpiyaskej ika tlen tiknemiliaj (Éx. 20:17). Sekimej kijtouaj ika tla san tiknemilia ika tikchiujtok tlen xkuajli niman xijkon tikchiua, xtlaj panoua. San ika, san no yejuamej nokajkayauaj. Pampa ijkuak más tiknemiliskej ika tikchiujtokej tlen xkuajli, más tiknekiskej ijkon tikchiuaskej. Niman tla ijkon tikchiuaj, kentla san no tejuamej tiktejtemoskiaj tlen iuan toxijxikoskiaj. San ika, kemantika peua tiknemiliaj tlen xkuajli maski xtiknekij. Ijkuak ijkon panos, ¿tlenon noneki tikchiuaskej? Noneki nimantsin tiknemiliskej tlen kuajli niman ijkon xtiknemilijtoskej tlen xkuajli pampa ueliskia tikileuiskej tlen xkuajli tla san yejon tiknemilijtokej niman más ouijtika tikitaskej toteltiskej niman ueliskia titlajtlakoskej (Filip. 4:8; Col. 3:2; Sant. 1:​13-15).

14. ¿Tlenon techpaleuis maka matiknekikan tikchiuaskej tlen xkuajli?

¹⁴ ¿Tlenon noijki techpaleuis matitlatlachixtokan niman ijkon xtikchiuaskej se tlajtlakojli? Noneki kuajli matikmatstokan ika tla tikintlakamatij itlanauatiluan Jehová, melak techpaleuis. Kemantika ueliskia ouijtika tikitaskej titlanemiliskej noso tiknekiskej tikchiuaskej ijkon ken Jehová kuelita. San ika, tla tokojtiliaj nochipa tiktlakamatiskej Jehová, melak tiyolpakiskej.

15. ¿Tlenon techpaleuis matiknekikan tikchiuaskej tlen kuajli?

¹⁵ Melak noneki matokojtilikan nochipa matiknekikan tikchiuaskej tlen kuajli. Tla tejuamej tiktlauelitaj tlen xkuajli niman tiktlasojtlaj tlen kuajli, tiknekiskej nochipa tikchiuaskej  tlen kuajli niman xtikchiuaskej tlen ueliskia kichiuas matitlajtlakokan (Amós 5:15). Niman tla kemantika tikpiyaj se tetlatlatalistli tlen xtikchiayaj, uelis tikxikoskej niman xtitlajtlakoskej.

16. ¿Kenijki techtlajpiya ijkuak tikchiuaj tlen techpaleuiya más matiktlasojtlakan Jehová? (Noijki xkimita tlaixkopinaltin).

¹⁶ ¿Tlenon uelis tikchiuaskej niman ijkon matiknekikan tikchiuaskej tlen kuajli? Tla nochipa tikchiuaj tlen techpaleuis más matiktlasojtlakan Jehová. Ijkuak tinemij ipan tlanechikoltin noso ijkuak titenojnotsaj, más tiknekij tikyolpaktiskej Jehová niman xmás tikileuiyaj tlen xkuajli (Mat. 28:​19, 20; Heb. 10:​24, 25). Ijkuak tikamapouaj niman tomachtiaj iTlajtol toTajtsin niman itech titlanemiliaj, techpaleuiya matiktlasojtlakan tlen kuajli niman matiktlauelitakan tlen xkuajli (Jos. 1:8; Sal. 1:​2, 3; 119:​97, 101). Niman noijki matikilnamikikan tlen Jesús otechijli: “Xchiuakan oración para maka mechtlanis tetlatlatalistli” (Mat. 26:41). Ijkuak tejuamej tikxelouaj tiempo para tiknotsaskej toTaj iluikakchane, noijki tokauilijtokej matechpaleui para matiknekikan matikyolpaktikan (Sant. 4:8).

NOCHIPA MATITLATLACHIXTOKAN

17. ¿Iuan tlenon miyekpa onoxijxiko Pedro?

¹⁷ Kanaj aman xok toxijxikouaj iuan seki tlemach tlen yeuejkaui iuan toxijxikouayaj. San ika, onka seki tlemach tlen ok iuan toxijxikojtokej. Matikteneuakan tlen ipan opanok apóstol Pedro. Yejua kinmakasiya oksekimej. Sejpa, yexpa okijto ika xkixmatiya Jesús (Mat. 26:​69-75). San ika, sakin yejua onoyolchikauj niman otenojnots ixpan Sanedrín. Kuakon, nesiya ika yejua xok nomojtiaya (Hech. 5:​27-29). San ika, seki xiujtin sakin, yejua xok otlakua imiuan tokniuan akin xjudíos katkaj pampa okinmakas “on yejuan ipan nouikaj on tlanauatijli de circuncisión” (Gál. 2:​11, 12). Ken tikitaj, Pedro oksejpa opeuj noxijxikoua iuan tlen yeuejkaui iuan noxijxikotoya, niman xtikmatij tla ouel okikajkauj ika kinmakasiya oksekimej.

18. ¿Tlenon ueliskia oksejpa topan nochiuas?

¹⁸ Kanaj tejuamej oksejpa nonekis toxijxikoskej iuan tlen yeuejkaui iuan toxijxikouayaj. Se tokniuj tlakatl ijkin kijtoua: “Xonikitak pornografía 10 xiuitl niman oniknemili ika xok iuan ninoxijxikoskia. San ika, yejon ileuilistli ompa  onkatka, ken se yolki akin san kichiatok oksejpa tekuas”. ¡Melak kuajli ika tokniuj nochipa onotlajpix! Yejua okasikamat ika tla kinekiya kixikos yejon tetlatlatalistli, mojmostla noneki noxijxikos iuan yejon xkuajli ileuilistli niman kanaj nonekis iuan noxijxikojtos hasta ipan yenkuik tlaltikpaktli. Isiuauj niman tokniuan tlayekankej yokipaleuijkej makichiua tlen kipaleuis maka oksejpa kitas pornografía.

19. ¿Tlenon uelis tikchiuaskej tla ok itlaj iuan toxijxikojtokej?

¹⁹ Tla ok itlaj iuan toxijxikojtokej, ¿tlenon techpaleuis maka matitlajtlakokan? Tla tikchiuaj tlen Jesús okijto: “Xtlachixtiakan”. Niman tla tiknemiliaj ika xok itlaj iuan toxijxikojtokej, maka tipeuaskej tikchiuaskej tlen ueliskia kichiuas matitlajtlakokan (1 Cor. 10:12). Niman nochipa xchiua tlen yotikitak ika mitspaleuiya maka xchiua tlen xkuajli. Proverbios 28:14 kijtoua ika akin nochipa tlatlachixtok melak yolpaki (2 Ped. 3:14).

¿KENIJKI TECHPALEUIYA TLA TITLATLACHIXTOKEJ?

20, 21. a) ¿Kenijki techpaleuiya tla titlatlachixtokej? b) ¿Tlenon kichiuas Jehová tla kita ika noijki tokojtiliaj titlaxikoskej? (2 Corintios 4:7).

²⁰ Melak kuajli tla tokojtiliaj nochipa titlatlachixtoskej para xtikchiuaskej se tlajtlakojli. Ijkuak tikchiuaj se tlajtlakojli, xuejkaui ika tiyolpakij. San ika, ijkuak tikintlakamatij itlanauatiluan Jehová, más tiyolpakij (Heb. 11:25; Sal. 19:8). Niman ijkon panoua pampa tejuamej otexchijchiujkej para matiktlakamatikan Jehová (Gén. 1:27). Niman uelis tikpiyaskej totlamachilis chipauak niman uelis nochipa tinemiskej tla tiktlakamatij Jehová (1 Tim. 6:12; 2 Tim. 1:3; Jud. 20, 21).

²¹ Ken yotikteneujkaj, totlalnakayo xkojtik, san ika, yejon xkijtosneki tla xuelis tikchiuaskej tlen kuajli pampa Jehová touan nemi para techpaleuis (xpoua 2 Corintios 4:7). Jehová uelis techmakas ikojtilis para uelis titlaxikoskej. San ika, noijki noneki tiktekitiltiskej tokojtilis niman ijkon uelis iuan toxijxikoskej tlen xkuajli tikileuiyaj niman ijkon xtitlajtlakoskej. Niman tla ijkon tikchiuaj, kuajli matikmatstokan ika Jehová techmakas kojtilistli ijkuak tiktlajtlaniliskej (1 Cor. 10:13). Kuakon, kuajli matikmatstokan ika uelis titlatlachixtoskej niman xtitlajtlakoskej pampa Jehová techpaleuis.