1. ¿Tleka akin tiitekipanojkauan Jehová tiktlasojtlaj tlen temachtia iTlajtol?

 AKIN tiitekipanojkauan Jehová tiktlasojtlaj tlen temachtia iTlajtol pampa yejon tlen melauak, niman san yejon tikneltokaj (Rom. 10:17). Noijki tikmatstokej ika tlanechikoltin “kejeuaj niman kimanauiyaj on tlen melauak” pampa Jehová yejua akin okintlali (1 Tim. 3:15). Niman tiknektokej tikintlakamatiskej akin techyekanaj pampa yejuamej techmachtiaj tlen melauak kiteititia Biblia niman techijliaj kenon uelis tiktlakamatiskej toTajtsin (Heb. 13:17).

2. Ijkon ken kijtoua Santiago 5:​19, ¿tlenon ueliskia topan panos?

² Tejuamej tikneltokaj tlen melauak niman tikmatstokej ika noneki tikchiuaskej tlen ikalpan toTajtsin techijlia. Maski ijkon, ueliskia tiktlalkauiskej tlen melauak (xpoua Santiago 5:19). Satanás kuelitaskia maka sa matitlaneltokakan itech Biblia noso maka matikchiuakan tlen ikalpan Jehová techijlia (Efes. 4:14).

3. ¿Tleka melak noneki matikmatikan katlejua tlen melauak niman katlejua tlen xmelauak? (Efesios 6:​13, 14).

³ (Xpoua Efesios 6:​13, 14). Sa achijtsin poliui ijkuak Diablo más tekajkayauas niman ijkon kalpamej makixnamikikan Jehová (Apoc. 16:​13, 14). Noijki tikmatstokej ika Satanás mojmostla más kinkajkayauas itekipanojkauan Jehová (Apoc. 12:9). Ika yejon, melak noneki matikmatikan katlejua tlen melauak  niman katlejua tlen xmelauak niman nochipa matikchiuakan tlen melauak (Rom. 6:17; 1 Ped. 1:22). Niman melak noneki ijkon matikchiuakan para timakisaskej ijkuak tinemiskej ipan ueyi tlajyouilistli.

4. ¿Tlenon tikitaskej ipan yejuin tlamachtijli?

⁴ Ipan yejuin tlamachtijli tikitaskej ome kualneskayomej tlen noneki matikinpiyakan para uelis tikmatiskej tlen melauak temachtia Biblia niman para tiknektoskej tikchiuaskej tlen techijlia ikalpan Jehová. Noijki tikitaskej yeyi tlemach tlen noneki tikchiuaskej niman ijkon xtiktlalkauiskej tlen melauak.

¿TLENON TECHPALEUIS MATIKMATIKAN KATLEJUA TLEN MELAUAK?

5. ¿Tleka tla tiktlakaitaj Jehová techpaleuis matikitakan katlejua tlen melauak?

⁵ Matiktlakaitakan Jehová. Tla tiktlakaitaj Jehová, melak tiktlasojtlaskej niman xkeman tikchiuaskiaj tlen yejua xkuelitas. Tejuamej tiknekij tikmatiskej tlenon kuajli niman tlenon xkuajli niman katlejua tlen melauak niman katlejua tlen xmelauak niman ijkon uelis tikyolpaktiskej Jehová (Prov. 2:​3-6; Heb. 5:14). Xnoneki melak matikinmakasikan oksekimej, yej noneki más matiktlasojtlakan Jehová pampa kemantika tlen kuelitaj kichiuaskej tlaltikpakchanejkej xkuelita Jehová.

6. ¿Tlenon opanok pampa 10 ichtakatlachixkej okiminmakaskej cananeos?

⁶ Tla peua melak tikinmakasij oksekimej, ueliskia xok más tiktlakaitaskej Jehová, niman yejon ueliskia kichiuas matikneltokakan tlen xok ualeua itech yejua. Matitlanemilikan itech 12 ichtakatlachixkej akin okitatoj Tlajli tlen yonoijtoka kinmakaskej. Yejuin ichtakatlachixkej kitlasojtlayaj Jehová, san ika, 10 ichtakatlachixkej más okiminmakaskej cananeos, ika yejon, ijkin okijtojkej: “Ka, tejuamej xtiueliskej tikinuijsokiskej on tlakamej, pampa yejuamej nesi sanoyej kojtikej xken tejuamej” (Núm. 13:​27-31). Yejuamej  kijtojtoyaj tlen melauak ijkuak okijtojkej ika cananeos más kojtikej katkaj xijkon ken israelitas. San ika, ijkuak okijtojkej ika xueliskiaj kintlaniskej, okiteititijkej ika kilkaujtoyaj Jehová. Yejuamej san nonekiya kilnamiktoskej ika Jehová yokimijlijka kinmakas yejon tlaltin. Niman noijki nonekiya kilnamikiskej kenon Jehová yokinpaleuijka. Yejon kinpaleuiskia makitakan ika cananeos xueliskiaj kintlaniskej pampa Jehová kinpaleuiskia. San ika, Josué niman Caleb xokichiujkej ijkon ken 10 ichtakatlachixkej. Yejuamej melak tlaneltokayaj itech Jehová niman kinekiyaj kiyolpaktiskej. Ika yejon, ijkin okimijlijkej israelitas: “Tla toTEKO techiknelia, yejua techpaleuis para tikalakiskej ipan on tlajli niman techmakas” (Núm. 14:​6-9).

7. ¿Tlenon techpaleuis más matiktlakaitakan Jehová? (Noijki xkita tlaixkopinajli).

⁷ ¿Tlenon techpaleuis más matiktlakaitakan Jehová? Tla nochipa tiknemiliaj tlenon kuelita achto itlaj tiktlapejpeniskej (Sal. 16:8). Ijkuak itlaj tikamapouas ipan Biblia xmotlajtolti: “Tla nejua ompa ninemiskia, ¿tlenon nikchiuaskia?”. Xkonnemili ika tikaktika tlen kijtojtokej yejon 10 ichtakatlachixkej. ¿Tikneltokaskia tlen kijtouaj niman noijki timomojtiskia? ¿Noso tiknekiskia tikyolpaktis Jehová pampa melak tiktlasojtla? Nion se israelita xokitak ika tlen okijtojkej Josué niman Caleb melauak katka, ika yejon, xokalajkej ipan Tlajli tlen yonoijtoka kinmakaskej (Núm. 14:​10, 22, 23).

8. ¿Tleka melak noneki matiyolyemankej?

⁸ Matiyolyemankej. Jehová kimijlia tlen melauak akin yolyemankej (Mat. 11:25). Ijkuak opeuj tomachtiaj, otoyolyemanilijkej niman otiknejkej matechpaleuikan (Hech. 8:​30, 31). San ika, melak noneki matotlajpiyakan para xtoueyimatiskej, pampa tla peua toueyimatij, ueliskia tiknemiliskej ika tlen tejuamej tiknemiliaj melak ueyi kijtosneki ijkon ken tlen kijtoua Biblia niman tlen techijlia ikalpan Jehová.

9. ¿Tlenon techpaleuis nochipa matiyolyemankej?

⁹ ¿Tlenon techpaleuis nochipa matiyolyemankej? Tla nochipa tikilnamikij ika Jehová más ueyixtika (Sal. 8:​3, 4). Noijki uelis tiktlajtlaniliskej Jehová matechpaleui matiyolyemankej niman matokauilikan matechmachti. Niman Jehová techpaleuis matiknemilikan tlen yejua techmachtia ipan iTlajtol niman tlen technauatia ikalpan, niman maka matiknemilikan ika tlen tejuamej tiknemiliaj más kuajli. Ijkuak tikamapouaskej Biblia, matikitakan kampa techititia kenon Jehová melak kuelita ijkuak yakaj yolyemanki niman kitlauelita ijkuak yakaj noueyimati niman kinemilia ika nochi kuajli kichiua. Niman tla techmakaj se ueyi tekitl ipan ikalpan Jehová, melak noneki matotlajpiyakan para maka peuas toueyimatiskej.

¿TLENON NONEKI TIKCHIUASKEJ PARA XTIKTLALKAUISKEJ TLEN MELAUAK?

10. ¿Akinomej okintlapejpeni Jehová para makinyekanakan itekipanojkauan?

¹⁰ Matitlaneltokakan itech ken ikalpan Jehová techyekana. Yeuejkaui, Jehová okitlali Moisés para makinyekana israelitas, niman sakin okitlali Josué (Jos. 1:​16, 17). Niman israelitas kuajli nemiyaj ijkuak kintlakamatiyaj yejuin tlakamej. Sakin, ijkuak yopanokaj miyek xiujtin, 12 apóstoles yejuamej akin kinyekanayaj tlanechikoltin (Hech. 8:​14, 15). Niman sakin, sekimej tokniuan tlayekankej akin nemiyaj Jerusalén, okintlapejpenijkej para teuan makiyekanakan tlanechikoltin. Niman tokniuan “noyolchikauayaj ipan intlaneltok niman on tlaneltokakej mojmostla más miyekixtiayaj” pampa tokniuan kintlakamatiyaj  tlayekankej (Hech. 16:​4, 5). Aman Jehová noijki techteochiua ijkuak tiktlakamatij ikalpan. San ika ¿kenon nomachilia Jehová ijkuak kita ika xtiknekij tikintlakamatiskej tokniuan akin yejua yokintlapejpeni para matechyekanakan? Matikitakan tlen yeuejkaui opanok ijkuak israelitas yayaj ipan Tlajli tlen yonoijtoka kinmakaskej.

11. ¿Tlenon inpan opanok akin xokinejkej okitlakamatkej Moisés? (Noijki xkita tlaixkopinajli).

¹¹ Ijkuak israelitas yaujtoyaj ipan Tlajli tlen yonoijtoka kinmakaskej, sekimej tlakamej akin uejueyixtoyaj opeuj kitejteneuaj Moisés niman opeuj kijtouaj tleka yejua kinyekanaya. Yejuamej okijtojkej: “Nikan tinochimej tiiyaxkauan toTEKO [xsan Moisés], niman [Jehová] nemi touan tinochimej” (Núm. 16:​1-3). Yemelak, Jehová kema iyaxkauan katkaj nochimej israelitas, san ika, yejua yokitlapejpenijka Moisés para yejua makiyekana ikalpan. Kuakon, ijkuak israelitas kitejteneujtoyaj Moisés, kentla kitejteneujtoskiaj Jehová. Yejuamej xokinemilijkej tlenon kinekiya Jehová, san okinemilijkej ika kinekiyaj más uejueyixtoskej niman más tlayekanaskej. Jehová okinmikti yejuin tlakamej niman nochimej israelitas akin okinpaleuijkej (Núm. 16:​30-35, 41, 49). Kuakon, kuajli matikmatstokan ika Jehová noijki xkuelita ijkuak kita ika sekimej xkinekij kichiuaskej tlen ikalpan techijlia.

12. ¿Tleka titlaneltokaj itech ikalpan Jehová?

¹² ¿Xmelak ika tlen kichiua ikalpan Jehová techititia ika uelis itech titlaneltokaskej? Ijkuak tokniuan akin kiyekanaj ikalpan Jehová kitaj ika noneki nopatlas ken tikasikamatij itlaj tlen kijtoua Biblia noso ika noneki nopatlas itlaj ipan ikalpan, yejuamej nimantsin kipatlaj (Prov. 4:18). Niman ijkon kichiuaj pampa kinekij kiyolpaktiskej Jehová. Noijki melak nokojtiliaj para kitaskej tla tlen kitlapejpeniaj nestok ipan iTlajtol toTajtsin, niman yejuin melak kuajli pampa ken tikmatij, tejuamej san noneki toyekanaskej ika tlen kijtoua Biblia.

13. ¿Tlenon “on kuajli temachtilistli”, niman tlenon noneki tikchiuaskej?

 ¹³ “Xmouika ipan on ejemplo yejuan omitsmachti itech on kuajli temachtilistli” (2 Tim. 1:13). ¿Tlenon “on kuajli temachtilistli”? Nochi tlen Jesús otemachti, tlen onka ipan Biblia (Juan 17:17). Tejuamej san tikneltokaj tlen techmachtia Biblia, ikalpan Jehová yotechmachti para ijkon matikchiuakan. Niman tla nochipa ijkon tikchiuaj, kuajli tonkisaskej.

14. ¿Kenon sekimej xok onoyekankej ika “on kuajli temachtilistli”?

¹⁴ ¿Tlenon panos tla xok toyekanaj ika “on kuajli temachtilistli”? Matikitakan tlen opanok ipan kachtopa siglo. Sekimej kiteijlijtinemiyaj ika yoyejkoka itonal Jehová. Kanaj onkatka se carta tlen kijtouaya yejon niman kinemiliayaj ika okijkuilojka apóstol Pablo. San ika, sekimej nion xotetlajtoltijkej tla yejon melauak katka niman okineltokakej, niman noijki ijkon kiteijlijtinemiyaj. San ika, tla yejuamej kilnamikiskiaj tlen Pablo okinmachti ijkuak imiuan nemiya, yejuamej xkinkajkayauaskiaj (2 Tes. 2:​1-5). Ika yejon, apóstol Pablo okimijli maka makineltokakan nochi tlen kikakiyaj. Niman ijkuak oksejpa okimijkuilouili se carta, yejua ijkin okimijli para maka oksejpa makinkajkayauakan: “In tlajpalouilistli, nejua Pablo nemechtlajkuiluiya ikan noma. Ijkin nemechititia ika in melauak nejua notlajkuilolamauan. Niman ijkin nikijkuiloua” (2 Tes. 3:17).

15. ¿Kenon uelis totlajpiyaskej para xtechkajkayauaskej? Xkijto se neskayotl. (Noijki xkimita tlaixkopinaltin).

¹⁵ Aman tejuamej noijki melak techpaleuiya tlen Pablo okimijli tokniuan tesalonicenses. Tla itlaj techijliaj noso itlaj tijkakij tlen tikitaj ika xnotlajtolnamiki ika tlen kijtoua Biblia, maka nimantsin matikneltokakan. Matikteneuakan tlen yeuejkaui opanok. Ne Unión Soviética, sekimej totlauelikniuan okichijchiujkej se carta tlen nesiya kentla oficina kampa noyekanaj nochi sucursales okontitlan. Ipan yejuin carta kimijliayaj tokniuan manoxelokan itech ikalpan Jehová niman sa no yejuamej manoyekanakan. Maski nesiya ika tokniuan okintitlanilijkej yejuin carta, tokniuan akin melajkanemiyaj  xokineltokakej. Yejuamej okitakej ika tlen kijtouaya yejuin carta xnotlajtolnamikiya ika tlen yejuamej yonomachtijkaj ipan Biblia. Aman totlauelikniuan kitekitiltiaj tecnología niman ijkon techkajkayauaskej niman techxeloskej itech ikalpan Jehová. Kuakon, tla xtiknekij yakaj matechtlamachilispolo, melak noneki matikitakan tla tlen tijkakij noso tlen tikitaj notlajtolnamiki ika tlen kijtoua Biblia (2 Tes. 2:2; 1 Juan 4:1).

16. Ijkon ken kijtoua Romanos 16:​17, 18, ¿tlenon noneki tikchiuaskej tla tikitaj ika yakaj yopeuj kitlalkauiya tlen melauak?

¹⁶ Nochipa matinemikan imiuan akin melajkanemij itech Jehová. ToTajtsin kineki matikueyichiuakan imiuan tokniuan, niman san uelis ijkon tikchiuaskej tla nochipa tikneltokaj tlen melauak. Akin peuaj kitlalkauiyaj tlen melauak kinekij texexeloskej ipan tlanechikojli, ika yejon, Jehová kijtoua maka imiuan matouikakan para ijkon xtechijtlakoskej (xpoua Romanos 16:​17, 18).

17. ¿Tlenon panos tla tikmatij katlejua tlen melauak niman san yejon tikneltokaj?

¹⁷ Tla tikmatij katlejua tlen melauak, niman san yejon tikneltokaj, tinemiskej nisiuj itech Jehová niman totlaneltok chikaujtos (Efes. 4:​15, 16). Noijki xtokauiliskej matechkajkayauakan niman xtikneltokaskej tlen xkuajli temachtia Satanás, niman Jehová techtlajpiyas ipan ueyi tlajyouilistli. Kuakon, nochipa matikneltokakan tlen melauak niman toTajtsin akin teyolseuiya touan nemis (Filip. 4:​8, 9).