SA ACHIJTSIN poliuiya ika israelitas kipanauiskiaj atentli Jordán niman ijkon kalakiskiaj ipan Tlajli tlen toTajtsin yokimijlika kinmakas. San ika, se tonajli sekimej siuamej akin xompa chanejkej katkaj okimitatoj niman okiminotskej tlakamej imiuan matlakuatij. Kanaj okinyoltilan yejon pampa ijkon ueliskiaj teixmatiskiaj, nijtotiskiaj niman kuajli tlakuaskiaj. ToTajtsin yokimijlika israelitas ika xkuajli katka tlen kichiuayaj yejon siuamej, maski ijkon, sekimej tlakamej kanaj okinemilijkej ika ueliskiaj notlajpiyaskiaj niman xitlaj inpan nochiuaskia.

 San ika ¿tlenon opanok? Biblia techijlia: “Opejkej auilnemij iminuan on moabitas siuamej”. Yejuin siuamej san kinekiyaj ika tlakamej israelitas makinueyichiuakan tajtsitsintin. Niman yejon tlen okichiujkej israelitas. Ika yejon, Jehová okualan iuan ikalpan (Núm. 25:1-3).

Yejon israelitas xokitlakamatkej iTlanauatil toTajtsin pampa okichiujkej ome tlemach tlen xkuajli: onotlakuantelketskej imixpan tajtsitsintin niman oauilnenkej. Melak miyekej omijkej pampa xotetlakamatkej (Éx. 20:4, 5, 14; Deut. 13:6-9). ¿Tleka melak teajman tlen okichiujkej? Pampa sa achijtsin poliuiya ika kipanauiskiaj atentli Jordán niman kalakiskiaj ipan Tlajli tlen toTajtsin yokimijlika kinmakas. Tla yejuin tlakamej kitlakamatiskiaj iTlanauatil toTajtsin, ueliskiaj panoskiaj (Núm. 25:5, 9).

Apóstol Pablo okilnamik yejuin tlen opanok ijkuak okijkuilo: “Nochi tlen impan onochiu on toachtojtajuan onotlajkuiloltlalij ipan on Yektlajkuilojli ken sen ejemplo para maka no ijki tikchiuaskej, yejuan tinemij ipan in sa ika nochi tiempo” (1 Cor. 10:7-11). Kuajli tikmatstokej ika Satanás okiyolpakti ika yejon israelitas okichiujkej se ueyi tlajtlakojli niman ika ipampa yejon xouel okalajkej ipan Tlajli tlen toTajtsin yokimijlika kinmakas. Noneki totlajpiyaskej maka tikchiuaskej ken yejon israelitas, pampa tikmatstokej ika Satanás kuelitaskia maka matikalakikan ipan yenkuik tlaltikpaktli tlen toTajtsin yotechijli techmakas.

Satanás kuajli yokitak kenon uelis techtlajkalis akin tiktekichiuiliaj Jehová, pampa miyekej yokintlajkal. Ken yotikontakej, okichiuj ika israelitas maauilnemikan. Niman aman noijki kineki yejon matikchiuakan. ¿Kenon Satanás kiyejyekoua matiauilnemikan? Yejua kitekitiltia pornografía.

Ipan yejuin tonaltin, yakaj uelis kitas pornografía niman xakaj kimatis. Ikipiya seki xiuitl, tla yakaj kinekiya kitas pornografía, nonekiya yas cine konitas se película noso nonekiya kinkouas revistas noso amoxtin tlen kipiayaj pornografía. Kanaj miyekej xkichiuayaj pampa pinauiyaj makimitakan. San ika, aman maski san akinon uelis kalakis Internet niman kitas pornografía kampa tekiti noso hasta ipan icarro. Niman ipan miyek países, tlakamej niman siuamej uelij kitaj pornografía inchan, aman xok noneki kisaskej.

San ika, xsan yejon. Celulares noso tabletas kichiuaj ika se xouijtika makita pornografía. Yakaj uelis nejnentias, yas ipan autobús noso ipan tren niman kimitstias xkuajkualtin tlaixkopinaltin ipan icelular noso itableta.

Ken yotikitakej, xouijtika ika yakaj makita pornografía niman ika oksekimej maka makimatikan. Yejuin melak teijtlakojtika. Ipampa yejon, miyekej xok kuajli nemij imiuan imixnamik, xok kuajli nomachiliaj niman kinpajsoloua intlamachilis. Niman tlen melak xkuajli, uelis kijtlakoskej ken nouikaj iuan toTajtsin. Uelis kuajli tikmatstoskej ika pornografía melak teijtlakoua. Miyekpa, kichiua ika se san manoyolkokojtinemi. Kanaj ika yolik se uelis más kuajli nomachilijtias, san ika, kemantika xok ueli popoliui.

Maka matikilkauakan ika Jehová techpaleuiya matotlajpiyakan itech yejuin tlen Satanás kitekitiltia. Tla tiknekij matechpaleui, noneki tikchiuaskej tlen tlakamej israelitas xokichiujkej: noneki tikchiuaskej nochi tlen toTajtsin kijtoua (Éx. 19:5). Kipiya ika tikasikamatiskej ika toTajtsin kitlauelita pornografía. ¿Tleka ijkon tikijtouaj?

Matitlanemilikan itech yejuin: tlanauatiltin tlen toTajtsin okinmakak israelitas melak tlamantikej katkaj itech itlanauatiluan okseki kalpamej. Itlanauatiluan toTajtsin katkaj ken se tepantli, kinpaleuiaya israelitas maka imiuan manosentlalikan niman maka makichiuakan tlen yejuamej kichiuayaj (Deut. 4:6-8). Yejuin tlanauatiltin kiteititiayaj itlaj tlen ueyi kijtosneki: ika Jehová kitlauelita auilnemilistli.

 Ijkuak Jehová okijto nochi tlen xkuajli kichiuayaj kalpamej tlen nisiuj onkatkaj, noijki okimijli israelitas: “Maka nemouikaskej ken kichiuaj on tlakamej yejuan chantij ipan on tlajli Canaán kampa nemechuikas. Nion maka nenkintlakamatiskej iminleyes. [...] Impaís no kijtlakouaj nixpan ipampa on miyek tlajtlakojli, niman yejua ika nochi on tlakamej yejuan nemij ompa nikincastigaros niman nikinkixtis”. ToTajtsin akin chipauak itech Israel kitaya ika ken chantiyaj cananeos melak tsokuiltik katka, niman hasta okijto ika tlajli kampa chantiyaj melak yoijtlakaujka niman yotsokuiliujka (Lev. 18:3, 25).

Maski Jehová okintlajyouilti cananeos, oksekimej tlaltikpakchanejkej ok auilnemiyaj. Ijkuak yopanoka 1,500 xiuitl, Pablo okijto ika uejueyimej kalpamej kampa chantiyaj tokniuan xok kimatiyaj “tla itlaj tepinajtij”. Yejuamej kichiuayaj “nochi tlen xkuajli” tlen ualeuaya ipan intlamachilis. Melak kuelitayaj kichiuaskej “nochi tlajtlamach tlen xchipauak” (Efes. 4:17-19). Aman miyekej noijki melak auilnemij. Akin melauak kichiuaj ken Cristo melak nokojtiliaj xkitaskej kenon auilnemilo ipan yejuin tlaltikpaktli.

Pornografía kixnamiki toTajtsin. ToTajtsin otexchijchiuj ijkon ken yejua niman okichiuj matikmatikan tlenon kuajli noso tlenon xkuajli. Ika tlamachilistli, okintlali tlanauatiltin itech relaciones sexuales. Kinekiya kiteititis ika san se tlakatl niman se siuatl akin yononamiktijkej ueliskej notekaskej (Gén. 1:26-28; Prov. 5:18, 19). San ika, akin kiteititiaj pornografía xkitlakaitaj toTajtsin nion itlanauatiluan. Ika yejon, yejua kintlajtlakolmakas yejuin tlaltikpakchanejkej (Rom. 1:24-27).

¿Niman tlenon uelis tikijtoskej intech akin kipouaj noso kitaj pornografía san pampa yejuamej kinekij? Kanaj sekimej kijtouaj ika yejon xteijtlako. San ika, yejuamej kinpaleuijtokej akin xkitlakaitaj itlanauatiluan toTajtsin. Kanaj xkinekiyaj kichiuaskej yejon ijkuak opeujkej kitaj pornografía. San ika, Biblia kuajli kijtoua ika akin kitekichiuiliaj toTajtsin kipiya ika kitlauelitaskej. Biblia technauatia: “Nemejuamej yejuan nenkitlajsojtlaj toTEKO, maka xnekikan on tlen xkuajli” (Sal. 97:10).

Niman hasta akin xkinekij kitaskej pornografía kimachiliaj ika ouijtika xuetsiskej ipan yejon. Pampa titlajtlakolejkej, kanaj tikyejyekojtokej xtikpiyaskej seki xkuajkualtin ileuilistin. Niman toyojlo  tlen noijki tlajtlakole uelis kichiuas matiknemilikan ika kuajli tla xtiktlakamatij itlanauatil toTajtsin (Jer. 17:9). San ika, miyekej akin aman tokniuan youelkej yokixnamijkej yejon. Yejuin uelis kinyolchikauas akin kiyejyekojtokej xkitaskej pornografía. Matikitakan kenon iTlajtol toTajtsin uelis techpaleuis matikmapeuakan yejuin tlen Satanás kitekitiltia.

Ken otikitakej ijkuak opeuj tlamachtijli, miyekej israelitas xkuajli tlen inpan onochiuj pampa okileuijkej tlen xkuajli. Aman noijki ijkon uelis panos. Santiago, akin itlakpaikniuj katka Jesús, okijto yejuin: “Sano yejua on xkuajli ieleuilis sen tlakatl kitlatlata para ma tlajtlako [...]. On xkuajli eleuilistli yejua kitsmolinaltia on tlajtlakojli” (Sant. 1:14, 15). Ijkuak yakaj kikauilia ika ipan iyojlo manoskalti se xkuajli ileuilistli, uelis kichiuas se tlajtlakojli. Ika yejon, maka matiknemilikan tlen xkuajli; matikmapeuakan tlanemililtin tlen tsokuiltikej.

Tla tikitaj ika xtiuelij tijkajkauaj tiknemiliaj tlen xkuajli, nimantsin itlaj matikchiuakan. Jesús okijto: “Tla moma noso mokxi mitschiuilia titlajtlakoua, xteki niman uejka xkontlajkali. [...] Niman tla mixtololoj mitschiuilia para titlajtlakoua, xkixti niman uejka xkontlajkali” (Mat. 18:8, 9). Nikan Jesús xkijtotoya ika yemelak noneki itlaj totekiliskej. Yejua kinekiya kiteititis ika noneki nimantsin matokixtilikan tlen uelis kichiuas matikchiuakan tlen xkuajli. ¿Kenon uelis tikchiuaskej yejuin tlen okijto Jesús niman ijkon xtikitaskej pornografía?

Matiknemilikan ika uajnestiuetsi se tlaixkopinajli tlen xkuajli. Maka matiknemilikan ika xtlaj topan nochiuas. Nimantsin oksekan matontlachiakan. Matikseuijtiuetsikan televisión, computadora noso celular. Matitlanemilikan itech itlaj tlen kuajli. Tla tikchiuaj yejuin, techpaleuis kuajli matitlanemilikan, niman xtijkauiliskej ika xkuajkualtin ileuilistin matechyekanakan.

Tlaixkopinaltin niman tlanemililtin tlen kipiyaj pornografía uelis nokauas ipan totsontekon miyek xiuitl, niman uelis tikimilnamikiskej ijkuak nion xtiknemiliskej. Ijkuak panoua yejon, se uelis kinekis nomajmatokas noso kichiuas okse itlaj  tlen más xkuajli. Kuakon, maka xkilkaua ika kemantika kanaj tikilnamikis tlen tsokuiltik, ika yejon, noneki kuajli xmatsto kenon tikinmapeuas yejon xkuajkualtin tlanemililtin.

Matitlanemilikan niman matikchiuakan ijkon ken kuelita toTajtsin. Xchiua ken apóstol Pablo, yejua okijto: “Notlalnakayo nicastigaroua ken noneki para nechtlakamati” (1 Cor. 9:27). Maka xmokauili mamitsyekanakan xkuajkualtin tlanemililtin. Xchiua tlen kijtoua Romanos 12:2: “Xkauilikan Dios ma yejua kiyenkuili nemotlamachilis. Ijkin tej, nenkimatiskej tlinon Dios kineki: on tlen kuajli, on tlen kipaktia niman nochi on tlen chipauak”. Maka xkilkaua ika melak tiyolpakis tla titlanemilia niman tikchiua ken kineki toTajtsin. San ika, tla tikchiua tlen tikileuiya, xijkon tiyolpakis.

Xyejyeko xkintsontekontlali seki tlaxeloltin tlen mamitspaleuikan xtlauelita pornografía ijkon ken Jehová kitlauelita niman tlen mamitspaleuikan xkasikamati tlen yejua kitlajtlani motech. Ijkon, ijkuak tikualilnamikis tlen xkuajli, xmochiualti xtlanemili itech yejon tlaxeloltin. Yejuin seki tlaxeloltin, Salmo 119:37, Isaías 52:11, Mateo 5:28, Efesios 5:3, Colosenses 3:5 niman 1 Tesalonicenses 4:4-8.

¿Niman tla tikmachilia ika melak tikneki tikitas noso tiknemilis itlaj tlen tsokuiltik? Xchiua ijkon ken okichiuj Jesús (1 Ped. 2:21). Ijkuak yonoapolaktijka, Satanás miyekpa okitlatlatak. ¿Tlenon okichiuj Jesús? Yejua okixnamik Satanás. Okinmapeuj itlatlatalisuan niman nochipa okiteneuj tlen kijtoua Biblia. Okijli: “Xuiya Satanás”, niman Satanás okitlalkaui. Ijkon ken Jesús ouel okixnamik Satanás, tejua noijki uelis tikixnamikis (Mat. 4:1-11). Satanás niman akin kinyekana ok kinekiskej techkalaktiliskej ipan totsontekon tlen tsokuiltik, san ika, maka matokauilikan. Uelis tikixnamikiskej pornografía. Jehová techpaleuis matiktlanikan Satanás.

Nochipa matikchiuilikan teoyotl Jehová niman matiktlajtlanilikan matechpaleui. Pablo okijto: “Xtlajtlanilikan Dios tlen mechp[o]loua niman xmakakan tlaxtlauijli. Niman Dios mechmakas yolseuilistli más ueyi yejuan xakaj uelis kajsikamatis. Niman in yolseuilistli kejeuas nemoyojlo niman nemotlamachilis pampa itechkopa Cristo Jesús nennemij san sekan” (Filip. 4:6, 7). Jehová techmakas yolseuilistli tlen noneki ijkuak toxijxikoskej ika tlajtlakojli. Tla tiknisiuiyaj toTajtsin, yejua noijki technisiuis (Sant. 4:8).

Uelis tikixnamikiskej maski san tlenon tla tiknisiuiyaj toTajtsin akin melak ueyixtika. Jesús okijto itech Satanás: “Ye uajlau on diablo yejuan tlamandaroua ipan in tlaltikpaktli. Maski yejua xkipiya poder para nechtlanis” (Juan 14:30). ¿Tleka Jesús kuajli kimatstoya ika Diablo xueliskia kitlanis? Sejpa okijto: “On yejuan onechajtitlan nouan nemi. NoTajtsin xnoselti nechkaua, pampa nejua nochipa nikchiua tlen yejua kuelita” (Juan 8:29). Tla tikchiuaj tlen Jehová kuelita, yejua noijki xsan toselti techkauas. Matikmapeuakan pornografía niman Satanás xuelis techtlanis.