TINOCHIMEJ tikmatstokej ika Jehová kinyekana itekipanojkauan niman kinchikauilia intlaneltokil ipan yejuin itlamiyan tonaltin (2 Tim. 3:1, TNM). San ika, toseselti noneki tiktlapejpeniskej tla tiktlakamatiskej. Noneki tikchiuaskej ijkon ken israelitas akin nemiyaj ipan tlaluaktli. Yejuamej nonekiya itlaj kichiuaskiaj ijkuak kinkakiskiaj tlapitsaltin noso trompetas.

Jehová okijlika Moisés: “Xchijchiua ome tlapitsajli de plata yejuan tlatetsotsontli ikan martillo. Ika on tlapitsaltin tikinnotsas on israelitas para ma nosentlalikan, niman no para ma kimatikan ijkuak notekpanaskej para kisaskej” (Núm. 10:2). Teopixkej nonekiya tlatlamantik kinpitsaskej intlapitsaluan niman ijkon israelitas kimatiskiaj tlenon kichiuaskiaj (Núm. 10:3-8). Ipan yejuin tonaltin, akin tiktekichiuiliaj Jehová noijki kentla tikinkakiskiaj tlapitsaltin. Matikitakan tleka ijkon tikijtouaj. Uelis tikijtoskej ika tikinkakij yejuin tlapitsaltin ijkuak technotsaj matiuiyan ipan uejueyimej tlanechikoltin, ijkuak kinmajmachtiaj tlayekankej kenon más kuajli kichiuaskej intekiyo niman ijkuak kimijliaj tlanechikoltin tlenon noneki kichiuaskej.

Ijkuak Jehová kinekiya ika nochimej israelitas manosentlalikan itech ikalakiyan on tabernáculo, teopixkej kinpitsayaj “on ome tlapitsaltin” (Núm. 10:3). Nochimej tribus tlen naujkan xeliujtoyaj niman nemiyaj iyeualiujyan tabernáculo kuajli kinkakiyaj yejuin tlapitsaltin. Kanaj israelitas akin ompa nisiuj nemiyaj nimantsin ajsiyaj. San ika, israelitas akin uejka nemiyaj kanaj más uejkauiyaj ika ajsiyaj. Maski tla nisiuj noso uejka nemiyaj, Jehová kinekiya ika nochimej manosentlalikan niman makikakikan tlen yejua kimijlisnekiya.

Ipan yejuin tonaltin, noijki technotsaj matiuiyan ipan uejueyimej tlanechikoltin. San ika, tejuamej xtiauej ipan tabernáculo, yej tiauej ipan uejueyimej tlanechikoltin yeyi tonajli niman okseki tlanechikoltin kampa techijliaj tlen melak techpaleuis. Ipan nochi tlaltikpaktli, itekipanojkauan Jehová akin yauej ipan yejuin uejueyimej tlanechikoltin, melak nopaleuiyaj ika tlen ompa nopanoltia. Sekimej noneki uejka nejnemiskej niman ijkon yaskej ipan uejueyimej tlanechikoltin. San ika, nochimej nokojtiliaj yaskej pampa kimatstokej ika melak kinpaleuis.

¿Tlenon kichiuaj tokniuan akin melak uejka chantij niman xuelij yauej ipan uejueyimej tlanechikoltin? Ipampa tecnología tlen aman onka, yejuin tokniuan ueli kitaj tlen nopanoltia ipan uejueyimej tlanechikoltin, niman kimachiliaj kentla ompa nemiskiaj. Ijkin onomachilijkej tokniuan akin chantij Arlit (Níger), se pitentsin kalpan tlen nokaua  ipan tlaluaktli Sahara. Ijkuak se tokniuj akin ualeua itech oficina kampa noyekanaj nochi sucursales okitlajpaloto sucursal de Benín, tokniuan de Arlit onosentlalijkej niman ijkon kitaskej tlanechikojli tlen nopanoltiskia ne sucursal. Onosentlalijkej 21 tokniuan niman oksekimej akin kemach nomachtijtoyaj Biblia. Maski yejuamej xnemiyaj imiuan yejon 44,131 akin onosentlalijkej ipan se ueyi tlanechikojli, onomachilijkej kentla ompa nemiskiaj. Se tokniuj okijkuilo: “Melak tiktlasojkamatij pampa ouel otikitakej yejuin tlanechikojli. Yejuin techititia kenon melak nentechtlasojtlaj”.

Ijkuak teopixkej kipitsayaj san se tlapitsajli, san nosentlaliayaj ipan tabernáculo akin “tlayekanaj ipan cada tribu” (Núm. 10:4). Ompa Moisés kimititiaya kenon más kuajli kinyekanaskej imintribus. Tla tejuamej titlayekanaskiaj ipan se tribu, ¿xmelak ika tokojtiliskiaj ompa tinemiskej niman tokauiliskej matechmachtikan?

Ipan yejuin tonaltin, tlayekankej xkinemiliaj ika tlanechikojli yejuamej inyaxka (1 Ped. 5:1-3). San ika, kema nokojtiliaj kuajli kitlajpiyaskej ikalpan toTajtsin. Ika yejon, melak yolpakij ijkuak kinmajmachtiaj kenon más kuajli kichiuaskej intekiyo. Niman ika inyojlo yauej ipan Tlamachtijli itech iTekiyo Tekiuajyotl. Yejuin kinpaleuiya más kuajli makiyekanakan tlanechikojli. Ipampa yejuin tlamachtijli tlen kiseliaj, tlayekankej niman nochimej tokniuan akin nemij ipan tlanechikojli más kuajli nouikaj iuan Jehová. Maski kanaj tejuamej xtikseliaj nion se itech yejuin tlamachtiltin, uelis techpaleuis tlen tlayekankej ompa onuelij.

Kemantika, teopixkej israelitas miyekpa kinpitsayaj intlapitsaluan. Jehová okijto ika ijkuak ijkon tlapitsaskiaj israelitas, nonekiya “notekpanaskej para kistiaskej” (Núm. 10:5, 6). Jehová melak kuajli ken kinyekanaya. San ika, yejuamej noijki nonekiya nokojtiliskej niman ijkon nochi kuajli makisa. Sekimej kanaj ouijtika kitayaj kitlakamatiskej Jehová. ¿Tleka?

Sekimej kanaj kinemiliayaj ika melak miyekpa tlapitsayaj niman ika kichiuayaj ijkuak nion xkichiayaj. Biblia kijtoua ika “kamantika on moxtli noteltiaya san se yeuajli” niman ika kualkan “peuaya yau”, niman kemantika “noteltiaya [...] ome tonajli, se metstli” noso más (Núm. 9:21, 22). ¿Niman kechpa ononek nejkuaniskej israelitas? Números 33 techijlia ika israelitas onejkuanijkej kanaj 40 veces.

Kemantika israelitas kanaj ajsiyaj kampa tlaseuiyan. Yejuin sajnoye kuelitayaj pampa yejon tlaluaktli “sanoyej ueyi niman sanoyej temojtij” katka (Deut. 1:19). Kuakon, ueliskia kinemiliskej ika xkuajli yeskia tla nejkuaniskiaj.

Ijkuak miyekpa tlapitsayaj, nochimej tribus kikakiyaj, san ika, xnochimej nimantsin notekpanayaj. Kanaj sekimej israelitas nosiaujkauayaj pampa nonekiya tlamachiaskej. Ijkuak israelitas kikakiyaj ika miyekpa tlapitsayaj, kasikamatiyaj ika kachtopa nonekiya notekpanaskej yejon tribus tlen nemiyaj kampa ika este. Yejuin tribus katkaj: Judá, Isacar niman Zabulón (Núm. 2:3-7; 10:5, 6). Ijkuak yejuin tribus yoyajkaj, teopixkej oksejpa miyekpa tlapitsayaj niman ijkon kiteasikamachiltiskiaj ika nonekiya notekpanaskej yejon yeyi tribus tlen onkatkaj kampa ika sur. Niman ijkon kichiujtiayaj hasta ijkuak nochimej israelitas yoyajkaj.

Kanaj tejuamej ouijtika otikitakej tiktlakamatiskej itlaj tlen ikalpan toTajtsin otechijli. Kanaj otikmachilijkej ika melak miyek tlen onopatlak. Noso kanaj tikuelitayaj kenon kachtopa itlaj nochiuaya niman xtiknekiyaj manopatla. Kanaj xnimantsin otikasikamatkej tleka ijkon okichiuj ikalpan Jehová niman otechtekiyomakak tikseliskej tlen okipatlak. San ika, kuajli tikmatstokej ika noneki tikchiuaskej. Tla tokojtiliaj, kuajli tikitaskej kenon Jehová melak techteochiuas.

Ijkuak nemiya Moisés, Jehová okinyekan ipan tlaluaktli melak miyekej tlakamej, siuamej niman kokonej. Tla Jehová xkintlajpiyaskia niman xkinyekanaskia, yejuamej mikiskiaj. Ipan yejuin itlamiyan tonaltin, kampa nochiua tlen melak xkuajli, Jehová noijki techyekana niman techpaleuiya kuajli matikpiyakan totlaneltokil. Kuakon, matikchiuakan ken yejon israelitas akin nochipa tetlakamatiyaj ijkuak kinkakiyaj tlapitsaltin.