“Ijkuak opeuj ninokualania iuan noprimo, opeuj nikechkokojmiktia. Niknekiya nikmiktis” (Paul).

“Ipan nochan nimantsin nitlauelmikiya, nikinxixiniaya muebles, ajauiltin niman nochi tlen nikitaya” (Marco).

Kanaj tejuamej xhasta ijkon tikchiuaskiaj. San ika, kemantika tinochimej techtekiyomaka toselti toteltiskej. ¿Tleka? Pampa Adán otechpanoltili tlajtlakojli, ika yejon, tiknekij tikchiuaskej tlen xkuajli (Rom. 5:12). Sekimej, ijkon ken Paul niman Marco, kintekiyomaka noteltiskej inselti. Oksekimej nokojtiliaj kixnamikiskej tlen kinmojtia noso xtlanemiliskej itech tlen kinyolkokoua. Sekimej ouijtika kitaj xok auilnemiskej, xok koniskej miyek alcohol noso xok kikuiskej drogas.

Akin nimantsin kichiujtiuetsij tlen kinemiliaj, tlen kileuiyaj niman tlen kinekij melak xkuajli onkisaj. ¿Tlenon uelis tikchiuaskej tla xtiknekij ijkon topan manochiua? Tla tokojtiliaj toselti toteltiskej. Matitlajtokan itech yeyi tlemach tlen techpaleuis. Kachtopa, ¿tlenon kijtosneki timoteltis moselti? Ika ome, ¿tleka melak noneki ijkon matikchiuakan? Ika yeyi, ¿tlenon uelis tikchiuaskej niman ijkon toselti toteltiskej? (Gál. 5:22, 23, TNM). Sakin, tikitaskej tlenon uelis tikchiuaskej tla kemantika xueli toselti toteltiaj.

Akin ueli noteltia iselti, xtotoka kichiujtiuetsi tlen kimachilia, yej nokojtilia xkijtos noso xkichiuas tlen toTajtsin xkuelita.

Jesús kuajli okiteititi ika ueliya noteltiaya iselti. Biblia kijtoua: “Ijkuak on tlakamej okuijuikaltijkej Cristo, yejua xotlanankilij ikan tlauijuikaltilistli. Ijkuak okitlajyouiltijkej, xokijtoj ika kintlayouiltis nion kinmiktis, yej okinmaktilij Dios yejuan nochipa tetlaxtlauilia ken noneki” (1 Ped. 2:23). IKoneuj toTajtsin okiteititi ika ueliya iselti noteltiaya ijkuak okipilojkej ipan kojtli melaktik niman ijkuak okipijpinaujtijkej itlauelikniuan (Mat. 27:39-44). Noijki okiteititi ijkuak tlayekankej ipan tlaneltokiltin kinekiyaj “itlaj ma kimijli yejuan ika uelis kiteixpanuiskej” (Mat. 22:15-22). Niman melak kuajli okiteititi ika ueliya iselti noteltiaya ijkuak sekimej judíos akin kualantoyaj kinekiyaj kitemojmotlaskej. Yejua xonotlakuepilti, yej “oniyan, niman okisteu ne ipan on ueyitiopan” (Juan 8:57-59).

¿Uelis tikchiuaskej ijkon ken Jesús? Kema uelis. Apóstol Pedro okijkuilo: “Cristo otlajyouij nemopampa, niman ijkon omechititij kenijki no noneki nenkichiuaskej” (1 Ped. 2:21). Maski titlajtlakolejkej, uelis tikyejyekoskej tikchiuaskej ijkon ken Jesús. ¿Tleka melak noneki ijkon matikchiuakan?

Tla tiknekij tikyolpaktiskej Jehová, noneki toselti toteltiskej. Tla xtiknemiliaj tlen tikijtouaj niman tlen tikchiuaj, kanaj xok uelis touikaskej iuan Jehová, maski tla yotiuejkaujkej ika tiktekichiuiliaj.

Matikitakan tlen ipan onochiuj Moisés, “sen tlakatl yejuan sanoyej yolyemanki katka xken yakaj okse ipan in tlaltikpaktli” (Núm. 12:3). Yejua uejkaujtipan okimijyouijtinen israelitas akin xtetlakamatiyaj. San ika, se tonajli xok okixiko niman okualan ijkuak israelitas opeuj kitejteneuaj pampa xonkatka atl. Okintlauelijli: “Xkakikan xipanteitanij [noso akin xnentetlakaitaj], ¿manin uelis temechkixtiliskej atl ipan in ueyi tetl para nematliskej?” (Núm. 20:2-11).

Moisés xouel onotelti iselti, xokiueyiteneuj Jehová ijkuak okinmakak atl (Sal. 106:32, 33). Yejua ika, Jehová xokikauili makalaki ipan yejon Tlajli tlen yokimijlika kinmakas (Núm. 20:12). Kuajli tikmatstokej ika hasta ijkuak imikiskia, ok noyolkokouaya pampa xouel onotelti iselti (Deut. 3:23-27).

¿Tlenon tiuelij itech yejuin? Ika maski tla yotiuejkaujkej ika tiktekichiuiliaj Jehová, noneki tikinnotsaskej ika tetlakaitalistli akin techkualaniaj noso akin noneki noyektlaliskej (Efes. 4:32; Col. 3:12). Melauak, ijkuak más tiuejueyixtiuej, más techtekiyomaka titeijyouiskej. San ika, matikilnamikikan Moisés. Xtiknekiskiaj maka ok touan manouika Jehová san pampa xototeltijkej toselti. Kuakon, ¿tlenon uelis tikchiuaskej niman ijkon uelis toselti toteltiskej?

Matiktlajtlanilikan Jehová matechmaka espíritu santo. ¿Tleka? Pampa tla tikpiyaj espíritu santo uelis toselti toteltiskej, niman Jehová kinmaka yejuin espíritu akin kitlajtlaniliaj (Luc. 11:13). Jehová kikui iespíritu santo niman ijkon techpaleuis matiuelikan toselti toteltiskej (2 Cor. 4:7). Noijki, espíritu santo uelis techpaleuis matikinpiyakan okseki kualneskayomej, ken tlasojtlalistli, tlen techpaleuis toselti matoteltikan (1 Cor. 13:5).

Maka matikchiuakan tlen xtechpaleuis toselti matoteltikan. Yejuin kijtosneki ika xnoneki tikimitaskej páginas ipan Internet tlen kipiyaj tlen tsokuiltik noso itlaj tlen uelis kichiuas matikchiuakan tlen xkuajli (Efes. 5:3, 4).  Kema, noneki tikmapeuaskej nochi tlen uelis kichiuas matitlajtlakokan (Prov. 22:3; 1 Cor. 6:12). Matikonnemilikan yejuin, yakaj akin kimatstika ika uelis onuetsis ipan auilnemilistli kuajli yeskia tla xkinamapoua amoxtin noso xkimita películas tlen ueliskia kichiuas maauilnemi.

Kanaj ouijtika tikitaj ijkin tikchiuaskej. San ika, tla tejuamej noijki tokojtiliaj, Jehová techpaleuis toselti matoteltikan (2 Ped. 1:5-8). Yejua techpaleuis kuajli matitlanemilikan, kuajli matitlajtokan niman matikchiuakan tlen kuajli. Paul niman Marco, akin otikinteneujkej ipeujyan yejuin tlamachtijli, ouel onopatlakej pampa Jehová okinpaleui. Matitlanemilikan itech se tokniuj akin nokualaniaya imiuan akin noijki tlanejnemiltiayaj ipan carretera. ¿Tlenon okipaleui manopatla? Yejua kijtoua: “Mojmostla niktlatlaujtiaya Jehová. Nikinamapouaya toamatlajkuiloluan kampa nesi kenon uelis timoteltis moselti niman nikintsontekontlaliaya tlaxeloltin tlen ueliskiaj nechpaleuiskej. Melak youejkauj niuajnokojtilijtiuj xnimantsin nikualanis, san ika, melak nechpaleuiya mojmostla nikilnamikis ika noneki noselti ninoteltis. Niman ijkuak noneki kanaj ika nias, saniman noneua niman ijkon xsan nijsiujtias”.

Kemantika xuelis toselti toteltiskej. Ijkuak ijkon panos, kanaj tipinauiskej tiknotsaskej Jehová. San ika, ijkuak ijkon panos, más noneki matiknotsakan. Nimantsin matiknotsakan. Matiktlajtlanilikan Jehová matechtlapopolui niman matechpaleui, niman tejuamej matokojtilikan maka oksejpa ijkon tikchiuaskej (Sal. 51:9-11). Yejua kikakis toteoyouj tla ika nochi toyojlo tiktlajtlaniliaj matechikneli (Sal. 102:17). Apóstol Juan techilnamiktia ika iyesyo iKoneuj toTajtsin “texchipauilia nochi totlajtlakoluan” (1 Juan 1:7; 2:1; Sal. 86:5). Maka matikilkauakan ika Jehová technauatia matitetlapopoluikan nochipa ijkuak nonekis. Kuakon, kuajli matikmatstokan ika yejua noijki techtlapopoluis (Mat. 18:21, 22; Col. 3:13, TNM).

Jehová xokuelitak ijkuak Moisés okualan ne ipan tlaluaktli. San ika, okitlapopolui. Niman Biblia kiteneua Moisés ken se tlakatl akin melak chikauak kipiaya itlaneltokil (Deut. 34:10; Heb. 11:24-28). Maski Jehová xokikauili makalaki ipan Tlajli tlen yokimijlika kinmakas, kema kikauilis manemi ipan xochitlalpan kampa xkeman mikis. Tejuamej noijki uelis tikseliskej yejon kualtsin tetlayokolijli tla noijki tokojtiliaj toselti toteltiskej (1 Cor. 9:25).