TLAMACHTIJLI 26
“Xuajmokuepakan notech”
“Xuajmokuepakan notech, niman nejua ninokuepas nemotech” (MAL. 3:7, TNM).
TLAKUIKAJLI 102 Matikinpaleuikan akin xkojtikej
TLEN TIKITASKEJ *
1. ¿Kenon nomachilia Jehová ijkuak se iborreguito uajnokuepa?
KEN otikitakej ipan tlamachtijli tlen youajpanok, Jehová kijtoua ika yejua kentla se tlajpixketl akin kintlajpiya iborreguitos ika tlasojtlalistli niman kitejtemoua akin yopoliuj. Sejpatipan, Jehová okimijli israelitas akin yokitlalkauijkaj: “Xuajmokuepakan notech, niman nejua ninokuepas nemotech”. Niman tikmatstokej ika Jehová ok ijkon tlanemilia pampa noijki kijtoua: “Nejua [...] xninopatla” (Mal. 3:6, 7, TNM). Niman Jesús okijto ika Jehová niman iluikaktekitkej melak yolpakij ijkuak se borreguito uajnokuepa (Luc. 15:10, 32).
2. ¿Tlenon tikitaskej ipan yejuin tlamachtijli?
2 Ipan yejuin tlamachtijli, tikimitaskej yeyi neskayomej tlen Jesús okinteneuj, tlen kiteititiaj ika noneki matikinpaleuikan akin yokitlalkauijkej Jehová oksejpa manokuepakan itech. Tikitaskej tlenon noneki tikchiuaskej niman ijkon tikinpaleuiskej yejuin tokniuan, niman noijki tikitaskej tleka melak noneki ijkin matikchiuakan.
MATIKTEJTEMOKAN YEJON TOMIN TLEN YOPOLIUJ
3, 4. ¿Tleka yejon siuatl akin noteneua ipan Lucas 15:8-10 melak okitejtemo itomin tlen okipolojka?
3 Noneki melak tokojtiliskej tikintejtemoskej akin kinekij uajnokuepaskej itech Jehová. Ipan iEvangelio Lucas tiknextiaj se neskayotl kampa Jesús otlajto itech se siuatl akin okipolo se tomin tlachichiujtli ika plata. Yejuin neskayotl techititia kenon yejon siuatl melak okitejtemo itomin tlen okipolojka (xpoua Lucas 15:8-10).
4 Ipan itonaluan Jesús, sekimej nantin judías kintlayokoliayaj imichpochuan akin nonamiktiayaj majtlaktli tomin tlachijchiujtli ika plata. Kanaj yejon siuatl akin Jesús okiteneuj okipolojka se itomin tlen inan okitlayokolijka. Pampa yejuin siuatl kinemilia ika itomin ouets ipan tlajli, kitlikuiltia se lámpara niman peua kitejtemoua. San ika, xkinextia. Kanaj ilámpara xmás tlauiloua niman xkita kanon tlajkaltok itomin. Kuakon, peua kichpana nochi ichan. Ijkuak ikololos itlasol tlen yokisentlali, kita ika itlaj ompa petlantika. ¡Yejuin siuatl yokinexti itomin! Jesús okijto ika pampa yejuin siuatl melak yolpaki, kominnotsa iamigas niman akin nisiuj chantij niman ijkon kimijlis ika yokinexti itomin.
5. ¿Tleka tikijtouaj ika noneki tokojtiliskej tla tiknekij tikinnextiskej akin youejkaujkej ika xok tenojnotsaj?
5 Tlen okijto Jesús techititia ika tla tiknekij tiknextiskej itlaj tlen yotikpolojkej, noneki tokojtiliskej. Ijkon noneki tikchiuaskej ijkuak tikintejtemoskej akin youejkaujkej ika xok tenojnotsaj. Sekimej kanaj kipiyaj miyek xiujtin ika xok yauej tlanechikoltin. Kanaj onochantitoj kampa tokniuan nion xkimixmatij. San ika, kuajli tikmatstokej ika amantsin miyekej kinektokej oksejpa uajnokuepaskej itech Jehová. Yejuamej oksejpa kinekij touan kitekichiuiliskej Jehová, san ika, noneki tikinpaleuiskej.
6. ¿Tlenon uelis tikchiuaskej niman ijkon tikinnextiskej akin youejkaujkej ika xok tenojnotsaj?
6 ¿Akinomej ipan tlanechikojli uelis tlapaleuiskej niman ijkon kinnextiskej akin youejkaujkej ika xok tenojnotsaj? Nochimej akin nemij ipan tlanechikojli, ichanejkauan, tlayekankej, precursores niman tenojnotskej. ¿Tikpiyaj se tochanejkauj noso se toamigo akin youejkauj ika xok tenojnotsa? ¿Yotiknextijkaj yakaj akin youejkauj ika xok tenojnotsa ijkuak titenojnotstinemiyaj techajchan noso ika carrito? Tla yejua kineki makitlajpalotij tlayekankej niman techijlia kanon niman kenon tiknextiskej, uelis tikimijliskej tlayekankej akin nemij ipan totlanechikol, san noneki kuajli tikitaskej tlenon kijtouaj tlanauatiltin ipan topaís.
7. ¿Tlenon tiuelij itech tlen kijtoua se tlayekanketl akin itoka Thomas?
7 ¿Tlenon uelis kichiuaskej tlayekankej niman ijkon kinnextiskej akin kinekij oksejpa uajnokuepaskej itech Jehová? Matikitakan tlenon kijtoua se tlayekanketl akin chanti España niman itoka Thomas. * Yejua yokinpaleui ipantsin 40 iteixpantijkauan Jehová manokuepakan ipan tlanechikojli. Yejua kijtoua: “Kachtopa nikintlajtoltia sekimej tokniuan tlakamej niman siuamej tla kimatij kanon chantij tokniuan akin youejkaujkej ika xok tenojnotsaj. Noso nikintlajtoltia tokniuan tenojnotskej tla kilnamikij se tokniuj akin youejkauj ika xok yauj tlanechikoltin. Miyekej melak yolpakij ijkuak ijkin tlapaleuiyaj. Sakin, ijkuak nikomintlajpaloua tokniuan akin youejkaujkej ika xok tenojnotsaj, nikintlajtoltia kenon nemij inkoneuan niman okseki inchanejkauan. Ijkin nikchiua pampa kanaj sekimej kinuikayaj inkoneuan ipan tlanechikoltin niman kanaj hasta noijki itenojnotsayaj. Yejuamej noijki uelis tikinpaleuiskej oksejpa manokuepakan itech Jehová”.
MATIKINPALEUIKAN AKIN YOPOLIUJKEJ OKSEJPA MANOKUEPAKAN ITECH JEHOVÁ
8. ¿Tlenon okichiuj on tajtli akin noteneua ipan Lucas 15:17-24 ijkuak ikoneuj oksejpa itech ouajnokuep?
8 ¿Tlenon uelis tikchiuaskej niman ijkon tikinpaleuiskej akin kinekij oksejpa uajnokuepaskej itech Jehová? Matikitakan tlenon tiuelij itech se neskayotl tlen Jesús okiteneuj kampa otlajto itech se tekoneuj akin opoliujka (xpoua Lucas 15:17-24). Jesús okijto ika, sakin, yejuin telpochtli opeuj kuajli tlanemilia niman oksejpa onokuep ichan. Itaj onotlalojteuj ijkuak okonitak ikoneuj niman okinapalo niman ijkon okititi ika ok kitlasojtla. Yejuin telpochtli melak notlajtlakoltia niman kinemilia ika itaj xok kinamiki makita ken ikoneuj. San ika, itaj melak kiknelia pampa kita ika yonoyolkuep niman pampa kijlia nochi tlen kimachilia. Kuakon, on tajtli iluichiua niman tlanauatia makuajkuilikan itelpoch “on más kuajli tlakentli”. Ijkin kititia ika xkiselia ken se itlakeual, yej kiselia ken se ikoneuj akin melak kitlasojtla.
9. ¿Tlenon uelis tikchiuaskej niman ijkon tikinpaleuiskej akin youejkaujkej ika xok tenojnotsaj oksejpa mauajnokuepakan itech Jehová? (Xkita recuadro “ ¿Kenon uelis tikinpaleuiskej akin oksejpa kinekij uajnokuepaskej?”).
9 Jehová ken yejon tajtli akin noteneua ipan neskayotl tlen Jesús okijto. Melak kintlasojtla tokniuan akin yokitlalkauijkej niman kinekiskia oksejpa itech mauajnokuepakan. Tla tikchiuaj ijkon ken Jehová, uelis tikinpaleuiskej oksejpa mauajnokuepakan. Ika yejon, xnoneki nimantsin tosiaujkauaskej, noneki tikinmasikamatiskej niman tikintlasojtlaskej. ¿Tleka melak noneki ijkin matikchiuakan, niman kenon uelis tikinteititiskej yejuin kualneskayomej?
10. ¿Tleka xnoneki nimantsin tosiaujkauaskej ijkuak tikpaleuiskej yakaj akin youejkauj ika xok tenojnotsa?
10 Matikilnamikikan ika akin youejkauj ika xok tenojnotsa uejkauis oksejpa nouikas iuan Jehová. Ika yejon, xnoneki nimantsin tosiaujkauaskej. Miyekej tokniuan akin ouejkaujkej ika xok tenojnotsayaj kijtouaj ika tlayekankej niman oksekimej tokniuan ipan tlanechikojli ononek miyekpa makintlajpalotij. Yejon okinpaleui oksejpa mauajnokuepakan itech Jehová. Se tokniuj akin ualeua Asia, itoka Nancy, kijkuiloua: “Se noamiga akin nemi ipan notlanechikol melak onechpaleui. Yejua melak onechtlasojtlak, niman nechitaya kentla ikniuj akin más iueyi. Nechilnamiktiaya kenon melak kuajli san sekan tiyolpakiyaj. Ijkuak nikijliaya tlen nikmachiliaya, yejua kuajli nechkakiya niman nechijliaya tlenon uelis nechpaleuis. Melak kuajli iuan oninouikak niman nochipa nechpaleuiaya”.
11. ¿Tleka noneki tikimasikamatiskej akin noyolkokouaj?
11 Ijkuak tikimititiaj oksekimej ika tikimasikamatij, kentla tikintlaliliskiaj se pomada kampa yonokokojkej. Sekimej tokniuan okitlalkauijkej tlanechikojli pampa yakaj tokniuj okinyolkoko niman xuelij kilkauaj yejon, maski yopanok miyek xiuitl. Ika yejon, xkinekij oksejpa uajnokuepaskej itech Jehová. Oksekimej kanaj kinemiliaj ika xkinamikiya tlen okinchiuilijkej. Kanaj kinekij yakaj makinkaki niman makimasikamati (Sant. 1:19). Se tokniuj itoka María, akin ouejkauj ika xok tenojnotsaya, kijtoua: “Niknekiya yakaj nikijlis nochi tlen nechajmanaya, niknekiya yakaj manechpaleui niman nouan machoka”.
12. ¿Tleka tikijtouaj ika itetlasojtlalis Jehová yeskia kentla se mekatl?
12 Biblia kijtoua ika Jehová melak kintlasojtla itekipanojkauan, niman yejon tlasojtlalistli yeskia kentla se mekatl. ¿Tleka ijkon tikijtouaj? Xkonnemili ika otiuetsito ipan se ueyi tlalkontli. Pampa melak tlauejkatlan, xuelis san moselti tiuajkisas. San uelis tikisas tla yakaj mitsonchapanilia se mekatl niman mitstilana. Yeuejkaui, Jehová ijkon okichiuj imiuan israelitas. Ika tlasojtlalistli yejua okichiuj oksejpa makinisiuikan (Os. 11:4, TNM). ToTajtsin kineki ijkin kinpaleuis akin youejkaujkej ika xok tenojnotsaj, akin kipiyaj miyek tlauejli niman melak najmanaj. Kineki kinpaleuis oksejpa mauajnokuepakan niman makimatikan ika melak kintlasojtla. ToTajtsin uelis techtekitiltis niman ijkon kimititis itlasojtlalis.
13. ¿Tlenon tiuelij itech ken okipaleuijkej tokniuj Pablo?
13 Melak noneki matikimititikan akin youejkaujkej ika xok tenojnotsaj ika Jehová kintlasojtla niman tejuamej noijki. Tokniuj Pablo, akin otikteneujkej ipan tlamachtijli tlen youajpanok, ouejkauj ipantsin 30 xiuitl ika xok nemiya ipan tlanechikojli. Yejua kijtoua: “Se tonajli, ijkuak san kuakualkantsin onikis nochan, se tokniuj lamajtsin onechtlajpalo niman melak kualtsin onechnots. Opeuj nichoka ken se konetsintli. Onikijli ika nesiya kentla Jehová okuajtitlanka niman ijkon nouan matlajtoki. Ijkuakon onikijto ika oksejpa ninokuepaskia itech Jehová”.
IKA TLASOJTLALISTLI MATIKINPALEUIKAN AKIN XCHIKAUAK INTLANELTOKIL
14. Ken kijtoua Lucas 15:4, 5, ¿tlenon kichiua se tlajpixketl ijkuak kinextia iborreguito akin yopoliujka?
14 Ijkuak tokniuan akin youejkaujkaj ika xok tenojnotsaj oksejpa uajnokuepaj ipan tlanechikojli, ok noneki matikinpaleuijtokan niman matikinyolchikaujtokan. Kanaj melak noyolkokouaj ken yejon tekoneuj akin Jesús okiteneuj ipan se neskayotl. Kanaj xchikauak kipiyaj intlaneltokil pampa uejkaujtipan okitlalkauijkej ikalpan Jehová. Ika yejon, noneki tikinpaleuiskej oksejpa kuajli makipiyakan intlaneltokil itech Jehová. Ijkuak Jesús otlajto itech borreguito akin yopoliujka, noijki okijto ika itlajpixkauj okuajnokechpanolti niman okuikak kampa nemiyaj okseki borreguitos. Yejon tlajpixketl melak yonokojtilijka niman youejkaujka kitejtemojtinemiya. San ika, yejuin tlajpixketl kimatstika ika nonekis kipaleuis iborreguito pampa xok kojtik (xpoua Lucas 15:4, 5).
15. ¿Kenon uelis tikinpaleuiskej akin xok chikauak kipiyaj intlaneltokil niman kinekij oksejpa uajnokuepaskej itech Jehová? (Xkita recuadro “ Itlaj tlen melak tepaleuij”).
15 Kanaj nonekis tokojtiliskej niman tikxeloskej tiempo niman ijkon tikinpaleuiskej machikaui intlaneltokil akin yokitlalkauijkaj ikalpan Jehová (Rom. 15:1). Yejuin uelis tikchiuaskej pampa Jehová techmaka iespíritu santo, iTlajtol niman miyek amatlajkuiloltin. ¿Kenon uelis tikinpaleuiskej? Se tokniuj akin youejkauj ken tlayekanketl kijtoua: “Miyekej akin youejkaujkaj ika xok tenojnotsayaj oksejpa noneki ika se tokniuj makinmachti itech Biblia”. * Kuakon, tla tlayekankej techtlajtlaniliaj matikpaleuikan se tokniuj akin youejkauj ika xok tenojnotsa, matikchiuakan ika nochi toyojlo. Tokniuj tlayekanketl akin kemach yotikteneujkej kijtoua: “Akin youejkaujkej ika xok tenojnotsaj kinekij ika akin kinmachtis manochiua se iminamigo akin uelis itech tlaneltokaskej”.
PAKILO NE ILUIKAK NIMAN IPAN TLALTIKPAKTLI
16. ¿Kenon tikmatij ika iluikaktekitkej techpaleuiyaj?
16 Tlen inpan yonochiuj miyekej tokniuan techititia ika iluikaktekitkej techpaleuiyaj matikinnextikan tokniuan akin youejkaujkej ika xok tenojnotsaj niman kinekij oksejpa uajnokuepaskej itech Jehová (Apoc. 14:6). Matitlajtokan itech Silvio, se tokniuj akin chanti Ecuador, yejua okitlatlaujti Jehová niman ijkon makipaleui oksejpa nokuepas ipan tlanechikojli. Ijkuak yejua ok kichiujtoya teoyotl, omemej tlayekankej oajsikej ichan niman okitsilinijkej itimbre. Tokniuan nimantsin opeuj kipaleuiyaj.
17. ¿Kenon uelis tomachiliskej tla tikinpaleuiyaj akin xchikauak kipiyaj intlaneltokil?
17 Melak tiyolpakij ijkuak tikinpaleuiyaj akin xchikauak kipiyaj intlaneltokil oksejpa manokuepakan itech Jehová. Kuajli matikitakan tlen kijtoua Salvador, se precursor akin melak nokojtilia kinpaleuis tokniuan akin youejkaujkej ika xok tenojnotsaj, yejua kijtoua: “Kemantika melak nipakamiki niman peua nichoka, melak nechyolpaktia ijkuak nikita kenon Jehová yokimakixti se iborreguito itech yejuin tlaltikpaktli tlen kiyekana Satanás, niman noijki niyolpaki pampa nejua noijki onitlapaleui” (Hech. 20:35).
18. Tla tejua youejkauj xtitenojnotsa, ¿tlenon uelis tikmatstos?
18 Tla tejua youejkauj ika otiktlalkaui ikalpan Jehová, uelis kuajli tikmatstos ika toTajtsin ok mitstlasojtla niman kineki xuajmokuepa. Melauak, tla tikneki oksejpa tiuajmokuepas itech Jehová, noneki tikchiuas seki tlemach. San ika, xkilnamiki yejon tajtli akin okiteneuj Jesús ipan se neskayotl. Jehová sa kinektika ika tejua oksejpa xmokuepa ipan ikalpan, niman yejua ika iyojlo mitsselis.
TLAKUIKAJLI 103 Tlayekankej se itetlayokolil toTajtsin
^ párr. 5 Akin youejkaujkej ika xok tenojnotsaj niman xok yauej tlanechikoltin, Jehová kimijlia: “Xuajmokuepakan notech”. Tinochimej uelis tikinpaleuiskej yejuin tokniuan akin kuelitaskiaj nokuepaskej itech Jehová. Ipan yejuin tlamachtijli, tikitaskej kenon uelis tikchiuaskej.
^ párr. 7 Seki tokayomej yonopatlakej.
^ párr. 15 Sekimej akin youejkaujkej ika xok tenojnotsaj uelis kinpaleuis tla nomachtiaj seki capítulos itech amoxtli Nochipa xnemikan itech itlasojtlalis toTajtsin, niman oksekimej uelis kinpaleuis tla nomachtiaj seki capítulos itech amoxtli Acerquémonos a Jehová. Tlayekankej akin kineskayotiaj Grupo ika Tlayekankej kijtoskej akinon uelis kimachtis yejon tokniuj akin youejkauj ika xok tenojnotsa.
^ párr. 68 TLEN NESI IPAN TLAIXKOPINAJLI: Yeyimej tokniuan kipaleuiyaj se tokniuj akin kineki oksejpa uajnokuepas ipan tlanechikojli. Se tokniuj kititlanilia mensaje, okse tokniuj kuajli kinotsa niman okse kuajli kikaki, ijkin kititiaj ika kitlasojtlaj.
