1. ¿Tleka sekimej itekipanojkauan Jehová kemantika san inselti nomachiliaj?

KEMANTIKA kanaj san toselti yotomachilijkaj. Sekimej xuejkaui ika ijkon nomachiliaj, san ika, oksekimej nochipa san inselti nomachiliaj. Nemij akin ijkon nomachiliaj maski kinpiyaj miyekej akin imiuan nouikaj. Oksekimej xnimantsin nomatij ipan se yenkuik tlanechikojli. Noijki, nemij akin uejka yonochantitoj niman melak najmanaj pampa kintemouaj inchanejkauan. Sekimej melak najmanaj pampa yomik yakaj akin melak kitlasojtlaj niman oksekimej tokniuan akin yenkuikej san inselti nomachiliaj pampa inchanejkauan niman inamigos kintlauelitaj.

2. ¿Tlenon tiknankiliskej ipan yejuin tlamachtijli?

² Jehová melak kuajli techixmati niman techasikamati. Yejua kita ijkuak san toselti tomachiliaj niman kinektok techpaleuis. Ipan yejuin tlamachtijli, tiknankilijtoskej yejuin: ¿kenon techpaleuiya Jehová maka san toselti matomachilikan?, ¿tlenon uelis tikchiuaskej tla san toselti tomachiliaj? niman ¿kenon uelis tikinpaleuiskej tokniuan akin san inselti nomachiliaj?

3. ¿Kenon Jehová okipaleui Elías?

³ Jehová kineki ika nochimej itekipanojkauan kuajli manemikan. Yejua nochipa touan nemi niman kimatstok ijkuak san toselti tomachiliaj (Sal. 145:18, 19). Matikitakan kenon okipaleui teotlajtoketl Elías. Yejuin itekipanojkauj toTajtsin nemiya ijkuak israelitas kixnamiktoyaj tlen ouijtika. Itlauelikniuan toTajtsin kintlaueltokayaj itekipanojkauan niman kinekiyaj kimiktiskej Elías (1 Rey. 19:1, 2). Elías san iselti nomachiliaya pampa kinemiliaya ika nochimej iteotlajtokauan Jehová yokinmiktijkaj (1 Rey. 19:10). ¿Kenon Jehová okipaleui Elías? Nimantsin okuajtitlanili se iiluikaktekitkauj niman ijkon okasikamachilti ika xsan iselti nemiya niman ika ok nemiyaj israelitas akin yolmelajkanentoyaj (1 Rey. 19:5, 18).

4. ¿Kenon Marcos 10:29, 30 kiteititia ika Jehová kineki kinpaleuis akin inchanejkauan niman inamigos yokintlalkauijkej?

⁴ Jehová kimatstok nochi tlen otijkaujkej para tiktekichiuiliskej. Kanaj hasta tochanejkauan niman toamigos akin xkitekichiuiliaj Jehová otechtlalkauijkej. Se tonajli, apóstol Pedro okijli Jesús: “Tejuamej yotikajkej nochi tlen tikpiyayaj, niman tikistinemij mouan. ¿Tlinon tej, tikseliskej?” (Mat. 19:27). Jesús kuajli okimijli inomachtijkauan ika kinpiyaskiaj melak miyekej imikniuan akin yeskiaj ken inchanejkauan (xpoua Marcos 10:29, 30). Niman toTajtsin Jehová kuajli techijlia ika nochipa kinpaleuis akin kitekichiuiliaj (Sal. 9:10). Matikitakan kenon uelis techpaleuis yejuin ijkuak san toselti tomachiliskej.

5. ¿Tleka melak kuajli tla tikilnamikij kenon Jehová techpaleuiya?

⁵ Matikilnamikikan kenon Jehová techpaleuijtika (Sal. 55:22). Yejon techpaleuis kuajli matitlanemilikan. Carol, * se tokniuj akin xinonamiktia niman ichanejkauan xiteixpantijkauan Jehová, kijtoua: “Ijkuak san noselti ninomachilia, melak nechyolchikaua nikilnamikis kenon Jehová onechpaleui ijkuak  onikixnamik tlen ouijtika. Yejon nechititia ika Jehová noijki nechpaleuis ika tlayekapan”.

6. ¿Kenon 1 Pedro 5:9, 10 kinyolchikaua akin san inselti nomachiliaj?

⁶ Matikilnamikikan kenon Jehová kinpaleuijtika oksekimej tokniuan akin san inselti nomachiliaj (xpoua 1 Pedro 5:9, 10). Hiroshi, akin ichanejkauan xiteixpantijkauan Jehová, kijtoua: “Nochimej tokniuan akin nemij ipan tlanechikojli kixnamikij itlaj tlen ouijtika. Akin tikinpiyaj tochanejkauan akin xnomachtiaj Biblia, tiyolchikauij ijkuak tikitaj kenon nochimej tokniuan nokojtiliaj chikauak kitekichiuiliskej Jehová”.

7. ¿Kenon tejua mitspaleuiya teoyotl?

⁷ Matokojtilikan chikauak tikpiyaskej totlaneltokil. Melak noneki matikijlikan Jehová kenon tomachiliaj (1 Ped. 5:7). Massiel, se tokniuj ichpochtli akin ichanejkauan okitlalkauijkej pampa opeuj kitekichiuilia Jehová, kijtoua: “Ijkuak san noselti ninomachiliaya, niknotsaya Jehová ika nochi noyojlo. Yejon melak onechpaleui. Nikitaya kentla notaj yeskia. Miyekpa niknotsaya ipan se tonajli niman nikijliaya kenon ninomachiliaya”.

8. ¿Kenon mitspaleuiya ijkuak tikamapoua niman titlanemilia itech Biblia?

⁸ Noijki, melak noneki mojmostla matikpouakan Biblia niman matitlanemilikan itech tlen techititia ika Jehová melak techtlasojtla. Bianca, se tokniuj akin noneki kijyouis tlen kijliaj ichanejkauan, kijtoua: “Melak nechpaleuiya ijkuak nikamapoua niman nitlanemilia itech itekipanojkauan Jehová akin okixnamijkej tlen nejua nikixnamiki”. Sekimej tokniuan kintsontekontlaliaj seki tlaxeloltin tlen teyolchikauaj, ijkon ken Salmo 27:10 niman Isaías 41:10. Oksekimej kinkaktiuej audios ijkuak kiamapouaj inBiblia niman ijkuak nomachtiaj tlen kitaskej ipan tlanechikojli. Yokitakej ika yejuin kinpaleuiya maka melak san inselti manomachilikan.

9. ¿Kenon mitspaleuiya ijkuak tiauj tlanechikoltin?

⁹ Noneki tokojtiliskej nochipa tiaskej tlanechikoltin pampa ompa techyolchikauaj niman kuajli tikimixmatij tokniuan (Heb. 10:24, 25). Massiel, akin otikteneujkej ipan párrafo 7, kijtoua: “Maski melak nipinauiya, onikijto ika nochipa niaskia tlanechikoltin niman nitlanankilis maski san sejpatsin. Yejuin onechpaleui manikmachili ika tokniuan nouan nemij”.

10. ¿Tleka melak noneki matouikakan imiuan tokniuan akin yolmelajkanemij?

¹⁰ Matouikakan imiuan tokniuan akin yolmelajkanemij. Matokojtilikan touikaskej imiuan tokniuan akin techpaleuiskej, maski tla  iuejueyimej noso xiuejueyimej niman maski san kanon maualeuakan. Biblia kijtoua ika “on ueuentsitsimej kipiyaj tlamatkilistli niman kajsikamat[i]listli” (Job 12:12). Akin iuejueyimej noijki uelis kinpaleuis tla nouikaj imiuan akin telpokamej. Matikilnamikikan ika David melak kuajli onouikak iuan Jonatán, maski David ok telpochtli katka (1 Sam. 18:1). Yejuamej onopaleuijkej ijkuak kitekichiuilijtoyaj Jehová niman ijkuak okixnamijkej tlen ouijtika (1 Sam. 23:16-18). Irina, se tokniuj akin ichanejkauan xnomachtiaj Biblia, kijtoua: “Akin nemij ipan tlanechikojli uelis tikimitaskej kentla totajuan noso tokniuan. Jehová uelis kintekitiltis niman ijkon manochiuakan kentla tochanejkauan”.

11. ¿Tlenon noneki tikchiuaskej tla tiknekij tikinpiyaskej akin imiuan touikaskej?

¹¹ Kanaj sekimej san pijpinauij niman ouijtika kitaj kinnextiskej akin imiuan nouikaskej. Matikitakan tlenon kijtoua Ratna, se tokniuj akin san pijpinaui niman melak okitlaueltokakej ijkuak kemach opeuj nomachtia Biblia. Yejua kijtoua: “Onikasikamat ika nonekiya nikinkauilis manechpaleuikan tokniuan akin nemij ipan tlanechikojli”. Kemantika ouijtika tikitaj tikteijliskej tlen tikmachiliaj. San ika, yejon tlen techpaleuis kuajli matouikakan iuan se tokniuj. Tla tiknekij ika akin imiuan touikaj matechyolchikauakan niman matechpaleuikan, noneki tikimijliskej kenon tomachiliaj.

12. ¿Kenon techpaleuiya ijkuak titenojnotsaj imiuan oksekimej tokniuan?

¹² Tla titenojnotsaj imiuan oksekimej tokniuan, uelis tipeuaskej imiuan touikaskej. Carol, akin otikteneujkej ipan párrafo 5, kijtoua: “Pampa nitenojnotsa imiuan tokniuan niman pampa imiuan nikchiua okseki tekitl, yonechpaleui imiuan maninouika. Jehová yonechpaleui itechkopa yejuin tokniuan”. Kuajli nesi ika melak tepaleui tla touikaj imiuan tokniuan akin yolmelajkanemij. Jehová kichiua matechpaleuikan yejuin tokniuan ijkuak tikixnamikij itlaj tlen ouijtika, ijkon ken ijkuak san toselti tomachiliaj (Prov. 17:17).

13. ¿Tlenon noneki tikchiuaskej ipan tlanechikojli?

¹³ Tinochimej noneki titepaleuiskej ika ipan tlanechikojli tokniuan manemikan ika inyojlo niman manotlasojtlakan. Tla ijkon tikchiuaj, xakaj san iselti nomachilis (Juan 13:35). Ika tlen tikijtouaj niman ika tlen tikchiuaj, uelis titepaleuiskej. Se tokniuj siuatl kijtoua: “Ijkuak opeuj ninomachtia Biblia, akin nemij ipan tlanechikojli opeuj nikimita ken nochanejkauan. Tla tokniuan xnechpaleuiskiaj, xninochiuaskia iteixpantijkauj Jehová”. ¿Kenon uelis tikinpaleuiskej maka san inselti manomachilikan akin inchanejkauan xnomachtiaj Biblia?

14. ¿Kenon uelis kuajli touikaskej imiuan akin yenkuikej ipan tlanechikojli?

¹⁴ Matikinnotsakan oksekimej niman imiuan matouikakan. Kuajli matikinselikan nochimej akin yenkuikej ipan tlanechikojli (Rom. 15:7). San ika, xsan noneki tikintlajpaloskej, noijki noneki tokojtiliskej imiuan touikaskej. Yejua ika, noneki kuajli tikinnotsaskej niman tikimititiskej ika tiknekij tikinpaleuiskej. Matikyejyekokan matikimasikamatikan, san ika, maka matokalaktikan ipan innemilis. Tla sekimej kitaj ouijtika techijliskej tlen kimachiliaj, maka matikinchiualtikan matechijlikan. Kuajli matiknemilikan tlenon tikintlajtoltiskej niman kualtsin  matikinkakikan. Kanaj uelis tikintlajtoltiskej kenon opeuj nomachtiaj Biblia.

15. ¿Kenon akin chikauak kipiyaj intlaneltokil uelis kinpaleuiskej tokniuan akin nemij ipan tlanechikojli?

¹⁵ Akin nemij ipan tlanechikojli chikaui intlaneltokil ijkuak tokniuan, ken tlayekankej, kimititiaj ika kinekij kinpaleuiskej. Melissa, akin inan okimachti itech Biblia, kijtoua: “Melak niktlasojkamati pampa tokniuan nochipa nechpaleuiyaj niman nechititiaj ika yejuamej kentla notajuan yeskiaj. Yejuamej nochipa nechkakij ijkuak nikneki nikijtos kenon ninomachilia”. Mauricio, se tokniuj telpochtli akin melak xkuajli onomachili ijkuak akin kimachtiaya Biblia okikajkauj ika tenojnotsa niman xok yaya tlanechikojli, kijtoua: “Ijkuak ijkon ninomachiliaya, tlayekankej melak onechpaleuijkej. Nochipa nouan tlajtlatouayaj, nouan ontenojnotsayaj, nechijliayaj tlenon ouelkej ijkuak inselti onomachtijkej Biblia niman hasta nouan onnauiltiayaj”. Melissa niman Mauricio chikauak kitekichiuilijtokej Jehová.

16, 17. ¿Kenon uelis tikinpaleuiskej tokniuan?

¹⁶ Matikitakan kenon uelis tikinpaleuiskej oksekimej (Gál. 6:10). Se misionero itoka Leo, akin uejka otlapaleuito, kijtoua: “Melak kuajli tla oksekimej mitspaleuiyaj ijkuak melak noneki. Nikilnamiki tlen opanok ijkuak onikpix se accidente ika nocarro. Ijkuak onajsik nochan, melak nimojkamiktoya. San ika, sekimej tokniuan onechijlikej imiuan manitlakuati. Xnikilnamiki tlenon otikuajkej, san ika, kema nikilnamiki ika melak kuajli onechkakej. Yejon okichiuj kuajli maninomachili”.

¹⁷ Tinochimej tikuelitaj tiaskej ipan toueyitlanechikoluan pampa ompa tinemij imiuan tokniuan niman san sekan titlajtlajtouaj itech tlen ompa nopanoltia. Matikitakan tlenon kijtoua Carol, akin yotikteneujkaj: “Nejua xkuajli ninomachilia ijkuak niauj ueyi tlanechikoltin pampa maski melak miyekej tokniuan ompa nemij, nochimej nemij imiuan inchanejkauan. Ijkuakon melak san noselti ninomachilia”. Sekimej melak ouijtika kitaj yaskej ueyi tlanechikojli sakin ika yomik inueuentsin noso insiuauj. ¿Tikixmatij yakaj akin ijkon ipan nochiua? ¿Uelis tikijliskej manemi imiuan tochanejkauan ijkuak nopanoltis se ueyi tlanechikojli?

18. ¿Kenon uelis tikchiuaskej ijkon ken kijtoua 2 Corintios 6:11-13?

 ¹⁸ San sekan matinemikan imiuan tokniuan. Ijkuak itlaj tikchiuaskej, matikinnotsakan tokniuan niman más akin kanaj san inselti nomachiliaj. Tiknekij kuajli toixmatiskej imiuan tokniuan niman más imiuan akin melak najmanaj (xpoua 2 Corintios 6:11-13). Melissa, akin otikteneujkej ipan párrafo 15, kijtoua: “Melak tiyolpakiyaj ijkuak sekimej tokniuan technotsayaj noso techijliayaj imiuan matipaxalotij”. Ipan totlanechikol, ¿nemi akin noijki ijkon uelis tiknotsaskej?

19. ¿Kemanon melak noneki matinemikan imiuan sekimej tokniuan?

¹⁹ Nochi xiujtin, ajsi se tonajli ijkuak tokniuan más kinekiskiaj imiuan matinemikan. Sekimej tokniuan kanaj san inselti nomachiliaj ijkuak inchanejkauan akin xnomachtiaj Biblia kipanoltiaj iluitl. Oksekimej melak najmanaj niman san inselti nomachiliaj ijkuak ajsi on tonajli tlen kimilnamiktia ijkuak omik yakaj akin melak kitlasojtlaj. Ijkuak san sekan tinemij imiuan yejuin tokniuan, tikimititiaj ika melauak tiknekij tikinpaleuiskej (Filip. 2:20).

20. ¿Kenon techpaleuis tlen Jesús okijto ipan Mateo 12:48-50 ijkuak san toselti tomachiliskej?

²⁰ Miyek tlen kichiua ika kemantika san toselti matomachilikan. San ika, maka matikilkauakan ika Jehová kuajli kimatstika kenon tomachiliaj. Yejua techpaleuiya itechkopa tokniuan (xpoua Mateo 12:48-50). Ijkuak tejuamej tikinpaleuiyaj tokniuan, akin san inselti nomachiliaj, tikteititiaj ika tiktlasojkamatij tlen Jehová kichiua topampa. Maski kemantika melak tajmanaj, maka san toselti matomachilikan, pampa Jehová xkeman san toselti techkauas.