1. ¿Tlenon yokichiuj Jehová topampa?

JEHOVÁ yejua akin okichiuj matinemikan ipan ikalpan (Juan 6:44). ¿Tlenon kijtosneki yejuin? Ijkuak yejua kitstoya inyojlo nochimej akin nemij ipan yejuin tlaltikpaktli, itlaj otechitili: okitak ika tejuamej tikpiyaj kuajli toyojlo niman ika ueliskia tiktlasojtlaskej (1 Crón. 28:9). Jehová techixmati, techasikamati niman techtlasojtla. ¿Xmelak ika yejon techyolseuiya?

2. ¿Kenon otechasikamachilti Jesús ika Jehová kintlasojtla nochimej itekipanojkauan?

² Jehová melak mitstlasojtla, niman noijki kintlasojtla nochimej tokniuan. Pampa Jesús kinekiya techasikamachiltis yejuin, okiteneuj tlen kijtoua ipan Mateo 18:12-14. Ompa okijto: “¿Tlinon kichiua sen tlakatl yejuan kipiya se ciento iborreguitos ijkuak se kipoloua? Yejua tej, kajteua on noventa y nueve ne ipan tepetl niman yau kontejtemoua on yejuan okipoloj”. Ijkuak on tlajpixketl kinextia iborreguito, yejua xkualani, yej yolpaki. ¿Tlenon otechasikamachiltisnek Jesús? Ika Jehová, akin kentla se tlajpixketl, melak kinpatiojkaita nochimej iborreguitos. Jesús okijto: “NemoTajtsin iluikak chanej no xkineki para semej yejuamej in konetsitsimej ma poliuikan”.

3. ¿Tlenon tikitaskej ipan yejuin tlamachtijli?

³ Tejuamej xtiknekij tikchiuaskej noso tikijtoskej itlaj tlen makinyolkoko tokniuan. Ipan yejuin tlamachtijli, tiknankiliskej yejuin: ¿tlenon uelis tikchiuaskej niman ijkon xtikinyolkokoskej oksekimej? niman ¿tlenon uelis tikchiuaskej tla yakaj techyolkokoua? San ika, kachtopa matikitakan akinomej on “konetsitsimej” akin Jesús okinteneuj ipan Mateo capítulo 18.

4. ¿Akinomej “in konetsitsimej”?

⁴ Ijkuak Mateo 18:3 kijtoua “in konetsitsimej”, kinteneujtika nochimej inomachtijkauan Jesús. Yejuamej kentla “konetsitsimej” pampa maski iuejueyimej noso xiuejueyimej kinokauiliaj makinmachti Jesús. Maski yejuamej ipan tlatlamantikej países ualeuaj, maski tlatlamantik tlen kuelitaj niman kichiuaj, nochimej tlaneltokaj itech Cristo. Niman yejua melak kintlasojtla (Mat. 18:6; Juan 1:12).

5. ¿Kenon nomachilia Jehová ijkuak yakaj kiyolkokoua se itekipanojkauj?

⁵ Jehová melak kintlasojtla nochimej “in konetsitsimej”. Tla tiknekij tikasikamatiskej yejuin, san matontlanemilikan kenon tejuamej tikimitaj kokonej. Tejuamej melak tikintlasojtlaj. Niman tiknekij tikinpaleuiskej pampa yejuamej xkojtikej, xitlaj kimatij niman xitlamachilisejkej ijkon ken akin iuejueyimej. Yemelak, xtikuelitaj ika yakaj makichiuilikan tlen xkuajli, san ika, tla yakaj kichiuilia itlaj tlen xkuajli se konetsintli, más techkualania. Jehová noijki ijkon nomachilia. Yejua kineki kintlajpiyas itekipanojkauan, niman ijkuak yakaj kiyolkokoua se itekipanojkauj, melak kikualania (Is. 63:9; Mar. 9:42).

6. Itech tlen kijtoua 1 Corintios 1:26-29, ¿kenon kimitaj inomachtijkauan Jesús?

⁶ ¿Tlenon más kijtosneki ijkuak Jesús okijto ika inomachtijkauan yeskiaj kentla “konetsitsimej”? San matikonnemilikan, ¿akinomej melak kinueyikaitaj? Akin kipiyaj tomin, akin melak kimixmatij niman akin melak uejueyixtokej. Miyekej xkintlakaitaj inomachtijkauan Jesús niman kinemiliaj ika “xitlaj kijtosnekij” pampa miyekej xkipiyaj tomin, xmelak kimixmatij niman xuejueyixtokej. Yejua ika, kimitaj kentla “konetsitsimej” (xpoua 1 Corintios 1:26-29). San ika, Jehová xijkon kimita.

7. ¿Kenon kineki Jehová matikimitakan tokniuan?

⁷ Jehová kintlasojtla nochimej itekipanojkauan, maski tla youejkaujkej noso xiuejkauij ika kitekichiuiliaj. Tla Jehová kinpatiojkaita nochimej tokniuan, tejuamej noijki noneki tikinpatiojkaitaskej. Kema, tejuamej tiknekij tikintlasojtlaskej nochimej on tokniuan, xsan sekimej (1 Ped. 2:17). Noneki tokojtiliskej tikintlajpiyaskej tokniuan. Tla tikitaj ika otikyolkokojkej se tokniuj, xnoneki tiknemiliskej ika xueyi kijtosneki tlen otikchiuilijkej, ika yejua xyolchikauak niman ika noneki kilkauas tlen opanok. ¿Kanaj tleka sekimej nimantsin noyolkokouaj? Kanaj sekimej, ijkuak okinmiskaltijkej, xokintlasojtlakej niman kinemiliaj ika xitlaj ika tepaleuiyaj. Noso kanaj pampa xiuejkaui ika opeuj kitekichiuiliaj Jehová niman xikimatij kenon kimijyouijtiaskej oksekimej. Maski san kenon, tla tikmatij ika otikyolkokojkej se tokniuj, noneki nimantsin iuan toyolseuiskej. Niman, tla se nimantsin noyolkokoua, noneki kasikamatis ika noneki kipatlas ken tlanemilia. Noneki ijkon kichiuas tla kineki nemis ika iyojlo niman kinpaleuis oksekimej.

8. ¿Tleka inomachtijkauan Jesús kinekiyaj uejueyixtoskej?

⁸ ¿Tleka Jesús opeuj tlajtoua itech “in konetsitsimej”? Pampa inomachtijkauan okitlajtoltijkej: “¿Akinon más ueyixtikaj ne kampa tlamandaroua on iluikak chanej?” (Mat. 18:1). Ipan yejon tonaltin, judíos melak kintlakaitayaj akin uejueyixtoyaj niman akin melak kipiayaj tomin. Se ixtlamatki okijto: “Tlakamej melak kinekiyaj makinueyikaitakan, melak makimixmatikan niman makintlakaitakan”.

9. ¿Tlenon nonekiya kichiuaskej inomachtijkauan Jesús?

⁹ Jesús kimatstoya ika inomachtijkauan nonekiya nokojtiliskej maka tlanemiliskej  ijkon ken judíos. Ika yejon, okimijli: “Yejuan nemotsajlan más ueyixtikaj noneki nouikas ken xueyixtikaj, niman yejuan tlamandaroua noneki nouikas ken on yejuan tepaleuijketl” (Luc. 22:26). Matikchiuakan ijkon ken Jesús okijto, matiknemilikan “ika oksekimej más uejueyixtokej”, xijkon ken tejuamej (Filip. 2:3). Tla tokojtiliaj ijkon tikchiuaskej, xtikinyolkokoskej oksekimej.

10. ¿Tlenon okijto Pablo ika noneki tikilnamiktoskej?

¹⁰ Nochimej tokniuan más uejueyixtokej xijkon ken tejuamej. Ijkon tikitaj ijkuak titlanemiliaj itech nochi tlen kuajli kichiuaj. Nochipa matikilnamiktokan tlen apóstol Pablo okimijli tokniuan corintios: “Maka xnemili tla Dios omitstlalij más tiueyixtikaj xken on oksekimej. ¿Itlaj tikpiya yejuan xDios omitsmakak? ¡Ka, xitlaj! Yej nochi tlen tikpiya Dios omitsmakak. Tla ijkon tej, ¿tline timoueyimati ika on tlen tikpiya ken sano tejua motech kisaskia?” (1 Cor. 4:7). Yejua ika, xnoneki tiknemiliskej ika oksekimej noneki techtlakaitaskej noso ika tejuamej más tiuejueyixtokej. Tla se tokniuj melak kuajli kinpanoltia itlamachtiluan noso se tokniuj melak miyekej kinmachtia itech Biblia, noneki kilnamiktoskej ika nochi yejon ueli kichiuaj pampa Jehová kinpaleuijtika.

11. ¿Tlenon techmachtia tlen Jesús okijto ipan Mateo 18:21-35?

¹¹ Sakin ika Jesús yokimijlika inomachtijkauan ika xnonekiya kinyolkokoskej oksekimej, okimijli tlenon okichiuj se tekiuaj iuan se itlakeual. On tekiuaj okitlapopolui itlakeual niman okijli ika xok nonekiskia kitlaxtlauilis nochi tlen kuikiliaya. Sakin, yejon tlakeuajli xokinek kitlapopoluis okse tlakeuajli akin san achijtsin kuikiliaya. Ijkuak tekiuaj okimat tlenon okichiuj itlakeual, otlanauati makitsakuakan pampa xoteikneli. ¿Tlenon techmachtia yejuin? Jesús okijto: “No ijki mechchiuilis on noTajtsin iluikak chanej, tla cada se xnenkitlapojpoluiyaj nenmokniu ikan nochi nemoyojlo” (Mat. 18:21-35).

12. ¿Kenon kimijtlakoua oksekimej ijkuak xtiknekij titetlapopoluiskej?

¹² Tlen okichiuj yejon tlakeuajli xsan yejua okijtlako, noijki okimijtlako oksekimej. Kachtopa, yejua xokikneli okse tlakeuajli niman okiteijli makitsakuakan hasta kitlaxtlauilis nochi tlen kuikilia. Niman noijki, okimijtlako oksekimej tlakeualtin akin okitakej tlen okichiuili on tlakeuajli. Jesús okijto: “Ijkuak on oksekimej tekipanojkej ijkon okitakej, sanoyej onajmankej”. Noijki ijkon, tlen tejuamej tikchiuaj noijki uelis kimijtlakos oksekimej. Tla yakaj techyolkokoua niman xtiknekij tiktlapopoluiskej, ¿tlenon uelis panos? Kachtopa, tikyolkokouaj akin xtiknekij tiktlapopoluiskej, tikititiaj ika xtiktlasojtlaj niman kanaj hasta xtiknekij tiknotsaskej. Niman ijkuak tokniuan akin nemij ipan tlanechikojli kitaj ika xtouikaj iuan se tokniuj, xkuajli nomachiliaj.

13. ¿Tlenon mitsmachtia tlen ipan onochiuj se precursora?

¹³ Ijkuak titetlapopoluiyaj, techpaleuiya matinemikan ika toyojlo niman noijki manemikan ika inyojlo oksekimej. Yejon tlen ipan onochiuj se tokniuj precursora akin tiktokayotiskej Crystal. Yejua kilnamiki kenon kiyolkokouaya se tokniuj ipan tlanechikojli: “Tlen kijtouaya melak nechyolkokouaya, ken tla nechtsopiniskiaj ika se cuchillo. Ijkuak tontenojnotsayaj, nion xniknekiya nias ipan carro kampa yejua yaya. Xok ika noyojlo nontenojnotsaya niman xok niyolpakiya”. Crystal kinemiliaya ika kinamikiya ijkon manomachili. San ika, onokojtili xsan itech yejua tlanemilis niman xkitlauelitas tokniuj. Onoyolyemanili niman okichiuj tlen kijtoua tlamachtijli “Perdonemos de corazón”, tlen uajlauj ipan  La Atalaya del 15 de octubre de 1999. Yejua ika, okitlapopolui tokniuj. Yejua kijtoua: “Aman nikasikamati ika tinochimej tikyejyekojtokej topatlaskej niman ika Jehová mojmostla techtlapopoluiya. Aman ika noyojlo ninemi niman oksejpa yopeuj niyolpaki”.

14. a) Itech tlen kijtoua Mateo 18:21, 22, ¿kanaj tlenon okixnamik apóstol Pedro, niman tlenon tiuelij itech tlen Jesús okijli? b) ¿Tlenon uelis tikchiuaskej tla noijki tikixnamikij tlen okixnamik Pedro?

¹⁴ Tikmatij ika noneki titetlapopoluiskej pampa ijkon techtlajtlanilia toTajtsin. Maski ijkon, kanaj kemantika ouijtika tikitaj. Nesi ika apóstol Pedro noijki ijkon ipan onochiuj (xpoua Mateo 18:21, 22). ¿Tlenon uelis techpaleuis matitetlapopoluikan? Kachtopa, noneki tikilnamikiskej ika Jehová melak miyekpa yotechtlapopolui (Mat. 18:32, 33). Xkinamiki matechtlapopolui, san ika, yejua kichiua pampa techiknelia (Sal. 103:8-10). Yejua ika, noijki noneki “titotlajsojtlaskej inuan oksekimej”. Kuajli nesi ika noneki titetlapopoluiskej pampa ijkon technauatia Jehová (1 Juan 4:11). Ika ome, matikilnamikikan kenon kinpaleuiya oksekimej ijkuak titetlapopoluiyaj. Tikpaleuiyaj akin otechyolkoko, titepaleuiyaj maka maonia tlauejli ipan tlanechikojli, kuajli touikaj iuan Jehová niman ika toyojlo tinemij (2 Cor. 2:7; Col. 3:14). Ika yeyi, matiknotsakan Jehová, akin techtlajtlanilia matikintlapopoluikan oksekimej. Maka matijkauilikan Satanás makixelo tlanechikojli (Efes. 4:26, 27). Melak noneki matechpaleui Jehová para maka techkajkayauas Satanás.

15. Itech tlen kijtoua Colosenses 3:13, ¿tlenon uelis tikchiuaskej tla se tokniuj kichiua itlaj tlen melak techkualania?

¹⁵ ¿Tlenon uelis tikchiuaskej tla se tokniuj kichiua itlaj tlen melak techkualania? Matokojtilikan maka tikpeualtiskej se tlauejli. Matikijlikan Jehová kenon tomachiliaj,  matiktlajtlanilikan makiteochiua on tokniuj akin otechyolkoko, niman noijki matikijlikan matechpaleui matikitakan niman matikpatiojkaitakan ijkon ken yejua kichiua (Luc. 6:28). Tla maski ijkon xueli tiktlapopoluiyaj, kuajli matiknemilikan kenon uelis iuan titlajtoskej, pampa kanaj yejua xkinekiya techyolkokos (Mat. 5:23, 24; 1 Cor. 13:7). Ijkuak iuan titlajtoskej, maka matiknemilikan ika yejua techtlauelita noso ika kinekiya techyolkokos. Niman, ¿tlenon uelis tikchiuaskej tla yejua xkineki matikyektlalikan yejon tlauejli? Biblia kijtoua: “Xmoijyouijtokan se iuan okse”. Matiknemilikan ika ajsis se tonajli ijkuak techtlapopoluis (xpoua Colosenses 3:13, TNM). * Maka matiktlauelitakan, pampa yejon uelis kichiuas maka ok kuajli matouikakan iuan Jehová. Maka matijkauilikan ika itlaj matechyolkoko. Tla ijkon tikchiuaj, tikteititiskej ika melak tiktlasojtlaj Jehová (Sal. 119:165).

16. ¿Tlenon noneki tikchiuaskej?

¹⁶ ¡Melak tiktlasojkamatij pampa san sekan tiktekichiuiliaj Jehová niman pampa “san se tlapixki” techyekana! (Juan 10:16). Ipan libro Organizados para hacer la voluntad de Jehová, página 165, kijtoua ika tinochimej noneki titlapaleuiskej para tokniuan kuajli manouikakan. Niman noijki kijtoua ika uelis kuajli touikaskej imiuan tokniuan tla tikimitaj ijkon ken Jehová kimita. Jehová techita ken “konetsitsimej” niman melak techpatiojkaita. Tejuamej noijki noneki ijkon tikimitaskej tokniuan. Jehová kita niman kipatiojkaita ken tikinpaleuiyaj niman tikintlajpiyaj tokniuan (Mat. 10:42).

17. ¿Tlenon tiknekij tikchiuaskej?

¹⁷ Melak tikintlasojtlaj tokniuan. Yejua ika, xtiknekij tikijtoskej noso tikchiuaskej itlaj tlen uelis kiyolkokos “noso kitlajkalis ipan tlajtlakojli” se tokniuj (Rom. 14:13). Matikilnamikikan ika tokniuan más uejueyixtokej xijkon ken tejuamej niman matikintlapopoluikan ika nochi toyojlo. Maka matijkauilikan matechyolkoko tlen kichiuaj oksekimej. Nochipa matokojtilikan “tikchiuaskej on tlajtlamach yejuan kuajkij yolseuilistli” niman tlen kinchikauilis intlaneltokil oksekimej (Rom. 14:19).