1. ¿Tlenon okijto Salomón ipan Eclesiastés 7:20?

 TEKIUAJ Salomón okijto: “Xakaj nemi ipan in tlaltikpaktli yejuan kichiua nochi tlen kuajli niman xkaman tlajtlakoua” (Ecl. 7:20). Tlen okijto yemelak. Tinochimej topopolouaj pampa titlajtlakolejkej (1 Juan 1:8). Ika yejon, ijkuak topopolouaj, tiknekij matechtlapopolui Jehová niman akin tikyolkokouaj.

2. ¿Kenon tomachiliaj ijkuak techtlapopoluiya yakaj akin iuan touikaj?

² ¿Kemantika yotikyolkokojka yakaj akin iuan timouika? Tla kema, kanaj nimantsin otikijli mamitstlapopolui pampa tikneki nochipa iuan timouikas. Niman kanaj ijkuak omitstlapopolui hasta otiuajyolseuj niman melak otiyolpak.

3. ¿Tlenon tiknankiliskej ipan yejuin tlamachtijli?

³ Tinochimej tikuelitaskiaj nochipa kuajli touikaskej iuan Jehová, san ika, kemantika itlaj tikchiujtikisaj noso itlaj tikijtojtikisaj tlen yejua xkuelita. ¿Kenon tikmatstokej ika Jehová kema kineki techtlapopoluis ijkuak topopolouaj? ¿Tetlapopoluiya Jehová ijkon ken tetlapopoluiyaj tlaltikpakchanejkej? Niman, ¿akinomej kintlapopoluiya toTajtsin? Nochi yejuin tiknankiliskej ipan yejuin tlamachtijli.

4. ¿Kenon tikmatij ika Jehová kinektika techtlapopoluis?

⁴ Yeuejkaui, ipan tepetl Sinaí Jehová okijli Moisés ika yejua kinektika techtlapopoluis. Itechkopa se ángel okijli:  “¡NiJehová! ¡NiJehová! ¡NimoDios yejuan nitetlasojtla niman niteiknelia! Xnimantsin nikualani. Sanoyej nitetlasojtla, niman nochipa nikchiua on tlen nikijtoua. Miles teuejkakoneuan yejuan tlakatitiuij nikimiknelia, niman nikintlapojpoluilia iminxompayejyeualis [noso tlen xkuajli kichiuaj], iminxipanteitalis niman imintlajtlakoluan” (Éx. 34:6, 7). Ken tikitaj, Jehová melak teikneliani niman tetlasojtlani. Ika yejon, tla yakaj akin yotlajtlako noyolkuepa ika nochi iyojlo, Jehová kitlapopoluiya (Neh. 9:17; Sal. 86:15).

5. Ijkon ken kijtoua Salmo 103:13, 14, ¿tlenon kichiua Jehová pampa kuajli techixmatstok?

⁵ Pampa Jehová otexchijchiuj, yejua melak kuajli techixmatstika (Sal. 139:15-17). Jehová noijki kimatstok ika tikpiyaj tlajtlakojli tlen Adán niman Eva otechpanoltilijkej, niman kimatstok kenon techijtlakoua yejon tlajtlakojli. Niman xsan yejon, yejua noijki kita nochi tlen xkuajli topan nochiua niman pampa yejua kitstika nochi tlen topan nochiua, techiknelia (Sal. 78:39; xpoua Salmo 103:13, 14).

6. ¿Kenon yotechititi Jehová ika kinektika techtlapopoluis?

⁶ Jehová kuajli kimatstika ika pampa Adán otlajtlako, tejuamej noijki titlajtlakouaj niman timikij (Rom. 5:12). Niman kimatstika ika sa no tejuamej xueliskia tomakixtiskej itech yejon tlajtlakojli niman mikilistli (Sal. 49:7-9). Ika yejon, yejua otechikneli niman okinek techmakixtis. ¿Tlenon okichiuj? Ipan Juan 3:16 kijtoua: “Dios sanoyej okintlajsojtlak on tlaltikpaktlakamej, hasta okitemakak isenteKonetsin para nochi on akin kineltokas xpoliuis, yej kipiyas nemilistli para nochipa”. Jehová okiteititi ika kinektok techtlapopoluis pampa hasta okitemakak isenteKonetsin para mamiki topampa, niman ijkon, akin itech tlaneltokaskiaj, makisaskiaj (Mat. 20:28; Rom. 5:19; Heb. 2:9). San xkonnemili kenon melak onoyolkoko Jehová ijkuak okitak kenon melak okitlajyouiltijkej niman okimiktijkej iKoneuj. Kuakon, tla Jehová xkinekiskia techtlapopoluis, yejua xkitekauiliskia makitlajyouiltikan niman makimiktikan iKoneuj.

7. Xkinteneua sekimej akin Jehová okintlapopolui.

 ⁷ Biblia kinteneua miyekej tlakamej niman siuamej akin Jehová okintlapopolui (Efes. 4:32). ¿Tejua tikilnamiki se? Kanaj otikilnamik tekiuaj Manasés, yejua okichiuj miyek tlen xkuajli niman melak otlajtlako ixpan Jehová. Opeuj kinueyichiua tajtsitsintin niman okimijli Israelitas noijki ijkon makichiuakan, noijki hasta okinuentlali ikoneuan. Niman hasta okikalaktito se itajtsin ichan Jehová, kampa melak tlachipauak katka. Biblia kijtoua ika “okichiu miyek tlajtlamach yejuan xkuajli ixpan toTEKO, niman ijki sanoyej okualanij toTEKO” (2 Crón. 33:2-7). San ika, ijkuak Manasés okiteititi ika yemelak onoyolkuep, Jehová okitlapopolui niman hasta okikauili oksejpa matekiuajti (2 Crón. 33:12, 13). Aman matitlajtokan itech tekiuaj David, akin noijki otlajtlako. Yejua oauilnen niman otemikti. San ika, ijkuak David okijto ika otlajtlako niman yemelak onoyolkuep, Jehová noijki okitlapopolui (2 Sam. 12:9, 10, 13, 14). Nochi yejuin techititia ika Jehová kema kinektok techtlapopoluis. Aman tej, ¿tetlapopoluiya Jehová ijkon ken tetlapopoluiyaj tlaltikpakchanejkej? Matikitakan.

8. ¿Kenon tikmatij ika san Jehová kuajli kichiua itekiyo ken juez, niman kenon kipaleuiya ijkuak tetlapopoluiya?

⁸ Biblia kijtoua: “Tejua [Jehová] tijuez yejuan más tiueyixtikaj ipan nochi in tlaltikpaktli” (Gén. 18:25). Se juez noneki kimixmatis nochi tlanauatiltin. Niman san Jehová kuajli kimixmati nochi tlanauatiltin pampa yejua otechinmakak nochi tlanauatiltin (Is. 33:22). Noijki, san Jehová kimati tlen kuajli niman tlen xkuajli. Se juez noneki kimatstos nochi tlen opanok ijkuak yakaj kitlajtlakolmakas. ¿Niman akinon kita nochi tlen panoua? Kema, san Jehová. Ika yejon, tikijtouaj ika san Jehová kinamiki yes juez.

9. ¿Tlenon kita Jehová ijkuak tetlapopoluiya?

⁹ Jueces miyekpa nopopolouaj pampa xkimatij nochi tlen opanok, yejuamej san kimatij tlen kitaj niman tlen kimijliaj oksekimej. San ika, Jehová xkeman nopopoloua ijkuak tetlajtlakolmaka pampa yejua kimatstika nochi tlen opanok (Gén. 18:20, 21; Sal. 90:8). Yejua kuajli kimatstok kenon titlachijchiujtin, kenon otechiskaltijkej, kenon tichantij, kenon titlanemiliaj, niman kenon tomachiliaj. Noijki, Jehová kita tlen onka ipan toyojlo. Ika yejon, kimatstok tleka itlaj tikchiuaj noso tleka tiknekij itlaj tikchiuaskej. Ken tikitaj, Jehová nochi kitstika niman xtlaj uelis tikiyaniliskej (Heb. 4:13). Kuakon, Jehová kachtopa kita nochi tlen opanok niman ijkon kijtos tla yakaj kimelaua kitlapopoluis.

10. ¿Tleka Jehová nochipa kichiua tlen kuajli? (Deuteronomio 32:4).

¹⁰ Jehová nochipa kichiua tlen kuajli. ¿Tleka? Pampa yejua xtechikoita. Jehová xsan kitlapopoluiya yakaj akin kualtsin nesi, akin kipiya tomin noso akin kipiya se ueyi tekitl. ToTajtsin nochimej kintlapopoluiya (1 Sam. 16:7; Sant. 2:1-4). Noijki, xakaj uelis kichiualtis noso kitlaxtlauilis Jehová para makitlapopolui (2 Crón. 19:7). Maski kajmana noso kikualania tlen yakaj kichiua, yejua kachtopa kuajli kinemilia tla kitlapopoluis noso ka (Éx. 34:7). Kuajli tikitaj, ika san Jehová kuajli kichiua itekiyo ken juez pampa kuajli techixmatstika niman kimatstika  tlen topan nochiujtika (xpoua Deuteronomio 32:4).

11. ¿Tlenon techititiaj akin okijkuilojkej Tlajkuiloltin ika Hebreo?

¹¹ Akin okijkuilojkej Tlajkuiloltin ika Hebreo kuajli kimatstoyaj ika xnemiya okse akin matetlapopolui ijkon ken Jehová. Miyekej ixtlamatkej kijtouaj ika yejuin tlakamej miyekpa okitekitiltijkej se tlajtojli ika hebreo tlen okiteititi ika Jehová otetlapopolui, niman yejuin tlajtojli xkeman okikuikej para kijtoskej ika se tlakatl okitlapopolui okse tlakatl. Yejuin techititia ika san Jehová kuajli kitlapopoluiya akin yemelak yonoyolkuep. Niman ¿kenon tomachiliaj ijkuak Jehová techtlapopoluiya?

12, 13. a) ¿Kenon nomachilia akin Jehová kitlapopoluiya? b) ¿Tlenon kichiua Jehová ijkuak techtlapopoluiya?

¹² Ijkuak tejuamej tikasikamatij ika Jehová yotechtlapopolui hasta tiuajyolseuij. Noijki, xok más techajmana tlen otikchiujkej niman oksejpa tiyolpakij. Ijkuak se tlaltikpakchane techtlapopoluiya kuajli tomachiliaj, san ika, ijkuak Jehová techtlapopoluiya más kuajli tomachiliaj niman tiyolpakij (Hech. 3:19). ¿Tleka? Pampa ijkuak techtlapopoluiya, oksejpa kuajli iuan touikaj. Yejua kilkaua nochi tlen xkuajli otikchiujkej.

¹³ Ijkuak Jehová yakaj kitlapopoluiya, yejua xok kilnamiktijtok tlen xkuajli okichiuj nion xkitlajyouiltia ipampa tlen okichiuj (Is. 43:25; Jer. 31:34). Biblia kijtoua ika Jehová sajnoye uejka kitlalia totlajtlakoluan “ijkon ken uejka ikisayan tonaltsintli hasta kampa ikalakiyan” (Sal. 103:12). b Ijkuak Jehová techtlapopoluiya melak tiyolpakij niman más kuajli tikueyichiuaj (Sal. 130:4). Aman tej, ¿akinomej kintlapopoluiya Jehová?

14. ¿Tlenon yotiuelkej?

¹⁴ Ken yotikitakej, Jehová kinektika kintlapopoluis akin okichiujkej se ueyi tlajtlakojli. Noijki, otikitakej ika Jehová melak kuajli techixmatstok pampa yejua otexchijchiuj. Niman otikitakej ika san yejua kuajli kichiua itekiyo ken juez, ika yejon,  ijkuak kinemilia tla yakaj kitlapopoluis noso ka, kachtopa kita nochi tlen opanok. ¿Niman tlenon okseki kita Jehová ijkuak tetlapopoluiya?

15. Ijkon ken kijtoua Lucas 12:47, 48, ¿tlenon okseki kita Jehová ijkuak tetlapopoluiya?

¹⁵ (Xpoua Lucas 12:47, 48). Jesús kuajli okijto ika Jehová kita tla akin otlajtlako kimatstoya ika xkuajli tlen kichiujtoya. Ijkuak yakaj kichiua itlaj tlen kimatstika ika toTajtsin xkuelita, yejua kichiujtika se tlajtlakojli. Niman Jehová kanaj xkitlapopoluis (Mar. 3:29; Juan 9:41). San ika, kemantika itlaj tikchiujtikisaj niman sakin tikitaj ika xkuajli tlen otikchiujkej. Ijkuak ijkon panoua, ¿Jehová uelis techtlapopoluis? Kema. San ika, noneki itlaj tikchiuaskej. Matikitakan tlenon.

16. ¿Tlenon kijtosneki timoyolkuepas, niman tleka melak noneki matoyolkuepakan?

¹⁶ Jehová noijki kita tla akin otlajtlako yemelak yonoyolkuep. ¿Niman tlenon kijtosneki yemelak timoyolkuepas? Kijtosneki tikpatlas ken titlanemilia niman tlen tikchiua. Noijki, yakaj akin yonoyolkuep kajmana tlen xkuajli okichiuj niman noyolkokoua pampa xokichiuj tlen kuajli. Niman najmana pampa kimatstoya ika xchikaujtoya itlaneltok ijkuak otlajtlako. Kuakon, Jehová techtlapopoluis tla yemelak toyolkuepaj, ijkon ken Manasés niman David. Maski yejuamej okichiujkej tlen melak xkuajli, Jehová okintlapopolui pampa okiteititijkej ika yemelak yonoyolkuepkaj (1 Rey. 14:8). Tla tiknekij ika Jehová matechtlapopolui, xsan noneki matechyolkoko tlen xkuajli otikchiujkej, noijki noneki tikteititiskej ika yemelak yotoyolkuepkej. c ¿Kenon? Matikitakan.

17. ¿Tlenon kijtosneki timopatlas, niman kenon techpaleuiya? (Isaías 55:7).

¹⁷ ¿Tlenon kita Jehová? Yejua kita tla topatlaj. Kita tla yotikajkaujkej tlen xkuajli tikchiuayaj niman tla yopeuj tikchiuaj tlen yejua kuelita (xpoua Isaías 55:7). Noneki tikpatlaskej ken titlanemiliaj niman peuas titlanemiliskej ijkon ken Jehová (Rom. 12:2; Efes. 4:23). Noijki,  xnoneki tiknemiliskej nion tikchiuaskej tlen xkuajli (Col. 3:7-10). San ika, noneki tikneltokaskej ika Jesús omikiko topampa. Tla ijkon tikchiuaj Jehová techtlapopoluis. Ijkuak Jehová kita ika tokojtilijtokej topatlaskej, yejua techtlapopoluiya itechkopa imikilis iKonetsin, Jesús (1 Juan 1:7).

18. ¿Tleka tikijtouaj ika xakaj tetlapopoluiya ijkon ken Jehová?

¹⁸ Oksejpa matikteneuakan tlen otikitakej ipan yejuin tlamachtijli. Otiuelkej ika xakaj tetlapopoluiya ijkon ken Jehová. ¿Tleka? Kachtopa, pampa yejua nochipa kinektok techtlapopoluis. Ika ome, pampa yejua kuajli techixmatstok niman kimatstok tla yemelak yotoyolkuepkej. Niman ika yeyi, pampa ijkuak Jehová techtlapopoluiya kilkaua tlen xkuajli otikchiujkej. Ika yejon, ijkuak techtlapopoluiya oksejpa kuajli iuan touikaj niman xok techajmana tlen otikchiujkej.

19. ¿Tleka uelis tiyolpakiskej maski kemantika topopolouaj?

¹⁹ Pampa titlajtlakolejkej, miyekpa tikijtoskej noso tikchiuaskej tlen Jehová xkuelita. San ika, tlen kijtoua Perspicacia para comprender las Escrituras, volumen 1, página 209, melak techyolchikaua. Ompa kijtoua: “Jehová kimatstok ika itekipanojkauan tlajtlakolejkej. Kuakon, ijkuak nopopoloskej xnoneki melak najmanaskej pampa yejua kimasikamati (Sl 103:8-14; 130:3). Niman tla yejuamej nokojtiliaj nochipa kichiuaskej tlen Jehová kintlajtlanilia, nochipa yolpakiskej (Flp 4:4-6; 1Jn 3:19-22)”. ¡Yejuin melak techyolchikaua!

20. ¿Tlenon tiknankiliskej ipan okse tlamachtijli?

²⁰ Melak tiktlasojkamachiliaj Jehová pampa kinektok techtlapopoluis ijkuak yemelak toyolkuepaj. San ika ¿tejuamej noijki uelis titetlapopoluiskej ijkon ken Jehová? ¿Niman tleka melak noneki matikasikamatikan? Nochi yejuin tiknankiliskej ipan okse tlamachtijli.