Notajuan chantiyaj Estonia; san ika, ijkuak panotoya ika Okpa Guerra ipan nochi tlaltikpaktli onochantitoj Alemania, kampa nejua onitlakat. Sakin otiajkej Canadá niman otochantitoj nisiuj Ottawa. Tichantiyaj nisiuj kampa kinpiayaj kuanakamej, xtlaj tiktopiliayaj, san ika, mojmostla tijkuayaj totoltetsintli.

Se tonajli, iteixpantijkauan Jehová okititijkej nonan tlen kijtoua Apocalipsis 21:3, 4. Yejua opeuj choka pampa oajsik ipan iyojlo tlen okikak. Tlen melauak onokauj ipan iyojlo. Ika yejon, sakin notaj niman nonan onoapolaktijkej.

Maski notajuan xmás ueliyaj inglés, nokojtiliayaj kichiuaskej tlen kijtoua Biblia. Notaj tekitiya Sudbury (Ontario); niman maski melak siauiya kampa tekitiya, nochi sábados techuikaya tontenojnotsayaj nejua niman noknitsin Sylvia. Nochi semanas san sekan tomachtiayaj Amatl Tekakistilijketl. Nonan niman notaj onechmachtijkej ika nonekiya niktlasojtlas Jehová. Niman yejon onechpaleui maninosentemaka itech Jehová ipan 1956, ijkuak nikpiaya 10 xiuitl. Pampa nikitaya kenon notaj niman nonan kitlasojtlayaj Jehová yonechpaleui ipan nochi nonemilis.

Ijkuak oniktlamilti secundaria, opeuj niknemilia ika tla ninochiua precursor xkeman nikpiyaskia tomin para nias ipan se avión niman nonpaxalos ipan okseki países. Ika yejon, opeuj nitekipanoua ipan se estación de radio. Ompa nikintlaliaya tlakuikaltin niman melak nikuelitaya tlen nikchiuaya. San ika, pampa nitekitiya ika teotlak xniaya tlanechikoltin niman nitekitiya imiuan akin xkitlasojtlayaj Jehová. Nejua yoninomachtijka ipan Biblia tlen Jehová kinekiya manikchiua, yejon onechpaleui oksejpa kuajli manitlanemili.

Oninochantito Oshawa (Ontario). Ompa onikixmat Ray Norman niman ikniuj Lesli, niman oksekimej precursores. Nochimej kinekiyaj nechpaleuiskej. Ijkuak onikitak kenon yolpakiyaj, oksejpa oniknemili tlen niknekiya nikchiuas. Yejuamej onechyolchikaujkej maninochiua precursor, niman ijkon onikchiuj ipan septiembre de 1966. Nejua melak niyolpakiya niman nikuelitaya tlen nikchiuaya. San ika, sakin nochi onopatlak.

Ijkuak ok ninomachtijtoya secundaria, oniktemilti se solicitud pampa niknekiya nontlapaleuis Betel tlen onka Toronto (Canadá). Niman sakin, ijkuak  iniprecursor katka, onechnotskej manitlapaleuiti Betel naui xiuitl. San ika, melak nikuelitaya Lesli niman xmás niknekiya nias Betel pampa niknemiliaya ika xok keman nikitaskia. Sakin ika onikchiuj teoyotl oniktlapejpeni nontlapaleuis Betel, niman melak onechyolkoko nijkaujteuas Lesli.

Ijkuak onajsik Betel, opeuj nitlapaleuiya kampa kinpakayaj tlakentin niman sakin ken secretario. Ijkuakon, Lesli okititlankej ken precursora especial ne Gatineau (Quebec). Nochipa niknemilijtoya tlenon kichiujtoya niman ninotlajtoltiaya tla kuajli tlen oniktlapejpeni. San ika, ijkuakon onechijlikej itlaj tlen melak onechyolpakti: Ray, ikniuj Lesli, okinotskej Betel niman iuan nichantiskia ipan nocuarto. Ijkon, oksejpa opeuj ninonotsa iuan Lesli. Nejua onechnotskej Betel san naui xiuitl niman notekiyo otlan ipan 27 de febrero de 1971. Ipan yejon tonajli oninonamikti iuan Lesli.

Otechtitlankej Quebec ipan se tlanechikojli kampa tlajtouaj francés. Seki xiujtin sakin, onechijlikej tla niknekiya nitlapaleuis ken tlayekanketl ipan circuito. Yejon melak onechmojkatlachialti pampa san nikpiaya 28 xiuitl. Ika yejon niknemiliaya ika xueliskia nikchiuaskia yejuin tekitl. San ika, melak onechyolchikauj tlen kijtoua Jeremías 1:7, 8. Pampa Lesli yokinpixka seki accidentes kemantika xueliya kochiya, niman yejon kichiuaya maniknemili ika xueliskia tikchiuaskej tekitl tlen techmakatoyaj. San ika, yejua onechijli: “Tla Jehová techijlia matikchiuakan yejuin tekitl, ¿xnoneki tikyejyekoskej?”. Sakin, otikteijlikej ika kema ueliskia tikomintlajpaloskej tlanechikoltin. Niman otiuejkaujkej 17 xiuitl ipan yejuin tekitl.

Melak nikpiaya tekitl pampa tikintlajpalojtinemiyaj tlanechikoltin. Ika yejon kemantika xnikpiaya tiempo para Lesli. San ika, sakin opanok itlaj tlen onechtlanemililti. Se lunes ika kualkan yakaj okitetepiniko topuerta. Ijkuak oniktlapo, xakaj ompa nemiya; san ompa onkatka se chikijtli ika se tlakentli, fruta, queso, pan, se botella de vino, copas niman se amatsintli tlen kijtouaya: “Xpaxaloltiti mosiuatsin”. Ijkuakon melak kualtsin yokiska tonaltsintli; san ika, nejua nonekiya nikinyekchiuas seki tlamachtiltin. Ika yejon, onikijli Lesli ika xueliskia nias. Yejua onechasikamat, san ika, achijtsin onajman. Ijkuak opeuj nikinyekchiua notlamachtiluan, onikilnamik tlen kijtoua Efesios 5:25, 28. Onikitak ika Jehová nechilnamiktijtoya ika nonekiya nikasikamatis kenon nomachilia nosiuatsin. Onikchiuj se teoyotl niman sakin onikijli Lesli: “Tiauej”. Yejua melak oyolpak. Otiajkej ipan tocarro niman otajsikej itenpan se atentli, otikuajsokej tlakentli... niman melak otiyolpajkej ipan yejon tonajli. Niman hasta onikpix tiempo para nikinyekchiuas notlamachtiluan.

Melak miyek circuitos otikintlajpalojkej, desde Columbia Británica hasta Terranova. Niman melak otiyolpajkej ijkuak otikintlajpalotoj tokniuan. Noijki,  yoniknemilijka nias Galaad, san ika, nechmojtiaya nitlapaleuis ken misionero ipan okse país. Niknemiliaya ika tlen kichiuayaj misioneros nejua xkeman ueliskia nikchiuas. Noijki, nechmojtiaya pampa niknemiliaya ika nechtitlaniskiaj ipan se país tlen onka África, kampa onka kokolistli niman guerra. Melak niyolpakiya kampa ninemiya.

Ipan 1992 opeuj notekauilia manotenojnotsa ipan seki países tlen teuan katkaj itech Unión Soviética, tlen yeuejkaui onkatka. Ika yejon, otechtlajtoltijkej tla tiknekiyaj tiaskej ken misioneros ne Estonia. Pampa xtikchiatoyaj, otikchiuilijkej teoyotl Jehová niman oksejpa otiknemilijkej: “Tla Jehová techijlia matikchiuakan yejuin tekitl, ¿xnoneki tikyejyekoskej?”. Sakin, otikteijlikej ika kema tiaskiaj, niman nikilnamiki ika oniknemili: “¡Melak kuajli ika xotechtitlankej África!”.

Nimantsin otomachtijkej tlajtojli estonio. Xitiuejkauiyaj ika tinemiyaj Estonia ijkuak otechijlikej matikintlajpalotij tlanechikoltin. Nonekiya tikintlajpaloskej 46 tlanechikoltin niman grupos tlen onkatkaj ipan yeyi países bálticos niman Kaliningrado (Rusia). Ika yejon, ononek tomachtiskej letón, lituano niman ruso. Melak ouijtika otikitakej. San ika, tokniuan melak kitlasojkamatiyaj tlen tikchiujtoyaj niman melak otechpaleuijkej. Ipan 1999, okitlapojkej sucursal ne Estonia niman ompa onechijlikej ika nitlapaleuiskia ipan grupo akin kiyekanaskia sucursal imiuan tokniuan Toomas Edur, Lembit Reile niman Tommi Kauko.

Otikimixmatkej miyekej iteixpantijkauan Jehová akin okinuikakej Siberia. Maski yejuamej kixnamiktoyaj miyek tlen ouijtika ipan cárcel niman xnemiyaj imiuan inchanejkauan, xkeman san noyolkokojtoyaj. Yejuamej nochipa yolpaktoyaj niman ika inyojlo tenojnotsayaj. Yejuin otechititi ika tejuamej ueliskia titlaxikoskej niman tiyolpakiskej maski san tlenon tikixnamiktoskej.

Yopanokaj miyek xiujtin ika xmás toseuiayaj, ika yejon, Lesli opeuj melak siaui. Ijkuakon xtikmatiyaj ika yejua kipiaya fibromialgia. Ika yejon, opeuj tikijtouaj ika inonekiya tokuepaskej Canadá. Ijkuak otechnotskej ipan se Tlamachtijli tlen kiseliaj Akin Tlayekanaj ipan se Sucursal iuan insiuauan ne Patterson (Nueva York), oniknemili ika xueliskia tiaskej. San ika, sakin ika otikchiuilijkej teoyotl Jehová, otikteijlikej ika kema tiaskej. Niman Jehová melak okiteochiuj tlen otiktlapejpenijkej. Ijkuak ompa tinemiyaj, Lesli okipajtikej niman yejon otechpaleui oksejpa matikchiuakan tlen yeuejkaui tikchiuayaj.

Se yeuajli ipan 2008, ijkuak itokueptoyaj Estonia, tokniuan akin nemij ipan oficina kampa noyekanaj nochi sucursales onechuajnotskej niman onechtlajtoltijkej tla niknekiya nias República Democrática del Congo. Xnikmatiya tlenon nikijtos niman más pampa yejuamej kinekiyaj uajmostla manikinnankili. Xtlaj onikijli Lesli, pampa niknekiya kuajli makochi. San ika, nejua xouel onikoch pampa nikijlitoya Jehová tleka xniknekiya nias África.

 Uajmostla ijkuak onikijli Lesli, otikijtokej: “Jehová techtitlantika África, ¿kenon tikmatij ika xuelis tikchiuaskej yejuin tekitl niman tiyolpakiskej tla xtikyejyekouaj?”. Ika yejon, maski yotiuejkaujkaj 16 xiuitl Estonia otiajkej Kinsasa, icapital país. Sucursal kipiya se kualtsin jardín niman ijkuak ompa tinemis hasta tiuajyolseuis. Ijkuak otajsikej kampa otokaujkej, Lesli nimantsin okitlali se tarjeta tlen kuajkuiya desde ijkuak otikiskej de Canadá. Yejuin tarjeta kijtouaya: “Xmoskalti kampa mitstokaskej”. Ompa otikimixmatkej miyekej tokniuan, miyekej otikinmachtijkej itech Biblia niman otikitakej kenon yolpakiyaj misioneros; yejon otechpaleui matikitakan ika tejuamej noijki uelis melak tiyolpakiskej. Sakin otikintlajpalokej sucursales tlen onkatkaj ipan 13 países de África. Yejuin otechpaleui matikitakan kenon tlamantikej niman kualtsitsintin okseki kalpamej. Onikilkauj tlen kachtopa nechmojtiaya niman otiktlasojkamachilijkej Jehová pampa otechtitlan África.

Ne Congo-Kinsasa tijkuayaj tlen xkeman tiknemiliayaj tijkuaskiaj. Ken seki yolkatsitsintin. Maski xkeman tikinkuayaj, otikinkuajkej pampa otikitakej kenon tokniuan melak kinueliliayaj.

Otikimitkilijkej tlen kinpolouaya niman otikinyolchikauatoj tokniuan akin chantij kampa sekimej grupos kimixnamikiyaj kalpamej niman kinchiuiliayaj tlen xkuajli siuamej niman kokonej. Miyekej tokniuan xmiyek kinopiliayaj. San ika, melak otechyolchikauj ijkuak otikitakej ika yemelak kineltokayaj ika yoliuiskiaj akin yomijkej, ijkuak otikitakej kenon kitlasojtlayaj Jehová niman kenon tlaneltokayaj itech ikalpan. Tlen yejuamej kichiujtoyaj otechtlanemililti itech tlen tejuamej tikchiujtokej niman melak otechyolchikauj. Sekimej tokniuan xok kipiayaj inkal nion tlen kikuaskej. Yejuin onechilnamikti ika nochi tlen tikpiyaj uelis san totoka tikpoloskej, san ika, noijki onechilnamikti ika totlaneltokil melak techpaleuis ijkuak tikixnamikiskej tlen ouijtika. Maski kixnamiktoyaj miyek tlen ouijtika, tokniuan xkeman noyolkokojtoyaj. Tlen kichiujtoyaj otechpaleui matitlaxikokan ijkuak otikixnamijkej tlen ouijtika niman ijkuak otikualokej.

San totoka otechtitlankej ipan sucursal tlen onka Hong Kong. Xkeman tiknemiliayaj ompa tiaskej.  San ika, pampa yotikitakaj kenon Jehová melak yotechpaleuijka kampa yotechtitlanka, aman xok otiometlamatkej. Ipan 2013, melak otichokakej pampa otikinkaujteujkej toamigos niman nochi tlen kualtsin onka África. Xtikmatiyaj tlenon topan nochiuaskia.

Hong Kong se ueyi kalpan niman melak tojlan chantij, yejua ika, ijkuak ompa otajsikej nochi onopatlak. Melak ouijtika otikitakej tiueliskej tlajtojli chino cantonés. San ika, tokniuan kuajli otechselijkej niman melak otikuelilijkej tlakuajli tlen ompa kikuaj. Pampa opeuj totoka ueyiya ikalpan Jehová niman melak yotlapatiouaka, Grupo akin Tlayekana okijto ika kejkuaniskiaj sucursal niman kinnemakaskiaj seki tlaltin tlen kinpiayaj. Melak kuajli tlen okitlapejpenijkej kichiuaskej. Ipan 2015, otejkokej Corea del Sur, kampa aman tinemij. Noijki melak ouijtika otikitakej tiueliskej tlajtojli tlen nikan tlajtouaj. Maski ximás tiuelij, techyolchikaua ijkuak tokniuan techijliaj ika aman más ikuajli tonotsaj imiuan akin tlajtouaj coreano.

Kemantika ouijtika tikinnextis yenkuikej amigos. San ika, yotikitakej ika tla tejuamej peua tikinnotsaj tokniuan niman kuajli tikinseliaj, nimantsin ueli tikimixmatij. Noijki yotikitakej ika tokniuan san noijki tlen kipiyaj ipan inyojlo. Niman pampa Jehová melak kualtsin ken yotexchijchiuj tejuamej ueli toyolchikauaj, touikaj imiuan oksekimej niman melak totlasojtlaj (2 Cor. 6:11).

Noijki yotikasikamatkej ika noneki tikimitaskej oksekimej ijkon ken Jehová kimita niman ika noneki tikitaskej kenon yejua techtlasojtla niman techyekana ijkuak tikixnamikij itlaj tlen ouijtika. Nochipa ijkuak san toselti tomachiliayaj, toyolkokouayaj noso xtikmatiyaj tla kuajli touikayaj imiuan oksekimej, tikimitayaj tarjetas noso cartas tlen techinuajtitlaniliayaj toamigos. Kuajli yotikitakej ika Jehová okinnankili toteoyouan niman otechyolchikauj; noijki otechkojtili ijkuak nonekiya.

Lesli niman nejua yotikasikamatkej ika, maski tikpiyaj miyek tekitl, melak noneki tikxeloskej tiempo niman ijkon san sekan tinemiskej. Noijki yotikitakej ika melak techpaleuiya ijkuak touejuetskiliaj, más ijkuak tomachtijtokej se yenkuik tlajtojli. Niman ijkuak itikochiskej titlanemiliaj itech tlen kualtsin topan onochiuj niman tiktlasojkamachiliaj Jehová.

Xkeman oniknemili tla ueliskia nitlapaleuis ken misionero noso nias ipan okseki países. San ika, kuajli yonikasikamat ika Jehová nochipa techpaleuiya, niman yejon melak nechyolpaktia. Noijki nitlanemilia ken teotlajtoketl Jeremías, ijkuak okijto: “Yotinechkajkayauj, oh, Jehová” (Jer. 20:7, TNM). Yejua melak miyek tlen yotechtlayokoli niman yotechteochiuj ijkon ken xtikchiayaj. Hasta yonechpaleui manikchiua tlen niknekiya desde ijkuak nikonetl katka: melak miyekan yotipaxalotoj ipan avión. Yotikintlajpalotoj sucursales ipan makuijli continentes. Melak niktlasojkamachilia Lesli pampa ika nochi iyojlo yonechpaleui kampa techtitlani ikalpan Jehová.

Nochipa tikilnamikij akinon tiktekichiuiliaj niman tleka. Tlen aman techmaka Jehová techititia kenon melak kualtsin tinemiskej ijkuak tikpiyaskej nemilistli tlen xkeman tlamis. Kema, ijkuak Jehová techmakas nochi tlen tejuamej tiknekij (Sal. 145:16).