1, 2. ¿Tleka tikijtouaj ika aman noijki tikixnamikij tlen Lot okixnamik?

 IJKUAK tikitaj ika miyekej xnoyekanaj ika itlanauatiluan Jehová, tomachiliaj ken Lot, se tlakatl akin yeuejkaui onen niman omelajkanen itech toTajtsin. “Yejua noyolkokouaya ijkuak kintaya ken xkuajli kipiyaj innemilis on xkuajkualtin tlakamej” pampa kimatstoya ika toTajtsin xkuelita ijkon makichiuakan (2 Ped. 2:7, 8). Lot melak kitlasojtlaya Jehová niman kitlakaitaya, ika yejon, noijki xkuelitaya ika tlaltikpakchanejkej akin ompa nemiyaj maauilnemikan. Aman noijki ijkon panoua. Tichantij kampa miyekej nion achijtsin xkintlakaitaj itlanauatiluan toTajtsin. Maski ijkon, tla tiktlasojtlaj toTajtsin niman tiktlakaitaj, uelis itech timelajkanemiskej (Prov. 14:2).

² Jehová techpaleuiya itech matimelajkanemikan ika tlen techijlia ipan Proverbios. Nochimej akin kichiuaj ken Cristo, tlakamej niman siuamej, telpokamej niman akin iuejueyimej uelis miyek nomachtiskej itech tlen kijtoua Proverbios.

3. Ken kijtoua Proverbios 17:3, ¿tleka noneki tiktlajpiyaskej toyojlo? (Noijki xkita tlaixkopinajli).

³ Melak noneki matotlajpiyakan pampa Jehová kita tlen tikpiyaj ipan toyojlo. ¿Tlenon kijtosneki yejon? Ika Jehová kita tlen tlaltikpakchanejkej xkitaj. Yejua kimatstok nochi tlen tejuamej tiknemiliaj niman tikmachiliaj (xpoua Proverbios 17:3). Jehová techtlasojtla ijkuak kita ika tikintlakamatij itlanauatiluan. Kuakon, maka keman matiauilnemikan nion matitekajkayauakan, pampa yejon tlen Satanás niman akin yejua kinyekana kuelitaj (Juan 4:14; 1 Juan 5:18, 19). Ijkuak más tiknisiuiskej toTajtsin, más tiktlasojtlaskej niman tiktlakaitaskej. Xtiknekiskej  tikchiuaskej itlaj tlen makiyolkoko toTajtsin nion xtiknemiliskej tikchiuaskej itlaj tlen yejua xkuelita. Ijkuak itlaj tikixnamikiskej, totlajtoltiskej: “¿Kenon uelis nikyolkokos yakaj akin melak nechtlasojtla niman miyek yokichiuj nopampa?” (1 Juan 4:9, 10).

4. ¿Tlenon okichiuj se tokniuj pampa kitlakaitaya Jehová?

⁴ Marta, b se tokniuj akin ualeua Croacia, okinek kichiuas itlaj tlen xkuajli. Yejua okijkuilo: “Xueliya kuajli nitlanemiliaya. San niknemilijtoya kenon tlen nechyoltilanaya nechyolpaktiskia maski san achijtsin. San ika, pampa niktlakaita Jehová onechpaleui”. ¿Kenon okipaleui? Marta okijto ika pampa kitlakaita toTajtsin opeuj tlanemilia itech kenon onkisaskia tla kitlapejpeniskia tlen xkuajli. Tejuamej noijki uelis ijkon tikchiuaskej. Matikilnamikikan ika melak xkuajli yes tla titlajtlakouaj, pampa tikyolkokoskej Jehová niman xok uelis tikueyichiuaskej (Gén. 6:5, 6).

5. ¿Tlenon mitsmachtia tlen ipan onochiuj Leo?

⁵ Akin kitlakaita Jehová xkinemilia ika xkijtlakos tla nouika imiuan akin xkitekichiuiliaj Jehová. Matikitakan tlen ipan onochiuj Leo, akin chanti República Democrática del Congo. Naui xiuitl sakin ika onoapolakti opeuj nouika imiuan akin xkitekichiuiliaj toTajtsin. Kinemiliaya ika yejon xse tlajtlakojli katka pampa yejua xkichiujtoya tlen xkuajli. San ika, xouejkauj ika akin imiuan nouika okimaujkej niman opeuj melak tlauani niman auilnemi. Itajuan Leo iteixpantijkauan Jehová katkaj, kuakon yejua opeuj tlanemilia itech nochi tlen okimachtijkaj niman okilnamik kenon melak yolpakiya. Yejua otlanemili itech tlen okichiuj, niman pampa tlayekankej okipaleuijkej onokuep itech Jehová. Aman Leo melak yolpaki pampa tlapaleuiya ken tlayekanketl niman ken precursor especial.

6. ¿Intech akinomej omemej siuamej titlajtoskej ipan yejuin tlamachtijli?

 ⁶ Aman matikitakan Proverbios capítulo 9, ompa tlajtoua itech omemej siuamej, se akin tlamatki niman okse akin xtlamatki (uelis tikitas Romanos 5:14; Gálatas 4:24). Ijkuak tomachtiskej okseki párrafos, xkilnamiki ika Satanás niman akin kinyekana san tlanemilijtokej itech sexo niman pornografía (Efes. 4:19). Yejua ika, melak noneki más matiktlakaitakan Jehová niman matiktlalkauikan tlen xkuajli (Prov. 16:6). Tinochimej, maski tla titlakamej noso tisiuamej uelis techpaleuis tlen kijtoua Proverbios capítulo 9. Yejuin omemej siuamej akin tikinteneuaskej kinnotsaj akin “xe ixtojtomij”. Yeskia kentla kinnotsaskiaj imiuan matlakuatij inchan (Prov. 9:1, 5, 6, 13, 16, 17). San ika, xsan noijki ontlamij akin kalakij inchan yejuin siuamej.

7. Ken kijtoua Proverbios 9:13-18, ¿kenon ontlamij akin kikakij on siuatl akin xtlamatki? (Noijki xkita tlaixkopinajli).

⁷ Kachtopa matitlajtokan itech siuatl akin xtlamatki (xpoua Proverbios 9:13-18). Yejua xpinaujkayo niman “on telpokamej yejuan xe ixtojtomij kimijlia: ‘¡Xuajlakan nikan!’”. Ijkon kinyoleua iuan achijtsin manoyolpaktikan. ¿Niman kenon ontlamij akin kalakij ichan? “Onxinij miktlan”. Xsan ipan yejuin tlaxelojli noteneua se siuatl akin ijkon kichiua. Ipan okseki itlaxeloluan Proverbios kiteneua se siuatl akin notemajmakasneki niman noijki okse siuatl “akin tekajkayaua”. Intech yejuamej ijkin noijtoua: “Tla sen tlakatl kalaki ichan on siuatl, kijtosneki kajsi ojtli yejuan kuikas kampa mikis” (Prov. 2:11-19). Proverbios 5:3-10 kiteneua okse siuatl akin noijki “tekajkayaua” niman kijtoua ika “on yejuan iuan nokajkayaua kenon siuatl, kinextia mikilistli”.

8. ¿Tlenon noneki kitlapejpeniskej akin kikakij itlajtol on siuatl akin xtlamatki?

⁸ Nochimej akin kikakij itlajtol yejuin siuatl akin xtlamatki noneki kitlapejpeniskej tla kalakiskej ichan, noso ka. ¿Kemanon ueliskia ijkon topan nochiuas? Uelis ijkon panos ijkuak itlaj kichiuas matiknekikan tiauilnemiskej noso ijkuak tixpan uajnestiuetsis se tlaixkopinajli itech pornografía. ¿Tlenon tiktlapejpeniskej tikchiuaskej ijkuak ijkon panos?

9, 10. ¿Tleka xnoneki tiauilnemiskej?

⁹ Melak techpaleuis tla xtiauilnemij. Proverbios techijlia ika yejon siuatl akin xtlamatki kijtoua: “On atl yejuan san tikichtekis más uelik”. ¿Tlenon kineskayotia yejon atl tlen san kichtekij? Biblia kijtoua ika ijkuak akin yononamiktijkej san sekan notekaj yeskia kentla atl tlen  teseselia (Prov. 5:15-18). Se tlakatl niman se siuatl akin yononamiktijkej uelis ijkon noyolpaktiskej. San ika, atl tlen san kichtekij xteyolseselia. Yejuin kanaj kijtosneki ijkuak yakaj noteka iuan akin xixnamik. ToTajtsin xkuelita ijkuak ijkon kichiuaj. Miyekpa, akin auilnemij san ichtaka kichiuaj, ijkon ken yakaj akin tlachteki. Akin ijkon kichiuaj kanaj kimachiliaj ika yejuin atl melak tsopelik pampa kinemiliaj xakaj kimita. San ika, san yejuamej nokajkayauaj pampa Jehová, akin kita nochi, xuelis kikajkayauaskej. Tla yakaj auilnemi, xok uelis nouikas iuan toTajtsin niman yejon yeskia ken itlaj tlen melak chichik (1 Cor. 6:9, 10). San ika, xsan yejon.

¹⁰ Kanaj sekimej akin auilnemij pinauij, xok kuajli nomachiliaj, xok nouikaj imiuan inchanejkauan noso siuamej nokoneuajtiaj. Kuajli nesi ika xtlaj ika techpaleuis tla tijkakij yejon siuatl akin xtlamatki. Miyekej akin auilnemij xok nouikaj iuan toTajtsin niman noijki peua kimajsi kokolistli tlen kichiua mamikikan (Prov. 7:23, 26). Proverbios capítulo 9 ijkin ontlami: “On tlakamej yejuan onkalakij ipan ichan, onxinij miktlan”. Kuakon, tla xkuajli ontlamij, ¿tleka miyekej yauej itech yejuin siuatl? (Prov. 9:13-18).

11. ¿Tleka melak xkuajli tla tikitaj pornografía?

¹¹ Satanás noijki tekajkayaua ika pornografía. Sekimej kinemiliaj ika xtlaj panoua tla tikitaj. San ika, yejon xmelauak. Pornografía melak teijtlakoua. Kichiua maka sa xtetlakaita niman maka xkintlakaita oksekimej. Niman ouijtika tijkajkauas. Tlaixkopinaltin itech auilnemilistli xnimantsin uelis tikimilkauas. Noijki, pornografía kichiua más xneki tiauilnemis (Col. 3:5; Sant. 1:14, 15). Niman miyekej akin kitaj pornografía, sakin auilnemij.

12. Tla uajnesi se tlaixkopinajli tlen ueliskia kichiuas matiknemilikan tlen tsokuiltik, ¿tlenon noneki tikchiuaskej?

¹² ¿Tlenon nonekiskia kichiuas se tokniuj tla ijkuak kikuitika icelular noso itableta uajnesi se tlaixkopinajli kampa auilnemij? Noneki nimantsin oksekan ontlachias. Uelis techpaleuis tla tikilnamikij ika para tejuamej melak ueyi kijtosneki touikaskej iuan Jehová. Maski seki tlaixkopinaltin xkipiyaj pornografía, xnoneki tikimitaskej pampa ueliskia kichiuas matiknemilikan tlen tsokuiltik. Niman, ijkon tikchiuaj pampa xtiknekij nion achijtsin tiauilnemiskej ipan toyojlo (Mat. 5:28, 29). David, se tlayekanketl akin ualeua Tailandia, kijtoua: “Nejua nikuelita ninotlajtoltis: ‘¿Kuelitas Jehová manikimitsto yejuin tlaixkopinaltin maski xkipiyaj pornografía?’. Yejuin nechpaleuiya kuajli maniktlapejpeni tlen nikchiuas”.

13. ¿Tlenon techpaleuis matiktlapejpenikan tlen kuajli?

¹³ Tla tiktlakaitaj Jehová niman xtiknekij tikyolkokoskej, xouijtika tikitaskej tiktlapejpeniskej tlen kuajli. Yejua ika, Proverbios 9:10 kijtoua: “Tla tiktlakaitas toTEKO nesis ika melauak titlamatki”. Yejon tlen techasikamachiltia ipeujyan Proverbios capítulo 9, kampa tlajtoua itech se siuatl akin kineskayotia tlamatkilistli.

14. ¿Akinon okse technotsa ipan Proverbios 9:1-6?

¹⁴ (Xpoua Proverbios 9:1-6). Nikan technotsa Jehová, akin otexchijchiuj niman itech ualeua tlamachilistli (Prov. 2:6; Rom. 16:27). Aman Proverbios tlajtoua itech se ueyi kajli tlen kipiya siete pilares. Yejuin kijtosneki ika Jehová kuelita kitemakas niman kuelita kinselis nochimej akin kintlakamatij itlanauatiluan.

15. ¿Tlenon techijlia toTajtsin?

¹⁵ Jehová kuelita kitemakas niman techmaka miyek tlen kuajli. Niman noijki yejon tlen kichiua siuatl akin kineskayotia “tlamatkilistli” akin noteneua ipan Proverbios capítulo 9. Yejua nochi yokichiuj: yokiyektlali mesa, yokikxitij nakatl niman yokitlali vino (Prov. 9:2). Noijki, Proverbios 9:4 niman 5 kijtoua ika  tlamatkilistli kinnotsa akin xiixtojtomij niman kimijlia: “Xuajlakan, xkuakij notlakual”. ¿Tleka noneki tijkakiskej yejuin siuatl akin kineskayotia tlamatkilistli? Pampa Jehová kineki kintlajpiyas ikoneuan niman kinmakas tlamatkilistli. Yejua xkineki matitlajyouikan para tikmatiskej ika itlaj xkuajli. Ika yejon, “toTEKO kimpaleuiya niman kinmanauiya on yejuan melajkanemij” (Prov. 2:7). Tla tiktlakaitaj Jehová tiknekiskej tikyolpaktiskej niman tikchiuaskej tlen technauatia. Yejuin kichiua matiyolpakikan (Sant. 1:25).

16. Pampa Alain kitlakaita Jehová, ¿tlenon okichiuj, niman kenon otepaleui yejuin?

¹⁶ Matikitakan itlaj tlen techititis ika tla tiktlakaitaj Jehová techpaleuis matiktlapejpenikan tlen kuajli. Alain, akin tlapaleuiya ken tlayekanketl ipan tlanechikojli, tekiti ken maestro ipan se escuela. Yejua kijtoua: “Miyekej nocompañeros akin imiuan nitekiti kinemiliaj ika películas tlen kipiyaj pornografía kinpaleuiya para más ueliskej itech sexo niman ijkon más kuajli temachtiskej”. San ika, Alain kimatstok ika xkuajli yeskia tla ijkon tlanemiliskia. Yejua techijlia tlenon okichiuj: “Nejua niktlakaita Jehová, ika yejon, xoniknek nikimitas yejon películas niman noijki onikimijli akin imiuan nitekiti tleka xnikimitaskia”. Ijkon, yejua okiteititi ika tlamachilise niman ika kichiua ken “yejuan tlamatkej” (Prov. 9:6). Sekimej akin imiuan tekiti okinmojkatlachialti tlen okichiuj Alain. Yejua ika, noijki opeujkej nomachtiaj Biblia niman opeujkej yauej tlanechikoltin.

17, 18. ¿Kenon nemij akin kichiuaj tlen kijtoua siuatl akin kineskayotia “tlamatkilistli”, niman kenon nemiskej ika tlayekapan? (Noijki xkita tlaixkopinajli).

¹⁷ Ika yejuin omemej siuamej, akin se kineskayotia tlamatkilistli niman okse akin “xtlamatki”, Jehová techititia tlen noneki tikchiuaskej tla tiknekij tiyolpakiskej ika tlayekapan. Akin kichiuaj tlen kijtoua yejon siuatl akin “xtlamatki” san kinekij noyolpaktiskej ijkuak auilnemij. Yejuamej san tlanemiliaj itech tlen kichiujtokej niman xkinemiliaj kenon kimijtlakos ika tlayekapan. Nochimej akin kichiuaj tlen kijtoua yejon siuatl akin “xtlamatki” “onxinij miktlan” (Prov. 9:13, 17, 18).

¹⁸ San ika, melak kuajli onkisaj akin kichiuaj tlen kijtoua yejon siuatl akin kineskayotia tlamatkilistli. ¡Yolpakij pampa kipiyaj miyek tlen ika kichikauaj intlaneltok! Tlen yeskia kentla tlakuajli (Is. 65:13). Jehová ijkin kijtoua itechkopa teotlajtoketl Isaías: “Aman kuajli xkakikan tlinon nemechijlia, niman nenkuaskej on kuajli tlakuajli yejuan uelik” (Is. 55:1, 2). Kema, tejuamej tomajmachtijtokej tiktlasojtlaskej tlen Jehová kitlasojtla niman tiktlauelitaskej  tlen yejua kitlauelita (Sal. 97:10). Noijki, tiyolpakij tikimijliskej oksekimej manoyekanakan ika melauak “tlamatkilistli”. Tejuamej tiyeskiaj ken on siuamej tekichiuilijkej akin kinteneua Proverbios capítulo 9 niman tsajtsij “kampa más tlakpak de on ueyikalpan”. Ijkon ken yejuamej, tikijtouaj: “¡Xuajlakan nikan, telpokamej yejuan xe nenmixtojtomij!”. Tejuamej niman akin techkakij techpaleuiya tla tikchiuaj tlen kijtoua Proverbios. Niman noijki techpaleuis ika tlayekapan. Tla touikaj “ken yejuan tlamatkej”, uelis nochipa tinemiskej (Prov. 9:3, 4, 6).

19. Ken kijtoua Eclesiastés 12:13, 14, ¿tlenon noneki tikchiuaskej? (Noijki xkita recuadro “ ¿Kenon techpaleuiya tla tiktlakaitaj toTajtsin?”).

¹⁹ (Xpoua Eclesiastés 12:13, 14). Aman ika itinemij ipan itlamiyan tonaltin más yomiyekiyak tlen xkuajli. San ika, tejuamej nochipa tiknekij tiktlakaitaskej Jehová. Ijkon tiktlajpiyaskej toyojlo, tichipaujkanemiskej niman tinemiskej nisiuj itech Jehová. Pampa tiktlasojtlaj niman melak tiktlakaitaj tiknekij tikinnotsaskej nochimej akin kitejtemouaj “tlamatkilistli” niman ijkon itech manopaleuikan.