1. ¿Tlenon noneki tikchiuaskej tla tiknekij timakisaskej?

 IJKUAK Biblia kijtoua “itonal Jehová”, tlajtotika itech on tiempo ijkuak toTajtsin kinpopolos itlauelikniuan niman kimakixtis ikalpan. Yeuejkaui Jehová okintlajtlakolmakak sekimej kalpamej (Is. 13:1, 6; Ezeq. 13:5; Sof. 1:8). Itonal Jehová tlen iyejkos, peuas ijkuak kixnamikiskej Ueyixtika Babilonia niman tlamis ipan Armagedón. Tla tiknekij timakisaskej, noneki toyektlaliskej desde aman. Jesús otemachti ika noneki titlatlachixtoskej ijkuak yejkos ueyi tlajyouilistli, ijkon okiteititi ika yejuin itlaj tlen noneki nochipa tikchiujtoskej (Mat. 24:21; Luc. 12:40).

2. ¿Kenon techpaleuis tla tomachtiaj 1 Tesalonicenses?

² Ipan 1 Tesalonicenses, apóstol Pablo okinteneuj miyek neskayomej para kinpaleuis tokniuan makasikamatikan tlenon nonekiya kichiuaskej achto yejkos itonal Jehová. Pablo kimatstoya ika ok uejkauiskia para mayejko itonal Jehová (2 Tes. 2:1-3). San ika, okimijli ika melak nonekiya manoyektlalikan, kentla tla yejon tonajli iyejkoskia. Tejuamej noijki uelis ijkon tikchiuaskej. Matikitakan tlenon okijto itech 1) kenon yejkoskia itonal Jehová, 2) akinomej xmakisaskiaj niman 3) tlenon uelis tikchiuaskej achto yejkos yejon tonajli.

3. ¿Tleka tikijtouaj ika itonal Jehová yeskia kentla ijkuak yakaj “tlachteki ipan yeuajli”? (Noijki xkita tlaixkopinajli).

³ “Ijkon ken se akin tlachteki ipan yeuajli” (1 Tes. 5:2, TNM). Yejuin kachtopa neskayotl tlen Pablo okitekitilti para kiteititis kenon yejkos itonal Jehová. Akin tetlachtekiliaj san isiujkan tlachtekij niman kichiuaj ika tlayoua, ijkuak xakaj kinchia.  Noijki ijkon, itonal Jehová san isiujkan yejkos niman miyekej hasta mojkatlachiaskej. Akin tiktekichiuiliaj toTajtsin kanaj noijki techmojkatlachialtis ijkuak tikitaskej ika nochi san isiujkan panos. San ika, tejuamej xtechpopoloskej; san kinpopoloskej akin xkuajkualtin.

4. ¿Tleka tikijtouaj ika itonal Jehová yeskia kentla “ijkuak on siuatl san uajpejtetsi nokokoua para kinemitia ikonetsin”?

⁴ “Ken ijkuak on siuatl san uajpejtetsi nokokoua para kinemitia ikonetsin” (1 Tes. 5:3). Se siuatl akin koneua xkimati tlen tonajli kinemitis ikonetsin. San ika, kuajli kimatstika ika yejkos. Niman noijki kimatstika ika ijkuak ijkon panos san isiujkan yes, melak tekoko yes niman ika xuelis kiteltis. Noijki ijkon, maski xtikmatij tlen tonajli nion tlen hora yejkos itonal Jehová, kuajli tikmatstokej ika yejkos. Tikmatstokej ika yejua san isiujkan kintlajtlakolmakas akin xkuajkualtin niman ika xakaj uelis kinmakixtis.

5. ¿Tleka tikijtouaj ika itonal Jehová yeskia kentla ijkuak uajtlanesi?

⁵ Ken ijkuak uajtlanesi. Ipan ika yeyi neskayotl Pablo oksejpa tlajtoua itech akin tlachtekij ika tlayoua, san ika, aman kijtoua ika itonal Jehová yeskia kentla ijkuak uajtlanesi (1 Tes. 5:4). Ijkuak yakaj tlachteki, kemantika nion xkita ika yopeuj tlanesi niman ika uelis kitaskej. Ipan ueyi tlajyouilistli noijki ijkon panos. Nochimej akin kichiuaj tlen toTajtsin kitlauelita niman kinemiliaj ika xakaj kimita, yejua kimixpantis. San ika, tejuamej xijkon ken yejuamej, yej tikteititiaj ika yotoyektlalijkej para itonal Jehová. ¿Kenon tikteititiaj? Tla xtikchiuaj tlen Jehová kitlauelita niman tla tokojtiliaj nochipa tikijtoskej “tlen melauak”, tla tikchiuaj tlen kuajli niman tla tiyolmelajkej (Efes. 5:8-12). Pablo sakin okintekitilti ome neskayomej para kiteititis akinomej xmakisaskej ipan itonal Jehová.

6. ¿Tleka tikijtouaj ika miyekej kentla kochtoskiaj? (1 Tesalonicenses 5:6, 7).

⁶ Akin kochij (xpoua 1 Tesalonicenses 5:6, 7). Pablo okijto ika akin xmakisaskej ipan itonal Jehová yeskiaj kentla akin kochtokej. Yakaj akin kochtika xueli kita tlenon panoua iyeualiujyan niman xkita kenon panoua tiempo. Nion xkita tla tlen panotika uelis kipaleuis noso kijtlakos, niman xueli itlaj kichiua. Aman miyekej xkuajli kipiyaj intlaneltokil pampa kentla kochtoskiaj (Rom. 11:8). Xkasikamatij ika tinemij ipan “itlamiyan tonaltin” niman ika iyejkos ueyi tlajyouilistli. Ijkuak nochiua itlaj tlen melak xkuajli, sekimej peua kikakij iTlajtol toTajtsin. Uelis tikijtoskej ika kentla achijtsin kintlapouaj imixtololojuan. San ika, miyekej de yejuamej oksejpa xok kikakij iTlajtol toTajtsin. Niman maski miyekej noijki kineltokaj ika yejkos se tonajli ijkuak toTajtsin kintlajtlakolmakas akin xkuajkualtin, kinemiliaj ika ok uejkauis (2 Ped. 3:3, 4). San ika, tejuamej tikmatij ika aman más noneki matitlatlachixtokan.

7. ¿Tleka tikijtouaj ika nochimej akin toTajtsin kinpopolos yeskiaj kentla akin tlauanij?

⁷ Akin tlauanij. Apóstol Pablo okijto ika nochimej akin toTajtsin kinpopolos yeskiaj kentla akin tlauanij. Akin tlauani xueli kuajli tlanemilia niman xkuajli kitlapejpenia tlenon kichiuas. Noijki ijkon, akin xkuajkualtin xkikakisnekij toTajtsin niman xkuajli tlen kitlapejpeniaj. San ika, apóstol Pablo okimijli tokniuan makichiuakan kentla akin tlachixtokej, maka kentla akin yotlauankej (1 Tes. 5:6). Se ixtlamatki itech Biblia kijtoua ika yakaj akin kuajli tlachixtok yolseujtok niman kuajli kinemilia tlenon kichiuas, yejuin kipaleuiya makitlapejpeni tlen kema kipaleuis. San ika ¿tleka noneki tiyolseujtoskej niman kuajli titlanemiliskej? Pampa tla xtotlajpiyaj uelis peuas tokalaktiskej ipan política niman tikchiuaskej ijkon ken akin xnomachtiaj Biblia. Niman pampa inisiuj itonal Jehová, tikmatstokej ika onias más miyek tlemach tlen uelis kichiuas maka matiyolmelajkanemikan. San ika, xnoneki melak tajmanaskej pampa iespíritu santo toTajtsin techyolseuis niman techpaleuis matiktlapejpenikan tlenon tikchiuaskej (Luc. 12:11, 12).

8. Itech tlen kijtoua 1 Tesalonicenses 5:8, ¿tlenon noneki tikchiuaskej para titlatlachixtoskej niman kuajli titlanemiliskej? (Noijki xkita tlaixkopinajli).

⁸ Matotlalilikan toteposchaleco niman tocasco. Pablo okijto ika tejuamej tiyeskiaj kentla soldados akin tlatlachixtokej niman kipiyaj nochi tlen ika tlaixnamikiskej (xpoua 1 Tesalonicenses 5:8). Ijkuak onka se guerra, se soldado noneki kuajli noyektlalis niman ijkon uelis tlaixnamikis. Ijkon ken yejon soldado, tejuamej noijki tikteititiaj ika yotoyektlalijkej para itonal Jehová tla totlaliliaj toteposchaleco: kijtosneki tla más tikchikauaj totlaneltok niman más titetlasojtlaj. Noijki tla totlaliliaj tocasco: kijtosneki tla más titlaneltokaj itech tlen toTajtsin yokijto kichiuas. Nochi yejuin melak techpaleuis.

9. ¿Kenon techpaleuiya totlaneltok?

⁹ Ijkon ken se teposchaleco kitlajpiaya iyojlo se soldado, totlaneltok niman tlasojtlalistli kipaleuiya tlen tikpiyaj ipan toyojlo. Totlaneltok niman totlasojtlalis techpaleuiya matiktekichiuilikan Jehová niman matikchiuakan ken Jesús. Totlaneltok techpaleuiya matikneltokakan ika Jehová “kintiochiuas on yejuan melauak kitejtemouaj” (Heb. 11:6). Noijki, techpaleuiya matiyolmelajkanemikan itech Jesús maski tikixnamikij miyek tlen ouijtika. Tla tiknekij tikchikauaskej totlaneltok niman tikxikoskej tlen tikixnamikij, noneki tikitaskej kenon oksekimej  tokniuan yoyolmelajkanenkej, maski kintlaueltokaj noso xkipiyaj tlen ika nopanoltiskej. Tla xtiknekij peuas tikileuiskej miyek tomin noso tiknekiskej totomintiskej, noneki tikchiuaskej ijkon ken tokniuan akin san ika achijtsin nemij niman nokojtiliaj chikauak kitekichiuiliskej toTajtsin.

10. ¿Tlenon ika tiknekiskej tikchiuaskej tla tiktlasojtlaj toTajtsin niman tikintlasojtlaj oksekimej?

¹⁰ Noijki, noneki titetlasojtlaskej tla tiknekij titlatlachixtoskej niman kuajli titlanemiliskej (Mat. 22:37-39). Tla tiktlasojtlaj toTajtsin tiknekiskej tikinnojnotsaskej oksekimej maski tikixnamikiskej tlen ouijtika (2 Tim. 1:7, 8). Niman pampa noijki tikintlasojtlaj akin xtokniuan, tokojtiliaj tikinnojnotsaskej, maski ipan teléfono noso ika carta. Xtiknemiliaj tla xok uelis makisaskej. Tejuamej tikchiaj manopatlakan niman makichiuakan tlen kuajli (Ezeq. 18:27, 28).

11. ¿Kenon techpaleuiya tla tikintlasojtlaj tokniuan? (1 Tesalonicenses 5:11).

¹¹ Pampa tikintlasojtlaj tokniuan tokojtiliaj tikinyolchikauaskej niman tikinchikauiliskej intlaneltok (xpoua 1 Tesalonicenses 5:11). Soldados akin san sekan tlaixnamikij nopaleuiyaj. San ika, ijkuak ontlaixnamikij kanaj san no yejuamej uelis kikokoskej se incompañero, maski xkinekij. Noijki ijkon, tejuamej xkeman tikinyolkokoskiaj noso tikinchiuiliskiaj tlen xkuajli tokniuan san pampa tiknekij (1 Tes. 5:13, 15). Noijki, uelis tikimititiskej tokniuan ika tikintlasojtlaj tla tikintlakaitaj akin tlayekanaj ipan tlanechikojli (1 Tes. 5:12). Matontlanemilikan itech tlanechikojli tlen onkatka Tesalónica. Ijkuak Pablo okintlajkuilouili tokniuan de Tesalónica, tlanechikojli xiuejkauiya, kemach kipiaya kanaj se xiuitl. Kanaj tlayekankej xmás kimatiyaj kenon kichiuaskej intekiyo niman nopopolouayaj, san ika, nonekiya kintlakaitaskej. Aman, más noneki matopaleuikan intech akin kiyekanaj tlanechikojli. ¿Tleka? Pampa iyejkos ueyi tlajyouilistli, niman ijkuakon kanaj xuelis tikmatiskej tlen techijliskej tokniuan de sucursal niman de oficina kampa noyekanaj nochi sucursales. Yejua ika, melak noneki ika desde aman matikintlakaitakan niman matikintlasojtlakan tokniuan akin tlayekanaj  ipan tlanechikojli. Maski san tlenon mapano, kuajli matitlanemilikan niman maka san matikitakan kenon nopopolouaj. Matikilnamikikan ika Jehová kitekitiltijtika Jesús niman ijkon kinyekanas yejuin yolmelajkej tlakamej.

12. ¿Kenon tlen tikchiaj techpaleuiya kuajli matitlanemilikan?

¹² Ijkon ken se casco kipaleuiaya itsontekon se soldado, totlamachialis techpaleuiya kuajli matitlanemilikan. Pampa tikmatij tlenon techmakas toTajtsin ika tlayekapan, tikitaj ika tlen techmakasneki yejuin tlaltikpaktli xtlaj ika tepaleui (Filip. 3:8). Totlamachialis noijki techyolseuiya niman techpaleuiya kuajli matitlanemilikan. Yejon tlen inpan onochiuj tokniuj Wallace niman isiuauj Laurinda, akin tlapaleuiyaj ne África. San ipan yeyi semanas, Laurinda omik inan, niman Wallace omik itaj. Yejuamej xouel oyajkej ipan inpaís niman ijkon nemiskej iuan infamilia pampa panotoya kokolistli COVID-19. Tokniuj Wallace kijtoua: “Melak nechpaleuiya ijkuak nikilnamiki ika yoliuiskej akin yomijkej. Xsan nitlanemilia itech tlen okixnamijkej achto mikiskiaj, yej nitlanemilia itech kenon nemiskej ipan xochitlalpan. Yejuin nechyolseuiya niman nechpaleuiya maka sajnoye maninajmana pampa xok touan nemij”.

13. ¿Tlenon uelis tikchiuaskej para Jehová matechmaka espíritu santo?

¹³ “Maka xteltikan [...] Espíritu Santo” (1 Tes. 5:19). Pablo okijto ika espíritu santo yeskia ken itlaj tlitl tlen onka ipan toyojlo. Yejuin espíritu techpaleuiya matiyolpakikan, matiknekikan matikchiuakan tlen kuajli niman techpaleuiya chikauak matiktekichiuilikan Jehová (Rom. 12:11). ¿Tlenon uelis tikchiuaskej para Jehová matechmaka espíritu santo? Noneki tiktlajtlaniliskej. Noijki noneki tomachtiskej iTlajtol niman nochipa tinemiskej ipan ikalpan. Tla ijkon tikchiuaj, tikteititiskej ika toyekanaj ika espíritu santo (Gál. 5:22, 23).

14. ¿Tlenon xnoneki tikchiuaskej tla tiknekij nochipa tikseliskej iespíritu santo toTajtsin? (Noijki xkita tlaixkopinajli).

¹⁴ Jehová techmaka iespíritu, san ika, noneki totlajpiyaskej para maka tikchiuaskej itlaj tlen makitelti. Tla tiknekij ika Jehová matechmaka iespíritu santo, noneki tikchiuaskej tlen kuajli  niman chipaujtos totlamachilis. Tla peua tiknemiliaj tlen xkuajli niman tikchiuaj, tikpoloskej iespíritu santo toTajtsin (1 Tes. 4:7, 8). ¿Tlenon más noneki tikilnamikiskej? Pablo okijto: “Maka xchichiuakan [noso xkauilmatikan] on tiotlajtojli” (1 Tes. 5:20). Ijkuak ipan yejuin tlaxelojli kijtoua “tiotlajtojli”, kiteneujtika tlen toTajtsin kiteijlia itechkopa iespíritu. Kijtosneki ika onotekitilti iespíritu santo ijkuak onoteneuj tlenon nochiuas ipan itonal Jehová niman ika melak inisiuj. Tejuamej xtiknemiliaj ika ok uejkauis yejuin tonajli noso ika xtikitaskej ijkuak peuas Armagedón. Kuajli tikasikamatij ika sa achijtsin poliui para yejkos. Yejua ika, mojmostla tokojtiliaj tinemiskej ika “yolchipaualistli niman yolkuajlilistli” (2 Ped. 3:11, 12).

15. ¿Tlenon uelis tikchiuaskej para maka techkajkayauaskej? (1 Tesalonicenses 5:21).

¹⁵ Ika tlayekapan, itlauelikniuan toTajtsin kijtoskej yejuin: “Onkaj yolseuilistli niman xakaj nion itlaj uelis techmiktis” (1 Tes. 5:3). Apocalipsis kijtoua ika ijkuakon xkuajkualtin espíritus melak miyekej kinkajkayauaskej (Apoc. 16:13, 14). ¿Niman tejuamej? ¿Tokauiliskej matechkajkayauakan? Xijkon panos tla nochi tikixtlalouaj (xpoua 1 Tesalonicenses 5:21). Tlajtojli “xkixtlalokan”, tlen nikan notekitiltia, ualeua itech se tlajtojli ika griego tlen kijtosneki kuajli tikitas tla se tepostli oro noso plata. Tejuamej noijki noneki kuajli tikitaskej tla melauak tlen tijkakij noso tlen tikpouaj. Yeuejkaui, tesalonicenses nonekiya ijkon kichiuaskej. Aman, noijki noneki ijkon matikchiuakan pampa más inisiuj ueyi tlajyouilistli. Tejuamej xtikneltokaj nochi tlen techijliaj, yej tiktekitiltiaj totlamachilis niman tikitaj tla tlen tikamapouaj noso tlen tijkakij uajlauj ipan Biblia noso tla ijkon kijtoua ikalpan Jehová. Ijkon, xkuajkualtin espíritus xtechkajkayauaskej (Prov. 14:15; 1 Tim. 4:1).

16. ¿Tlenon tikseliskej ika tlayekapan, niman tlenon noneki tikchiuaskej aman?

¹⁶ Tikmatstokej ika Jehová kipaleuis ikalpan ijkuak panotos ueyi tlajyouilistli, san ika, xtikmatij tlenon nochiuas ipan cada se de tejuamej (Sant. 4:14). Maski tla timakisaj ipan ueyi tlajyouilistli noso tla timikij, Jehová techmakas nemilistli tlen xkeman tlamis tla itech tiyolmelajkanemij. Akin tlapejpeniltin nemiskej iuan Cristo ne iluikak, niman oksekimej borreguitos nemiskej ipan yejuin tlaltikpaktli tlen nokuepas se xochitlalpan. Chika yejko yejon tonajli, nochipa matitlanemilikan itech tlen Jehová techmakas niman matoyektlalikan para itonal Jehová.