1. Ijkon ken kijtoua 1 Pedro 5:2, ¿tlenon kipatiojkaitaj kichiuaskej tokniuan tlayekankej?

 JEHOVÁ yokintekitlali tokniuan tlayekankej para makintlajpiyakan iborreguitos. Yejuamej kipatiojkaitaj kinpaleuiskej imikniuan niman nokojtiliaj kuajli tlayekanaskej (Jer. 23:4; xpoua 1 Pedro 5:2). ¡Melak tiyolpakij ika ipan totlanechikoluan nemij tokniuan akin ijkon kichiuaj!

2. ¿Tlenon kixnamikij sekimej tlayekankej?

² Tlayekankej kixnamikij miyek tlen ouijtika ijkuak kichiuaj intekiyo. Yejuamej noneki chikauak tekitiskej niman ijkon kitlajpiyaskej tlanechikojli. Matontlanemilikan itech tlen okixnamik tokniuj Tony, se tlayekanketl de Estados unidos. Yejua okasikamat ika xnochi ueliya kichiuaya niman ika xnonekiya kiselis nochi tekitl tlen kimakayaj. Tony kijtoua: “Ijkuak opeuj kokolistli COVID-19, nonekiya tikitaskej kenon nochiuaskej tlanechikoltin niman kenon titenojnotsaskej. Onechijlijkej tla ueliskia nikchiuas nochi yejon tekitl niman nejua nochipa nikijtouaya ika kema. San ika, maski ninokojtiliaya nochi nikchiuas, nochipa onkatka miyek tekitl. Yejon okichiuj maka manikpiya tiempo para nikpouas noBiblia, ninomachtis niman nikchiuas teoyotl”. Ilir, se tlayekanketl akin ualeua Kosovo, okse itlaj okixnamik. Chantiya kampa onkatka miyek guerras niman ouijtika kitaya kitlakamatis tlen kijtouaya ikalpan toTajtsin. Yejua kijtoua: “Ijkuak sucursal onechtlajtlanili manikinpaleui tokniuan akin chantiyaj kampa nochiujtoya tlen xkuajli, melak oninomojti. Ouijtika onikitak niyolchikauak yes, niman niknemiliaya ika tlen techijliaya ikalpan toTajtsin xmás techpaleuiskia”. Noijki, se misionero de Asia akin itoka Tim, ouijtika kitaya kichiuas nochi itekiyo. Yejua kijtoua: “Melak yonisiaujka, hasta xok niueliya nikinpaleuiaya tokniuan”. ¿Tlenon uelis kichiuaskej tlayekankej tla kixnamiktokej itlaj ken yejuin?

3. ¿Kenon techpaleuis tla tikitaj tlen okichiuj Gedeón?

 ³ Tokniuan tlayekankej uelis miyek nomachtiskej itech tlen okichiuj Gedeón (Heb. 6:12; 11:32). Yejua kitlajpiaya niman kiyekanaya ikalpan toTajtsin (Juec. 2:16; 1 Crón. 17:6). Ijkon ken Gedeón, tlayekankej noneki kitlajpiyaskej ikalpan toTajtsin aman ika nochiujtika tlen melak ouijtika (Hech. 20:28; 2 Tim. 3:1). Tlayekankej noijki miyek ueliskej itech Gedeón tla kitaj kenon yolyemanki katka, tetlakamatiya niman kasikamatiya ika xnochi ueliya kichiuaya. Noijki, tlen okichiuj Gedeón tinochimej techpaleuis más matikpatiojkaitakan tlen kichiuaj tlayekankej niman techpaleuis matikinpaleuikan ika nochi toyojlo (Heb. 13:17).

4. ¿Kenon okiteititi Gedeón ika xnochi ueliya kichiuaya niman ika yolyemanki?

⁴ Gedeón kasikamatiya ika xnochi ueliya kichiuaya niman yolyemanki katka. b Ijkuak se iluikaktekitketl okijli ika Jehová yokitlapejpenijka para makinmakixti israelitas pampa madianitas kintlajyouiltijtoyaj, yejua ijkin otlanankili: “Noueyifamilia yejua más xkojtik yejuan kisaj itech itribu Manasés. Niman nejua xmás niueyixtikaj itech nofamilia” (Juec. 6:15). Yejua kinemiliaya ika xkimelauaya kichiuas yejon tekitl. San ika, Jehová kimatstoya ika yejua ueliskia kichiuas niman, pampa okipaleui, Gedeón ouel okichiuj yejon tekitl.

5. ¿Tlenon ueliskia kichiuas ika tlayekankej maka makiteititikan ika xnochi ueli kichiuaj niman ika yolyemankej?

⁵ Tlayekankej nokojtiliaj kasikamatiskej ika xnochi ueli kichiuaj niman nokojtiliaj yolyemankej yeskej (Miq. 6:8; Hech. 20:18, 19). Xnoueyimatij ipampa tlen kichiuaj niman xajmankamikij ijkuak nopopolouaj. San ika, kemantika ouijtika kitaj kiteititiskej ika xnochi ueli kichiuaj niman ika yolyemankej. Ijkon uelis panos tla se tlayekanketl kiselia miyek tekitl, san ika, sakin kita ika xnochi ueli kichiua. Kanaj, miyekej kijliskej ika melak kuajli okichiuj itekiyo noso kanaj peuas kitejteneuaskej pampa xkuajli okichiuj. Ijkuak ijkon panos, ¿kenon uelis kinpaleuis tlayekankej tlen okichiuj Gedeón?

6. ¿Kenon tlayekankej kiteititiaj ika kasikamatij ika xnochi ueli kichiuaj ijkon ken Gedeón? (Noijki xkita tlaixkopinajli).

⁶ Xtlajtlanikan mamechpaleuikan. Akin kasikamati ika xnochi ueli kichiua kitlajtlani  makipaleuikan. Gedeón ijkon okichiuj (Juec. 6:27, 35; 7:24). Tlayekankej akin tlamachilisejkej noijki ijkon kichiuaj. Tony, akin otikteneujkej ipan párrafo 2, kijtoua: “Nejua nochipa nikseliaya miyek tekitl pampa ijkon onechmachtijkej desde ijkuak nipitentsin katka. Yejua ika, onikimijli nochanejkauan ika ijkuak tikueyichiuaskiaj toTajtsin, tikitaskiaj kenon ueliskia tikasikamatiskej ika xnochi ueliskia tikchiuaskiaj. Niman onikijli nosiuatsin manechijli tlenon kinemilia. Noijki onikitak video Ijkon ken Jesús, matikinmachtikan oksekimej niman matitlaneltokakan intech, tlen onka ipan jw.org”. Tony opeuj kimijlia oksekimej makipaleuikan, yejua techijlia: “Yejuin okichiuj ika kuajli manochiua nochi tekitl ipan tlanechikojli, niman aman nikpiya más tiempo para nikchikauas notlaneltok niman ninouikas iuan Jehová”.

7. ¿Kenon tlayekankej uelis kichiuaskej ijkon ken Gedeón ijkuak yakaj kintejteneua? (Santiago 3:13).

⁷ Maka xkualanikan tla mechtejteneuaj. Ijkuak se tlayekanketl kitejteneuaj, melak kipaleuis tla kita tlen okichiuj Gedeón. Yejua kimatstoya ika nopopolouaya, niman xokualan ijkuak efraimitas opeujkej kitejteneuaj (Juec. 8:1-3). Pampa yolyemanki katka, kuajli okinkak niman yejon okichiuj mayolseuikan. Tlayekankej akin tlamachilisejkej kichiuaj ijkon ken Gedeón. Ijkuak yakaj kintejteneua, kuajli kikakij niman kuajli kinankiliaj (xpoua Santiago 3:13). Ijkon tlapaleuiyaj para maka maonia tlauejli ipan tlanechikojli.

8. ¿Tlenon noneki kichiuaskej tlayekankej ijkuak kinueyiteneuaskej? Xkijto se neskayotl.

⁸ Xueyiteneuakan Jehová. Ijkuak israelitas opeujkej kiueyiteneuaj Gedeón pampa okintlan madianitas, yejua okichiuj ika makiueyiteneuakan Jehová (Juec. 8:22, 23). ¿Kenon tlayekankej uelis kichiuaskej ijkon ken Gedeón? Tla kiueyiteneuaj Jehová ijkuak kuajli kisa intekiyo (1 Cor. 4:6, 7). Tla se tlayekanketl kijliaj ika melak kuajli ken temachtia, yejua uelis kijtos ika nochi okikixti ipan iTlajtol toTajtsin niman ika tinochimej miyek tiuelij pampa Jehová techmachtia itechkopa ikalpan. Tlayekankej noneki kitaskej tla ken temachtiaj kiueyiteneua Jehová noso san kichiua ika yejuamej makinueyiteneuakan. Matontlanemilikan itech tlen ipan onochiuj se tokniuj akin itoka Timothy. Ijkuak okitlalijkej ken tlayekanketl, melak kuelitaya kinpanoltis tlamachtiltin. Yejua kijtoua: “Ijkuak nikinpeualtiaya notlamachtiluan, melak niuejkauiya niman nikinteneuaya neskayomej tlen temojkatlachialtiayaj. Yejua ika, tokniuan nochipa nechijliayaj ika melak kualtsitsintin notlamachtiluan. San ika, onikitak ika nejua nechueyiteneuayaj niman xkiueyiteneuayaj Jehová nion tlen kijtoua Biblia”. Sakin, Timothy okitak ika nonekiya kipatlas ken temachtia niman ijkon maka san yejua makiueyiteneuakan (Prov. 27:21). ¿Kenon okipaleui yejuin? Yejua kijtoua: “Aman sekimej tokniuan nechijliaj ika notlamachtil okinpaleui matlaxikokan noso ika okichiuj más manonisiuikan itech Jehová. Más niyolpaki ipampa tlen nechijliaj aman, xijkon ken tlen achto nechijliayaj”.

9. ¿Tlenon okixnamik Gedeón? (Xkita tlaixkopinajli tlen nesi ixpan yejuin revista).

⁹ Sakin ika Jehová okitlali Gedeón para makinyekana israelitas, okixnamik miyek tlen okichiuj makita ouijtika tetlakamatis niman yolchikauak yes. Okijlikej makixoxotoni tlaixpan tlen itaj yokichijchiuilijka Baal (Juec. 6:25, 26). Sakin, Gedeón okinsentlali melak miyekej soldados para ontlaixnamikiskej, san ika, Jehová okpa okijli ika xnonekiya melak miyekej yeskej (Juec. 7:2-7). Niman sa ika tlami, Jehová okijli Gedeón makimixnamiki itlauelikniuan ijkuak melak itlayoua katka (Juec. 7:9-11).

10. ¿Kanaj tlenon kichiuas ika se tlayekanketl makita ouijtika tetlakamatis?

 ¹⁰ Tlayekankej noneki nochipa tetlakamatiskej (Sant. 3:17). Ijkuak se tlayekanketl tetlakamati, ika nochi iyojlo kichiua tlen kijtoua Biblia niman ikalpan toTajtsin, niman ijkon oksekimej kitaj ika noijki noneki ijkon kichiuaskej. San ika, kemantika kanaj ouijtika kitaj tetlakamatiskej pampa kinseliaj miyek tlanauatiltin niman yejon tlanauatiltin san totoka nopatlatiuetsij. Kemantika hasta uelis notlajtoltiskej tla kema tepaleuis tlen kintlajtlaniliaj makichiuakan. Noso kanaj kimijliskej makichiuakan itlaj tlen uelis kichiuas makintsakuakan. Ijkuak ijkon panos, ¿kenon tlayekankej uelis tetlakamatiskej ijkon ken Gedeón?

11. ¿Tlenon kinpaleuis tlayekankej matetlakamatikan?

¹¹ Kuajli xtlakakikan niman xchiuakan tlen mechijliaj. ToTajtsin yokijlika Gedeón kenon kixoxotonis tlaixpan tlen itaj yokichijchiujka, kanon kichijchiuas se tlaixpan para Jehová niman katlejua yolki kiuentlalis. Gedeón nimantsin okichiuj ken okinauatijkej niman xokpa okinemili. Ipan yejuin tonaltin, ikalpan toTajtsin kintekitiltia cartas, anuncios niman okseki tlen techpaleuiya niman ijkon kimijlis tlayekankej tlenon noneki kichiuaskej. Nochi yejuin kichiua machikaujto totlaneltokil niman kuajli matinemikan. Melak tikintlasojtlaj tokniuan tlayekankej pampa nokojtiliaj kichiuaskej ijkon ken kinnauatia ikalpan toTajtsin. Yejuin kipaleuiya nochi tlanechikojli (Sal. 119:112).

12. ¿Kenon tlayekankej uelis kichiuaskej tlen kijtoua Hebreos 13:17 ijkuak itlaj nopatlas?

¹² Xtetlakamatikan maski itlaj nopatla. Matikilnamikikan ika Jehová okijli Gedeón makintitlani inchan casi nochimej isoldados (Juec. 7:8). Kanaj yejua okinemili: “¿Noneki nikchiuas yejuin? ¿Uelis titetlaniskej?”. Maski ijkon, Gedeón otetlakamat. ¿Kenon tlayekankej uelis kichiuaskej ijkon ken yejua? Tla tetlakamatij maski ikalpan Jehová itlaj kipatla (xpoua Hebreos 13:17). Matikitakan seki tlen yonopatlak. Ipan 2014, Grupo akin Tlayekana okipatlak ken notekitiltia tomin para kinchijchiuaskej Kaltin kampa tosentlaliaj niman kampa tikinpiyaj toueyitlanechikoluan (2 Cor. 8:12-14). Yeuejkaui, tokniuan kintlaneujtiayaj tomin para makichijchiuakan kajli kampa nosentlaliskej, niman sakin nonekiya kitekuepiliskej tomin. San ika, aman onka san se cuenta kampa yokitlalijkej nochi tomin tlen kitemakaj tlanechikoltin de nochi tlaltikpaktli. Ijkon, ijkuak nonekis kichijchiuaskej kampa nosentlaliskej, uelis ompa kajsiskej tomintsin maski sekimej xuelij miyek kitemakaj. Ijkuak se tlayekanketl akin itoka José okimat yejuin, okinemili ika xtepaleuiskia. Yejua ijkin okinemili: “Yejuin kanaj tepaleuis oksekan, san ika, nikan ka. Nikmatstika ika xnochijchiuas nion se kajli kampa tosentlaliskej”. San ika, yejua otetlakamat maski xmás kuelitaya. ¿Tleka? José kijtoua: “Onikilnamik tlen kijtoua Proverbios 3:5, 6, ika noneki nitlaneltokas itech Jehová. Niman nikita ika tlen kijtoua ikalpan toTajtsin melak yotechpaleui. Yonochijchiujkej más miyekej kaltin kampa  tosentlaliaj niman noijki yotiuelkej ika noneki titlapaleuiskej para manochijchiuakan okseki kaltin kampa tosentlaliaj”.

13. a) ¿Tlenon kuajli kimatstoya Gedeón? b) ¿Kenon tlayekankej uelis kichiuaskej ijkon ken Gedeón? (Noijki xkita tlaixkopinajli).

¹³ Ika yolchikaualistli xchiuakan tlen Jehová mechtlajtlanilia. Gedeón okitlakamat Jehová maski kixnamikiskia tlen ouijtika niman nomojtiaya (Juec. 9:17). Ijkuak Jehová okijli Gedeón ika iuan nemiskia, yejua más okineltokak ika kipaleuiskia makitlajpiya ikalpan. Tlayekankej akin chantij kampa xtechkauiliaj titenojnotsaskej noso tonechikoskej, kichiuaj ken Gedeón. Yejuamej kitaj kenon tokniuan uelis kipiyaskej intlanechikoluan niman kenon tenojnotsaskej maski uelis kintsakuaskej, kinkixtiskej itech intekiyo noso kintlaueltokaskej. c Ijkuak panotos ueyi tlajyouilistli, tlayekankej nonekis yolchikaujkej yeskej para kichiuaskej tlen kintlajtlaniliskej maski uelis itlaj inpan panos. Kanaj kimijliskej matechijlikan tlenon noneki tikchiuaskej ijkuak tikteijliskej tlenon inpan nochiuas akin xkitlakamatij Jehová, tlen temojmojti yes ijkon ken uejueyi tesiujtli. Noso kanaj tokniuan tlayekankej kimijliskej matechijlikan tlenon noneki tikchiuaskej para timakisaskej ijkuak techixnamikis Gog de Magog (Ezeq. 38:18; Apoc. 16:21).

14. ¿Tlenon okixnamik Gedeón?

¹⁴ Gedeón melak chikauak otekit niman ijkon kinyekanas israelitas. Ijkuak madianitas ocholojkej ika tlayoua pampa ikintlantoyaj, Gedeón niman isoldados okintotokakej desde Jezreel hasta ipan atentli Jordán. Itenko yejuin atentli kanaj onkatka melak miyek uitstli (Juec. 7:22). ¿Kuakon tlenon okichiujkej Gedeón niman isoldados? ¿Kanaj onoteltijkej? Tikmatstokej ika ka. Maski yejuamej melak siaujtoyaj, okipanauijkej atentli niman okintotokakej madianitas, okimajsitoj niman okintlankej (Juec. 8:4-12).

15. ¿Tleka tlayekankej kemantika kitaj ouijtika tlaxikoskej?

¹⁵ Tlayekankej uelis melak siauiskej niman ajmankamikiskej pampa onka miyek tekitl ipan  tlanechikojli niman pampa noneki kitlajpiyaskej infamilia. ¿Kenon tlayekankej uelis kichiuaskej ijkon ken Gedeón ijkuak ijkon nomachiliskej?

16, 17. a) ¿Tlenon okipaleui Gedeón matlaxiko? b) ¿Tlenon uelis kuajli kimatstoskej tlayekankej? (Isaías 40:28-31; noijki xkita tlaixkopinajli).

¹⁶ Xneltokakan ika Jehová mechkojtilis. Yejon tlen okichiuj Gedeón, niman Jehová nochipa okipaleui (Juec. 6:14, 34). Sejpatipan, Gedeón niman isoldados okintotokakej omemej tekiuajkej madianitas, akin nesi ika yayaj ipan incamellos (Juec. 8:12, 21). San ika, Jehová okinpaleui. Yejua ika israelitas ouelkej okimajsitoj niman okintlankej. Aman tlayekankej noijki uelis tlaneltokaskej itech Jehová, toTajtsin akin “xkaman siaui”. Yejua nochipa kinkojtilis ijkuak nonekis (xpoua Isaías 40:28-31).

¹⁷ Matikitakan tlen ipan onochiuj tokniuj Matthew, se tlayekanketl akin kinpaleuiya Tokniuan ipan Hospitales. ¿Tlenon kipaleuiya matlaxiko? Yejua kijtoua: “Kuajli yonikitak ika melauak tlen kijtoua Filipenses 4:13. Miyekpa, ijkuak yonisiauj niman nikmachilia ika xok nitlaxikoua, niktlajtlanilia Jehová manechkojtili niman ijkon uelis nikinpaleuis tokniuan. Ijkuakon nikmachilia kenon yejua nechkojtilia”. Ijkon ken Gedeón, tlayekankej chikauak tekitij para kinpaleuiskej tokniuan maski kixnamikij tlen ouijtika. San ika, yejuamej noneki kasikamatiskej ika xnochipa uelis kichiuaskej nochi tlen kinekij. Maski san tlenon mapano, tlayekankej kineltokaj ika Jehová kinkakis niman kinpaleuis matlaxikokan (Sal. 116:1; Filip. 2:13).

18. Ijkon ken yotikitakej, ¿kenon tlayekankej uelis kichiuaskej ijkon ken Gedeón?

¹⁸ Ijkon ken yotikitakej, tlayekankej melak miyek uelis nomachtiskej itech Gedeón. Noneki kasikamatiskej ika xnochi ueli kichiuaj niman ika noneki yolyemankej yeskej ijkuak kinueyiteneuaskej noso kintejteneuaskej. Noijki noneki tetlakamatiskej niman yolchikaujkej yeskej, más aman ika itinemij ipan itlamiyan tonaltin. Niman noneki kineltokaskej ika maski san tlenon mapano, Jehová kinpaleuis para matlaxikokan. ¡Melak tiktlasojkamatij nochi intekiyo yejuin tokniuan akin chikauak tekitij! (Filip. 2:29).