1. ¿Tlenon uelis techpaleuis kuajli matiktekichiuilijtokan Jehová maski miyek tikixnamikij?

 BIBLIA kijtoua ika pampa itinemij itlamiyan tonaltin, miyek “tlamach nochiuas tlen sanoyej xkuajli” (2 Tim. 3:1). Ika yejon, aman nochimej kixnamikij tlen ouijtika, san ika, akin tiktekichiuiliaj toTajtsin okseki tikixnamikij: miyekej techixnamikij niman techtlaueltokaj pampa tiktekichiuiliaj Jehová. ¿Tlenon uelis techpaleuis matiktekichiuilijtokan Jehová? Techpaleuis tla tikilnamikij ika Jehová melauak nemi (Jer. 10:10; 2 Tim. 1:12).

2. ¿Kenon techititia Jehová ika melauak nemi?

² Jehová melauak nemi pampa yejua kita nochi tlen tikixnamikij niman nochipa kineki techpaleuis (2 Crón. 16:9; Sal. 23:4). Tla tikneltokaj ika Jehová melauak nemi, uelis titlaxikoskej ijkuak itlaj tikixnamikiskej. Matikitakan kenon tekiuaj David nochipa okineltokak ika Jehová melauak nemi.

3. ¿Tlenon okiteititi David ijkuak okijto: “¡Jehová melauak nemi!”?

³ David kuajli kixmatstoya Jehová niman itech tlaneltokaya. Yejua okitlajtlanili makipaleui ijkuak tekiuaj Saúl niman oksekimej kitlaueltokatinemiyaj (Sal. 18:6). Niman ijkuak David okitak kenon Jehová okinankili, yejua ijkin okijto: “¡Jehová  melauak nemi!” (Sal. 18:​46, TNM). David xsan kijtojtoya ika toTajtsin melauak nemi. Se libro kijtoua ika ijkuak David ijkin okijto, okiteititi ika kineltokaya ika Jehová akin melauak nemi nochipa kipaleuiskia ikalpan. David kimatstoya ika Jehová nochipa kitstoya tlen ipan panouaya niman ika ueliskia kipaleuis. Yejon okiyolchikauj para nochipa makitekichiuilijto niman makiueyiteneujto (Sal. 18:​28, 29, 49).

4. ¿Kenon techpaleuis tla tikneltokaj ika Jehová melauak nemi?

⁴ Tla tikneltokaj ika Jehová melauak nemi, techpaleuis matiktekichiuilikan ika toyojlo. Noijki techpaleuis matikxikokan tlen tikixnamikiskej niman techpaleuis chikauak matiktekichiuilijtokan. Niman xkeman tiknekiskej tijkauaskej.

TOTAJTSIN AKIN MELAUAK NEMI MITSKOJTILIS

5. ¿Tlenon techpaleuis matitlaxikokan ijkuak itlaj tikixnamikiskej? (Filipenses 2:13).

⁵ Tla tikilnamikij ika Jehová melauak nemi niman ika yejua nochipa techpaleuis, uelis tikxikoskej maski san tlenon tikixnamikiskej. Jehová nion se tlauejli xkita tla xuelis noyektlalis pampa yejua melak kojtik, niman yejua uelis techmakas kojtilistli para tikxikoskej maski san tlenon (xpoua Filipenses 2:13). Kuakon, tla nochipa tikilnamikij yejuin, xtomojtiskej ijkuak itlaj topan panos. Noijki, ijkuak tikitaj kenon Jehová techpaleuiya ijkuak tikixnamikij tlen xmás ouijtika, tikneltokaj ika Jehová techpaleuis ijkuak tikixnamikiskej tlen más ouijtika.

6. ¿Tlenon okipaleui David más matlaneltoka itech Jehová?

⁶ Matitlajtokan itech tlen ipan opanok David tlen okichiuj más matlaneltoka itech Jehová. Yejua kintlajpiaya iborreguitos itaj ijkuak telpochtli katka. Ijkuak se león niman se oso kinekiyaj kinkuaskej iborreguitos, yejua onoyolchikauj niman okintotokak niman okinmikti. David kimatstoya ika ouel ijkon okichiuj pampa Jehová okimakak chikaualistli, ika yejon, xkeman yejua onoueyiteneuj (1 Sam. 17:​34-37). David xkeman okilkauj tlen ipan opanok niman nochipa itech otlanemili, niman yejon okipaleui más makineltoka ika toTajtsin akin melauak nemi kiyolchikauaskia ika tlayekapan.

7. ¿Itech tlenon otlanemili David, niman tleka yejon okipaleui makixnamiki Goliat?

⁷ Sakin, kanaj ijkuak David ok telpochtsintli katka, oyaj kampa nemiyaj soldados israelitas. Yejua okitak ika soldados melak nomojtijtoyaj pampa se ueyi tlakatl filisteo akin itoka katka Goliat ijkin kimijlijtoya: “Aman in tonajli, nemechijlia soldados israelitas ika nemechtlanis” (1 Sam. 17:​10, 11). Soldados israelitas melak nomojtijtoyaj pampa san tlanemilijtoyaj itech kenon melak ueyi tlakatl katka Goliat niman itech tlen kimijlijtoya (1 Sam. 17:​24, 25). San ika, David xijkon otlanemili, yejua okijto ika Goliat kinekiya kinuijsokis “on soldados yejuan ikoneuan on Dios yejuan nochipa nemi” (1 Sam. 17:26). Kuakon, David tlanemiliaya itech Jehová. Yejua kimatstoya ika Jehová kipaleuiskia matetlani ijkon ken okipaleui ijkuak okimixnamik se león niman se oso. Kuakon, Jehová okipaleui David makixnamiki Goliat, niman ken tikmatij, ¡David otetlan! (1 Sam. 17:​45-51).

8. ¿Tlenon techpaleuis más matitlaneltokakan itech Jehová ijkuak tikixnamikiskej tlen ouijtika? (Noijki xkita tlaixkopinajli).

⁸ Ijkon ken David, uelis titlaxikoskej ijkuak itlaj tikixnamikiskej tla tikilnamikij ika toTajtsin akin melauak nemi san kitstok kenon uelis techpaleuis (Sal. 118:6). Uelis más tikneltokaskej ika Jehová techpaleuis tla titlanemiliaj itech tlen yejua yokichiuj. Uelis  tikitaskej ipan Biblia kenon Jehová okinmakixti itekipanojkauan (Is. 37:​17, 33-37). Noijki uelis tikitaskej ipan jw.org kenon Jehová yokinpaleui tokniuan ipan yejuin tonaltin. Noijki xkilnamiki kenon Jehová melak yomitspaleui. Kanaj Jehová xomitspaleui xmikti se oso noso se león, san ika, tikmatstokej ika Jehová melak miyek yokichiuj mopampa. Uelis tiknemilis kenon Jehová okinek iuan xmouika (Juan 6:44). Noijki xkilnamiki ika tejua tinemi ipan ikalpan pampa yejua mitspaleuiya. Uelis tikijlis Jehová mamitspaleui xkilnamiki kenon yokinnankili moteoyouan, kenon yomitspaleui ijkuak más nonekiya mamitspaleuikan noso kenon omitstlajpix ijkuak otikixnamik tlen melak ouijtika. Tla tejua titlanemilia itech nochi tlen Jehová yokichiuj mopampa, más tikneltokas ika yejua nochipa mitspaleuis.

9. ¿Tlenon noneki tikilnamikiskej ijkuak itlaj tikixnamikiskej? (Proverbios 27:11).

⁹ Ijkuak itlaj tikixnamikiskej, xsan noneki totech titlanemiliskej. Diablo okijto ika ijkuak itlaj tikixnamikiskej, tiktlalkauiskej Jehová. Kuakon, ijkuak itlaj tikixnamikiskej niman tiknemiliskej tlenon tikchiuaskej, melak noneki matiknemilikan kenon nomachilis Jehová (Job 1:​10, 11; xpoua Proverbios 27:11). Tla tejuamej timelajkanemij, tikteititiskej ika tiktlasojtlaj Jehová niman ika Satanás san tekajkayaua. Kanaj tejua tikixnamiktok itlaj tlen ouijtika. Kanaj kampa tichanti tekiuajkej kimixnamikij itekipanojkauan Jehová, kanaj xtikpiya tomintsin, kanaj xmitskakij akin tikinnojnotsa noso kanaj itlaj okse tikixnamiktika. San ika, xkilnamiki ika ijkuak itlaj tikixnamiki, uelis tiktlapejpenis tikyolpaktis Jehová. Noijki xkilnamiki ika Jehová mitspaleuis niman mitsmakas kojtilistli para uelis tikxikos tlen tikixnamikis (1 Cor. 10:13).

TOTAJTSIN AKIN MELAUAK NEMI MITSTEOCHIUAS

10. ¿Tlenon kichiuas Jehová inpampa akin kiueyichiuaj?

¹⁰ Jehová kinteochiua akin kiueyichiuaj (Heb. 11:6). Ipan yejuin tonaltin, Jehová kichiua  matiyolseujtokan niman matiyolpaktokan, niman ika tlayekapan yejua techmakas nemilistli tlen xkeman tlamis. Tejuamej kuajli tikmatstokej ika Jehová kineki techteochiuas niman ika kipiya kojtilistli para ijkon kichiuas. Yejua ika, tiknektokej chikauak tiktekichiuiliskej, ijkon ken yeuejkaui okichiujkej itekipanojkauan. Matikitakan tlen okichiuj Timoteo (Heb. 6:​10-12).

11. ¿Tleka Timoteo chikauak otekit ipan tlanechikojli? (1 Timoteo 4:10).

¹¹ (Xpoua 1 Timoteo 4:10). Timoteo kineltokaya ika toTajtsin kiteochiuaskia. Ika yejon, yejua chikauak okitekichiuili Jehová niman melak okinpaleui tokniuan. ¿Tlenon okichiuj? Apóstol Pablo okijli kuajli matemachti ipan tlanechikojli niman kuajli makinmachti akin kinnojnotsaya. Noijki okijli kuajli makichiua itekiyo niman ijkon tokniuan telpokamej niman akin iuejueyimej ueliskiaj kichiuaskej ijkon ken yejua. Noijki okimakakej tekitl tlen ouijtika katka, kemantika ononek kinyektlalis tokniuan ika tlasojtlalistli (1 Tim. 4:​11-16; 2 Tim. 4:​1-5). Kanaj sekimej xkitayaj noso xkitlasojkamatiyaj tlen kichiuaya Timoteo, san ika, yejua kuajli kimatstoya ika Jehová kema kitaya tlen kichiuaya niman ika kiteochiuaskia (Rom. 2:​6, 7).

12. ¿Tleka tlayekankej chikauak tekitij? (Noijki xkita tlaixkopinajli).

¹² Tokniuan tlayekankej noijki uelis kimatstoskej ika Jehová kita niman kipatiojkaita nochi tlen kichiuaj. Yejuamej kintlajpiyaj tokniuan ipan tlanechikojli, temachtiaj niman tenojnotsaj. San ika, sekimej noijki tlapaleuiyaj ipan construcción noso ijkuak kanaj tlaixpoliui. Oksekimej nemij ipan Grupos de Visita a Pacientes noso ipan Comités de Enlace con los Hospitales. Tlayekankej kuajli kimatstokej ika tlanechikojli xokitlali se tlaltikpakchane, yej okitlali Jehová. Ika yejon, yejuamej melak kuajli kichiuaj intekiyo niman kimatstokej ika Jehová kinteochiuas (Col. 3:​23, 24).

13. ¿Kenon nomachilia Jehová ijkuak kita ika tokojtiliaj tiktekichiuiliskej?

 ¹³ Xtinochimej uelis titekitiskej ken tlayekankej, san ika, tinochimej uelis itlaj tikmakaskej Jehová. Yejua melak kitlasojkaita nochi tlen tikchiuaj ipampa. Yejua melak kipatiojkaita ijkuak kita ika tikmaka motomintsin, maski kemantika xueli ueyi tikmaka pampa xmás tikpiya. Yejua melak yolpaki ijkuak kita ika timokojtilia titlanankilis ipan tlanechikojli maski melak timomojtia. Niman melak tikyolpaktia ijkuak tiktlapopoluiya akin omitsyolkoko. Xkilnamiki ika yejua melak kipatiojkaita tlen tikchiua. Jehová melak mitstlasojtla niman mitsteochiuas ipampa nochi tlen tikchiua (Luc. 21:​1-4).

MAKA MATIKTLALKAUIKAN TOTAJTSIN AKIN MELAUAK NEMI

14. ¿Tleka tla tikneltokaj ika Jehová melauak nemi techpaleuis itech matimelajkanemikan? (Noijki xkita tlaixkopinajli).

¹⁴ Tla tikneltokaj ika Jehová melauak nemi, xouijtika tikitaskej itech timelajkanemiskej, ijkon ken José okichiuj. Yejua xokinek auilnemis pampa kimatstoya ika toTajtsin melauak nemi niman xkinekiya kiyolkokos (Gén. 39:9). Tla tiknekij tikneltokaskej ika Jehová melauak nemi, noneki tiknotsaskej niman tomachtiskej iTlajtol. Tla ijkon tikchiuaj, peuas más kuajli iuan touikaskej; niman tla kuajli iuan touikaj ijkon ken José iuan onouikak, noijki xtiknekiskej tikyolkokoskej (Sant. 4:8).

15. ¿Tleka xnoneki tikchiuaskej ijkon ken israelitas akin nemiyaj ipan tlaluaktli? (Hebreos 3:12).

¹⁵ Akin xok tlaneltokaj itech Jehová ueliskia kitlalkauiskej. Matitlanemilikan itech tlen inpan opanok israelitas ijkuak nemiyaj ipan tlaluaktli. Yejuamej kimatstoyaj ika Jehová nemi, san ika, opeuj kinemiliaj ika Jehová xueliskia kinmakas tlen kinpolouaya. Hasta ijkin opeuj notlajtoltiaj: “¿Nemi toTEKO touan, noso ka?” (Éx. 17:​2, 7). Tejuamej xtiknekij tikchiuaskej ijkon ken israelitas pampa sakin yejuamej xok otetlakamatkej (xpoua Hebreos 3:12).

16. ¿Tleka ueliskia xok más titlaneltokaskej itech Jehová?

 ¹⁶ Ipan yejuin tonaltin, melak ouijtika timelajkanemis itech Jehová. Miyekej tlaltikpakchanejkej kijtouaj ika toTajtsin xnemi, niman akin ijkon kijtouaj nesi ika melak kuajli nemij. Nochi yejuin ueliskia kichiuas maka melak matitlaneltokakan itech Jehová. Kanaj xtiknemiliskej ika toTajtsin xnemi, san ika, ueliskia tiknemiliskej ika Jehová xuelis techpaleuis. Ijkon ipan opanok akin okijkuilo Salmo 73. Yejua okitak ika akin xkintlakamatiyaj itlanauatiluan toTajtsin melak ika inyojlo nemiyaj. Ika yejon, opeuj notlajtoltia tla tepaleui tiktekichiuilis Jehová noso xtepaleui (Sal. 73:​11-13).

17. ¿Tlenon techpaleuis maka matiktlalkauikan Jehová?

¹⁷ ¿Tlenon okipaleui salmista makipatla ken tlanemiliaya? Yejua opeuj tlanemilia itech tlenon inpan panoskia akin xok tlaneltokayaj itech Jehová (Sal. 73:​18, 19, 27). Noijki otlanemili itech kenon melak kipaleuiaya pampa kitekichiuiliaya Jehová (Sal. 73:24). Aman tejuamej noijki uelis ijkon tikchiuaskej. Uelis tiknemiliskej kenon Jehová melak yotechteochiuj niman noijki uelis tiknemiliskej kenon tinemiskiaj tla xtiktekichiuiliskiaj. Tla ijkon tikchiuaj, techpaleuis matiknekikan nochipa matimelajkanemikan itech Jehová niman tikijtoskej ijkon ken salmista: “Pero nejua niknisiuis Dios. Tej, para nejua Dios yejua sanoyej kuajli” (Sal. 73:28).

18. ¿Tleka xnoneki techmojtis tlen panos ika tlayekapan?

¹⁸ Ipan yejuin itlamiyan tonaltin, uelis tikxikoskej maski san tlenon tikixnamikiskej pampa tejuamej tiitekipanojkauan “on yejuan melauak Dios niman yejuan nochipa nemi” (1 Tes. 1:9). Jehová, akin melauak nemi, najmana topampa niman nochipa techpaleuis. Yeuejkaui, yejua okinpaleui itekipanojkauan, niman ipan yejuin tonaltin noijki techpaleuis. Sa achijtsin poliui ijkuak peuas se ueyi tlajyouilistli ijkon ken xkeman panouani, san ika, xsan toselti tinemij (Is. 41:10). “Uelis tikijtoskej ikan nochi toyojlo: NoTEKO yejua nechpaleuiya. Yejua ika, xnikmakajsis on tlen uelis nechchiuilis yakaj tlakatl” (Heb. 13:​5, 6).